„Yehovah Gado teki a man èn a poti en na ini a dyari fu Eden fu wroko a gron èn fu sorgu a dyari. Boiti dati, Yehovah Gado gi a man a komando disi: ’Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede.’”—Genesis 2:15-17.

Gado ben poti a fosi man, Adam, na ini a dyari fu Eden, wan paradijs na grontapu pe furu meti nanga ala sortu moi bon ben de. Furu bon ben de di ben e gi froktu èn Adam ben kan nyan den froktu dati. Ma Yehovah Gado ben taigi Adam taki a no ben mag nyan fu wan fu den bon. A ben warskow en taki efu a ben du dati, a ben o dede.

Adam ben frustan san Gado ben taigi en? Iya, a ben sabi san na dede, fu di a ben e si fa meti e dede. Efu Gado ben meki Adam fu dede te fu kaba, dan na fu soso a ben warskow en. Ma Adam ben frustan taki efu a ben gi yesi na Gado, èn efu a no ben nyan fu a froktu, a ben o libi fu têgo, a no ben o dede.

Son sma e bribi taki a bon ben abi fu du nanga seks, ma dati no kan. Bika Yehovah ben wani taki Adam nanga en frow, Eva, ben musu „meki pikin èn kon furu” teleki den „kon lai na grontapu èn basi ala sani na grontapu” (Genesis 1:28). Sobun, Yehovah ben warskow den gi wan trutru bon. Yehovah ben kari a bon dati a bon fu „Sabi san bun èn san ogri”, fu di a ben prenki a reti di Gado abi fu bosroiti gi libisma san bun èn san ogri. Efu Adam no ben nyan fu a froktu fu a bon dati, dan a ben o sori taki a e gi yesi na Gado. Ma a ben o sori tu taki a ben abi lespeki gi a sma di meki en èn di blesi en nanga so furu sani.

„Dan [Gado] taigi Adam: ’Fu di yu . . . nyan a froktu fu a bon, aladi mi gi yu a komando: ’Yu no musu nyan fu en,’ meki . . . yu o broko sweti, fu di yu o abi fu wroko tranga fu feni nyanyan. Na so a o de teleki yu dede èn yu drai go baka na a gron di mi teki yu puru na ini, bika na fu doti yu meki èn na doti yu o tron baka.’”—Genesis 3:17, 19.

Adam nyan fu a bon di a no ben mag nyan. A sani di a ben du ben de wan seryusu sondu. A ben opo ensrefi teige Gado, sobun a no ben abi warderi gi ala den bun sani di Gado ben du gi en. Fu di Adam nyan fu a froktu, meki a sori taki a no ben wani taki Yehovah taigi en san a musu du, èn a sani disi ben o tyari takru bakapisi kon gi en.

Adam dede te fu kaba, soleki fa Yehovah ben taki. Gado ben meki en fu a doti fu gron, èn a taigi en taki a ben o „drai go baka na a gron”. Adam no ben libi go doro leki wan yeye na wan tra presi. Di a dede, a no ben abi libi moro, neleki a doti pe a ben komoto.—Genesis 2:7; Preikiman 9:5, 10.

„Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu.”—Romesma 5:12.

A trangayesi fu Adam, noso a sondu fu en ben tyari takru bakapisi kon gi en, ma sosrefi gi trawan. A libi di Adam lasi di a sondu, a no wan libi fu 70 noso 80 yari nomo, ma a lasi a howpu fu libi fu têgo. Boiti dati di Adam sondu, dan a gi ala den bakapikin fu en sondu.

Wi alamala na bakapikin fu Adam. Sondro fu wi ben wani wi gebore nanga wan sondu skin èn te fu kaba wi e dede. Luku san Paulus e taki fu a hebi disi di wi kisi: „Mi na wan sondu sma, wan srafu fu sondu. Ai, mi de fu sari fu tru! Suma sa frulusu mi fu a skin disi di e tyari mi go dede?” Paulus srefi e piki a aksi fu en: „Mi e taki Gado tangi taki a frulusu mi nanga yepi fu wi Masra Yesus Krestes!”—Romesma 7:14, 24, 25.

„A Tata seni en Manpikin kon leki Frulusuman fu grontapu.”—1 Yohanes 4:14.

Yehovah Gado seti sani so taki wi kan kon fri fu sondu nanga dede. Fa a du dati? A seni en lobi manpikin kon na grontapu fu gebore leki wan libisma di no abi sondu, neleki Adam. Ma tra fasi leki Adam, Yesus „no du nowan sondu” (1 Petrus 2:22). Fu di a no ben abi sondu, meki a no ben abi fu dede èn a ben kan libi fu têgo.

Ma Yehovah gi pasi taki den feanti fu Yesus kiri en. Dri dei baka dati, Yehovah wiki en baka leki wan yeye so taki a ben kan drai go baka na hemel te a ten ben doro. Drape Yesus gi Gado na ofrandi di a ben tyari leki wan libisma di no abi sondu. Yehovah teki na ofrandi dati, èn na so fasi ala sma di e poti bribi na ini Yesus kan kisi a têgo libi di Adam lasi gi ensrefi èn gi den bakapikin fu en.—Romesma 3:23, 24; 1 Yohanes 2:2.

Na so fasi Yesus pai gi a sani di Adam ben lasi. A dede gi wi so taki wi kan libi fu têgo. Bijbel e taki: „Yesus . . . dede. Na so fasi a bun-ati fu Gado meki taki a ben kan dede gi ala sma.”—Hebrewsma 2:9.

A sani disi e leri wi furu fu Yehovah. Fu di a e koti krutu na wan reti fasi, meki sondu libisma no ben o man frulusu densrefi. Ma fu di a abi lobi nanga sari-ati, meki a gi en eigi Manpikin fu frulusu wi. Na so fasi a hori ensrefi na en eigi wet aladi a sani dati kostu en furu.—Romesma 5:6-8.

„Krestes kisi wan opobaka trutru. Fu den wan di dede en na a fosiwan di kisi wan opobaka. Fu di na wan libisma tyari dede kon, dan na wan libisma o meki taki dede sma opo baka tu. Neleki fa ala sma dede fu Adam ede, na so ala sma sa kon na libi baka tu fu Krestes ede.”—1 Korentesma 15:20-22.

Wi de seiker taki Yesus ben libi èn taki a dede, ma sortu buweisi de taki a ben opo baka? Wan fu den krin buweisi na taki baka di Yesus opo baka, a ben meki furu sma si en na difrenti okasi èn na difrenti presi. Wan leisi a sori ensrefi na moro leki 500 sma. Na apostel Paulus ben taki fu a tori dati na ini a brifi di a skrifi gi den Korentesma. A ben taki srefi taki wan tu fu den sma dati ben de na libi ete, èn taki den ben kan taki san den si èn yere.—1 Korentesma 15:3-8.

Di Paulus skrifi taki Krestes ben de „a fosiwan” fu den wan di opo baka, a ben wani sori taki bakaten tra sma ben o opo baka tu. Yesus srefi ben taki dati a ten ben o kon taki „ala den sma di de na ini den grebi” o „komopo drape”.—Yohanes 5:28, 29.

„Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:16.

A fosi buku fu Bijbel e taki fa dede kon na grontapu èn fa a paradijs lasi gowe. A lasti buku e taki fu a ten te dede no o de moro èn te Paradijs o seti baka na grontapu. Dan sma o man libi koloku fu têgo. Openbaring 21:4 e taki: „Dede no o de moro.” Fu sori taki a pramisi disi o kon tru seiker, meki vers 5 e taki: „Den wortu disi tru èn sma kan bribi den.” Yehovah man du ala san a pramisi.

Yu e bribi taki ’den wortu disi tru èn taki sma kan bribi den’? Efu dati de so, dan leri sabi Yesus Krestes moro bun èn poti bribi na ini en. Te yu du dati, dan Yehovah o feni yu bun. Boiti taki a o blesi yu nownow kaba, yu o abi a howpu fu libi fu têgo na ini Paradijs na grontapu pe „dede no o de moro. Nowan sari, noso krei, noso pen no o de moro.