Imikilis Jesús non tlen okachi ipati omochi itech Tlaltikpak, pampa ijkon uelis oksepa tikpiaskej tlen okipolojkej totatajuan. Tlaltikpaktlakamej amo okinchijchijkej pampa ma kichiuakan tlen amo kuali, nion pampa ma mokokokan nion ma mikikan (Génesis 1:31). Pero axkan tinochtin titlajtlakolejkej pampa Adán otlajtlakolchi. Pero Jesús okitemakak iyolilis pampa ma timomakixtikan itech tlajtlakoli uan mikilistli. (Xiktlajtolti Mateo 20:28 uan Romanos 6:23.)

ToTajtsin Dios okiteititi techtlasojtla ijkuak okitemakak iKone pampa ma mikiki (1 Juan 4:9, 10). Jesús okinmilui imachtijkauan ma kilnamikikan imikilis, pero amo ma kichiuakan se ueyi iluitl, san omonekiaya ma kitlalikan seki pan uan vino. Tla sejse xiuitl ijkon tikchiuaj, tikteititiaj tiktlajsojkamatiliaj Jehová uan Jesús pampa sapanoa techtlasojtlaj. (Xiktlajtolti Lucas 22:19, 20.)

Ijkuak Jesús okinmilui imachtijkauan ma kilnamikikan imikilis, okintlapoui itech se tlajtolsenkaualistli (Mateo 26:26-28). Ika nin tlajtolsenkaualistli yejuan uan oksekimej tlaltikpaktlakamej uelis mochiuaskej ueyi tekiuajkej uan teopixkej itech iluikak. Itech nochtin akinmej kilnamikiskej imikilis Jesús, san sekimej uelis kikuaskej pan uan koniskej vino. (Xiktlajtolti Apocalipsis 5:10.)

Yikipia kanaj dos mil xiuitl Jehová kinpejpentok akinmej tlanauatiskej iuan iKone (Lucas 12:32). Amo miakej tlanauatiskej iuan iKone, pampa okachi miakej akinmej yoltoskej itech Tlaltikpak. (Xiktlajtolti Apocalipsis 7:4, 9, 17.)