Ononkhia mba Jesus mbakolela unene. Wankhile opo akondole ovanthu komuenyo uhapu. Ovanthu kavatungilwe neyembelo liokulinga ovipuka ovivi, ine opo vavele, nokunkhia. (Gênesis 1:31) Mahi, onkhali yanyingila mouye mokonda yomulume wo tete, Andau. Jesus aave omuenyo wae opo etuyovole konkhali, no kononkhia.—Tanga Mateus 20:28; Romanos 6:23.

Huku walekesa okuti una oluembia olunene nonthue etyi atuma Omona wae pano pohi opo etunkhile. (1 João 4:9, 10) Jesus watumine ovalongwa vae opo vahinangele ononkhia mbae, otyipito tyimwe tyihepuiya, pakala ombolo novinyu. Okulinga otyipuka otyo omanima aeho, otyilekeso tyokuti tuapanda oluembia lwa Huku, no lwa Jesus.—Tanga Lucas 22:19, 20.

Etyi Jesus apopila ovalongwa vae otyikando tyo tete opo vahinangele ononkhia mbae, wapopile konthele yomphango imwe. (Mateus 26:26-28) Omphango oyo, yaikula ondyila opo ovalongwa ovo, novanthu ovakuavo vehehi vakakale onohamba, novanakwa kumwe na Jesus keulu. Namphila ovanthu ovanyingi vakala pehinangelo liononkhia mba Jesus, mahi valia kombolo nokunwa kovinyu, o vokukahi vala momphango oyo.—Tanga Revelação 5:10.

Momanima ehungi po 2.000, Jeova ukahi nokuholovona vana mavakakala onohamba. (Lucas 12:32) Kavehi, okuveeleka na vana ma vakakala apeho pano pohi.—Tanga Revelação 7:4, 9, 17.