Jesús Huañushca Punllata yarinaca minishtirishcapachami can. Jesús huañuimandami Taita Dios munashcashna gentecunaca causai ushashun. Gentecunata Taita Dios rurashpaca, nalicunata rurachun, unguchun, huañuchunga na rurarcachu (Génesis 1:31). Shinapash Taita Diosta Adán na cazushcamandami tucuicuna juchayu canchi. Cutin Jesús paipa causaita cushcamandami gentecunaca juchamanda, huañuimandapash salvari ushapanchi. (Mateo 20:28; Romanos 6:23, liipangui.)

Jesusta cai Alpaman cachamushpa, ñucanchimanda huañuchun saquishpami gentecunata ninanda juyashcata Taita Diosca ricuchirca (1 Juan 4:9, 10). Jesusca paipa catijcunataca shuj tandanajuita rurashpa asha vinota, asha tandata utilizashpa pai huañushca punllata yarichunmi mandarca. Jesús Huañushca Punllata cada huata yarishpami Taita Diostapash Jesustapash agradicishcata ricuchinchi. (Lucas 22:19, 20, liipangui.)

Jesusca, pai huañushca punllata yarichun paipa catijcunata mandajushca punllapica shuj pactota ruranamandami parlarca (Mateo 26:26-28). Chai pactota Jesús rurashcamandami, huaquin gentecunaca paihuan jahua cielopi mandangapaj ringa. Jesús huañushcata yaringapaca ashtaca ashtaca gentecunami tandanajunga. Shinapash jahua cieloman rina gentecunallami tandata micuna, vinota ufiana can. (Apocalipsis 5:10, liipangui.)

Casi 2 mil huatacunatami Jehová Diosca picuna Jesushuan jahua cielopi mandangapaj rina gentecunata agllajushca (Lucas 12:32). Cai Alpapi causana gentecunahuan ricujpica jahua cieloman rina gentecunaca huaquingunallami can. (Apocalipsis 7:4, 9, 17, liipangui.)