SINGKO anyos kami ni Gwen kan manudan ming magbayle. Dai pa kami magkabisto kaidto. Kan nagdadakula na kami, pareho ming ginusto na magin karera an pag-ballet. Pero kan papasikat na kami, binayaan mi an samong karera. Taano?

David: Namundag ako kan 1945 sa probinsiya nin Shropshire, England. May sadiring tanuman asin atamanan nin hayop an sakong ama sa matuninong na probinsiyang iyan. Pakaretira, gustong-gusto kong magbahog kan mga manok, mangua nin mga sugok o bunay kaiyan, saka mag-ataman kan mga baka asin karnero. Pag bakasyon, nagtatabang akong mag-ani, kun minsan ako an nagmamaneho kan mga tractor mi.

Pero, may saro pa akong kinahiligan na nagin panginot sa buhay ko. Narisa kan sakong ama na kan akion pa ako, napapabayle ako pag may nadadangog akong tugtog. Kaya kan singko anyos na ako, sinabihan niya an sakong ina na ienrol ako sa sarong eskuwelahan nin pagbayle sa lugar mi para makanuod akong mag-tap dance. Nahiling kan sakong paratukdo na may potensiyal ako na magin ballet dancer kaya sinanay man niya ako digdi. Sa edad na 15, nanggana ako nin scholarship sa prestihiyosong Royal Ballet School sa London. Duman ko namidbid si Gwen, asin kami an pinagpartner sa pagbayle.

Gwen: Namundag ako kan 1944 sa matawong siyudad nin London. Aki pa ako, hararom na an pagtubod ko sa Diyos. Pinurbaran kong basahon an sakong Bibliya pero nadipisilan akong sabuton iyan. Bago kaini, kan singko anyos ako, nag-adal ako nin pagbayle. Pakalihis nin anom na taon, nanggana ako sa sarong kumpetisyon na bukas para sa gabos na parabayle sa Britania, na may premyong makalaog sa junior section kan The Royal Ballet School. Yaon ini sa White Lodge, sarong magayon na mansiyon na istilong Georgiano sa Richmond Park na nasa luwas kan London. Duman ako nag-eskuwela asin tinukduan nin ballet kan mga respetadong paratukdo. Kan 16 anyos na ako, naglipat ako sa senior section kan The Royal Ballet School na yaon sa sentral na parte kan London, asin duman ko nabisto si David. Sa laog nin pirang bulan, magkaiba kaming nagbayle nin ballet sa mga opera sa Royal Opera House sa Covent Garden, London.

David: Arog kan sinabi ni Gwen, nakapagbayle kami sa bantog na Royal Opera House asin sa London Festival Ballet (English National Ballet na ngunyan). Kan an saro sa mga koreograpo sa Royal Ballet magpundar nin sadiri niyang internasyonal na kompanya sa Wuppertal, Germany, kinua niya kaming duwa na magin soloist dancer. Huli sa samong karera, nakapagbayle kami sa mga teatro sa bilog na kinaban, kaiba an sikat na mga parabayle arog ni Margot Fonteyn asin Rudolf Nureyev. Nakakapalangkaw nin hiling sa sadiri an arog kaining istilo nin pamumuhay, asin nagin dedikado kaming marhay sa samong propesyon.

 Gwen: Nakasentro an buhay ko sa pagbayle. Ambisyon mi pareho ni David na magin sikat sa samong karera. Nauugma ako pag may nagpapa-autograph, nagtataong burak, asin pag pinapalakpakan kan mga tawo. Sa teatro, napapalibutan ako nin grabeng imoralidad, pagsigarilyo, asin pag-inom; arog kan iba na pareho mi an trabaho, nag-aasa ako sa mga pampasuwerte.

David: Pagkatapos nin dakul na taon sa propesyon nin pagbayle, napagal na ako sa kabibiyahe. Huling nagdakula ako sa probinsiya, hinahanap-hanap ko an mas simpleng buhay duman. Kaya kan 1967, nagpundo na ako sa pagbayle asin nagtrabaho sa sarong dakulang atamanan nin hayop harani sa harong kan sakong mga magurang. Pinaarkila sa sako kan kagsadiri kaiyan an sarong sadit na harong. Dangan inapudan ko si Gwen sa teatro asin inalok ko siyang magpakasal. Nasakitan siyang magdesisyon ta na-promote na siyang solo dancer asin nagigin sikat na siya sa propesyon niya. Pero, inako niya an alok ko asin nag-iba sako sa probinsiya dawa dai siya tuod sa buhay diyan.

Gwen: Iyo, bakong madaling mag-adjust sa buhay sa probinsiya. An paggagatas sa mga baka asin pagbahog sa mga urig saka manok dawa maraot an panahon ibang-iba sa dating buhay ko. Nagklase nin siyam na bulan si David sa sarong kurso sa pag-ataman nin hayop para maaraman niya an pinakabagong mga pamamaagi, asin huling banggi na siya kun minauli, napupungaw ako saiya. Sa panahon na iyan namundag an inot ming aki, si Gilly. Nag-adal akong magmaneho kan sinabihan ako ni David, tapos sarong aldaw kan magduman ako sa karaning banwaan, nahiling ko si Gael, na nabisto ko kan magtrabaho siya sa saro sa mga tindahan duman.

Inimbitaran ako ni Gael sa saiyang harong para mag-tsaa. Ipinahiling niya sa sako an mga ritrato kan kasal niya, asin may ritrato duman na kaiba niya an sarong grupo na nasa luwas kan inaapod na Kingdom Hall. Hinapot ko siya kun anong klaseng simbahan idto. Kan sabihon niyang Saksi ni Jehova sindang mag-agom, naugma ako. Nagirumduman ko na Saksi an saro sa mga tiyaon ko. Pero nagirumduman ko man kun gurano kaanggot asin kauyam sa saiya an sakong ama, na pig-aapon pa ngani sa basurahan an mga babasahon niya. Naisip ko kaidto kun taano ta an sakong makiamigong ama, anggot na marhay sa mabuot kong tiyaon.

May pagkakataon na akong maaraman kun taano ta an mga tinutubod kan sakong tiyaon lain na marhay sa mga itinutukdo kan simbahan. Ipinahiling sa sako ni Gael kun ano talaga an itinutukdo kan Bibliya. Napangalas ako kan maaraman ko na an dakul sa mga doktrina, arog kan Trinidad asin imortalidad kan kalag, kontra palan sa itinutukdo kan Kasuratan. (Par. 9:5, 10; Juan 14:28; 17:3) Kaidto ko man inot na nahiling sa Bibliya an pangaran nin Diyos—an Jehova.—Ex. 6:3.

 David: Sinasabi sako ni Gwen an mga nanunudan niya. Natatandaan ko na kan aki pa ako sinasabihan ako kan sakong ama na dapat kong basahon an Marahay na Libro. Kaya, nagtugot kami ni Gwen na magpa-Bible study ki Gael asin sa saiyang agom na si Derrick. Pakalihis nin anom na bulan nagbalyo kami sa Oswestry, sa probinsiya man sana nin Shropshire, huling duman may pagkakataon kaming makapag-arkila nin sadit na lote. An Saksing si Deirdre na taga duman an mapasensiyang nagpadagos kan pag-Bible study samo. Maluway an pag-uswag mi sa espirituwal kan primero. Sibot-sibot kaya kami sa pag-asikaso sa ataman ming mga hayop. Pero, luway-luway na nakagamot sa samong puso an katotoohan.

Gwen: An pinakadakulang ulang na kaipuhan kong halion iyo an paniniwala ko sa superstisyon. Tinabangan ako kan Isaias 65:11 na mahiling kun paano minamansay ni Jehova an “mga nagpupuwesto nin lamesa para sa diyos nin Suwerte.” (NW) Kinaipuhan ko nin dakul na panahon asin pamibi tanganing mahali ko an gabos kong pampasuwerte saka anting-anting. Kan manudan ko na ‘an siisay man na mapalangkaw ibababa, asin an siisay man na mapakumbaba ilalangkaw,’ narealisar ko kun anong klaseng tawo an hinahanap ni Jehova. (Mat. 23:12) Gusto kong paglingkudan an Diyos na nagmamakulog na marhay sa sato na itinao an saiyang namumutan na Aki bilang pantubos. Kan panahon na idto, ipinangaki ko an ikaduwa ming aking babayi, asin nakakaugmang maaraman na puwedeng mabuhay sagkod lamang an samong pamilya sa sarong paraisong daga.

David: Kan masabutan ko an kahanga-hangang kautuban kan mga hula sa Bibliya, arog kan yaon sa Mateo kapitulo 24 asin sa libro nin Daniel, nakumbinsir na ako na iyo ini an katotoohan. Narealisar ko na mayo sa sistemang ini nin mga bagay an makakapantay sa pagkaigwa nin marahay na relasyon ki Jehova. Kaya sa pag-agi nin panahon, nababawasan an pagigin ambisyoso ko. Nasabutan ko na bako sanang sadiri ko an importante, kundi pati an sakong agom asin mga aki. Nakumbinsir ako kan Filipos 2:4 na dai ako dapat magpokus sa sakong sadiri asin sa pagmawot ko na magkaigwa nin mas dakulang atamanan nin hayop. Imbes, dapat kong inuton sa sakong buhay an paglilingkod ki Jehova. Ipinundo ko an pagsigarilyo. Pero dai nagin madali an pag-atender mi kada Sabadong banggi para sa pagtiripon na 10 kilometros an rayo sa samo huling oras man iyan nin paggagatas sa samong mga baka. Pero sa tabang ni Gwen, mayo kaming napaltahan na pagtiripon; nungka mi man na dai naiiba an samong duwang aki sa pagmiministeryo kada Domingong aga—pagkatapos ming gatasan an mga baka.

Dai nagustuhan kan samong mga paryente an ginibo mi. Anom na taon na dai tinino si Gwen kan saiyang ama. Pinurbaran man kan mga magurang ko na pugulan kaming makiasosyar sa mga Saksi.

Gwen: Tinabangan kami ni Jehova na makaya an mga pagbalong ini. Asin mantang nag-aagi an panahon, an mga tugang sa Oswestry Congregation nagin garo bagong pamilya mi, na mamumuton na nagsusuportar samo mantang nag-aagi kami sa  mga pagbalong ini. (Luc. 18:29, 30) Idinusay niyamo an samong buhay ki Jehova asin nagpabawtismo kan 1972. Gusto kong makatabang nin lubos sa dakul na tawo na maaraman an katotoohan, kaya nagpayunir ako.

David: Mapagal an pag-ataman nin mga hayop; kun dapit sa espirituwal, hininguwa ming magin marahay na halimbawa sa samong mga aki. Nag-abot an panahon na binawasan kan gobyerno an tabang na itinatao ninda, kaya napiritan kaming butasan an loteng inaarkila mi. Mayo kaming harong asin trabaho saka sarong taon pa sana an ikatulo ming aking babayi, pero namibi kami ki Jehova na tabangan asin giyahan kami. Nagdesisyon kaming gamiton an samong talento asin magbukas nin dance studio tanganing masuportaran an samong pamilya. An samong determinasyon na inuton an espirituwal na mga bagay nagkaigwa nin marahay na resulta. Ugmahon kami kan magpayunir an tulo ming aking babayi pagka-gradweyt ninda. Payunir man si Gwen, kaya aroaldaw niyang naaantabayanan an samong mga aki.

Kan mag-agom na an mga aki ming si Gilly asin Denise, isinara mi na an dance studio. Nagsurat kami sa sangang opisina tanganing maaraman kun sain kami puwedeng magtabang. Pinaduman ninda kami sa mga banwaan sa timog-sirangan nin England. Huling an nguhod mi na sanang aki na si Debbie an kaiba mi sa harong, nagpayunir na man ako. Pakalihis nin limang taon, pinatabang kami sa iba pang kongregasyon sa parteng amihanan. Kan ikasal na si Debbie, nagkapribilehiyo kaming maglingkod nin sampulong taon sa proyekto nin internasyonal na pagtutugdok sa Zimbabwe, Moldova, Hungary, asin Côte d’Ivoire. Dangan nagbalik kami sa England tanganing magtabang sa ginigibong pagtutugdok sa Bethel sa London. Huling igwa ako nin eksperyensiya sa pag-ataman nin hayop, pinatabang ako sa Bethel farm na yaon pa kaidto. Sa ngunyan, nagpapayunir kami sa amihanan-sulnupan kan England.

Gwen: An inot na karera mi—an ballet—nakakapaugma pero temporaryo sana. An ikaduwa asin pinakaimportanteng karera mi—an paglilingkod ki Jehova—nagtao sa samo nin dakulang kaugmahan asin dai iyan nin katapusan. Magkapartner pa man giraray kami, pero bako na sa pagbayle, kundi sa pagpapayunir na. An makatabang sa dakul na tawo na manudan an mahalagang marhay asin nagliligtas-buhay na katotoohan nagtao sa samo nin daing kapantay na kaugmahan. An ‘mga surat na ini nin pagpamidbid’ o rekomendasyon mas urog pa kisa sa ano man na kabantugan sa kinaban. (2 Cor. 3:1, 2) Kun dai mi nakua an katotoohan, an mawawalat sana sa samo iyo an magagayon na nangyari sa buhay mi, lumang mga ritrato, asin kopya nin mga programa sa teatro hali sa dati ming karera.

David: Binagong marhay kan karera mi sa paglilingkod ki Jehova an samong buhay. Nakatabang iyan sa sako na magin mas marahay na agom asin ama. Sinasabi sa sato kan Bibliya na si Miriam, Hading David, asin iba pa nagbayle tanganing ipahayag an saindang kaugmahan. Hinahalat-halat mi, kaiba kan dakul na iba pa, an panahon na mabayle kami sa kaugmahan sa bagong kinaban ni Jehova.—Ex. 15:20; 2 Sam. 6:14.