OMU ami naGwen twapwile namyaka yakusemuka yitanu, twaputukile kulinangula kukina. Halwola kana te kanda tulitachikize. Omu twapwile nakukola, tuvosena twafwililile kupwa vakuluwa mukukina wino vavuluka ngwavo ballet. Oloze omu twatachikijile kanawa wino kana, tuvosena twalitwaminyine. Uno vyuma muka vyatulingishile tulitwamine?

David: Ngwasemukile mu 1945 mungalila yaShropshire, muEngland. Tata apwilenga nafwamu kuchihela chimwe chapwile kwakusuku nambaka. Omu ngwakotokelenga kushikola, ngwalivwishilenga kuwaha kulisa tusumbi, nakukungulula maulu, nakufunga vangombe namikoko. Nge tunasoko shikola, ngwakafwilenga visemi jami kwaha jimbuto, kaha lwola lumwe ngwatambukishilenga jitalakita jetu.

Oloze kutwala muze, ngwafwililile kulinga vyuma vyeka mukuyoya chami. Tata amwene ngwenyi, putu vene kuunyike wami ngwasakilenga kukina heshoho ngwevwilenga myaso. Shikaho omu ngwapwile namyaka yakusemuka yitanu, tata alwezele mama angutwale kushikola yapwile mungalila yetu yize vanangwilenga vanyike vyakukina. Vasakile ngukalinangule wino vavuluka ngwavo tap. Mulongeshi wami amwene ngwenyi ngukwechi uhashi wakulinangula wino waballet, kaha aputukile kungunangula wino kana. Omu ngwapwile nakumyaka 15, vangusakwile nguyenga kushikola yaRoyal Ballet yize yayile fuma muLondon. Hashikola kana hakiko ngwakawanyine Gwen, kaha vatusakwile tukinyinenga hamwe.

Gwen: Ngwasemukile mu 1944 munganda yaLondon. Omu ngwapwile ngukanyike, ngwafwelelele chikuma Kalunga. Ngwatangilenga Mbimbiliya yami, oloze vyuma ngwatangilenga kavyangulumbunukililengako. Omu ngwapwile namyaka yakusemuka yitanu, ngwayile kushikola yakulinangula vyakukina. Kahomu mwahichile myaka 6 ngwatapile vakwetu muBritain yosena, ngocho vangufwetele hakungutwala kushikola yaRoyal Ballet. Shikola kana yapwilile haWhite Lodge, zuvo yayinene yamwaza yaGeorgian kuRichmond Park yize yapwilile kusongo yanganda yaLondon. Hashikola kana hakiko ngwakawanyine valongeshi vakwipangweji vaze vangunangwile wino waballet. Omu ngwapwile namyaka yakusemuka 16, ngwayile mumango yayinene hashikola kaneyi yaRoyal Ballet muLondon, aha hakiko twaliwanyine naDavid. Mwahichile tukweji vavandende kaha, twaputukile kukinyina mujizuvo jakuhemena jajinene jakufwana nge Royal Opera House kuCovent Garden, muLondon.

David: Nganomu nahanjika Gwen, ou mulimo wakukina watulingishile tukinyine muzuvo yayile fuma yaRoyal Opera House nahachiwanyino chaLondon Festival Ballet (chize vali nakuvuluka oholyapwa ngwavo English National Ballet). Mutu umwe muka-kunangula wino kanou wahashikola yaRoyal Ballet atungile kapani munganda yaWuppertal, muGermany, kaha atusakwile etu tuvavali mangana tumukinyinenga. Halwola kanelu, twakinyinyinenga mujizuvo jakuhemena jajivulu mukaye kosena, kaha twakinyinenga navatu vaze vayile fuma vakufwana nge Dame Margot Fonteyn naRudolf  Nureyev. Ou mulimo wakukina weji kulingisanga mutu alivwe nge wamulemu, kaha twandupukilile chikuma mumulimo kanou.

Gwen: Mujimba wami wosena navishinganyeka vyami vyosena vyapwile kukukina. Ami naDavid twafwilile kuya fuma mukaye kosena. Ngwevwilenga kuwaha omu vatu vangukomokelenga, nakunguhana mawana, nakwivwa vatu navangusakwilila. Kaha ngwandupukilile mukulinga ujila, namukunwa makanya nawala. Ngana mwavaka-kukina vavavulu, ngwapendaminyine hajipelo jakuneha kutokwa.

David: Twakinyine hamyaka yayivulu, oloze kutwala muze ou mulimo wakukinakina wanguzeyesele mwomwo kangwatwamishilenga hemboko. Hakuwana nge ngwakolelele hafwamu, ngocho ngwashinganyekele kuya nakutwama hafwamu yami kwakusuku nambaka. Ngocho mu 1967, ngwalitwaminyine kukinakina, kaha ngwaputukile kuzachila hafwamu yayinene yize yapwile kwakamwihi nafwamu yavisemi jami. Mwenya-fwamu angwitavishile ngutwamenga mukazuvo kakufwetela kaze kapwile hafwamu kana. Kufumaho ngwatuminyine shinga Gwen uze achipwile mumulimo wakukinakina, nakumulweza ngwami nguli nakusaka kumumbata. Halwola kanelu Gwen vamuhanyine chihela chachinene, kaha nawa apwile nakuzovoloka chikuma, ngocho chamukaluhwilile kusakula vyakulinga. Chipwe ngocho, etavilile tulimbate, kaha ejile nakutwama nayami hafwamu, numba tuhu chiyoyelo chahafwamu chapwile chaungeji kuli ikiye.

Gwen: Eyo, chiyoyelo chahafwamu chapwile chachikalu. Chapwile chachikalu kukamuna mavele kuvangombe nakulisa vangulu natusumbi lyacha lyakameneka. Lunga lyami David aputukile shikola yatukweji 9 yakulinangula jijila jajihya jakuzakaminamo vimuna. Omu ayilenga kushikola kana, ngwevwilenga uli mwomwo ahetelenga hembo ufuku. Halwola kanelu te mwanetu wapwevo watwatwa Gilly nasemuka lyehi. Lunga lyami angulwezele ngulinangule kutambukisa minyau, kaha ngwalingile vene ngocho. Jino likumbi limwe omu ngwayile kumbaka yimwe yapwile kwakamwihi, ngwalihumanganyine naGael, uze ngwatachikijile omu azachililenga muchitanda chimwe chamungalila yetu.

Gael angusanyikile kuzuvo yenyi ngukataleko. Omu twahetele kuze, angulwekesele mivwimbimbi yahachilika chavo chakulimbata, kaha mivwimbimbi yimwe yapwile nakusolola vali haweluka wazuvo yimwe vavulukile ngwavo Zuvo yaWangana. Ngwamuhulishile ngwami, chachi muka eyi? Omu angulwezele ngwenyi ikiye nalunga lyenyi vapwile Vinjiho jaYehova, ngwevwile kuwaha chikuma. Ngwanukile ngwami tatapwevo umwe apwa Chinjiho. Oloze ngwanukile omu tata likumbi limwe apihililile nayou tatapwevo, kaha ambilile mikanda yenyi kuchishita. Ngwapwile nakuhuhwasana ovyo tata uze apwile muka-kusehaseha apihililile natatapwevo uze apwile mutu wamwaza walikoji.

Ngocho elu lwapwile hilwola lwamwaza lwakutachikiza  omu vyuma afwelelele tatapwevo vyalihandunwine navyuma vanangwilenga mujichachi. Gael angulwezele vyuma yanangula Mbimbiliya. Ngwalikomokelele chikuma hakutachikiza nge kunangula chatulunga vatatu, nachakwamba nge mwono kaweshi kufwako chalimbalaka naVisoneka. (Kwambu. 9:5, 10; Yowa. 14:28; 17:3) Ngwamwene nawa lijina lyaKalunga, Yehova, halwola lwatete muMbimbiliya.—Kulo. 6:3.

David: Gwen angulwezele vyuma apwile nakulinangula. Ngwanukile tata uze angulwezelenga omu ngwapwile ngukanyike ngwenyi ngwatela kutanganga Mbimbiliya. Ngocho ami napuwami twetavilile kutunangula Mbimbiliya kuli Gael nalunga lyenyi Derrick. Omu mwahichile tukweji 6 twalukilile kuOswestry, mungalila yoyimwe yaShropshire, kuze twawanyine fwamu yayindende yakufwetela. Kuheta kuze, Chinjiho umwe walijina lyaDeirdre, atwalileho lika kutunangula Mbimbiliya. Hakavanga katwapwile nakuzovoloka washi kushipilituko. Twapwile namilimo yayivulu yakuzakama vimuna jetu. Oloze kutwala muze muchano wajikile miji mumichima yetu.

Gwen: Ukalu waunene ngwalipikile nawo shina wakumbila kupanda. Chisoneka chaIsaya 65:11 changukafwile ngumone omu Yehova amona ‘vaze veji kulongeselanga kalunga wakutokwa mesa.’ Ngwalombelenga chikuma kuli Kalunga, kaha mwahichile tando yayisuku numbanyi ngumbile jipelo jami jakuneha kutokwa navingwanjangwanja vyeka vyakupanda. Omu ngwalinangwile nge “weshowo mwalitohwesa ivene navakamwinyisa, kaha weshowo mwalinyisa ivene navakamutohwesa,” ngwatachikijile jino ngwami Yehova asaka vatu vakulinyisa. (Mateu 23:12) Ngwafwililile kuzachila Kalunga uze atuzakama chikuma, uze atutuminyine Mwanenyi umwe kaha wakulipwila ezenga nakutufwila. Halwola kanelu twapwile namwana wapwevo wamuchivali, kaha twevwile kuwaha hakulinangula nge tanga yetu nayikatwama haya myaka yosena mupalachise hano hamavu.

David: Omu ngwevwishishile upolofweto wamuMbimbiliya uze wapwile nakutesamo, wakufwana nge uze watwama mumukanda waMateu kapetulu 24 namumukanda waNdanyele, ngwenjikijile ngwami ngunawane muchano. Ngwatachikijile jino ngwami kupwa nausoko wamwaza naYehova chikiko chuma chachilemu chikuma kuhambakana kala chuma chamukatwamino kamyaka yino. Kutwala muze, ngwalitwaminyine kufwila vihela naulemu. Ngwatachikijile ngwami puwami navana vami vavali vapwile vavalemu kunguhambakanami. Chisoneka chaWavaka-Fwilipi 2:4 changukafwile nge kangwatela kujika muchima wami wosena hakulisuulwisa ami ivene nakusaka kupwa nafwamu yayineneko. Oloze ngwatelele kujika muchima wami kukuzachila Yehova. Ngwalitwaminyine kunwa makanya. Oloze chapwile chachikalu kutambuka jikilomita kafwe 10 hakuyanga kukukunguluka lyaSateli nachingoloshi mwomwo elu lukiko lwola twakamwinenga mavele kuvangombe. Oloze puwami Gwen angukafwilenga chikuma, kaha twayilenga kukukunguluka lwola lwosena. Twayilenga nawa navana vetu mumulimo wamuwande chalumingo hichalumingo lyaSondo nachimene omu twakumishile kukamuna mavele kuvangombe.

Vausoko wetu kavevwile kuwaha hakumona vyumevi twalingile mukuyoya chetuko. Tatawenu alitwaminyine kuhanjika napuwami hamyaka 6. Visemi jami navakiko vesekele kutukanyisa kulikata naVinjiho.

 Gwen: Yehova atukafwile muukalu wosena ou twamwenenga. Kutwala muze vandumbwetu muchikungulwilo chetu chaOswestry vapwile jino nge vatanga jetu, kaha vatukafwile nakutukolezeza omu twapwile nakuhita muvyeseko kanevi. (Luka 18:29, 30) Twalihanyine kuli Yehova nakutumbapachisa mu 1972. Ngwafwilile kukafwa vatu vavavulu vatachikize muchano, ngocho ngwalisonekesele upayiniya.

David: Milimo twazachilenga hafwamu yapwile yayikalu, oloze twazachile nangolo mangana tuhane chakutalilaho chamwaza kushipilitu kuli vana vetu. Mukuya chamakumbi twasezele fwamu yetu mwomwo yajishimbi jimwe yakashile fulumende. Hakuwana nge katwapwile jino nazuvo namilimoko, kaha nawa mwanetu wapwevo wamuchitatu apwile kaha namwaka umwe, ngocho twalombele kuli Yehova atukafwe nakututwaminyina. Twashinganyekele kuzachisa uhashi wetu wakukinakina, kaha twasokolwele zuvo yakukinyina mangana tuwaneko jimbongo jakulikafwa najo. Muchima wetu wakuhaka vyuma vyakushipilitu kulutwe wemine mihako. Twawahililile chikuma hakumona vana vetu vosena vatatu navaputuka upayiniya omu vakumishile shikola. Gwen nayikiye apwile payiniya, ngocho avakafwilenga chikuma hakumbi hakumbi.

Omu mwanetu watwatwa Gilly nayou ahachilemo Denise vasombokele, twasokele yize zuvo yakukinyina. Twasonekelele kuofesi yamutango mangana vatulweze kuchihela kwapwile nakusakiwa kukafwa. Vatulwezele tuyenga kujimbaka jakusulo yaEngland. Nayami ngwaputukile upayiniya mwomwo twapwile kaha namwana umwe wakuzakama hembo. Omu mwahichile myaka yitanu, vatulwezele tuyenga nakukafwa vikungulwilo vyeka vyapwililile kunote. Omu mwanetu Debbie nayikiye asombokele, twaputukile kuzata mulimo wakutunga vihela vyakulemesela Kalunga. Twazachile mulimo kana hamyaka 10. Twazachilile mumafuchi akulisezaseza akufwana nge Zimbabwe, naMoldova, naHungary, naCôte d’Ivoire. Kufumaho twakindulukile kuEngland mangana tukafwe vandumbwetu vapwile nakutunga Mbetele muLondon. Hakuwana nge ngwatachikijile chikuma milimo yahafwamu, ngocho vangulwezele nguzachilenga hafwamu yahaMbetele. Oholyapwa tuli nakuzata mulimo waupayiniya kunote yaEngland.

Gwen: Mulimo wetu twazangile chikuma wakukinakina wapwile wamwaza vene, oloze wapwile wakatando kakandende kaha. Mulimo wetu ou tuli nakuzachila Yehova wamwaza chikuma kaha nawa naukelila haya myaka yosena. Ami nalunga lyami hanga tuli hamwe, kaha tuli nakuzachila hamwe mulimo wetu waupayiniya, keshi nge uze mulimo wakukinakinako. Kukafwa vatu vavavulu valinangule muchano waulemu wakutwala kukuyoya chinatulingisa tupwenga vakuwahilila chikuma mukuyoya chetu. Eyi “mikanda yakutujimbula” yinapu yayilemu chikuma kuhambakana kala vyuma vyamukaye vize vinahase kufumakanyisa mutu. (Koli. 2, 3:1, 2) Kachi nge katwalinangwile muchanoko, kachi oholyapwa tuli kaha namivwimbimbi yakusolola omu twapwile nakukinakina, nakwanuka kaha omu twakinyinenga mujizuvo jakuhemena.

David: Kuzachila Yehova chinatukafwe chikuma mukuyoya chetu. Chinangukafwe nguzakamenga kanawa puwami nakulela kanawa vana vetu. Mbimbiliya yatulweza ngwayo Milyame, naMwangana Ndavichi, navangamba jaKalunga veka valivwishilenga kuwaha kukina. Ngocho tuli nakutalilila kukakinyina hamwe navava vatu navakwetu veka vavavulu mukaye kakahya kaze atushika Yehova.—Kulo. 15:20; Samwe. 2, 6:14.