CHITWADIÑA nayaaka yitanu yakusemuka, ami naGwen twatachikili kudiza kuhañana. Twadiña kanda tudiluki. Ilaña chitwadiña nakukula, wejima wetu twafwilileña kwikala namudimu wakuhañana winu watenañawu nawu ballet. Chelili hitwilukisha mudimu wetu, twawulekeli. Chumanyi chaletesheli tuleki?

David: Navwalikili mu 1945 mwiluña daShropshire, England. Tata wadiña nafwamu mumukala mwadiña mwawunda. Chinafuma kushikola natiyileña kuwaha kudiisha atusumbi nikusenda mateta, kuhemba añombi nianyikoku. Neyi tunashinki shikola, nayikwashileña anvwali jami kwañula mbutu nikwendesha mazembi etu akudima nachu.

Hela chochu, kudi yuma yikwawu yinatachikili kukeña muchihandilu chami. Henohu nichidi kansi chikupu, tata wamweni nindi nakeñeli kuhañana neyi natiyi tumina. Chinashikijili yaaka yitanu, tata wamulejeli mama nindi yatwali kushikola yakuhañana yadiña mwiluña detu kulonda nakadizi winu watenañawu nawu tap dancing. Ntañishi yami wamweni nindi nikweti wuswa wakwikala mukwakuhañana ballet nawa wandizishili cheñi winu weniwu. Chinashikijili yaaka 15, anyinkeli wukwashi wakuya nakutañila kushikola yaya mpuhu yaRoyal Ballet School muLondon. Haniyi shikola dihu hitwadiwanini naGwen, nawa diyi anyinkeluwu kuhañanaña nindi.

Gwen: Navwalikilili mumusumba mwasweja antu muLondon mu 1944. Hela chakwila nadiña kansi, ilaña nadiña namukuhwelela Nzambi chikupu. Nafwilileña kutaña Bayibolu ilaña yadiña yakala kutiya. Hinadiña nayaaka yitanu yakusemuka, nayileña kushikola yakuhañana. Chimwahitili yaaka yitanu nachimu nahitili akwetu ejima amuBritain inahañeni nawu, dihu hañitejeluwu kuya nakutañila hashikola yaThe Royal Ballet School yawatwansi. Shikola yeniyi yadiña kuWhite Lodge, hetala deneni dadiwahi daGeorg dadiña muRichmond Park kwakulehi naLondon. Natañileña hashikola yeniyi nawa andizishileña kuhañana winu waballet kudi antañishi akuluka yitembi. Chinashikijili yaaka 16, natachikili kutañila haThe Royal Ballet School yawakulumpi muLondon, haniyi shikola dihu hitwadimweni naDavid. Chimwahitili tukweji twantesha, twatachikili kuhañana hamu winu waballet mwitala dayisela haRoyal Opera House kuCovent Garden, muLondon.

David: Eñañi, neyi chahoshayi Gwen, mudimu wetu watuletesheli kutachika kuhañana haRoyal Opera House yaya mpuhu nihaLondon Festival Ballet (makonu ayitenaña nawu English National Ballet). Muntu wumu wahaRoyal Ballet watuñaña njila jakuhañenamu watuñili kampani yeneni muWuppertal, Germany, nawa watutondeli muwuyedi wetu kuya nindi. Hampinji yitwahañeneña, twahañeneña  mumatala akuhañena amukaayi kejima nikwila yisela yatenañawu nawu Dame Margot Fonteyn niRudolf Nureyev. Iyi yisela yakudibecha yatuleñeleleña kudinka wanta nikusweja kwiñijamu mutu.

Gwen: Yitoñojoka yami yejima yayili kuniyi yisela yakuhañana. Ami niDavid twatoñojokeleña hohu kuyilaku hambidi mujakuhañana. Natiyileña kuwaha kwimba tumina twakusoneka hachipapilu, kutambwila jinkenu nikutiya kuwaha antu chinakusakililawu. Mwitala dakuhañena damukaayi kejima mwadiña antu elileña yuma yatama, kunwa makanya niwalwa; kufwana akwetu mutwahañeneneña anami nawa nashindameneni hayitumbu yami yampemba.

David: Hanyima yakwikala muniwu mudimu hayaaka yayivulu, nazeyeli nakwenda mpinji yejima. Chineli nakulilili kufwamu, natachikili kwanuka chihandilu chapela chitwahandileña kufwamu. Mu 1967, nalekeli iwu mudimu wakuhañana, nawa nayili kufwamu kwakamwihi nawanvwali jami. Ndimi wumu wañitejeli kusonkela kaditala kanyanya. Dichi namutemesheleli Gwen nshiña kwitala dakuhañena nakumwihula neyi wukwiteja nimusumbuli. Haniyi mpinji Gwen amwinkeli chifulu cheneni chakuhañana nkawindi nawa wakulukili yitembi, dichi chamukalilili kufuukulahu. Wetejeli nindi tudisumbuli nawa twatachikili kushakama kumukala kwadiña chihandilu chabuliliyi kwinjilila.

Gwen: Eña, chihandilu chakufwamu chankalilili. Kukamuna mayeli awañombi nikudyisha añulu nitusumbi himudimu wunabulili kwiluka. David watachikili kudiza hakoleji jinjila jajiha jakuhembelamu yimuna hadi tukweji tutanu natuwana, nawa natiyileña wuudi kushala nkawami hetala nakushika nimpinji yawufuku. Haniyi mpinji mwanetu wamumbanda wawedi Gilly, wadiña wavwalika dehi. David wañilili nindi nidizi chakwendesha motoka, nawa ifuku dimu chinayili mumbaka yakukamwihi nadimweni naGael wunelukili hampinji yalandishileña musitolu yamwiluña detu.

Gael wantambikili kwitala dindi nakunwa tii. Wanyinkeli nyevulu yahachawija chindi ninami namulejeli yami, nyevulu yachidika chindi hadiña izanvu dawantu emeni hanji Yetala daWanta. Namwihwili nami hichechinyi yeniyi. Chanlejeliyi nindi yena ninfumwindi hiyaYinsahu jaYehova natiyili kuwaha chikupu. Nanukili nami tata yami wamumbanda wumu niyena hiChinsahu. Nanukili chamukabishileñawu kudi tata nakumumbila nyikanda yindi mungungulu. Nahayamineña tata wadiña chiwahi chamuzuwilileñayi muntu wamuwahi muchima wamuchidiwu.

 Nekalili nakukooleka kwakwihula nsañu yakuhwelelayi tata wamumbanda chiyambukila nantañishilu yamachechi amakwawu. Gael wanlejeli yuma yatañishaña Bayibolu. Nahayamini hakwiluka nami ntañishilu Yawanzambi Asatu niyakwila nawu wumi hiwafwañaku yamuNsona wanyi. (Mukwa. 9:5, 10; Yow. 14:28; 17:3) Nawa namweni ijina daNzambi, Yehova katachi muBayibolu.—Kwid. 6:3.

David: Gwen wanlejeli yuma yadizileñayi. Nanukili chanlejeliyi tata mpinji yidaña kansi nindi natela kutañaña Bayibolu. Dichi, ami naGwen twetejeli kutudizisha Bayibolu kudi Gael nanfumwindi Derrick. Chimwahitili tukweji tutanu nakamu twabuukilili kumbaka yaOswestry, mwiluña dodimu daShropshire, muloña twatachikili kusonkela kafwamu kanyanya. Deirdre Chinsahu wamunidi iluña watwalekeluhu kutudizisha Bayibolu. Hakusambila twayilileñaku hambidi chovu-chovu. Twashili maana kumudimu wakuhemba yimuna. Hela chochu, chalala chatachikili kutushika hamuchima chovu-chovu.

Gwen: Nadiña nakukala kweneni kwakuleka kuzatisha waña. Mukanda waIsaya 65:11 wankwashili kwiluka chamonañayi Yehova ‘antu amwaalilaña nzambi waMpemba mesa.’ Hahitili mpinji nawa nalombeleña hakwila nileki kuzatisha yitumbu yami yampemba niyijimba. Chinadizili nami “muntu wukuditohesha akamukehesha, muntu wukudikehesha akamutohesha” nelukili muntu wakeñañayi Yehova. (Mat. 23:12) Nakeñeli kumuzatila Nzambi watwakamenaña chakwila watemesheli Mwanindi wakeñayi nankashi kulonda yekali ifutu danyiloña. Haniyi mpinji twadiña namwana mukwawu wamumbanda, nawa twazañaleli hakwiluka netu chisaka chetu chinateli kushakama haya nyaka muparadisa hamaseki.

David: Chinelukili mwatalisha chakashikijewa wuprofwetu wamuBayibolu wakuhayamisha wudi neyi wekala mumukanda waMatewu kapetulu 24 nimumukanda waDanyeli nelukili chikupu nami nawani chalala. Nelukili nami kwikala nawubwambu wawuwahi naYehova hikunateli kwesekana nachuma chidi chejima mukanu kaayuku. Dichi chimwahitili mpinji nalekeli kukeña kutiyakana mpuhu. Nelukili nami ñodami nianyanami alema neyi ami aweni. Afwilipi 2:4 yakwashili kwiluka nami hinatela kutoñojokaña hayuma yinafwilaña nikufwila kwikala nafwamu yenenuku. Ilaña natela kulemesha mudimu wakumukalakela Yehova muchihandilu chami. Nalekeli kunwa makanya. Ilaña hakwila tuhimpi chihandilu chetu kulonda tuyeña nakupompa haMposu namelela lwendu lwamakilomita 10 chatukalileña muloña diyi mpinji yitwateleleleña kukamuna mayeli awañombi. Hela chochu, twajiñiluhu wanyi kukupompa hela kushiya anyanetu mumudimu wakushimwina mafuku ejima haMulungu nantetemena hanyima yakukamuna añombi mayeli muloña Gwen wankwashileña.

Ataña jetu hiyatiyili kuwaha chitwahimpiluku. Tata yaGwen walekeli kumuhoshesha hadi yaaka yitanu nachimu. Anvwali jami niwena esekeli kutulekesha kudikunda nawaYinsahu.

 Gwen: Yehova watukwashili muniku kukala kwejima. Chimwahitili mpinji, amana kwetu niahela amuChipompelu chaOswestry ekalili neyi antaña jetu amaha nawa atukwashileña mpinji yitwamweneña kukala. (Luka 18:29, 30) Twadihanini kudi Yehova nawa twapapatisheweli muchaaka cha 1972. Chineli nafwilileña kuzata nañovu kulonda nikwashi antu amavulu kwiluka chalala, natachikili wupayiniya.

David: Twazatileña nyidimu yakola hayaaka hafwamu yetu; twafwilileña kuyimikila anyanetu chakutalilahu chachiwahi hakudifukula kudi Yehova. Chimwahitili mpinji nfulumendi yalekeli kutukwasha, dichi twalekeli mudimu wakufwamu. Chineli hitwadiña netala hela mudimuku nawa mwanetu wamuchisatu wamumbanda wadiña nachaaka chimu hohu, twalombeli kudi Yehova kulonda yatukwashi nikutulombola. Twafuukwiluhu kuzatisha yuma yitweluka nawa twenzunwini kaditala kakuhañena kulonda tuwaneñamu mali akukwasha nachu chisaka. Chineli twatwamijiluku kudifukula kudi Yehova mwafumini yuma yayiwahi. Twazañaleli chikupu chelili anyanetu ejima asatu atachiki wupayiniya wampinji yejima chamanishiluwu shikola. Gwen niyena wadiña payiniya dichi wazatileña nawanyanetu mafuku ejima.

Chasumbukiluwu anyanetu awakulumpi ayedi aGilly naDenise, twashinkili kaditala kakuhañena. Twasonekeleli kukasanji kamutayi nakwihula kutwatela kuya nakuzatila. Atulejeli kuya nakuzatila kukabeta kasumbwañesha chidiilu namusela waEngland. Chineli twashalili hohu namwana wumu wamumbanda hetala, Debbie, anami natachikili wupayiniya. Chimwahitili yaaka yitanu atulejeli kuya nakuzatila kuyipompelu yakwakulehi yakukabeta kachidiilu. Chasumbukiliyi Debbie, twadiña nakukooleka kwakuzata yaaka ikumi mumudimu wakutuña mumatuña amavulu adi neyi Zimbabwe, Moldova, Hungary, niCôte d’Ivoire. Kuhiñahu twafuntili muEngland nakukwashaku mudimu wakutuña Beteli muLondon. Chineli nadiña neluka mudimu wakufwamu, anyikeli mudimu wakuzatila kufwamu yahaBeteli yadiña nakuzatika hayina mpinji. Chayinu mpinji, twazatilaña wupayiniya kukabeta kasumbwañesha chidiilu namujika waEngland.

Gwen: Mudimu wutwazatileña hakusambila wakuhañana ballet watuzañalesheleña hohu hakampinji kantesha. Mudimu wetu wamuchiyedi walema wutwamuzatilaña Yehova watwinkaña muzañalu weneni nawa wahaya nyaka. Tuchidi kuzatila hamu, chatela tuhañeneña hamu twazatilaña hamu wupayiniya. Kukwasha antu amavulu kudiza chalala chahandishaña antu kunatuleteli muzañalu weneni chikupu. Iyi ‘nyikanda yakuhameka nachu’ yayiwahi nankashi kubadika kuya mpuhu mukaayi. (2 Kor. 3:1, 2) Neyi chakwila hitwadizili chalalaku, mutenowu twadikwanukaña hohu mudimu wetu wutwelileña kunyima, nyevulu yakunyaka nijiprogilamu jamwitala dakuhemena.

David: Mudimu wutwamuzatilaña Yehova waleñela chihandilu chetu chikali chachiwahi. Neluki nami iwu mudimu wankwasha kwikala iyala ninvwali wamuwahi. Bayibolu yatulejaña nawu Miriyami, Mwanta Davidi niantu amakwawu amwekesheli muzañalu wawu kuhitila mukuhañana. Etu niakwetu amavulu tunakutalila ifuku ditwakahañana namuzañalu mwituña daYehova dadiha.—Kwid. 15:20; 2 Sam. 6:14.