SHIGHE u Gwen man mo se lu anyom ataan la, se hii u henen amar a vinen. Se lu a fa ayol a ase hen shighe ne ga. Kpa se mba we ikyondo yô, hanmô wase tsua u vinen amar zenden. Ior mba hiin u fan se hanma ijiir cii sha amar a vinen yô, maa se de. Lu nyi i na ve se er nahana?

David: Yange i marem ken inyom i 1945 la, hen eniel u Shropshire, tar u Ingila. Terem lu a sule ken agar a hen eniel ne. Ijiir ne lu gong gong ga. Mea duen makeranta yô, i doom kpishi u za nan ikyegh kwaghyan shi kohol aji, shi nengen sha ibua man iyôngo. Sha ashighe makeranta wam u lu ken memyol yô, m wase terem sunda, ashighe agen m yar sunda ne a utraktô.

Nahan kpa, kwagh ugen gema hii u saren mo. Shighe u m lu wanye la, terem nenge er hanma shighe mea ungwa ityogholough ve m hii u vinen yô. Nahan shighe u m lu anyom ataan la, a due a mhen ér ngôm a za wam ken makeranta u tesen amar hen ningir wase, m hen amar a vinen. Tica wam hen ér me fatyô u vinen amar, keren angahar, nahan a tesem amar ne. M va kom anyom 15 yô, i nam iyua ér m yem zege makeranta ugen u tesen amar a vinen hen gar u London la. Mo man Gwen maa se za zua, nahan i kaa ér mo m vinen amar vea na.

Gwen: Yange i marem ken gar u London, u a lu gong gong la, ken inyom i 1944. Shighe u m lu wanye la, m na Aôndo jighjigh tsung. Yange m nôngo m ôr Bibilo, kpa i gema taver mo u kaven. M va kom anyom ataan yô, m za nyôr makeranta u henen amar a vinen. Anyom nga kar ateratar yô, m za hemba gesa u amaregh u mbaamarev mba ken Britain cica za la, nahan i nam iyua ér m za zege makeranta ugen, u i tesen mbayev amar a vinen la. Makeranta ne lu ken zegeyou i doon ashe i i yer ér White Lodge, i Georgia maa hen ijiir igen i ior za maan ahumbe her, ken akôngo a gar u London yô. M hen makeranta man amar a vinen hen ijiir ne, sha ikyev i atica a i naan a icivir tsung yô. M va kom anyom 16 yô, m nyôr makeranta u tesen mbaganden amar a vinen, u u lu ken atô u gar u London la. Ka hen makeranta ne mo man Davidi se za zua ye. Iwer ngi kar kpuaa yô, se gema vinen amar imôngo hen agirigi u vesen ugen u i vinen amar her, ken gar u London yô.

David: Ka mimi, er Gwen a kaa nahan, amar a vinen yange na se za vine amar hen agirigi u vesen ugen u vinen amar, u i fa un wuee yô, kua ijiir igen i vinen amar her igen ken London, i i yer i hegen ér English National Ballet la. Or u vinen amar ugen, u vinen amar hen agirigi u vinen amar ne, yange bugh zege kômpeni ugen hen gar u Wuppertal, ken tar u Jamani, nahan tsua se ér se za vinen amar her vea na. Shighe u se lu vinen amar la, se vine amar sha mbaagirigi mba amaregh ken ityar kpishi, se lu vinen amar vea mbaamarev mba duen ati, er Margot  Fonteyn man Rudolf Nureyev nahan. Imba gesa ne na yô, se hemban henen sha kwagh wase iyol yase tseegh, shi se de akaa cii se sar sha u vinen amar.

Gwen: Ishima yam cii yange yem sha u vinen amar. David man mo cii se lu a isharen i vinen amar aren sha azenger. Yange i doom u ngeren ior sigeneca wam, shi ngohol ufaluwa, shi ungwan ave a kuren. Shighe u m lu vinen amar la, m eren idya kpoghuloo, shi m maan taav man msôrom kpishi. M shi sha u eren mkombo a doon ikyôr, er mbaamarev mbagenev nahan.

David: Yange m vinen amar anyom nga kar kpishi yô, m vôr a ieren i zenden vinen amar la. Er m vese ape i eren tom sule yô, hii u saren mo u hiden yemen za eren uma u akuma akuma ken agar. Nahan ken inyom i 1967 la, m de amar a vinen, nahan m za hii u eren tom hen zege sule ugen, ikyua a ya u mbamaren av. Orsule la de ér mo m kôr haya ken anyou na u cuku ugen hen agar ne. Maa m gbidye Gwen waya ape lu vinen amar la, m kaa a na mer a vôsom. Hen shighe ne Gwen hingir zege kwase ken amar a vinen, shi lu zan ikyura kpaa, nahan taver un kpishi u lumun. Nahan cii kpa, a lumun u vôson mo. Se mba eren ivese yô, a va kohol mo hen agar a a fa kwagh u a cuku kpaa ga ne.

Gwen: Mimi yô, yange lum ican u hoghor a tom sule. Tom u kamen ibua atumba shi koson igyo man ikyegh sha ashighe kposo kposo la, lu kwagh u m fa cuku ga yô. Maa David va nyôr makeranta u tesen ior tom sule, sha u una fa igbenda i i sember duen a mi, i eren tom sule la, nahan una yem makeranta yô, i huan mo zan zan a kar za hiden tugh. Hen shighe ne, se mar wan wase u kwase, u i yilan un ér Gilly la. David maa due a mhen ér mo m hen mato u nahan, nahan iyange igen m ngur nahan mato yemen hen gar ugen u lu ikyua a vese yô, m za nenge a kwase ugen u i yilan un ér Gael, u yange m fa un shighe u teen kasua hen shôôpu igen hen ningir wase la.

Gael maa kar a mo se yem hen ya na, za nam tii. A tesem ufoto mba ivese na, mo kpa m tese un mba av, shi a tesem foto na u un vea ior mbagenev ve tile ken won u ijiir igen i i yer ér Iyou i Tartor la ve tôô yô. M pine un mer a pasem imba côôci la. Kaan a mo ér un vea nom na ve mba Mbashiada mba Yehova yô, doom je zua ga. M umbur er anmgbian u terem u kwase ugen lu Orshiada yô. Shi m umbur er ishima yange i vihi terem a na tsung ér ngu Kwaseshiada je, kura ityakerada na za haa shin anar u haan ihyôghonough yô. Yange kpiligh mo iyol kpishi, er terem u eren a ior kundu kundu ne nahan, a vihi ishima kpishi a kwase u lun ishima legh legh ne yô.

 Ken masejime yô, m va zua a ian m pine anmgbian u terem u kwase la er i hii ve akaa a a ne jighjigh a mi la a kaha kposo a atesen a ucôôci mbagenev yô. Gael pasem kwagh u Bibilo i tese la jighilii. Yange m kaven mer, atesen kpishi er, i Mbaaôndo Utar ken Môm man i uma kpen ga la nahan cii, a zough sha Ruamabera ga yô, kpiligh mo iyol. (Orpa. 9:5, 10; Yoh. 14:28; 17:3) Shi lu hiin yam u nengen a iti i Aôndo, i Yehova la, ken Bibilo je la.—Eks. 6:3.

David: Gwen ôrom er un lu henen Bibilo yô. M umbur shighe u m lu iyev ve, terem kaa a mo ér mo m ôron Bibilo la. Nahan Gwen man mo se lumun ser Gael man nom na Derrick, ve henen Bibilo a vese. Iwer ngi kar ateratar yô, se mough se yem hen Oswestry, kasua ugen u lu hen agar a Shropshire, sha ci u i na se ian i za ngohol ansule u cuku ugen haya, eren tom sule her. Shighe u se lu hen sule ne la, Orshiada ugen hen ningir wase ne, i yilan un ér Deirdre, za hemen u henen Bibilo a vese, gba uwer ga. Sha hiihii la se na ishima sha kwaghhenen ga. Er se lu nengen sha uzendenya yô, se luun a ian cuku i henen kwagh ga. Nahan cii kpa, tegh tegh tsô mimi wa amise ken ishima yase.

Gwen: Kwagh u vesen u lu tagher mo u vesen ken mimi, u gba u me hemba yô, lu kwagh u mbaimev. Yesaia 65:11 wasem u kaven mnenge u Yehova sha kwagh u ‘mba ve ser tebur sha ci u Gadi, akombo a doon ikyôr la.’ Yange m er msen shi shighe kar je ve m va mase haan ikyav yav mbi akombo a doon ikyôr man akpagher la cii kera ye. Yange m kaven er “hanmô u nan kenden a iyol i nan sha yô, á hire a nan ijime; man hanmô u nan hir a iyol i nan ijime yô, á kende a nan sha” yô, kwagh ne wasem u fan imbaor u Yehova a keren la. (Mat. 23:12) Yange sarem u civir Aôndo u a we se ikyo kpishi je a tindi Wan na u ishima ishima a va ne nagh sha ci wase la. Hen shighe ne, se mar wan u kwase ugen, nahan doo se kpishi er se fa ser tsombor wase ua fatyô u va lun uma gbem shon ken paradiso shin tar yô.

David: Shighe u m va kav er akaaôron a profeti a i nger ken Mateu ityough 24, man a i nger ken takerada u Daniel, man akaaôron a profeti agen kpishi, lu kuren sha gbenda u kpiligh iyol yô, m na jighjigh vangertiôr mer ka mimi je ne. M kav mer kwagh môm ken tar hemba doon a u yan ikyar kôôsôô a Yehova ga. Nahan shighe kar yô, m de gwa keren. M kav mer kwase wam man ônov av mba kasev mbara gba kwagh vough er mo nahan. Mbafilipi 2:4 wasem m fa mer doo u me henen sha kwagh wam man isharen yam i lun a zege sule la tseegh ga. Kpa doo u me ver mcivir u Yehova hiihii ken uma wam. Nahan m de taav u man. Nahan kpa, u sôron akaa ken uma wase sha er se eren zende ukilomita pue, se zaan mkombo sha iyange i Sati aikighe la, lu kwagh u kiriki ga, sha ci u yange i gba u se kam ibua atumba hen shighe la. Kpa sha iwasen i Gwen yô, mayange se bunde mkombo môm kpaa ga; shi hanma Sati sea kam ibua atumba sea bee yô, se due kwaghpasen vea ônov asev mba kasev.

 Gbenda u se gema uma wase la doo mba hen tsombor wase ga. Ter u Gwen lam a na ga je kuma anyom ateratar. Mbamaren av kpa nôngo ér se de u kohol imôngo vea Mbashiada.

Gwen: Yehova yange wase se u wan ishima a mbamtaver mban cii. Shi shighe ngur karen yô, anmgbianev mba nomso man mba kasev, mba ken Tiônnongo u Oswestry la hingir se tsombor u he, sha ci u ve lu suen se shi tesen se dooshima sha ashighe a se lu yan ican la cii. (Luka 18:29, 30) Se va tsegha ayol a ase sha ci u Yehova shi se er batisema ken inyom i 1972 la. Yange m soo u eren tom kpoghuloo sha er me wase ior kpishi ve fa mimi yô, nahan m hii u eren pania.

David: Anyom a se lu eren tom sule la, se vôr kpishi; kpa se nôngo se ver ônov asev mba kasev mbara ikyav i dedoo sha kwagh u ken jijingi. Shighe kar yô, se de tom sule, sha ci u gomoti kera lu suen mbasulev sha inyar kpishi ga. Er se kera lu a ya man tom ga, shi se mar wan wase u kwase u sha utar, u lu inyom môm tseegh la yô, se sôn Yehova ser a wase se shi a tese se kwagh u se er yô. Nahan mkav u se lu a mi sha kwagh u amaregh la wase se se za bugh ijiir i vinen amar, sha er se sue tsombor wase yô. Er se kange ishima ser se ver akaa a ken jijingi hiihii yô, kwagh u injaa due ker. Ônov asev mba utar mbara cii hii u eren pania shighe u ve bee makeranta la, nahan saan se iyol tsung. Gwen iyol na kpa hingir pania, nahan a wasen ve ken tom u pasen kwagh la ayange ayange.

Yange wan wase u kwase u hiihii, Gilly, man u sha uhar, Denise, mba eren nom kera yô, se cir ijiir yase i vinen amar la. Maa se nger afishi a branci washika se pine ape se fatyô u za nan ior iwasen yô. Afishi a branci kaa a vese ér se yem hen agar a a lu vegher u sha ityoughkitaregh man ken imbusutariyan, i tar u Ingila la. Er se shi a Debbie, wan wase u masetyô la tseegh yô, mo kpa m hii u eren pania. Se mba pasen kwagh anyom nga kar ataan yô, i kaa a vese ér se za wase atôônanongo acaa agen, a a lu vegher u ken imbusutarimese la. Debbie va eren nom yô, se zua a ian i eren tom u maan kwagh sha ityar ityar la. Se er tom ne ken tar u Zimbabwe man Moldova man Hungary man Côte d’Ivoire. Maa se va hide ken tar u Ingila, se va wase u maan kwagh shin Betel u hen London la. Er m lu a mfe sha kwagh u tom sule yô, i kaa a mo ér m za wase tom sule, u i lu eren shin Betel hen shighe ne la. Hegen ne, m ngu eren tom pania ken tar u Ingila, vegher u ken imbusutarimese man shin ityôtar la.

Gwen: Amar a vinen, a se na ishima sha mi sha hiihii la, yange a va se a msaanyol, kpa i gema i ngôôr ga. Kpa ishima i se va mase nan sha kwagh u Yehova la ka kwagh u hemban lun se a inja cii, shi kwagh ne va se a msaanyol tsung, u una bee mayange ga yô. Se mba akar her, kpa hegen se de amar a vinen, se mba eren tom pania imôngo. Er se lu wasen ior kpishi u fan mimi u doon tsung, u una na ve uma la yô, kwagh ne va se a msaanyol gandeôron. “Uwashika mba pasen mlu u or” ne, hemba hanma gwa ken tar ne cii. (2 Kor. 3:1, 2) Luun er yange sea fe mimi ga yô, hegen ma se lu umbur akaa a tse, man ufoto mba tsev man mbaagirigi mba se vinen amar her la di tseegh tsô.

David: Tom u se eren Yehova ne gema uma wase sha gbenda u vesen. U wasem u hemban lun nom man ter u dedoo. Bibilo kaa a vese ér Miriam man Tor Davidi, man mbagenev yange ve tese msaanyol ve sha amar a vinen. Se vea ior mbagenev kpishi di se mba veren ashe u va vinen amar, tesen iember yase ken tar u he u Yehova la.—Eks. 15:20; 2 Sam. 6:14.