БИЗ бәш яшымыздан танс мекдебине барып башладык. Эмма биз бири-биримизи танамаярдык. Биз улаланымызда ады белли балет тансчысы болмагы йүрегимизе дүвдүк. Биз көп үстүнликлер газандык, йөне соңра кәримизи ташладык. Нәме үчин?

Дейвид: Мен 1945-нҗи йылда Англияның Шропшир этрабында дүнйә индим. Какамың фермасы барды. Мен мекдепден геленсоң обада сыгырлара, гоюнлара, товуклара ийм берйәрдим ве юмуртга чөплейәрдим. Каникул гүнлеринде кәте трактор сүрүп, дайханчылык ишлерине көмеклешйәрдим.

Эмма мен башга бир зат билен гызыкланып башладым. Мен гаты кичи болсам-да, сазы эшиден бадыма танс эдип башлаярдым. Какам мениң укыбыма үнс берип, бу бабатда эҗем билен маслахатлашяр. Шейдип, олар бәш яшымдакам мени чечётканы өвренмегим үчин голайымыздакы танс мекдебине берйәрлер. Мугаллым мениң танса болан укыбымы гөрүп, балет тансыны хем өвредйәр. Мен 15 яшымда Лондондакы Ша балет мекдебинде мугт окамага мүмкинчилик газандым. Мен ол ерде Гвен билен танышдым ве биле чыкыш эдип башладык.

Гвен: Мен 1944-нҗи йылда Лондон шәхеринде догулдым. Мен чагалыгымдан Худая йүрекден иман эдйәрдим. Мукаддес Язгылары окамага җан этсем-де, оңа дүшүнмейәрдим. Мен бәш яшымда танс мекдебине барып башладым. Мундан алты йыл геченден соңра Британияның тансчыларының арасында ярыш гечирилди. Мен онда еңиш газандым ве Ша балет орта мекдебинде окамага чагырылдым. Ол Лондоның четиндәки Ричмонд сейилгәхинде ерлешйәрди. Бу мекдеп грузинлериң җайына меңзеш Ак-Ложа дийлип атландырылан овадан бинады. Ол ерде мен орта билим алдым ве теҗрибели мугаллымлардан балет тансыны өврендим. Мен 16 яшымда Меркези Лондондакы Ша балет мекдебиниң ёкары сынпында Дейвид билен танышдым. Биз Лондондакы Ковент-Гардениң Ша опера көшгүнде бирнәче айлап балет тансы билен чыкыш этдик.

Дейвид: Гвениң айдышы ялы, биз белли Ша опера көшгүнде ве «Лондоның фестиваль балети» (хәзирки Милли иңлис балети) билен чыкыш эдип, көп үстүнлик газандык. Ша балет танс гоюҗыларының бири Германияның Вупперталь шәхеринде халкара билелешигини дөредйәр. Ол тансчыларың арасындан бизи сайлап, өзи билен әкидйәр. Биз дүнйәниң көп театрларында, хатда Марго Фонтейин ханым ве Рудольф Нурыев ялы мешхур йылдызлар билен  хем чыкыш этдик. Бизиң кәримиз бәслешиге ве текепбирлиге итерйәрди. Биз танса бар гүйҗүмизи сарп эдйәрдик.

Гвен: Мен бүтин дуркумы ве ой-пикирими танса бердим. Дейвид икимиз мешхур йылдыз болмак ислейәрдик. Ядыгәрлик үчин гол чекмек, гүл алмак ве томашачыларың эл чарпышмалары маңа дийсең яраярды. Йөне мен хер гүн ахлаксыз, чилимкеш ве аракхор адамлара душ гелйәрдим. Ишдешлерим ялы менем дога-тумарларың шовлулык гетирйәндигине ынанярдым.

Дейвид: Мен бирнәче йыллап гөчүп-гонуп йөрмекден ядадым. Обада өнүп-өсендигим үчин сада дурмушы күйсейәрдим. Шол себәпли 1967-нҗи йылда тансчылык кәрими гоюп, ата-энемиң яшаян ериниң голайында ерлешйән улы фермада ишләп башладым. Бир дайхан маңа кичирәк җайы кирейине берди. Соңра мен театра җаң этдим ве Гвене маңа дурмуша чыкмагы теклип этдим. Эмма оңа карара гелмек кын болды. Себәби ол баш (соло) тансчы хөкмүнде көп үстүнликлери газаныпды. Ол оба яшайшы барада хич зат билмесе-де, маңа дурмуша чыкмага разы болды.

Гвен: Хава, оба дурмушына өвренишмек маңа гаты кын болды. Мениң дурмушым дүйбүнден өзгерди. Себәби мен инди гышын-язын сыгыр сагярдым, доңузлара ве товуклара ийм берйәрдим. Дейвид малдарчылыгың хәзирки заман тәрлерини өвренмек үчин докуз айлык окува гирди. Ол өе өрән гич гелйәрди, мениң болса йүрегим гысярды. Шол дөвүр илкинҗи перзендимиз Гиле дүнйә инди. Мен Дейвидиң маслахаты билен улаг сүрмеги өврендим. Бир гүн улаглы шәхере баряркам, өң дүканда ишлән Гал атлы таншымы гөрдүм.

Гал мәхир билен мени өйүне чай ичмәге чагырды. Шонда ол маңа той суратларыны гөркезди. Оларың арасында Патышалык залының өңүнде дүшүлен сурата мениң гөзүм дүшди. Мен Галдан мунуң хайсы бутханадыгыны сорадым. Ол өзүниң ве янёлдашының Ехованың Шаядыдыгыны айданда, мен өрән бегендим. Себәби какамың аял доганы хем Ехованың Шаядыды. Мениң какам юмшак адам болса-да, мәхирли аял доганына нәме үчин гахарланяндыгына дүшүнмейәрдим. Хатда какам онуң китапларыны газап билен хапа атылян бедрә-де зыңыпды.

Инди мен какамың аял доганының дининиң бейлеки динлерден нәмеде тапавутланяндыгыны билдим. Гал маңа Мукаддес Язгыларың нәме  өвредйәндигини дүшүндирди. Мен Үч йүзли таңры ве өлмейән рух ялы көп таглыматларың Мукаддес Язгылара гаршы гелйәндигини билип, гаты хайран галдым (Ваг. 9:5, 10; Яхя 14:28; 17:3). Шейле-де мен Мукаддес Язгыларда Худайың адыны илкинҗи гезек гөрдүм (Мүс. чык. 6:3).

Дейвид: Гвен билен затларыны маңа гүррүң берйәрди. Огланҗыккам какам маңа Мукаддес Язгылары окамалыдыгымы айярды. Шол себәпли биз Гал ве онуң янёлдашы Дерик билен Мукаддес Язгылар окувыны гечип башладык. Биз алты айдан соңра фермамызы кирейине бердик ве Шропшир этрабындакы Озуэстри шәхерине гөчүп бардык. Ол ерде биз Мукаддес Язгылар окувыны Дердре атлы уя билен довам этдик. Биз мал-гарамыз билен башагай болуп, рухы тайдан хаял өсйәрдик. Эмма хакыкат юваш-ювашдан йүрегимизе тәсир эдйәрди.

Гвен: Мен ырымчылдым ве маңа мундан эл чекмек гаты кын болды. Эмма Ишая 65:11-нҗи аят Ехованың «тәлей буты үчин сачак язянлара» нәхили гараяндыгыны дүшүнмәге көмек этди. Мен дога эдип, Ехованың көмеги билен дога-тумардан дынып билдим. Шейле-де мен «өзүни бейгелден песелер, өзүни песелден бейгелер» диен җүмләни оканымда, Ехованың нәхили адамлары говы гөрйәндигини билдим (Мат. 23:12). Инди мен ялңыз Оглуны гурбан берип, сөйги билен аладамызы эдйән Худая йүрекден гуллук этмек иследим. Шол дөвүрде икинҗи гызымыз дүнйә инди. Биз Җеннетде эбеди яшамага мүмкинчилигимизиң бардыгыны биленимизде өрән бегендик.

Дейвид: Маттаның 24-нҗи бабындакы ве Даныел китабындакы пыгамберликлериң ерине етйәндигини биленимде, мунуң хакыкатдыгына гөз етирдим. Шейле-де мен бу дүнйәде Ехова билен дост болмакдан башга гымматлы задың ёкдугына дүшүндим. Инди мен диңе өзүми дәл-де, машгаламың гадырыны билип башладым ве чилим чекмегими гойдум. Мен улы ферманы арзув эдйәрдим, йөне Филипилилер 2:4-нҗи аят маңа өз бәхбидиме чапман, Ехова гуллук этмеги биринҗи орунда гоймага көмек этди. Хер шенбе гүни агшам 10 километр узаклыкда гечирилйән йыгнак душушыгына гитмек аңсат дүшмейәрди, себәби биз сыгырлары сагмалыдык. Эмма Гвениң көмеги билен, биз йыгнак душушыкларындан хич хачан галмаярдык. Шейле-де хер екшенбе гүни ирден сыгырлары сагып боланымыздан соң, гызларымыз билен вагза гидйәрдик.

Бизиң дурмушымызы өзгертмегимиз доган-гарындашларымыза ярамады. Гвениң какасы онуң билен алты йыл геплешмеди. Мениң ата-энем болса Ехованың Шаятлары билен гатнашмагымызы ислемейәрди.

 Гвен: Ехова бизе кынчылыклара дөз гелмәге көмек этди. Озуэстри йыгнагындакы доган-уялар бизиң машгала агзамыз болды. Олар сынагларда сөйги билен бизи голдадылар (Лука 18:29, 30). Шейлеликде, биз 1972-нҗи йылда өзүмизи Ехова багыш эдип, сувда чокундырылдык. Мен хакыкаты хас көп адамлара айтмак үчин пионер гуллугына башладым.

Дейвид: Биз энчеме йыллап фермада арман-ядаман зәхмет чекйәрдик. Шейле-де биз Ехова гуллук этмек бабатда гызларымыза говы гөрелде гөркезмәге чалышярдык. Эмма шол дөвүрде хәкимиет тарапындан фермачылара мадды көмеги берилмән башлады, биз хем фермада ишлемегимизи бес этмели болдук. Биз бир яшындакы көрпе гызымыз билен өйсүз хем ишсиз галдык. Шонда Ехова дога эдип, көмек ве гөркезме бермегини сорадык. Биз машгаламызы эклемек үчин танс өвретмәге башладык. Йөне рухы затлар хемише биринҗи орунда дурярды. Нетиҗеде, үч гызымыз хем мекдеби тамамлап, пионер гуллугына башладылар. Биз муңа дийсең бегендик. Аялым пионер болуп гуллук эдйәрди ве чагалары хемише голдаярды.

Гил билен Дениз дурмуша чыкандан соң, биз танс өвретмегимизи гойдук ве филиала хат язып, көмегимизи хөдүрледик. Бизи Англияның гүнорта-гүндогарындакы шәхерлере ибердилер. Бизиң билен диңе Дебби гызымыз яшаярды, шонуң үчин менем пионер гуллугына башладым. Бәш йылдан соңра бизи демиргазыкдакы йыгнаклара көмек этмәге чагырдылар. Дебби дурмуша чыкандан соң, биз Зимбабведе, Молдовада, Венгрияда, Кот-д’Ивуареде он йыллап халкара гурлушык ишлерине гатнашдык. Биз Англия доланып, Лондондакы Бейтелиң гурлушык ишлеринде ишледик. Мениң малдарчылыкдан башым чыкяндыгы үчин, Бейтелиң фермасына-да көмек этдим. Хәзир биз Англияның демиргазык-гүнбатарында пионер болуп гуллук эдйәрис.

Гвен: Илкинҗи сайлан кәримиз балет тансы бизе вагтлайын шатлык берди. Эмма бизиң икинҗи сайлан эсасы кәримиз, ягны Ехова гуллук этмек хас көп шатлык берип, эбеди довам эдер. Мен хәзирем Дейвид билен кәрдеш. Себәби бизиң икимизем пионер болуп гуллук эдйәрис. Биз адамлара халас эдиҗи ве гымматлы хакыкаты өвренмәге көмек эдип, өзүмизи багтлы дуйярыс. Бу «маслахат хатлары» дүнйәдәки ислендик шөхратдан ёкарыдыр (2 Кор. 3:1, 2). Эгер хакыкаты билмедик болсак, онда бизиң өңки кәримизден диңе ягшы ятламалар, суратлар ве театр мейилнамалары галарды.

Дейвид: Биз Ехова гуллук эдип, дурмушымызы дүйбүнден өзгертдик. Мен Худайың көмеги билен, говы машгалабашы ве ата болдум. Мукаддес Язгыларда Меръемиң, Давут патышаның ве башга-да кәбир адамларың шатлыкдан яңа танс эдендиги барада айдыляр. Биз хем доган-уялар билен Ехованың тәзе дүнйәсинде шатлык билен танс этмәге сабырсызлык билен гарашярыс (Мүс. чык. 15:20; 2 Шам. 6:14).