HAN singko anyos kami ni Gwen, nag-aram kami pagsayaw. Diri pa kami magkakilala hito nga panahon. Pero samtang nagtutubo kami, pariho namon karuyag nga magin karera an pagsayaw hin ballet. Han nagin sikat na kami ngan haros maabot na namon an amon ambisyon, ginbayaan namon ito. Kay ano?

David: Natawo ako han 1945 ha probinsya han Shropshire, Inglatera. An akon tatay may uma ha mamingaw nga baryo. Pag-uuli ko tikang ha eskwelahan, nalilipay ako panubong ha mga manok ngan panguha han bonay hito pati ha pag-ataman ha mga baka ngan karnero. Kon bakasyon, nabulig ako ha pag-ani, usahay nagdadrayb pa ngani ako han amon traktor.

Kondi nagtikang ako pagpokus ha usa ko pa nga hilig. Naobserbaran ni Tatay nga bisan han bata pa ako, nasayaw ako kon nakakabati ako hin musika. Salit han singko anyos ako, ginsidngan niya hi Nanay nga ipaenrol ako ha usa nga dance school basi mahibaro ako han tap dancing. Nakita han akon instruktor nga may potensyal ako nga magin ballet dancer salit gintutdoan liwat niya ako pag-ballet. Han 15 anyos ako, nagdaog ako hin scholarship para ha sikat nga Royal Ballet School ha London. Didto ko nakilala hi Gwen, ngan nagin magpartner kami ha pagsayaw.

Gwen: Natawo ako han 1944 ha matawo nga syudad han London. Han bata pa ako, natoo gud ako ha Dios. Nagsari ako pagbasa han Biblia pero waray ko ito masabti. Han singko anyos ako, nag-eskwela ako ha usa nga dance school. Paglabay hin unom ka tuig, nagdaog ako ha usa nga kompetisyon nga gin-apihan hin mga parasayaw ha bug-os nga Britanya, nga an premyo amo an pakaeskwela ha The Royal Ballet School. Ini nga eskwelahan nahimumutang ha White Lodge, usa nga makaruruyag nga mansyon ha Richmond Park ha gawas han sentro han London. Didto gintutdoan ako ha akademya ngan ginbansay pagsayaw hin ballet hin kilala nga mga magturutdo. Han 16 anyos ako, nakaeskwela ako ha The Royal Ballet School nga nahimumutang ha sentro han London, ngan didto ko nakilala hi David. Ha sulod hin pipira ka bulan, magkaupod kami pagsayaw ha mga opera ha Royal Opera House ha Covent Garden ha London.

David: Sugad han ginsiring ni Gwen, tungod han amon karera, nakasayaw kami ha kilala nga Royal Opera House ngan ha London Festival Ballet (English National Ballet na yana). Usa han mga koryograper han Royal Ballet an nag-establisar hin internasyonal nga kompanya ha Wuppertal, Alemanya, ngan gin-upod niya kami basi magin mga parasayaw. Sinayaw kami ha mga teatro ha iba-iba nga nasud, ngan nakaupod pa ngani namon an kilala nga mga ballet dancer nga hira Margot Fonteyn ngan Rudolf Nureyev. Ini nga klase hin kinabuhi nga puro kompetisyon nagpapahinabo ha usa nga magin mapahitas-on, ngan nagin pokus gud kami ha amon karera.

 Gwen: Nakapokus gud an akon kinabuhi ha pagsayaw. Ambisyon namon ni David nga magin sikat. Nalilipay ako pagpirma hin mga autograph, pagkarawat hin mga bukad, ngan pagpamati han pagpakpak han magkirita. Komon ha teatro an imoralidad, panigarilyo, ngan pag-inom; ngan pariho ha iba dida ha teatro, sinarig ako ha akon mga panpaswerte.

David: Katapos hin damu ka tuig ha propesyon han pagsayaw, ginkapoy ako ha pagbiniyahe. Tungod kay nagdaku ako ha uma, ginhingyap ko an simple nga pagkinabuhi ha baryo. Salit han 1967, ginbayaan ko an akon karera ngan nagtrabaho ha usa nga daku nga uma hirani ha balay han akon mga kag-anak. Ginpapletehan ha akon han tag-iya han uma an usa nga gutiay nga balay. Katapos, gintawagan ko hi Gwen ha teatro ngan ginhangyo hiya nga magpakasal ha akon. Nagin solo na hiya nga parasayaw ngan nagtitikaopay pa gud an iya karera, salit nakurian hiya pagdesisyon. Bisan pa hito, nagpakasal hiya ha akon ngan nagkinabuhi kaupod ko ha baryo, nga iba gud ha iya nahiaraan.

Gwen: Diri masayon an pagpahiuyon ha kinabuhi ha uma. An pagkuha hin gatas ha mga baka ngan an pagtubong ha mga baboy ngan manok anoman an kahimtang han panahon iba gud ha akon nahiaraan. Nag-eskwela hi David ha sulod hin siyam ka bulan basi mahibaro han bag-o nga pamaagi ha pag-ataman hin hayop, ngan namimingaw ako ha magkulop nga waray hiya. Hito nga panahon, natawo an amon suhag nga hi Gilly. Tungod han suhestyon ni David, nag-aram ako pagdrayb. Ngan usa ka beses han binisita ako ha kahirani nga bungto, nakita ko hi Gael, nga nakilala ko han nagtrabaho hiya ha usa nga tindahan ha amon baryo.

Gin-imbitar ako ni Gael ha iya balay basi uminom hin semente. Ginpakita niya ha akon an mga retrato han iya kasal, ngan may usa nga retrato diin nakadto hira ha gawas hin bilding nga gintatawag nga Kingdom Hall. Ginpakianhan ko hiya kon kanan ano ito nga singbahan. Han nagsiring hiya nga Saksi ni Jehova hira nga mag-asawa, nalipay ako. Nahinumdoman ko nga Saksi an usa ko nga dadâ. Pero nahinumdoman ko liwat nga duro gud an kasina ni Tatay ha akon dadâ, ginlalabog pa ngani ha basurahan an iya mga literatura. Diri ko masabtan kon kay ano nga hi Tatay, nga makisangkayon man unta, nasina hinduro ha akon buotan nga dadâ.

Maopay na la kay nagkaada ako higayon nga hibaroan kon ano an kaibahan han gintotoohan han akon dadâ ngan han igintututdo han amon relihiyon. Iginpakita ha akon ni Gael kon ano gud an igintututdo han Biblia. Diri ako makatoo nga damu nga doktrina, sugad han Trinidad ngan imortalidad han kalag, an supak  ngay-an ha Kasuratan. (Ekles. 9:5, 10; Juan 14:28; 17:3) Nabasa ko liwat ha Biblia an ngaran han Dios, nga Jehova, ha siyahan nga higayon.—Eks. 6:3.

David: Iginsumat ha akon ni Gwen an iya mga hinbaroan. Nahinumdoman ko nga han bata pa ako, ginsidngan ako ni Tatay nga sadang ko basahon an Biblia. Salit, umuyon kami ni Gwen nga mag-aram han Biblia upod ni Gael ngan han iya bana nga hi Derrick. Paglabay hin unom ka bulan, binalhin kami ha Oswestry, nga sakop pa gihapon han Shropshire, tungod kay nakaplete kami didto hin gutiay nga uma. Didto, iginpadayon ni Deirdre an pagdumara ha amon hin pag-aram ha Biblia. Ha tinikangan, mahinay an amon pag-uswag. Sagipo gud kami ha pag-ataman han amon mga hayop. Bisan pa hito, hinay-hinay nga dinulot ha amon kasingkasing an kamatuoran.

Gwen: Usa han daku nga ulang ha akon an patootoo. Nakabulig ha akon an Isaias 65:11 nga hibaroan an panhunahuna ni Jehova hadton “nag-aandam hin lamesa” para ha dios han Swerte. Ginkinahanglan an panahon ngan mga pag-ampo antes ako nakaundang paggamit han akon mga panpaswerte ngan mga anting-anting. An paghibaro nga “an bisan hin-o nga nagpapahitaas pauubson, ngan an bisan hin-o nga nagpapaubos pahihitas-on” nakabulig ha akon nga masantop kon ano nga klase hin tawo an gin-uuyonan ni Jehova. (Mat. 23:12) Karuyag ko mag-alagad ha usa nga Dios nga nahigugma gud ha aton, nga tungod hito iginhatag niya an iya presyoso nga Anak sugad nga lukat. Hini nga panahon, nagkaada kami usa pa nga anak, ngan nalipay kami ha paghibaro nga an amon pamilya mahimo mabuhi hin waray kataposan ha paraiso nga tuna.

David: Han hinsabtan ko an urusahon nga katumanan han mga tagna ha Biblia, sugad han mababasa ha Mateo kapitulo 24 ngan ha libro han Daniel, nakombinse ako nga nabilngan ko na an kamatuoran. Nasantop ko nga hini nga sistema, waray na mas presyoso pa kay han pagkaada maopay nga relasyon kan Jehova. Salit paglabay han panahon, naibanan an akon pagin ambisyoso. Nasantop ko nga diri la an akon kalugaringon an importante kondi pati an akon asawa ngan mga anak. Hinbaroan ko ha Filipos 2:4 nga diri ako sadang magpokus ha akon kalugaringon la ngan ha akon hingyap nga magkaada mas daku nga uma. Lugod, sadang ko magin prayoridad an pag-alagad kan Jehova. Inundang ako pagsigarilyo. Pero diri masayon an pag-organisar han amon mga buruhaton basi makatambong ha katirok ha Sabado nga gab-i nga napulo ka kilometro an kahirayo tungod kay hito liwat nga mga oras kinahanglan namon kuhaan hin gatas an mga baka. Kondi ha bulig ni Gwen, waray gud kami pumalya pagtambong ha mga katirok ngan pag-upod ha amon mga anak ha pagsangyaw kada Domingo han aga—katapos kuhaan hin gatas an mga baka.

Waray malipay an amon mga paryente ha amon ginhimo nga mga pagbag-o. Waray makiistorya kan Gwen an iya tatay ha sulod hin unom ka tuig. An akon mga kag-anak nangalimbasog gihap nga pugngan kami ha pakig-upod ha mga Saksi.

 Gwen: Ginbuligan kami ni Jehova nga mailob ito nga mga pagsari. Ngan ha paglabay han panahon, an kabugtoan ha Oswestry Congregation nagin sugad hin amon bag-o nga pamilya, mahigugmaon nga ginsuportaran nira kami durante hiton makuri nga panahon. (Luc. 18:29, 30) Igindedikar namon an amon kinabuhi kan Jehova ngan nagpabawtismo han 1972. Karuyag ko gud makabulig ha damu nga tawo nga mahibaro han kamatuoran, salit nagpayunir ako.

David: Makapoy an trabaho ha amon uma; pero nangalimbasog kami nga magin maopay nga susbaranan ha amon mga anak ha pag-alagad kan Jehova. Ha urhi, tungod han pag-iban han pundo nga iginhahatag han gobyerno ha mga parauma, napiritan kami nga bayaan an amon uma. Nawad-an kami hin balay ngan trabaho, ngan usa ka tuig pa la an amon puto nga anak. Salit nag-ampo kami kan Jehova para hin bulig ngan giya. Nagdesisyon kami nga gamiton an amon talento ngan nag-abri kami hin dance studio basi masuportaran an amon pamilya. Nagbunga an amon determinasyon nga unahon an espirituwal nga mga butang. Makalilipay nga an tulo namon nga anak nagpayunir han natapos hira pag-eskwela. Payunir gihap hi Gwen salit nasuportaran niya hira ha kada adlaw.

Han nag-asawa an duha namon nga anak, hira Gilly ngan Denise, iginsara namon an dance studio. Nagsurat kami ha sanga nga opisina kon diin kami mahimo makabulig. Ginpakadto kami ha mga bungto ha sur-este han Inglatera. Tungod kay usa na la nga anak an amon kaupod, hi Debbie, nagpayunir na gihap ako. Paglabay hin lima ka tuig, ginhangyo kami nga bumulig ha iba nga kongregasyon ha hurohirayo nga bahin han norte. Han nag-asawa hi Debbie, nakapribilehiyo kami pagboluntaryo hin napulo ka tuig ha internasyonal nga programa han pagpanukod ha Zimbabwe, Moldova, Hungaryo, ngan Côte d’Ivoire. Katapos, binalik kami ha Inglatera basi bumulig ha konstruksyon ha Bethel ha London. Tungod han akon eksperyensya ha pag-uma, ginhangyo ako nga bumulig ha Bethel farm. Yana, payunir kami ha norte-weste han Inglatera.

Gwen: An siyahan nga nagin pokus han amon kinabuhi—an ballet—makalilipay kondi temporaryo la. An ikaduha ngan an pinakaimportante—an pag-alagad kan Jehova—naghahatag ha amon hin daku nga kalipay ngan waray ito kataposan. Magpartner pa gihapon kami yana, pero ginagamit na namon an amon mga tiil ha pagpayunir. An pagbulig ha mga tawo nga mahibaro han presyoso ngan nagtatalwas hin kinabuhi nga kamatuoran naghahatag ha amon hin daku nga kalipay. Ini nga “mga surat han rekomendasyon” mas maopay gud kay ha pagin kilala ha kalibotan. (2 Cor. 3:1, 2) Kon waray namon mabilngi an kamatuoran, bangin an amon la gintatag-iya yana amo an mga hinumdoman, daan nga mga retrato, ngan nakaimprinta nga mga programa ha teatro han amon karera hadto.

David: An amon karera ha pag-alagad kan Jehova nakagbag-o gud han amon kinabuhi. Maaram ako nga nakabulig ito ha akon nga magin mas maopay nga bana ngan tatay. An Biblia nasiring nga hira Miriam, Hadi David, ngan iba pa nagpahayag han ira kalipay pinaagi ha pagsayaw. Ngan hingyap gud namon, upod han damu nga iba pa, nga sumayaw tungod ha kalipay ha bag-o nga kalibotan ni Jehova.—Eks. 15:20; 2 Sam. 6:14.