1, 2. (a) Ano an ihinayag ni Jesus dapit sa huring mga aldaw? (b) Anong mga hapot an pag-uulayan ta?

SIGURADONG nakakaugmang eksperyensiya an magtukaw sa Bukid nin mga Olibo—na natatanaw an templo nin Jerusalem—mantang sinasabi ni Jesus an saro sa saiyang pinakainteresanteng marhay na mga hula. Atentibong marhay si Pedro, Andres, Santiago, asin Juan mantang sinasabi ni Jesus an saiyang hula na mangyayari sa harayuon pang panahon. Dakul siyang sinabi sa sainda manungod sa huring mga aldaw kan maraot na sistemang ini kan kinaban, an panahon na siya mamamahala sa Kahadian nin Diyos. Sinabi niya sa sainda na sa panahon na iyan, an saiyang “maimbod asin mapagmansay na uripon” an marepresentar sa saiya sa daga, na matao sa saiyang mga lingkod nin napapanahon na espirituwal na kakanon na kaipuhan ninda.—Mat. 24:45-47, NW.

² Dangan, sa iyo man sanang hula, isinaysay ni Jesus an parabula dapit sa sampulong daraga. (Basahon an Mateo 25:1-13.) Sa artikulong ini, mapokus kita sa mga hapot na ini: (1) Ano an panginot na mensahe  kan parabulang iyan? (2) Paano inaplikar kan maimbod na mga linahidan an sadol kan parabula, asin ano an nagin resulta? (3) Paano makikinabang an lambang saro sa sato ngunyan sa parabula ni Jesus?

3. Paano ipinapaliwanag kaidto kan satong mga literatura an parabula dapit sa sampulong daraga, na posibleng may anong resulta?

³ Naaraman ta sa nainot na artikulo na sa laog nin nakaagi pa sanang mga dekada, luway-luway na binabago kan maimbod na uripon an paagi nin pagpaliwanag sa Kasuratan na mas idinuduon an praktikal na aplikasyon kisa sa simboliko o makahulang mga kahulugan. Kun minsan, an mga literatura ta kaidto tinatawan nin espesipikong simbolikong mga kahulugan dawa an saradit na detalye sa parabula ni Jesus dapit sa sampulong daraga, kaiba na an mga lampara, lana, mga lalagan, asin iba pa. Pero, posible daw na nairarayo na kaiyan an pokus niyato sa simple asin importanteng mensahe kan parabula? Arog kan mahihiling niyato, importanteng marhay an simbag sa hapot na iyan.

4. Sa parabula, paano ta maaaraman kun siisay (a) an nobyo? (b) an mga daraga?

⁴ Aramon ta an panginot na mensahe ni Jesus sa parabulang ini. Inot, pag-ulayan ta an panginot na mga karakter. Siisay an nobyo sa parabula? Malinaw nanggad na si Jesus mismo ini. Iyo, huli ta sa sarong pagkakataon, inapod ngani ni Jesus an sadiri niya na nobyo! (Luc. 5:34, 35) Siisay man an mga daraga? Sa parabula, sinabi ni Jesus na paninimbagan kan mga daraga na magin andam asin siguraduhon na may laad an saindang mga lampara sa pag-abot kan nobyo. Mangnuhon na kaagid kaiyan an ipinagbuot ni Jesus sa saiyang sadit na aripumpon nin linahidan na mga parasunod: ‘Hagkusi nindo an saindong mga habayan, asin papaglaada nindo an saindong mga ilawan, asin magin kamong siring sa mga tawo na naghahalat kan saindang kagurangnan na magbalik hali sa kasal.’ (Luc. 12:32, 35, 36) Apuwera kaiyan, parehong pinasabngan si apostol Pablo asin apostol Juan na iagid an linahidan na mga parasunod ni Cristo sa mabining mga daraga. (2 Cor. 11:2; Kap. 14:4) Malinaw nanggad na isinaysay ni Jesus an parabula sa Mateo 25:1-13 tanganing magtao nin konseho asin patanid sa linahidan na mga parasunod niya.

5. Paano ipinarisa ni Jesus kun sa anong peryodo nin panahon maaplikar an saiyang parabula?

⁵ Ikaduwa, pag-ulayan ta an kalabot na panahon. Sa anong peryodo nin panahon minaaplikar an sadol ni Jesus? Nagtao sa sato si Jesus nin ideya sa pagtatapos kan parabula kun nuarin iyan: ‘Nagdatong an nobyo.’ (Mat. 25:10) Arog kan tinukar sa Hulyo 15, 2013 na isyu kan magasin na ini, sa hula ni Jesus sa Mateo kapitulo 24 asin 25, walong beses niyang sinambit an mapadapit sa saiyang ‘pagpadigdi,’ pagdatong, o pagbalik; sa kada pagsambit kaiyan, sarong porma kan iyo man sanang Griegong tataramon an ginamit. An pinanunungdan niya kan kada pagsambit niya kaiyan iyo an panahon kan dakulang kahurasaan na diyan maabot siya tanganing maghukom dangan laglagon an maraot na sistemang ini nin mga bagay. Kaya malinaw nanggad na an parabulang ini minaaplikar sa huring mga aldaw, pero an pagtatapos kaiyan mangyayari sa dakulang kahurasaan.

6. Basado sa konteksto, ano an panginot na mensahe kan parabula?

⁶ Ano an panginot na mensahe kan parabula? Girumdumon an konteksto. Katatapos pa sanang tukaron ni Jesus an manungod sa saiyang “maimbod asin mapagmansay na uripon.” An uripon na iyan iyo an sadit na grupo nin mga linahidan na manginginot sa mga parasunod ni Cristo sa panahon kan huring mga aldaw. Pinatanidan ni Jesus an mga lalaking idto na dapat sindang magdanay na maimbod. Sunod, ginamit niya an parabula tanganing sadulon an gabos niyang linahidan na mga parasunod sa huring mga aldaw na ‘magdanay sindang mapagbantay’ tanganing dai mawara an saindang mahalagang marhay na balos.  (Mat. 25:13, NW) Siyasaton ta na ngunyan an parabula asin aramon kun paano inaplikar kan mga linahidan an sadol kaiyan.

7, 8. (a) Anong duwang kuwalidad an nakatabang sa mapagmansay na mga daraga na magin andam? (b) Paano ipinapahiling kan mga linahidan na andam sinda?

⁷ Idinuduon sa parabula ni Jesus na bakong arog kan mga mangmang, an mapagmansay na mga daraga andam sa pag-abot kan nobyo. Taano? Huli sa duwang kuwalidad: pagigin andam asin pagigin mapagbantay. An mga daraga, na inasignaran na halaton an pag-abot kan nobyo sa banggi, kaipuhan na papagdanayon na may laad an saindang mga lampara asin magdanay na alerto sa gabos na oras kan halawig na paghalat sagkod na mag-abot an nobyo. Pero, bakong arog kan mga mangmang, talagang nag-andam an limang daraga asin nagdara nin ekstrang lana sa mga lalagan ninda kaiba kan saindang mga lampara. Nagin andam man daw an maimbod na mga linahidan?

⁸ Iyo nanggad! Sa bilog na panahon na ini kan huring mga aldaw, huminiro na arog kan mapagmansay na mga daragang idto an linahidan na mga Kristiyano, na andam tanganing maimbod na maisagibo an saindang asignasyon sagkod sa katapusan. Kinuwenta ninda an mga kaipuhan para sa maimbod na paglilingkod huling sa kapinunan pa sana, aram na ninda na an saindang asignasyon mangangahulugan na kaipuhan nindang isakripisyo an dakul na materyal na mga bentaha na makukua sa kinaban ni Satanas. Ki Jehova sana ninda idinusay an saindang sadiri asin naglilingkod sinda sa saiya bakong huli ta harani na an katapusan, kundi huli sa pagkamuot asin kaimbudan ninda sa saiya asin sa saiyang Aki. Pinagdadanay ninda an saindang integridad asin habo nindang arugon an kaisipan kan maraot na kinaban na ini, arog kan pagigin materyalistiko, imoral, saka makasadiri. Kaya, nagdadanay sindang andam, na padagos na nagliliwanag siring sa mga ilaw, na dai naaapektaran kan ano man na garo baga pagkaatraso kan pag-abot kan Nobyo.—Fil. 2:15.

9. (a) Paano nagpatanid si Jesus dapit sa natural na tendensiya nin pagtungka? (b) Paano naghimati an mga linahidan sa kurahaw na: ‘Uya na an nobyo’? (Hilingon man an nota sa ibaba.)

⁹ An ikaduwang kuwalidad na nakatabang sa mga daragang idto na magin andam iyo an pagigin mapagbantay. Posible daw na makaturog an indibidwal na linahidan na mga Kristiyano durante kan halawig na pagbantay na ini sa banggi? Iyo nanggad. Mangnuhon na sinabi ni Jesus na an sampulong daraga ‘gabos tinungka asin napaturog’ kan garo baga naaatraso an pag-abot kan nobyo. Aram ni Jesus na dawa andam asin grabe an pagmawot nin saro, puwede pa man giraray siyang maapektaran kan kaluyahan nin laman. Sinunod kan maimbod na mga linahidan an patanid na iyan asin mas lalong nagmaigot na magdanay na mapagbantay. Sa parabula, an gabos na daraga naghimati kan madangog an kurahaw na: ‘Uya na an nobyo!’ Pero an mga nagdanay sanang mapagbantay an nakatagal sagkod sa katapusan. (Mat. 25:5, 6; 26:41) Kumusta man an maimbod na mga linahidan ngunyan? Sa bilog na huring mga aldaw na ini, naghimati sinda sa makusog na ebidensiya kan garo baga pagkurahaw na, ‘Uya na an nobyo’—madali nang mag-abot. Nagtagal man sinda, na pirming andam sa pag-abot kan Nobyo. * Pero, an pagtatapos kan parabula nakapokus sa mas espesipikong peryodo nin panahon. Paano?

10. Anong nakakapaisip na hapot an minalataw huli sa pag-uulay kan mga mapagmansay asin mga mangmang na daraga?

¹⁰ An tibaad pinakanakakapaisip sa parabula  iyo idtong patapos na parte kaiyan, an pag-uulay kan mga mangmang asin mga mapagmansay na daraga. (Basahon an Mateo 25:8, 9.) Huli kan pag-uulay na iyan, minalataw an hapot na ini: “Kasuarin nangyari sa kasaysayan kan banwaan nin Diyos na dai tinabangan kan mga maimbod an mga naghahagad nin tabang?” Makukua ta an simbag kun kokonsideraron ta giraray kun sa anong peryodo nin panahon minaaplikar an parabula. Tandaan na sa lininaw na pakasabot niyato, si Jesus, an Nobyo, maabot tanganing maghukom sa panahon na madali nang matapos an dakulang kahurasaan. Kaya, bako daw na posibleng marhay na an pag-uulay na iyan nanunungod sa mga mangyayari bago an paghukom na iyan? Posibleng iyo man nanggad ta sa panahon na iyan an mga linahidan nag-ako na kan pangultimong pagtatak sa sainda.

11. (a) Ano an mangyayari bago magpuon an dakulang kahurasaan? (b) Ano an ipinaparisa kan pagsabi kan mapagmansay na mga daraga sa mga mangmang na magbakal sa mga paratinda nin lana?

¹¹ Kaya, bago magpuon an dakulang kahurasaan, an gabos na maimbod na linahidan sa daga nag-ako na kan pangultimong pagtatak sa sainda. (Kap. 7:1-4) Puon sa panahon na iyan, sigurado na an pag-apod sa sainda. Pero pag-isipan an mga taon bago magpuon an kahurasaan. Ano an mangyayari sa mga linahidan na dai nagdanay na mapagbantay asin nawara an saindang integridad? Mawawara sa sainda an langitnon na balos. Siyempre, dai sinda maako kan pangultimong pagtatak bago magpuon an kahurasaan. Sa panahon na iyan, an ibang mga maimbod lalahidan kan banal na espiritu bilang karibay ninda. Sa pagpuon kan kahurasaan, puwedeng mabigla an mga mangmang na iyan na mahiling an pagkalaglag kan Dakulang Babilonya. Tibaad sa panahon sanang iyan ninda marerealisar na bako palan sindang andam sa pag-abot kan Nobyo. Ano daw an mangyayari kun, huli sa grabeng kagipitan, mahagad sinda nin tabang sa matangang bangging iyan? Itinao kan parabula ni Jesus an nakakamundong simbag. Dai nagtugot an mapagmansay na mga daraga na itao an saindang lana sa mga mangmang, imbes sinabihan ninda an mga ini na magbakal sa mga paratinda nin lana. Pero tandaan na ‘matanga na’ kaidto. Makakakua pa daw sinda nin paratinda nin lana sa oras na iyan? Dai na. Talagang huri nang marhay.

12. (a) Sa panahon kan dakulang kahurasaan, ano an mangyayari sa siisay man na linahidan na nawara an integridad bago an pangultimong pagtatak? (b) Ano an kaaabtan kan mga magigin arog sa mangmang na mga daraga?

¹² Kaagid kaiyan, sa panahon kan dakulang kahurasaan, dai matatabangan kan maimbod na mga linahidan an siisay man na dai nagin maimbod. Mayo sindang makukuang tabang. Talagang huri nang marhay. Ano an kaaabtan ninda? Ipinaliwanag ni Jesus an nangyari kan maghali an mangmang na mga daraga tanganing magbakal nin lana: ‘Nagdatong an nobyo, asin an mga andam nagralaog kaiba niya [sa bangkete sa kasal], asin an tata pininto.’ Pag-abot kan Cristo sa saiyang kamurawayan sa panahon na madali nang matapos an kahurasaan, titipunon niya sa langit an saiyang maimbod na mga linahidan. (Mat. 24:31; 25:10; Juan 14:1-3; 1 Tes. 4:17) Kaya talagang seserahan nin pinto an mga bakong maimbod, na magigin arog kan mangmang na mga daraga. Garo baga makururahaw sinda: “Kagurangnan, Kagurangnan, bukasi kami”! Pero sisimbagon sinda arog kan isinimbag sa dakul na arog-kanding sa oras na iyan nin paghukom: “Sa katotoohan ako nagsasabi saindo, Dai ko kamo namimidbid.” Makamumundo nanggad!—Mat. 7:21-23; 25:11, 12.

13. (a) Taano ta dai ta maikokongklusyon na dakul sa mga linahidan na parasunod kan Cristo an magigin bakong maimbod? (b) Taano ta masasabi na an patanid ni Jesus kapahayagan man kan saiyang pagtitiwala? (Hilingon an ritrato sa kapinunan kan artikulo.)

¹³ Ano an maikokongklusyon niyato sa napag-ulayan tang ini? Buot daw sabihon ni Jesus na dakul sa linahidan na mga lingkod niya an magigin bakong maimbod kaya kaipuhan na salidahan? Dai. Tandaan na pinatanidan pa sana niya an saiyang “maimbod asin mapagmansay na uripon”  na nungkang magin maraot na uripon. Pero dai buot sabihon kaiyan na iyan an inaasahan niyang mangyayari. May mapuwersang patanid man an parabulang ini. Kun paanong limang daraga an mangmang asin limang daraga an mapagmansay, an kada linahidan may kakayahan na magpili na magin andam asin mapagbantay o magin mangmang asin bakong maimbod. Pinasabngan man si apostol Pablo na magtao nin kaagid kaiyan na patanid kan kaulay niya an kapwa linahidan na mga Kristiyano. (Basahon an Hebreo 6:4-9; ikumparar an Deuteronomio 30:19.) Mangnuhon na prangkang marhay an patanid ni Pablo, pero sinundan niya iyan nin mamumuton na kapahayagan kan saiyang pagtitiwala na igwang ‘urog karahay na mga bagay’ na naghahalat sa saiyang Kristiyanong mga tugang. Siring man, itinao an patanid sa parabula ni Jesus na may mamumuton na pagtitiwala. Aram ni Cristo na kaya kan lambang linahidan na mga lingkod niya na magdanay na maimbod asin mag-ako nin nakakaugmang balos!

14. Taano ta makikinabang man an ‘ibang mga karnero’ sa parabula dapit sa sampulong daraga?

¹⁴ Huling itinao ni Jesus sa saiyang linahidan na mga parasunod an parabula dapit sa sampulong daraga, maninigo daw niyatong ikongklusyon na dai makikinabang sa parabulang ini an ‘ibang mga karnero’ ni Cristo? (Juan 10:16) Dai nanggad! Girumdumon na an mensahe kan parabula simple sana: “Magdanay kamong mapagbantay.” Para sana daw iyan sa mga linahidan? Sinabi kaidto ni Jesus: “An sinasabi ko sa saindo, sinasabi ko sa gabos: Magdanay kamong mapagbantay.” (Mar. 13:37, NW) Kahagadan ni Jesus sa gabos na parasunod niya na andamon an saindang puso tanganing maimbod na makapaglingkod asin maabot an parehong pamantayan nin pagigin mapagbantay. Kaya sinusundan kan gabos na Kristiyano an mga linahidan sa bagay na ini, na inaarog an magayon na halimbawa ninda asin iniinot an ministeryo sa saindang buhay. Puwede man isaisip kan lambang saro sa sato na an mangmang na mga daraga naghagad nin lana sa mapagmansay na mga daraga. An saindang paghagad nagpapagirumdom sa sato na mayo nin siisay man an puwedeng magin maimbod para sa sato, magdanay sa katotoohan para sa sato, o magdanay na mapagbantay para sa sato. An lambang saro sa sato maninimbag sa matanos na Hukom na ninombrahan ni Jehova. Dapat kitang magin andam. Asin madali na siyang mag-abot!

15. Taano ta nauugma an gabos na tunay na Kristiyano sa mangyayaring kasal kan Cristo sa saiyang nobya?

¹⁵ Makikinabang man an gabos na Kristiyano sa importanteng okasyon sa parabula ni Jesus. Tutal, siisay sa sato an dai nauugma sa mangyayaring kasal na iyan? Masakat sa langit an mga linahidan; pagkatapos kan giyera nin Armagedon, magigin sindang nobya kan Cristo. (Kap. 19:7-9) An gabos na nasa daga sa panahon na iyan makikinabang sa kasal na iyan sa langit, huling garantiya iyan nin sarong perpektong gobyerno para sa gabos. Ano man an satong paglaom sa maabot na panahon, sa langit man o sa daga, magin determinado kita na makanuod sa mahalagang marhay na leksiyon kan parabula dapit sa sampulong daraga. Magin handa kita paagi sa pag-andam kan satong puso asin pagdanay na marigon saka mapagbantay, tanganing makamtan ta an mamuraway na paglaom na itinatagama sa sato ni Jehova!