1, 2. (a) Met Jesus a pwáraatá usun ekkewe ránin lesópwólóón? (b) Ikkefa ekkewe kapas eis sipwele pwóróus wóón?

 SÓTUN anchangei án Jesus mómmóót wóón ewe Chuukun Olif me nennetiwei ewe imwenfel lón Jerusalem. Lón ena atun Petrus, Andru, James, me Johannes ra nóm ren. Iir ra fókkun aúselingéch ngeni Jesus atun a ereniir eú oesini mi amwasangasang usun mwachkkan. Ena oesini a pwáraatá met epwe fis atun ekkewe ránin lesópwólóón ei ótót mi ngaw lupwen Jesus epwe nemenem lón án Kot we Mwú. Jesus a ereniir pwe lón ena fansoun mi kkóló aúchean, néún we “chon angang mi allükülük o tipachem” epwe wisen tupuni i wóón fénúfan me epwe awora ngeni néún kewe chón káé ener mwéngé lón pekin lúkú lón fansoun mi fich.—Mat. 24:45-47.

² Iwe, lón ena chék pwal oesini, Jesus a ereniir ewe kapas áwewe usun ekkewe engol fépwúl. (Álleani Mateus 25:1-13.) Lón ei lesen, sipwe pwóróus wóón ekkeei kapas eis: (1) Ifa ewe pwóróus mi lamot lón ei kapas áwewe? (2) Ifa usun ekkewe mi kepit ra fen apwénúetá ewe kapasen éúréúr lón ei kapas áwewe, iwe met  mwirilóón? (3) Ifa usun emén me emén kich ikenái sia tongeni kúna feiéch seni án Jesus ei kapas áwewe?

3. Mesemwan, ifa usun néúch kewe puk ra kan áweweei ewe kapas áwewe usun ekkewe engol fépwúl, iwe, neman met mwirilóón?

³ Lón ewe lesen akkomw mwen ei, sia káé pwe lón ekkewe ier kukkuto chék, ewe chón angang mi alúkúlúk a siwili napanapen áweween ekkóch pwóróus lón Paipel. Iei, ewe chón angang mi alúkúlúk a kan menlapei ekkewe lesen mi álilliséch sia tongeni káé seni ekkewe kapas áwewe, nge ese kon nefotofot wóón met ra tongeni liosuetá lón pekin oesini. Áwewe chék ren án Jesus we kapas áwewe usun ekkewe engol fépwúl. Mesemwan, néúch kewe puk ra apasa pwe ekkewe lamp, aléléér, me ekkewe rume ra wewe ngeni emén are och mettóch. Iwe nge, pokiten ra kon menlapei ekkewe kúkkún kinikin lón ena kapas áwewe, esap pwe a tongeni atopotopaaló ewe lesen mi mecheres me atapwalapwal? Pélúwen ena kapas eis a mmen lamot.

4. Lón ewe kapas áwewe, pwata sia silei ika (a) ié ewe mwán apwúpwúlú sefé? (b) ié ekkewe fépwúl?

⁴ Sipwele etittina ekkewe pwóróus mi lamot lón án Jesus we kapas áwewe. Áeúin, ekieki usun ekkewe aramas lón ewe kapas áwewe usun ekkewe engol fépwúl. Ié ewe mwán apwúpwúlú sefé? Jesus. Sia silei ena pokiten me mwan, Jesus a fósun pwisin i pwe i ewe mwán apwúpwúlú sefé. (Luk. 5:34, 35) Ié ekkewe fépwúl? Ikkena iir ekkewe Chón Kraist mi kepit, chón ewe “mwich mi kisikis.” Pwata sia silei ena? Lón ena kapas áwewe, a lamot ekkewe fépwúl repwe mmólnetá ngeni warotoon ewe mwán apwúpwúlú sefé me néúr kewe lamp repwe chék kkúkkú. Nengeni met Jesus a ereni néún kewe chón káé mi kepit: “Oupwe anükü üfemi o molotä ngeni mine epwe fis, oupwe atina nöümi lamp pwe epwe tin, pwe oupwe usun chök ekewe chon angang mi witiwiti nöür we masta an epwe liwinto seni eu fetalapen apwüpwülü.” (Luk. 12:32, 35, 36) Pwal eú, ekkewe aposel, Paulus me Johannes, ra apépééi ekkewe mi kepit chón tapweló mwirin Kraist ngeni ekkewe fépwúl mi limeliméch. (2 Kor. 11:2; Pwär. 14:4) Iwe, a ffat pwe ewe kapas áwewe lón Mateus 25:1-13, ina eú kapasen fén me éúréúr ngeni néún Jesus kewe chón káé mi kepit.

5. Ifa usun Jesus a pwári ngenikich ewe fansoun epwe pwénútá an we kapas áwewe?

⁵ Oruuan, án Jesus we kapasen éúréúr a weneiti menni fansoun? Minne Jesus a apasa lemuchúlóón an we kapas áwewe a álisikich le silei. A apasa: “Ewe mwän apwüpwülü söfö a war.” (Mat. 25:10) Sia káé me lón Ewe Leenien Mas minen July 1, 2013, usun án Jesus we oesini lón Mateus sópwun 24 me 25 mi fós fán walu usun án Jesus “feito,” “war,” “wareto,” are “liwinsefäl.” Lón iteiten ekkena walu leeni lón ekkena wokisin, ewe kapas a néúnéú a feito seni eú chék kapasen Krik. Lupwen Jesus a fós usun an “war,” a fósun ewe fansoun epwe feito pwe epwe apwúngú me nieló chón ei ótót mi ngaw. Iwe, sia tongeni apwúngaló pwe án Jesus we kapas áwewe a weneiti ekkewe ránin lesópwólóón, nge i epwe “war” atun ewe riáfféú mi lapalap.

6. Ifa ewe pwóróus mi lamot lón ewe kapas áwewe?

⁶ Ifa ewe pwóróus mi lamot sia káé seni ewe kapas áwewe? Chechchemeni met a mak lón ekkewe wokisin mwan lón Mateus sópwun 24. Jesus a kerán fós usun “ewe chon angang mi allükülük o tipachem.” Ena chón angang epwe wewe ngeni eú kúkkún mwichen mwán mi kepit epwe wisen emmwen lein néún Kraist kewe chón tapweló mwirin lón ekkewe ránin lesópwólóón. Jesus a éúréúra ekkena mwán  pwe a lamot ar repwe akkamwéchú ar tuppwél. Lón ewe sópwun mwirin, Jesus a áeá ewe kapas áwewe usun ekkewe engol fépwúl pwe epwe éúréúra meinisin néún kewe chón káé mi kepit lón ekkewe ránin lesópwólóón. Ewe lesen seni ena kapas áwewe, ina ar repwe “mamasa” pwe ete péút seniir ar we feiéch le kúna manaw lón láng. (Mat. 25:13) Iei, sipwele etittina ewe kapas áwewe me ppii ifa usun ekkewe mi kepit ra apwénúetá ewe kapasen éúréúr seni.

7, 8. (a) Pwata ekkewe fépwúl mi tipachem iir mi mmólnetá? (b) Ifa usun ekkewe mi kepit ra mmólnetá?

⁷ Lón án Jesus we kapas áwewe, i a menlapei pwe ekkewe fépwúl mi tipachem ra mmólnéch lupwen ewe mwán apwúpwúlú a war, nge rese usun ekkewe fépwúl mi tiparoch. Pwata? Pokiten iir ra fen mmólnetá me fókkun mammasa. Mi lamot pwe meinisin ekkewe engol fépwúl repwe mammasa me túmúnú pwe néúr kewe lamp repwe chék kkúkkú lón ena pwinin. Ekkewe nimmén fépwúl mi tipachem rese usun ekkewe mi tiparoch pún iir ra mmólnetá le uwei aléléén néúr kewe lamp. Ifa usun ekkewe Chón Kraist mi kepit mi tuppwél ra mmólnetá ngeni án Jesus waroto?

⁸ Ekkewe Chón Kraist mi kepit ra mmólnetá le apwénúetá wiser tori lesópwólóón. Ra mirititi pwe lón ar angang ngeni Jiowa a lamot repwe pennúkúóló ewe kinamwe a tongeni toto ngeniir me ren wéún án Satan ei ótót. Iwe ina met ra féri. Ra tipeppós le angang ngeni Jiowa fán tuppwél pokiten ra tongei i me Néún we nge esap pokiten a arapoto sópwólóón ei ótót. Ra akkamwéchú ar tuppwél me rese mut ngeni ekiekin chón ei fénúfan an epwe etipetiper, chókkewe mi tongei pisek, féfféringaw, me ekieki chék pwisin iir. Ekkewe mi kepit ra usun ekkewe fépwúl mi tipachem mi mmólnetá fán néúr kewe lamp. Ikaamwo ewe Mwán Apwúpwúlú Sefé usun itá a mmangoto, nge iir ra fókkun sassaramaram me mosonottam le witiwiti warotoon.—Fil. 2:15.

9. (a) Ifa ewe éúréúr Jesus a eáni usun eiessum? (b) Ifa usun ekkewe mi kepit ra rongosich ngeni ewe kékké: “A war ewe mwän apwüpwülü söfö”? (Pwal ppii ewe footnote.)

⁹ Ekkewe fépwúl mi tipachem ra pwal mmólnetá ngeni warotoon ewe mwán apwúpwúlú sefé ren ar mammasa. Nge lón ewe kapas áwewe, meinisin ekkewe engol fépwúl “ra aiesum o möür” atun ra wikkitiwiti ewe mwán apwúpwúlú sefé nge usun itá a mmangoto. Iwe met, ekkewe Chón Kraist mi kepit ikenái itá resap pwal tongeni “möür” ren ar túmúnúngawoló atun ra wikkitiwiti warotoon Kraist? Ewer. Jesus a silei pwe pwal mwo nge emén aramas mi tipemecheres me mwasangasang a tongeni apwangapwangoló me túmúnúngawoló atun a wikkitiwiti an waroto. Iwe, ekkewe Chón Kraist mi kepit mi tuppwél ra alapaaló ar achocho le mammasa. Ifa usun? Lón ewe kapas áwewe, meinisin ekkewe engol fépwúl ra rongosich ngeni ewe kékké: “A war ewe mwän apwüpwülü söfö.” Nge ekkewe chék fépwúl mi tipachem iir ra mammasa tori lesópwólóón. (Mat. 25:5, 6; 26:41) Pwal ina chék usun, lón ekkewe ránin lesópwólóón, ekkewe Chón Kraist mi kepit mi tuppwél ra rongosich ngeni ewe kékké: “A war ewe mwän apwüpwülü söfö.” Ra etiwa ekkewe pisekin ánnet mi fataffatéch mi pwáraatá pwe Jesus epwele feito, me ra mmólnetá ngeni an war. * Iei sipwele etittina  met Jesus a erá lemuchúlóón an we kapas áwewe, ewe mi weneiti eú fansoun mi tichik.

10. Menni kapas eis a tongeni ppiitá ren ewe pwóróusfengen lefilen ekkewe fépwúl mi tipachem me ekkewe mi tiparoch?

¹⁰ Arap ngeni lesópwólóón ewe kapas áwewe, ekkewe fépwúl mi tiparoch ra tingor aléléén néúr kewe lamp seni ekkewe mi tipachem. Nge ekkewe mi tipachem rese mochen álisiir. (Álleani Mateus 25:8, 9.) Nge ineet atun ekkewe mi kepit mi tuppwél resap mochen álisi emén mi osupwang? Chechchemeni ewe fansoun ewe kapas áwewe a weneiti. Jesus, ewe Mwán Apwúpwúlú Sefé, epwe war fán iten ewe angangen kapwúng arap ngeni lesópwólóón ewe riáfféú mi lapalap. Iwe, neman ewe pwóróusfengen lefilen ekkewe fépwúl a weneiti met epwe fis me mwen chék muchúlóón ewe riáfféú mi lapalap. Pwata sia erá ena? Pún me mwen ena fansoun ra fen angei ar we sáingolóón pwaau.

11. (a) Met epwe fis me mwen chék poputáán ewe riáfféú mi lapalap? (b) Met weween án ekkewe fépwúl mi tipachem ereni ekkewe mi tiparoch ar repwe ló me kamé aléléén néúr kewe lamp?

¹¹ Iwe, me mwen poputáán ewe riáfféú mi lapalap, meinisin ekkewe mi kepit mi tuppwél wóón fénúfan repwe angei ar we sáingolóón pwaau. (Pwär. 7:1-4) Seni ena atun, a ffat pwe repwele feitá láng. Nge ekieki usun ekkewe ier me mwen ewe riáfféú mi lapalap. Met epwe fis ngeni ekkewe mi kepit rese mammasa me akkamwéchú ar tuppwél? Iir resap angei ar sáingolóón pwaau. Iwe, me mwen ena fansoun, pwal ekkóch Chón Kraist mi tuppwél repwe kepit pwe repwe siwiliir. Lupwen ewe riáfféú mi lapalap epwe poputá, ekkewe mi tiparoch neman repwe rúké lupwen ra kúna katalóón Papilon mi Lapalap. Neman lón ena chék atun repwe kerán mirititi pwe rese mmólnetá ngeni án Jesus waroto. Iwe, met epwe fis ika ra tingor álillis lón ena fansoun? Pélúwan a nóm lón ewe kapas áwewe. Ekkewe fépwúl mi tipachem rese mochen fangóló aléléén néúr kewe lamp ngeni ekkewe fépwúl mi tiparoch, ra fen ereniir ar repwe ló kamé pwisin ar. Pokiten a fen ‘lukenipwin,’ iwe, esap chúen wor chón amémé ngeniir. A fen serlupwan!

12. (a) Atun ewe riáfféú mi lapalap, ekkewe mi kepit ra tongeni álisi emén mi fen kepit ese akkamwéchú an tuppwél tori ewe sáingolóón pwaau? Pwata? (b) Met epwe fis ngeni chókkewe mi usun ekkewe fépwúl mi tiparoch?

¹² Atun ewe riáfféú mi lapalap, ekkewe mi kepit mi tuppwél resap tongeni álisi emén ese akkamwéchú an tuppwél. Epwele fen serlupwan. Iwe, met epwe fis ngeni ena emén ese tuppwél? Nengeni met a fis ngeni ekkewe fépwúl mi tiparoch mi ló kamé aléléén néúr kewe lamp: “Ewe mwän apwüpwülü söfö a war. Iwe, ekewe limman föpwül mi molotä ra eti le tolong lon ewe imwen kametipen apwüpwülü, mürin ewe asam a kapüngüla.” Lupwen Jesus epwe waroto lón lingan arap ngeni lesópwólóón ewe riáfféú mi lapalap, i epwe ionifengeni ekkewe mi kepit mi tuppwél ngeni manaw lón láng. (Mat. 24:31; 25:10; Joh. 14:1-3; 1 Tes. 4:17) Nge i esap etiwa ekkewe rese tuppwél. Usun chék ekkewe fépwúl mi tiparoch, neman repwe apasa: “Samol, samol, kose mochen suki ngenikem asam.” Nge met Jesus epwe ereniir? Epwe ereniir met a pwal ereni chómmóng aramas mi usun siike: “Enlet, üpwe ürenikemi, üsap fokun silekemi.” A ifa me solapan!​—Mat. 7:21-23; 25:11, 12.

13. (a) Pwata ese lamot ach sipwe apwúngaló pwe chómmóng me lein ekkewe mi kepit chón tapweló mwirin Kraist resap akkamwéchú ar tuppwél? (b) Pwata sia tongeni erá pwe án Jesus we kapas áwewe a pwáraatá an lúkúlúk wóón ekkewe Chón Kraist mi kepit? (Ppii ewe sasing lepoputáán ei lesen.)

¹³ Itá weween alon Jesus pwe chómmóng me lein ekkewe mi kepit resap akkamwéchú ar tuppwél  me a lamot epwe wor chón siwiliir? Aapw. Lón Mateus 24, sia kúna pwe Jesus a éúréúra ewe chón angang mi alúkúlúk me tipachem an esap wiliti chón angang mi ngaw. An erá ena, ese sótun erenikich pwe epwe fis. Usun chék ewe kapas áwewe usun ekkewe engol fépwúl, eú minen éúréúr. Usun chék ekkewe nimmén fépwúl mi tiparoch me ekkewe nimmén mi tipachem, a lamot emén me emén Chón Kraist mi kepit epwe filatá an epwe mmólnetá me mammasa. Ika ese, iwe a tongeni wiliti emén mi tiparoch me ese chúen tuppwél. Paulus a pwal eáni ena esin éúréúr ngeni chienan kewe Chón Kraist mi kepit. (Álleani Ipru 6:4-9; apépééi ngeni Tuteronomi 30:19.) An we éúréúr a tuwenewen, nge a pwal lúkúlúk pwe chienan kewe repwe angei ar kewe feiéch. Pwal ina chék usun ewe éúréúr seni ewe kapas áwewe, a pwáraatá pwe Jesus a lúkúlúk wóón ekkewe mi kepit. A silei pwe emén me emén néún kewe chón angang mi kepit ra tongeni akkamwéchú ar tuppwél me angei ewe feiéch mi kkóló aúchean!

14. Pwata ewe kapas áwewe usun ekkewe engol fépwúl a tongeni pwal álisi ekkewe ‘ekoch sip’?

¹⁴ Án Jesus we kapas áwewe a weneiti ekkewe mi kepit. Nge met, ekkewe ‘ekoch sip’ resap pwal tongeni kúna álillis seni? (Joh. 10:16) Ewer, ra tongeni! Ewe lesen lón ewe kapas áwewe a mecheres: “Mamasa.” Fán eú Jesus a pwal erá: “Mine üa ürenikemi, üa üreni aramas meinisin: Oupwe mamasa.” (Mark. 13:37) Jesus a kútta seni meinisin néún kewe chón káé ar repwe mmólnetá me mammasa. Me meinisin Chón Kraist ra tongeni áppirú ewe leenien áppirú mi múrinné ekkewe mi kepit ra isetiw, ekkewe mi akkomwa lón manawer ewe angangen afalafal. Chechchemeni pwe ekkewe fépwúl mi tiparoch ra tingorei ekkewe mi tipachem ar repwe ngeniir aléléén néúr kewe lamp. Nge ar tingor ese ketiw. Ena mettóch a áchema ngenikich lamoten án emén me emén leich epwe akkamwéchú an tuppwél ngeni Kot, mmólnetá, me sópweló le mammasa. Ese wor emén a tongeni féri ekkena mettóch fán itach. Emén me emén leich epwe pwisin pwáraatá féfférún mwen mesen ewe Soukapwúng mi pwúng, Jesus Kraist, ewe epwele war. Iwe, a lamot sipwe mmólnetá!

15. Pwata meinisin Chón Kraist mi enlet ra mwétéresiti án Kraist apwúpwúlú ngeni pwúlúwan we?

¹⁵ Chón Kraist meinisin ra mwétéresiti ewe apwúpwúlú, ewe Jesus a fós usun lón an we kapas áwewe. Lón mwachkkan, mwirin ewe maunen Armaketon, ekkewe Chón Kraist mi kepit repwe wiliti pwúlúwen Kraist. (Pwär. 19:7-9) Meinisin mi nóm wóón fénúfan repwe kúna feiéch seni ena apwúpwúlú lón láng. Pwata? Pokiten a alúkúlúkú pwe epwe wor eú mwú mi unuséch fán iten aramas meinisin. Ese lifilifil ika sia eáni ewe ápilúkúlúkún kúna manaw esemuch lón láng are wóón fénúfan, nge sipwe chék tipeppós le mmólnetá me sópweló le mammasa. Ika sia féri ena, sia tongeni pwapwaiti ena fansoun mi echipwér Jiowa a ammólnatá fán itach!