1, 2. a) ¿Mbaʼépa heʼi kuri Jesús oikotaha koʼã ára pahápe? b) ¿Mbaʼépa ñahesaʼỹijóta ko artíkulope?

JESÚS oguapy hína pe sérro Olivotýpe. Upe guive ojekuaa pe témplo oĩva Jerusalénpe. Hendive oĩ cuatro ijapóstol: Pedro, Andrés, Santiago ha Juan. Upépe Jesús oñepyrũ oexplika chupekuéra peteĩ profesía iñimportantetereíva oñekumplítava haʼe ogoverna rire Ñandejára Rréinope ha ko múndo aña oñehundi potaite vove. Jesús heʼi ijapostolkuérape umi ára pahápe oĩtaha peteĩ “tembiguái jeroviaha ha iñarandúva”, omeʼẽtava kristianokuérape aliménto espirituál hiʼoraitépe (Mat. 24:45-47).

² Upe rire omombeʼu chupekuéra pe istória oñeʼẽva umi 10 kuñataĩre (elee Mateo 25:1-13). Ko artíkulope ñahesaʼỹijóta ko parávola ha ñambohováita mbohapy porandu. Primero, ¿mbaʼe leksiónpa Jesús omboʼese omombeʼúrõ guare ko istória? Segundo, ¿mbaʼéichapa umi unhído okumpli oñehaʼarõva chuguikuéra, ha mbaʼépa ohupytýta hikuái upe haguére? Tercero,  ¿mbaʼéichapa koʼág̃a opavavénte ikatu ñañevenefisia pe istóriagui?

3. a) ¿Mbaʼéichapa ñane puvlikasionkuéra oexplika vaʼekue pe istória oñeʼẽva umi 10 kuñataĩre? b) ¿Mbaʼérepa ñane puvlikasionkuéra noñeʼẽguasuvéi umi detállere?

³ Pe artíkulo ñahesaʼỹijo vaʼekuépe kóva mboyve, jahecha kuri ymave ñane puvlikasionkuéra oñesentrave hague oexplika hag̃ua mbaʼépa orrepresenta umi detálle oĩva káda istóriape. Péro koʼág̃a oñeʼẽve umi leksión ikatúvare ñaaprende umívagui. Ñapensamíntena pe rreláto oñeʼẽvare umi 10 kuñataĩre. Yma ningo ojeʼe umi detálle mimi oĩva ko istóriape orrepresentaha ótra kósa iñimportantevéva, por ehémplo umi lámpara, pe aséite ha umi mbaʼyruʼi oñemoĩha aséite. Péro oñesentraitereívo koʼã mbaʼére, sapyʼánte ojeperde kuri pe leksión iñimportantevéva. Upévare ko artíkulope nañañeʼẽmoʼãvéima umi detállere, síno jahecháta mbaʼépa ñanemboʼe pe rreláto ha mbaʼéichapa ideprovécho koʼã tiémpope.

4. a) ¿Mávapa pe nóvio, ha mbaʼérepa jaʼe upéva? b) ¿Mávapepa orrepresenta umi kuñataĩ, ha mbaʼéicha rupípa jaikuaa upéva?

⁴ Ikatu hag̃uáicha ñantende mbaʼe leksiónpa Jesús omboʼese vaʼekue, tekotevẽ jaikuaa mávapa hína umi persóna oñemensionáva pe rrelátope. ¿Mávapa pe nóvio? Pe nóvio hína Jesús. ¿Mbaʼérepa jaʼe upéva? Peteĩ jey haʼe voi oñekompara peteĩ nóviore (Luc. 5:34, 35). ¿Ha mávapa umi kuñataĩ? Umíva hína umi “ovechakuéra mbovymi” térã umi kristiáno unhído. ¿Mbaʼéicha rupípa jaikuaa upéva? Pe rrelátope heʼi pe nóvio og̃uahẽvo, umi kuñataĩ oĩma vaʼerãha preparáda ilamparakuéra reheve. Peteĩ jey Jesús heʼi vaʼekue isegidorkuéra unhídope: “Peñemonde, pejeprepara ha pemyendy pene lámpara. Peime vaʼerã oĩháicha umi kuimbaʼe ohaʼarõva ipatrónpe og̃uahẽ kasamientohágui” (Luc. 12:32, 35, 36). Avei apóstol Pablo okompara vaʼekue unhidokuérape peteĩ kuñataĩ vírhen rehe (2 Cor. 11:2, nóta). Upéicharõ, Jesús omombeʼu vaʼekue pe istória oñeʼẽva umi kuñataĩre, oñemoñeʼẽ hag̃ua umi unhídope.

5. a) ¿Arakaʼépa oñekumpli pe rreláto oñeʼẽva umi 10 kuñataĩre? b) ¿Mbaʼérepa jaʼe upéva?

⁵ ¿Arakaʼépa oñekumpli pe rreláto oñeʼẽva umi 10 kuñataĩre? Oñekumpli koʼã ára pahápe, ha pe párte finál oĩva pe rrelátope oñekumplíta pe jehasa asy guasúpe. ¿Mbaʼérepa jaʼe upéva? Jesús omohuʼãvo pe istória heʼi kuri: “Og̃uahẽ pe nóvio” (Mat. 25:10). Ñemañaha 15 de julio de 2013, ohechauka kuri Mateo kapítulo 24 ha 25-pe Jesús ocho vése voi heʼi hague ‘og̃uahẽha’ térã ‘ouha’. Jaikuaaháicha, upéva oñekumplíta hína pe jehasa asy guasúpe, Jesús ou vove oporohusga hag̃ua ha ohundi hag̃ua ko múndo aña. Upévare jaʼekuaa pe parávola oñeʼẽva umi 10 kuñataĩre oñekumpliha koʼã ára pahápe ha prinsipálmente pe jehasa asy guasu aja.

6. ¿Mbaʼépa omboʼese vaʼekue Jesús omombeʼúrõ guare pe rreláto oñeʼẽva umi 10 kuñataĩre?

⁶ Ñantende hag̃ua mbaʼépa omboʼese vaʼekue Jesús ko rreláto rupive, ñanemanduʼa vaʼerã mbaʼéicha rupípa haʼe omombeʼu ko istória. Mateo kapítulo 24-pe haʼe oñeʼẽ kuri pe ‘tembiguái jeroviaha ha iñarandúvare’, haʼéva hína peteĩ grúpo de unhído omotenondéva kristianokuérape koʼã ára pahápe. Jesús heʼi porã ko grúpo okumpli vaʼerãha oñehaʼarõva chugui. Upéi pe kapítulo 25-pe omombeʼu pe  istória oñeʼẽva umi 10 kuñataĩre omboʼe jey hag̃ua peteĩ leksión iñimportánteva. ¿Mbaʼépa hína upéva? Enterove unhído oikóva umi ára pahápe ‘oñatende porã’ vaʼerãha ani hag̃ua operde pe rrekompénsa iporãitéva (Mat. 25:13). Ñahesaʼỹijomína pe istória ha jahecha mbaʼéichapa umi unhído ohechauka oñatende porãha.

7, 8. a) ¿Mbaʼéichapa ojeprepara umi cinco kuñataĩ iñarandúva? b) ¿Mbaʼéichapa umi unhído ohechauka oĩha preparádo?

⁷ Pe rrelátope Jesús heʼi umi kuñataĩ apytépe oĩ hague cinco iñembotavýva. Haʼe heʼi hesekuéra iñembotavyha pórke noĩri preparáda pe nóvio og̃uahẽrõ guare. Péro umi ótra cíncore katu heʼi iñaranduha. ¿Mbaʼérepa? Pórke oĩma preparáda ha oñatende porã. Umi 10 kuñataĩ ohaʼarõ vaʼerã kuri pe nóviope ha omyendy vaʼerã ilamparakuéra pe pyhare pukukue. Umi kuñataĩ iñarandúva oreko aséite de rresérva, péro umi iñembotavýva ni ndojepreparái. ¿Mbaʼéichapa ojeprepara hína umi unhído ohaʼarõ aja Jesús og̃uahẽ?

⁸ Umi unhído oĩ dispuésto ojapóvo opa mbaʼe Jehová omandáva chupekuéra omohuʼã meve hekove ko yvy ape ári. ¿Mbaʼéichapa ohechauka hikuái upéva? Primero, oikuaa porã hikuái omboyke vaʼerãha heta komodida oikuaveʼẽva ko múndo oservi porã hag̃ua Jehovápe, ha naiprovlémai ojapo hag̃ua upéva. Segundo, ojedesidíma hikuái iñeʼẽrendu, péro ndahaʼéi hiʼag̃ui rupínte pe fin, síno ohayhúgui Jehovápe ha Jesúspe. Ha tercero, haʼekuéra omombaʼeve pe adorasión omeʼẽva Jehovápe, ha upévare ndoikói pláta rapykuéri, nopensái ijehénte, ni ndahekovaíri umi hénte ko mundopeguáicha. Ohechaukaháicha pe parávola, umi kuñataĩ iñarandúva ojeprepara ilamparakuéra reheve. Upéicha avei umi unhído oĩma preparádo, ha ipasiénsia ohaʼarõ aja og̃uahẽ pe nóvio, haʼetéramo jepe otardaha (Filip. 2:15).

9. a) ¿Mbaʼe adverténsiapa Jesús omeʼẽ vaʼekue umi unhídope? b) ¿Mbaʼépa ojapo umi unhído ohendúvo pe anúnsio: “¡Koʼápe ou la nóvio!”? (Ehecha pe nóta.)

⁹ Pe nóvio og̃uahẽrõ guare, umi kuñataĩ iñarandúva oĩma preparáda orresivi hag̃ua chupe, pórke oñatende porã kuri hikuái. Upéicharõ, ¿mbaʼérepa Jesús heʼi umi 10 kuñataĩ opyta hague oke ohechámarõ pe nóvio otardaha? Heʼívo upéva haʼe omeʼẽnte peteĩ adverténsia umi ungído koʼag̃aguápe: tekotevẽha oĩ alérta ani hag̃ua opyta oke, térã ojedistrae hikuái ohaʼarõ aja. Jesús oikuaa porã peteĩ persóna ikatuha heʼi oĩtaha alérta, péro noñatendeporãiramo ndahasyiete ojedistrae hag̃ua. Upévare umi unhído iñeʼẽrendúva oñehaʼãmbaite akóinte oñatende porã hag̃ua. ¿Mbaʼéichapa ojapo hikuái upéva? Pe istóriape Jesús omombeʼu umi kuñataĩ ohendu hague ojeʼeha: “¡Koʼápe ou la nóvio!”. Jepe umi 10 kuñataĩ ohendu upe anúnsio, cínconte oĩ kuri alérta (Mat. 25:5, 6; 26:41). Péicha avei, umi unhído ñane tiempopegua ohendu pe anúnsio: “¡Koʼápe ou la nóvio!”. Upéva heʼise haʼekuéra ohechakuaaha Jesús og̃uahẽmbotaitemaha, ha oĩma preparádo upearã. * Jahechamína mbaʼéichapa opa pe istória ha mbaʼe tiempoitépepa oñekumpli.

10. ¿Mbaʼérehepa oñeʼẽ umi 10 kuñataĩ pe nóvio og̃uahẽ mboyvemi, ha mbaʼépa ikatu ñañeporandu jalee rire ko rreláto?

¹⁰ Pe nóvio og̃uahẽ mboyvemi, umi kuñataĩ iñembotavýva oporandu umi iñarandúvape ikatúpa omeʼẽ chupekuéra michĩmi ijaséitegui ilamparakuérape g̃uarã. Péro umi kuñataĩ iñarandúva nomeʼẽi chupekuéra (elee Mateo 25:8, 9). Ikatu ñañeporandu: “Péro, ¿arakaʼe guive piko Jehová siervokuéra noipytyvõiva umi oikotevẽvape?”. Ñambohovái hag̃ua ko porandu, ñantende vaʼerã mbaʼe tiempoitépepa oñekumplíta ko párte oñemensionáva ko rrelátope. Jaikuaaháicha, Jesús og̃uahẽta oporohusga hag̃ua oñemohuʼã potaitévo pe jehasa asy guasu. Upévare ikatu jaʼe koʼã kuñataĩ iñembotavýva ojerureha ajúda oñemohuʼã potaitévo pe jehasa asy guasu, ha upe tiémpope g̃uarã umi unhído iñeʼẽrendúva orresivipátama pe último séllo.

11. a) ¿Mbaʼépa oikóta oñepyrũ mboyvemi pe jehasa asy guasu? b) Umi kuñataĩ iñarandúva heʼi umi kuñataĩ iñembotavývape oho hag̃ua ojeporeka ijaseiterãre, ¿mbaʼépa heʼise upéva?

¹¹ Upéicharõ, oñepyrũ mboyvemi pe jehasa asy guasu, enterove umi unhído iñeʼẽrendúva oĩva ko yvy ape ári orresivíta pe último séllo (Apoc. 7:1-4). Upéicha oñekonfirmáta chupekuéra ohotaha yvágape. Péro, ¿mbaʼépa oikóta umi unhído noñatendeporãi vaʼekuére ha ou naiñeʼẽrenduvéi oñepyrũ mboyve pe jehasa asy guasu? Umichagua ndorresivimoʼãi pe último séllo, ha hendaguépe oñenombráta ambue kristiáno iñeʼẽrendúvape. Upéi, oñepyrũvo pe jehasa asy guasu, umi naiñeʼẽrendúi vaʼekue oñemondýi ha ojedesesperáta ohechávo oñehundiha Babilonia Guasu térã entéro rrelihión japu. Ohechakuaáta hikuái pe nóvio og̃uahẽtamaha ha haʼekuéra noĩriha preparádo. ¿Mbaʼépa oikóta upe moméntope ojeruréramo ajúda? Pe rreláto ñanepytyvõ jaikuaa hag̃ua upéva. Upépe heʼi umi kuñataĩ iñarandúva nomeʼẽiha ijaséite umi kuñataĩ iñembotavývape ha heʼiha chupekuéra oho hag̃ua ojogua. Péro upérõ pyharepytéma ha ndaikatuvéima ojogua mamovégui pe aséite. Upéva heʼise ojerure reitamaha ajúda, pórke naipohãvéima hikuái.

12. a) ¿Mbaʼérepa ndaikatumoʼãi oñepytyvõ pe jehasa asy guasu aja umi unhído naiñeʼẽrendúivape? b) ¿Mbaʼépa oikóta umi unhído naiñeʼẽrendúivare?

¹² Pe jehasa asy guasu aja, umi unhído iñeʼẽrendúva ndaikatumoʼãi oipytyvõ umi naiñeʼẽrendúi vaʼekuépe pórke tardetereítama. Ha, ¿mbaʼépa oikóta upéicharõ umi naiñeʼẽrendúivagui? Pe rreláto ohechauka ñandéve mbaʼépa oiko umi kuñataĩ oho vaʼekuére oheka pe aséite: “Haʼekuéra oho aja ojogua, og̃uahẽ pe nóvio, ha umi kuñataĩ ojeprepara vaʼekue oike hendive pe kasamientohápe; ha pe okẽ oñemboty” (Mat. 25:10). Oñemohuʼã potaitévo pe jehasa asy guasu, Jesús og̃uahẽta ha ombyatypaitéta yvágape umi unhído iñeʼẽrendúvape. Péro orrechasáta umi unhído naiñeʼẽrendúi vaʼekuépe, oiko haguéicha umi kuñataĩ iñembotavývare, ha oñembotýva chuguikuéra pe okẽ (Mat. 24:31; Juan 14:1-3; 1 Tes. 4:17). Haʼekuéra heʼíta: “¡Karai, karai, eavrimína oréve!”. Péro Jesús heʼíta chupekuéra: “Añetehápe haʼe peẽme, che ndapoikuaái” (Mat. 7:21-23; 25:11, 12).

13. a) ¿Mbaʼérepa jaʼekuaa Jesús ndeʼíri hague heta unhído naiñeʼẽrendumoʼãiha? b) ¿Mbaʼéichapa Jesús ohechauka ko istória rupive ojeroviaha umi unhídore? (Ehecha pe taʼanga oĩva iñepyrũme.)

¹³ ¿Heʼisépa rakaʼe Jesús heta unhído  naiñeʼẽrendumoʼãiha ha tekotevẽtaha oñerremplasa umívape? Nahániri. Ñapensamíntena heʼívare Mateo kapítulo 24. Upépe Jesús omeʼẽnte peteĩ adverténsia pe tembiguái jeroviahápe: tekotevẽha oñatende porã ani hag̃ua oiko chugui peteĩ tembiguái iñañáva. Ha jaikuaaháicha, upéva ndeʼiséi kuri oĩtaha peichagua tembiguái. Upéicha avei, omombeʼúvo ko istória oñeʼẽva umi 10 kuñataĩre, Jesús oavisánte entéro umi unhídope tekotevẽha oñatende porã. Ko parávolape heʼi oĩ hague cinco kuñataĩ iñarandúva ha cinco iñembotavýva. Upéva ndeʼiséi alamita umi unhído naiñeʼẽrendumoʼãiha, síno heʼisénte káda unhído odesidi vaʼerãha oĩtapa alérta, térãpa nahániri. Apóstol Pablo omeʼẽ vaʼekue avei peichagua konsého umi ermáno unhídope (elee Hebreos 6:4-9; embojoja Deuteronomio 30:19 heʼívare). Pablo ningo oñemoñeʼẽ mbarete vaʼekue umi ermánope, upéicharõ jepe heʼi kuri ojeroviaha hesekuéra osegitaha iñeʼẽrendu. Ha Jesús omombeʼúvo pe istória oñeʼẽva umi 10 kuñataĩre, ohechauka avei ojeroviaha umi unhídore. Haʼe oikuaa porã ikatuha iñeʼẽrendu hikuái ha orresivitaha irrekompénsa.

14. ¿Mbaʼérepa “ambue ovechakuéra” ikatu oñevenefisia pe istória oñeʼẽvagui umi 10 kuñataĩre?

¹⁴ Jahechaháicha, Jesús omombeʼu vaʼekue pe istória oñeʼẽva umi 10 kuñataĩre oñemoñeʼẽ hag̃ua umi unhídope. Péro, ¿ikatúpa “ambue ovechakuéra” oñevenefisia ko ehémplogui? (Juan 10:16.) Si, ikatu. Jesús heʼi vaʼekue voi: “Ko haʼéva peẽme, enterovépe haʼe: ‘Peñatende porãke peikóvo’” (Mar. 13:37). Haʼe ningo oipota enterove kristiáno oĩ preparádo ha oñatende porã. Entéronte ikatu jasegi umi unhído ehémplo ha ñamotenonde pe predikasión, haʼéva pe tembiapo iñimportantevéva ikatúva jajapo. Avei ñañehaʼãmbaite vaʼerã ani hag̃ua jajogua umi kuñataĩ iñembotavývape, ojerure vaʼekue aséite umi ótra iñarandúvape. Káda uno jahechauka vaʼerã ñaneñeʼẽrenduha, ñaimeha preparádo ha alérta. Ótra persóna ningo ndaikatumoʼãi ojapo koʼã mbaʼe ñande vése. Jesús koʼẽrõite oúta ohusga hag̃ua opavavépe, ha káda uno jajecháta hendive ñane rembiapokuére. Upévare, jajapókena opa ikatúva ñaime hag̃ua preparádo haʼe og̃uahẽ vove.

15. ¿Mbaʼérepa entéro kristiáno oipotaitereíma og̃uahẽ Jesús kasamiénto?

¹⁵ Entéro kristiáno jaipotaitereíma og̃uahẽ pe kasamiénto Jesús oñeʼẽ hague pe rrelátope. Armagedón rire umi unhídogui oikóta Cristo nóvia amo yvágape (Apoc. 19:7-9). Ko kasamiénto ovenefisiáta avei umi oikovétavape ko yvy ape ári, pórke ogarantisa chupekuéra oĩtaha peteĩ goviérno perfékto. Upéicharõ, jahátaramo yvágape térã jaikótarõ ko yvy ape ári, ñañehaʼãmbaite vaʼerã ñaime hag̃ua alérta ha preparádo. Péichamante ikatúta jahupyty umi mbaʼe porãita Jehová oprometéva ñandéve.