1, 2. (a) Iesu ese nega dokona ia herevalaia neganai dahaka ia hahedinaraia? (b) Edena henanadai toi do ita herevalaia?

MANI oi laloa, Petero, Andrea, Iamesi bona Ioane be Iesu ida Olive Ororona ai idia helai, unai ororo amo Ierusalema ena dubu idia itaia diba. Iesu be vaira negana ia perovetalaia neganai, idia be idia kamonai namonamo. Iesu be Dirava ena Basileia ai do ia lohia bona inai tanobada dikana ena dokonai do idia vara gaudia ia herevalaia. Ia gwau unai nega ai, “igui hesiai tauna mai ena kamonai bona mai ena kara maoromaoro” be tanobada ai iena gaukara do ia karaia, nega korikori ai Dirava ena hereva be iena hesiai taudia dekenai do ia henia.—Mat. 24:45-47.

² Unai murinai, Iesu ese rami-hebou kekeni 10 parabolena ia herevalaia. (Mataio 25:1-13 duahia.) Inai henanadai mani ita lalodia: (1) Unai parabole amo dahaka ita dibaia? (2) Edena dala ai kamonai horoa taudia ese unai parabole ena sisiba idia badinaia, bona dahaka namo ia havaraia? (3) Hari, edena dala ai unai parabole ese ita ta ta ia durua?

3. Guna, iseda pablikeisen ese rami-hebou kekeni 10 ena parabole be edena bamona ia herevalaia, bona dahaka ia vara?

³ Vanegai stadi ai ita itaia, lagani momo lalonai hesiai tauna mai ena kamonai be edia hadibaia dalana idia haidaua. Unai anina be hari idia ese Baibel sivaraidia bona idia laulaulaia gaudia idia herevalaia momo lasi, to unai sivarai ese ita ia durua dalana idia herevalaia. Guna, iseda pablikeisen be rami-hebou kekeni 10 parabolena lalonai idia noho gau maragidia ibounai edia anina idia herevalaia. Hegeregere, lamepa, oela, kavabu, bona unai bamona gaudia. To, unai gau maragidia ibounai edia anina ita laloa dainai, parabole ena sisiba badana ita laloaboio, a? Unai henanadai ena haere be mai anina bada.

4. Parabole lalonai (a) headava matamata tauna be daika? (b) rami-hebou kekenidia be daidia?

⁴ Hari, unai parabole ai Iesu ena sisiba badana do ita itaia. Ginigunana be, unai parabole ese ia herevalaia taudia ita laloa. Headava matamata tauna be daika? Ia be Iesu. Badina nega ta Iesu be sibona ia gwauraia ia be headava matamata tauna bamona! (Luka 5:34, 35) Bona rami-hebou kekenidia be daidia? Iesu ia gwau rami-hebou kekenidia edia maduna be headava matamata tauna ia mai totona, idia hegaegae bona edia lamepa be do ia diari noho. Iesu ese unai bamona hahegani be iena “seri maragi,” horoa hesiai taudia unai, dekenai ia henia. Ia gwau: “Emui rami umui kwatua bona umui hegaegae, bona emui lamepa do idia araia noho. Bona edia biaguna idia naria taudia bamona umui noho.” (Luka 12:32, 35, 36) Ma danu, aposetolo Paulo bona Ioane ese Keriso ena horoa Keristani tadikaka be rami-hebou kekenidia ida idia hahegeregerea. (2 Kor. 11:2; Apok. 14:4) Unai dainai, Iesu ese Mataio 25:1-13 ai parabole ena sisiba bona hadibaia hereva be horoa hesiai taudia dekenai ia gwauraia.

5. Iesu ese ena parabole do ia guguru negana be edena bamona ia hahedinaraia?

⁵ Gau iharuana be, unai parabole ia guguru negana ita laloa. Iesu ena sisiba be edena nega ia herevalaia? Parabole ena dokonai Iesu ese ia hahedinaraia unai be, “headava matamata tauna ia ginidae” negana. (Mat. 25:10) Gima Kohorona, July 15, 2013, ena hereva bamona, Iesu ena peroveta herevana Mataio karoa 24 bona 25 ese ena “mai” o ginidae negana be nega eit ia herevalaia. Iesu be ena “mai” o ginidae negana ia herevalaia neganai, ia be hisihisi badana neganai do ia mai bona hahemaoro gaukara ia karaia, bena inai tanobada do ia hadikaia ore negana ia herevalaia. Unai dainai, ita gwau diba unai parabole be nega dokona ia herevalaia, to iena dokona be hisihisi badana lalonai.

6. Unai parabole ena sisiba badana be dahaka?

⁶ Unai parabole ena sisiba badana be dahaka? Mani parabole ena hereva oi laloa. Iesu be “igui hesiai tauna mai ena kamonai bona mai ena kara maoromaoro” ia herevalaia. Ia gwau, unai igui hesiai tauna be horoa taudia edia orea maragina ia herevalaia, idia ese nega dokonai Keriso murinai idia raka taudia do idia gunalaia. Iesu ese idia ia hadibaia namona be ia do idia badinaia noho. Unai murinai, parabole amo ia hahedinaraia, nega dokona lalonai horoa hesiai taudia ibounai ‘idia gima noho’ be namo, edia ahuna namona idia haboioa garina. (Mat. 25:13) Hari unai parabole do ita herevalaia, bona ita itaia edena dala ai horoa taudia ese ena sisiba idia badinaia.

7, 8. (a) Aonega kekenidia idia hegaegae badina edena kara rua idia hahedinaraia? (b) Edena dala ai horoa taudia ese idia hahedinaraia idia hegaegae?

⁷ Iesu ena parabole ese ia hahedinaraia aonega kekenidia be headava matamata tauna ena mai totona idia hegaegae, kavakava kekenidia bamona lasi. Dahaka dainai? Badina inai kara rua idia hahedinaraia: Idia hegaegae bona idia gima noho. Unai rami-hebou kekenidia be hanuaboi ai headava matamata tauna totona idia naria. Unai dainai, edia gaukara badana be hora ibounai lalonai do idia gima noho bona edia lamepa be ia diari ela bona headava tauna ia ginidae. Idia be kavakava kekenidia bamona lasi, badina idia hegaegae, edia lamepa bona oela ma haida idia abia lao danu. Unai hegeregerena, kamonai horoa taudia be idia hegaegae danu, a?

⁸ Oibe. Inai nega dokona ai horoa Keristani taudia be unai aonega kekenidia bamona, idia hegaegae mai kamonai ida edia hesiai gaukara idia karaia ela bona dokona. Idia laloparara unai bamona idia karaia totona, namona be Satani ena tanobada ena kohu idia dadaraia. Danu Iehova dekenai sibona idia henia bona ia idia hesiai henia, badina be nega ia kahirakahira dainai lasi, to ia bona ena Natuna idia lalokau henia. Dirava idia badinaia noho, bona inai tanobada ena lalohadai, kohu, matabodaga karadia bona sibona laloa bada karadia idia dadaraia. Unai dainai, idia hegaegae, tanobada ai edia diari idia halasia, bona mai haheauka ida Headava Matamata Tauna ena mai idia naria, herevana nega daudau idia naria.—Fili. 2:15.

9. (a) Iesu ese hesiku bona mahuta karana dekenai dahaka sisiba ia henia? (b) Horoa taudia be boiboi herevana idia kamonai neganai dahaka idia karaia? (Futnout itaia danu.)

⁹ Unai aonega kekenidia ia durua kara iharuana be idia gima noho. Horoa Keristani ta ta be hanuaboi ai nega daudau idia naria dainai, do idia hesiku bona mahuta diba, a? Oibe. Laloatao, Iesu ia gwau rami-hebou kekeni 10 be headava matamata tauna ia mai haraga lasi dainai, “idia ibounai edia matana idia metau bona idia mahuta.” Iesu ia diba ena be ta be mai ena ura ibounai ida ia naria, to tauanina ia manoka dainai nega haida ia hesiku diba. Kamonai horoa taudia be unai sisiba idia badinaia, bona idia gaukara goada idia gima noho totona. Parabole lalonai, rami-hebou kekenidia be hanuaboi ai boiboi idia kamonai: “Headava matamata tauna ia mai inai!” To, idia gima noho kekenidia sibona be idia haheauka ela bona dokona. (Mat. 25:5, 6; 26:41) Hari idia noho kamonai horoa taudia be edena bamona? Nega dokona lalonai, idia be inai boiboi idia kamonai: “Headava matamata tauna ia mai inai.” Unai dainai idia haheauka bona hegaegae noho Headava Matamata Tauna ia ginidae totona. * To, unai parabole ena dokona be mai anina bada negana ia herevalaia. Edena nega ia herevalaia?

10. Kavakava kekenidia ese aonega kekenidia dekenai oela idia noia karana ese dahaka henanadai ia havaraia?

¹⁰ Parabole ena dokona ese ia hahedinaraia, kavakava kekenidia be aonega kekenidia dekenai oela idia noia. To aonega kekenidia idia ura lasi idia durua. (Mataio 25:8, 9 duahia.) To, Dirava ena taunimanima edia histori lalonai, edena negai kamonai  hesiai taudia be heduru idia noia taudia idia dadaraia? Unai ita haerelaia totona namona be unai parabole ena dokona kahana ese ia herevalaia negana ita laloa. Ita abia diba matamata dekenai ita gwau, Iesu, Headava Matamata Tauna, be hisihisi badana ena dokonai do ia mai bona hahemaoro karana do ia karaia. Unai dainai, ita gwau diba unai parabole ena dokonai be hisihisi badana ia do vara lasi neganai, do ia vara gauna ia laulaulaia. Badina unai nega ai horoa taudia be edia maka ginigabena idia abia vadaeni.

11. (a) Hisihisi badana ia hamatamaia gwauraia neganai dahaka do ia vara? (b) Aonega kekenidia ese kavakava kekenidia be oela hoihoilaia taudia dekenai idia siaia lao ena anina be dahaka?

¹¹ Hisihisi badana ia do vara lasi neganai, kamonai horoa taudia ibounai tanobada ai be edia maka ginigabena idia abia vadaeni. (Apok. 7:1-4) Unai nega amo idia be guba do idia lao. To, hisihisi badana ia do vara lasi neganai, idia vara gaudia mani oi laloa. Idia gima lasi bona abidadama lasi horoa taudia dekenai dahaka do ia vara? Edia guba ahuna do idia abia lasi. Oibe, edia maka ginigabena do idia abia lasi, ela bona hisihisi badana ia matamaia. Unai negai, Dirava ese abidadama Keristani taudia haida sibona do ia horoa. Hisihisi badana ia matamaia neganai, kavakava taudia be Babulonia Badana ena moru idia itaia neganai do idia hoa. Unai neganai do idia laloparara idia be Headava Matamata Tauna ena mai totona idia hegaegae lasi. Danu, unai negai idia ese heduru idia noia neganai dahaka do ia vara? Iesu ese ia herevalaia rami-hebou kekeni 10 parabolena ese haere ia henia. Aonega kekenidia ese kavakava kekenidia dekenai oela idia henia lasi, to idia siaia oela idia hoihoilaia taudia dekenai oela idia hoia totona. Laloatao, unai be “hanuaboi momokani”dainai, oela hoihoilaia taudia do idia davaria lasi. Unai be leiti vadaeni.

12. (a) Hisihisi badana lalonai, guna horoa taudia ai idia lao, to gabeai Dirava idia badinaia lasi bona edia maka idia haboioa taudia dekenai dahaka do ia vara? (b) Kavakava kekenidia bamona taudia dekenai dahaka do ia vara?

¹² Unai hegeregerena, hisihisi badana lalonai abidadama horoa taudia ese Dirava idia badinaia lasi taudia do idia durua lasi. Unai be leiti vadaeni. Unai neganai dahaka do ia vara? Kavakava kekenidia be oela hoia totona idia lao neganai ia vara gauna mani oi laloa. Iesu ia gwau: “Headava matamata tauna ia ginidae, bona idia hegaegae rami-hebou kekenidia be ia danu headava rumana lalonai idia vareai, bona iduara idia koua.” Hisihisi badana ena dokona ia kahirakahira neganai, Keriso be mai ena hairai ida do ia mai, bona ena abidadama horoa tadikaka be guba dekenai do ia haboua. (Mat. 24:31; 25:10; Ioa. 14:1-3; 1 Tes. 4:17) To, Iesu ese Dirava idia badinaia lasi taudia do ia dadaraia. Idia be kavakava kekenidia bamona do idia boiboi, idia gwau: “Tau badana e, Tau badana e, mani ai totona iduara oi kehoa!” To madi, Iesu ese hahemaoro neganai, nanigosi bamona taudia ia haere henia hegeregerena idia dekenai do ia gwau: “Umui lau hamaoroa momokani, umui lau diba lasi.”—Mat. 7:21-23; 25:11, 12.

13. (a) Dahaka dainai ita gwau lasi Keriso ena horoa tadikaka momo be Dirava do idia badinaia lasi? (b) Edena dala ai Iesu ena hadibaia hereva ese ia hahedinaraia iena horoa tadikaka ia abidadama henia? (Laulau ginigunana itaia.)

¹³ Ita herevalaia gaudia amo dahaka ita dibaia? Iesu ena hereva anina be iena horoa hesiai taudia momo be Dirava do idia badinaia lasi bona ma haida ese edia gabu do idia abia, a? Lasi. Laloatao, matamanai ia ese ena “igui hesiai tauna mai ena kamonai bona mai ena kara maoromaoro” ia hamaoroa  igui hesiai tauna dikana ai do idia lao lasi. Iesu ena hereva anina be ena igui hesiai taudia be igui hesiai taudia dikana ai do idia lao lasi. Unai hegeregerena, rami-hebou kekeni 10 parabolena ese mai anina bada gauna ta ia hadibaia. Rami-hebou kekeni faiv be kavakava dalana idia badinaia bona ma kekeni faiv be aonega dalana idia badinaia. Unai hegeregerena, horoa taudia ta ta be abia hidi idia karaia diba idia hegaegae bona gima noho, o idia kavakava bona Dirava idia badinaia lasi. Aposetolo Paulo be ena Keristani horoa tadikaka ia herevalaia neganai, mai anina bada gauna ta ia hahedinaraia. (Heberu 6:4-9 duahia; Deuteronomi 30:19 sekea.) Paulo ese hadibaia hereva goadana ia henia, to danu ia abia dae ena tadikaka bona taihu ese edia davana do idia abia. Unai hegeregerena, Iesu ese rami-hebou kekeni 10 parabolena amo ia henia hadibaia hereva ese ia hahedinaraia iena horoa tadikaka ia abidadama henia. Keriso ia diba idia ta ta be Dirava do idia badinaia bona edia davana do idia abia!

14. Edena dala ai rami-hebou kekeni 10 parabolena ese “mamoe ma haida” ia durua?

¹⁴ Iesu ese ia herevalaia rami-hebou kekeni 10 parabolena be ena horoa tadikaka ia herevalaia. To unai ese Keriso ena “mamoe ma haida” ia durua danu, a? (Ioa. 10:16) Oibe! Laloatao unai parabole ena sisiba herevana be inai: “Umui gima noho.” Unai be horoa taudia sibona ia herevalaia, a? Nega ta Iesu ia gwau: “Umui lau hamaoroa gauna be ibounai dekenai lau gwauraia, gima noho.” (Mar. 13:37) Iesu ia ura ena murinai idia raka taudia ibounai be hesiai gaukara totona edia kudouna do idia hegaegaelaia bona do idia gima noho. Unai dainai, Keristani taudia ibounai ese horoa taudia idia badinaia. Idia edia haheitalai idia tohotohoa, bona edia mauri lalonai haroro gaukara idia atoa guna. Laloatao, kavakava kekenidia be aonega kekenidia dekenai oela idia noia. Unai ese ia hahedinaraia ita ta ta be abia hidi ita karaia diba Dirava ita badinaia, ita hegaegae, bona ita gima noho totona. Ta be ita totona unai do ia karaia lasi. Ita ta ta be Iehova ese ia abia hidi kara maoromaoro Kota Biaguna dekenai iseda kara ena anina do ita gwauraia. Namona be ita hegaegae. Ia be kahirakahira do ia mai!

15. Dahaka dainai Keristani taudia ibounai be Keriso bona ena adavana edia headava idia moalelaia?

¹⁵ Keristani taudia ibounai be Iesu ese parabole ai ia herevalaia headavana amo namo idia davaria. Momokani, nega vaira ai do ia vara headavana ita moalelaia, ani? Aramagedono tuarina murinai, horoa taudia be guba ai Keriso ena adavana bamona do idia lao. (Apok. 19:7-9) Tanobada ai idia noho taudia be unai guba headava amo namo bada do idia davaria, badina unai dala amo gavamani goevana ta do ia gini. Ena be iseda helaro nega vaira totona be guba ai do ita noho o tanobada ai do ita noho, to namona be eda lalona ita hadaia rami-hebou kekeni 10 parabolena amo diba ita abia totona. Namona be iseda kudouna ita hegaegaelaia bona ita gima noho, unai amo Iehova ese vaira negana totona ia hegaegaelaia hahenamo ita moalelaia diba!