1, 2. (a) Yesũ awetie kyaũ ĩũlũ wa mĩthenya ya mũminũkĩlyo? (b) Twĩsũngĩa makũlyo meva?

NO NGINYA amanyĩw’a ala mailyĩ na Yesũ yĩla ĩvinda waeleasya ũla wathani wa ũsengy’a makethĩwa moonaa ne ndaĩa nene kwoo kwĩthĩwa vau nake. Maĩ ĩũlũ Kĩĩmanĩ kya Mĩthata, nayo ĩkalũ mayene vaaya ĩtheo. Yesũ aĩ vamwe na Vetelo, Andalea, Yakovo, na Yoana, na nĩmateete matũ vyũ aielesya maũndũ ala makekĩka ĩtina wa ĩvinda ĩasa mũno. Amatavisye maũndũ maingĩ ĩũlũ wa mĩthenya ya mũminũkĩlyo ya nthĩ ĩno nthũku, ĩla ũkethwa e Mũsumbĩ wa Ũsumbĩ wa Ngai. Ameie kana ĩvindanĩ yĩu ya mwanya akethĩwa na “ngombo yĩ na kĩthito na mbũĩ” ĩla ĩkaũngama vandũ vake kũũ nthĩ ĩinenga aatĩĩi make lĩu ũla ũmaĩle wa kĩ-veva, ĩvindanĩ yĩla yaĩle.—Mt. 24:45-47.

² Nthĩnĩ wa wathani ũsu wake nĩvo wasyokie anengane ĩla ngelekany’o ya eĩtu ĩkũmi. (Soma Mathayo 25:1-13.) Kwoou yu ekai tũsũanĩe makũlyo aa: (1) Ngelekany’o ĩsu yĩ na ũvoo wĩva wa vata? (2) Etĩkĩw’a mauta ala methĩĩtwe me aĩkĩĩku maatĩĩe ata  ũtao ũla wĩ ngelekany’onĩ ĩsu, na maũatĩĩa kwĩthĩĩtwe ata? (3) Ũmũnthĩ ngelekany’o ĩsu ya Yesũ ĩtonya kũmanyĩsya kĩla ũmwe witũ ũndũ wĩva?

3. Tene mavuku maitũ manakothaa kũtũmĩa nzĩa yĩva kũelesya ĩla ngelekany’o ya eĩtu ĩkũmi? Kĩu kĩtonya kwĩthĩwa kĩnaetae thĩna wĩva?

³ Ĩsomo ĩvĩtu nĩyĩwetete kana myakanĩ ya mĩtũkĩ ngombo yĩ na kĩthito nĩyĩthĩĩtwe ĩielesya Maandĩko kwa nzĩa yĩ kĩvathũkany’o na tene. Vandũ va kũelesya mũno ngewa sya Mbivilia ta wathani kana syuu, mũno mũno ĩeleasya kĩla tũtonya kũtũmĩa ngewanĩ isu. Nthĩnĩ wa ĩla ngelekany’o ya Yesũ ya eĩtu ĩkũmi, mavuku maitũ nĩmanakothaa kũvanĩĩa syuu tũmaũndũnĩ tũnini vyũ o ta taa ila makuĩte, mauta, mĩio, na twĩndũ tũngĩ ta tũu. Ĩndĩ kĩu nĩkĩthĩwa kĩnatumaa tũtaelewa nesa ũvoo wĩ laisi na wa vata ũla wĩ ngelekany’onĩ ĩsu? O tondũ tũkilyĩ kwona, ve vata tũkwate ũsũngĩo wa ĩkũlyo yĩu.

4. Nthĩnĩ wa ĩla ngelekany’o ya Yesũ, tũtonya kũmanya ata (a) mũtwaani? (b) eĩtu?

⁴ Kwa nĩtũsisyei nesa kĩla Yesũ ũkwenda kũmanyĩsya ngelekany’onĩ ĩsu. Mbee, kwa eka twone ala maneenewe mũno ngelekany’onĩ ĩsu. We mũtwaani nũũ? Vai nzika kana Yesũ nĩwe weewetaa. Nĩkĩ? Nũndũ o na ve ĩvinda ĩna we mwene weeyĩtie mũtwaani! (Luka 5:34, 35) Nata ĩũlũ wa eĩtu? Nthĩnĩ wa ngelekany’o ĩsu Yesũ awetete kana mũtwaani aivika, eĩtu asu maĩle kwĩthĩwa me metho, taa syoo syakene. Yu kwasũanĩa ũtao ũngĩ ta ũsu ũla Yesũ wanengie yĩla ‘ĩĩthya yake ĩnini’ ya etĩkĩw’a mauta, akyasya: “Mwĩthĩwe mwĩvotoete inyunyunĩ, na mataa menyu makanĩte; nenyu mwĩthĩwe ta andũ ala meteele vwana woo, yĩla wĩsyoka kuma mũtwaanonĩ.” (Luka 12:32, 35, 36) O nake mũtũmwa Vaulo atongoew’e nĩ veva mũtheu nĩwaelekanilye aatĩĩi ma Klĩsto etĩkĩw’a mauta na eĩtu atheu. (2 Ako. 11:2) Kwoou vate nzika, Yesũ ainengane ngelekany’o ĩla yĩ ĩvukunĩ ya Mathayo 25:1-13 aĩ na kĩeleelo kya kũtaa na kũkany’a aatĩĩi make etĩkĩw’a mauta.

5. Yesũ oonanisye ata ĩvinda yĩla yĩkonetye ngelekany’o yake?

⁵ Kelĩ, sũanĩa ĩvinda yĩla yĩwetetwe. W’o ũtao ũsu wa Yesũ ũkonetye ĩvinda yĩva? Ve ũndũ Yesũ ũwetete nthĩnĩ wa ngelekany’o yake ũũtũtetheesya kũmanya nĩ ĩvinda yĩva. Aiminĩĩa aisye: ‘Mũtwaani ooka.’ (Mt. 25:10) O tondũ ĩkaseti ya Mũsyaĩĩsya ya 01/07/2013 yawetie, wathani wa Yesũ ũla ũandĩkĩtwe ĩvukunĩ ya Mathayo kĩlungu kya 24 na kya 25 ũwetete ‘kũka’ kwake mavinda nyanya, na kĩla ĩvinda ndeto o ĩla ĩla ya Kĩkiliki noyo ĩtũmĩĩtwe. Kĩla yĩmwe ya mavinda asu nyanya, Yesũ awetaa ĩla ũkoka ĩvindanĩ ya ũla thĩna mũnene nĩ kana asilĩle andũ na ĩndĩ nthĩ ĩno ĩyanangwa. Kwoou no twasye kana ngelekany’o ĩsu ĩkonetye mĩthenya ĩno ya mũminũkĩlyo, ĩndĩ kũka kwa mũtwaani no mũvaka ĩvindanĩ ya ũla thĩna mũnene.

6. Kwosana na maũndũ ala Yesũ waneeneaa, ngelekany’o ĩla wanenganie yĩ na ũvoo wĩva wa vata?

⁶ Ngelekany’o ĩsu yĩ na ũvoo wĩva wa vata? Lilikana maũndũ ala Yesũ waneeneaa ayĩsa kũtw’ĩka nĩwamĩnengane. Aĩ anaweta ĩla ‘ngombo yake yĩ na kĩthito na mbũĩ.’ Ngombo ĩsu yaĩ yĩse kwĩthĩwa ne kakundi kanini ka aũme etĩkĩw’a mauta, ala makatongoesya aatĩĩi ma Klĩsto mĩthenyanĩ ya mũminũkĩlyo. Aũme asu nĩmo wakanisye akĩmea kana no nginya mekale me aĩkĩĩku. Amina kũweta ngombo ĩsu nĩw’o wambĩĩie kũnengane ngelekany’o ĩsu ya eĩtu ĩkumi nĩ kana ekĩe vinya aatĩĩi onthe make etĩkĩw’a mauta ala makethĩwa mĩthenyanĩ ya mũminũkĩlyo mekale ‘masyaĩĩsye,’ maikese kũlea kũkwata ĩtuvi yoo ya vata. (Mt. 25:13)  Ekai ĩndĩ tũsisye nesa ngelekany’o ĩsu nĩ kana twone ũndũ etĩkĩw’a mauta methĩwa maatĩĩe ũtao ũla wĩ vau.

7, 8. (a) Nĩ maũndũ meva elĩ matumie ala eĩtu oĩ meteela mũtwaani nesa? (b) Etĩkĩw’a mauta meyũmbanĩtye ata?

⁷ Ngelekany’o ya Yesũ ĩkindĩlĩle kana ala eĩtu oĩ nĩmamweteele mũtwaani nesa kĩvathũkany’o na ala atumanu. Nĩkĩ? Nũndũ wa maũndũ elĩ: nĩmeeyũmbanĩtye na maĩ metho. Nũndũ eĩtu asu nĩmo manyuvĩtwe meteele mũtwaani saa isu sya ũtukũ, maaĩlĩte kũĩkĩĩthya taa syoo iinavoa na mayĩkala me metho ũtukũ ũsu w’onthe nginya ĩla mũtwaani ũkavika. Ala eĩtu atano oĩ nĩmeeyũmbanĩtye nesa nũndũ nĩmakuie taa vamwe na mĩio yĩ na mauta ma kwĩsa kwongela, ĩndĩ eĩtu ala atumanu mayeeyũmbanĩtye nesa. Mo Aklĩsto etĩkĩw’a mauta nĩmethĩĩtwe meyũmbanĩtye ta eĩtu asu oĩ?

⁸ Ĩĩ, nĩmethĩĩtwe! Mĩthenyanĩ ĩno ya mũminũkĩlyo, Aklĩsto etĩkĩw’a mauta nĩmekĩte ta eĩtu asu oĩ, nũndũ nĩmeyũmbanĩtye kwĩanĩsya wĩa woo me aĩkĩĩku nginya mũthya. Nĩmethĩawa mesĩ kana kũmũthũkũma Yeova me aĩkĩĩku ti laisi, nũndũ nĩmesĩ kuma mũthenya ũla makwatie kĩanda kyoo ĩkeethĩawa yĩ lasima mevate moseo maingĩ ma nthĩ ĩno ya Satani. Meyumĩtye vyũ mamũthũkũme Yeova e weka ti atĩ nũndũ nĩmamũtalĩle matukũ kana atĩ nũndũ mũthya wĩ vakuvĩ, ĩndĩ nũndũ nĩmamwendete e na Mwana wake na nĩmalũmanĩtye namo vyũ. Mekalaa me aĩkĩĩku na mayĩtĩkĩlaa kũkuwa nĩ veva wa nthĩ ĩno nthũku, o na mayendaa kwĩkala ta andũ ma nthĩ ĩno ala mendete syĩndũ sya kĩ-mwĩĩ, me mwĩkalĩle mũthũku, na meyendete. Nũndũ wa itumi isu mekalaa meyũmbanĩtye mailyĩ ta syeni iteũsiikĩa na mateũmaka o na ĩla Mũtwaani wooneka ta ũkũselewa.—Avi. 2:15.

9. (a) Nĩ kwa nzĩa yĩva Yesũ waumisye ũkany’o ĩũlũ wa kwombosya? (b) Etĩkĩw’a mauta mekĩte ata ĩla moona maũndũ ala kwa nzĩa ya ngelekany’o methĩawa maimea, “Sisyai, mũtwaani nĩwũkĩte”? (Sisya maelesyo ma kwongeleela.)

⁹ Ũndũ wa kelĩ ũla watetheeisye eĩtu asu meteele mũtwaani nesa nĩ kwĩkala me metho. Nũndũ ĩvinda yĩĩ etĩkĩw’a mauta meteele kũka kwa Klĩsto no ũndũ ũmwe na ũtukũ mũasa, yo nĩvatonyeka Mũklĩsto mũna mwĩtĩkĩw’a mauta akambĩĩa kwombosya? Ĩĩ, nĩvatonyeka. Kwa sisya ũndũ Yesũ waisye ĩũlũ wa ala eĩtu ĩkũmi ĩla eĩtu asu moonie mũtwaani ta wekalanga. Aisye: “Onthe mombosya na makoma.” Yesũ nĩweesĩ nesa kana o na ethĩwa ngoo yĩ na wendi, nĩ laisi ĩkatulw’a nĩ wonzu wa mwĩĩ. Etĩkĩw’a mauta ala aĩkĩĩku nĩmew’ĩte ũkany’o ũsu wĩ nthĩnĩ wa ngelekany’o ĩsu, na nĩmatataa mũno vyũ mekale me metho na masyaĩĩsye. Ngelekany’onĩ ĩsu eĩtu onthe me ĩkũmi nĩmookĩlile ĩla ũtukũ ũsu meewie wasya mũnene ũyasya: “Sisyai, mũtwaani nĩwũkĩte!” Ĩndĩ no ala maĩ metho moomĩĩisye nginya mũthya. (Mt. 25:5, 6; 26:41) Nao nata etĩkĩw’a mauta ala aĩkĩĩku ũmũnthĩ? Mĩthenyanĩ yonthe ya mũminũkĩlyo nĩmosete ĩtambya nũndũ nĩmonete vyũ maũndũ ala kwa nzĩa ya ngelekany’o methĩawa maimea, “Sisyai, mũtwaani nĩwũkĩte,” kana kwa ndeto ingĩ, nde vaasa mũno. O na ĩngĩ nĩmethĩawa na wũmĩĩsyo, meteele Mũtwaani avike. * Ĩndĩ ngelekany’o ĩsu ya Yesũ ĩthelete na kũweta ĩvinda ĩna. Yĩkĩte ũu ata?

10. Ũneenany’a katĩ wa eĩtu ala oĩ na ala atumanu wĩtuma twĩkũlya ata?

¹⁰ No kwĩthĩwa kĩla kĩtonya kũlanĩlya mũndũ ngewanĩ ĩsu ne kĩlungu kĩla kĩ mũthyanĩ wayo, kĩla kyonanĩtye eĩtu ala atumanu maineenany’a na ala oĩ. (Soma Mathayo 25:8, 9.) Ũneenany’a ũsu ũtumaa twĩkũlya atĩĩ: “Nĩ ĩndĩĩ andũ aĩkĩĩku ma Ngai maĩ malee kũtethya angĩ mekwĩtya ũtethyo?” Tũtonya kũelewa ũndũ ũsu nesa twasũanĩa ngelekany’o ĩsu ĩkonetye ĩvinda yĩva. Lilikana kana ũmanyi witũ wa mĩtũkĩ wĩonany’a kana Yesũ, ũla nĩwe Mũtwaani, akooka kũsilĩla andũ ũla thĩna mũnene ũkilyĩ kũthela. Kwoou yu tyo twasye ũneenany’a ũsu ũkesa kwĩthĩwa ũla thĩna mũnene ũkilyĩ kwambĩĩa? Nĩvatonya kwĩsa kwĩthĩwa vailyĩ ũu nũndũ tũyĩsa kũvika vau etĩkĩw’a mauta makethĩwa meekĩiwe ũsiĩlo wa mũthya.

11. (a) Nĩ kyaũ kĩkekĩka ũla thĩna mũnene ũkilyĩ kwambĩĩa? (b) Ala eĩtu oĩ moonanasya kyaũ ĩla meeie ala atumanu mathi kwa athoosya ma mauta?

¹¹ Kwoou ũla thĩna mũnene ũtanamba kwambĩĩa, etĩkĩw’a mauta ala aĩkĩĩku makethĩwa kũũ nthĩ makeethĩwa maneekĩwa ũsiĩlo woo wa mũthya. (Ũvu. 7:1-4) Ĩtina wa kwĩkĩwa ũsiĩlo ũsu, vaikethĩwa na nzika kana makathi ĩtunĩ. Ĩndĩ kwasũanĩa kĩla kĩkethĩwa kĩkĩkĩte myaka mĩna ũla thĩna mũnene ũtanamba kwambĩĩa. Nĩ kyaũ kĩkakwata etĩkĩw’a mauta ala matakethĩwa masyaĩĩsye kana mate aĩkĩĩku? Maikanewa ĩtuvi yoo ya kũthi ĩtunĩ. Kwoou maikakwata ũsiĩlo woo wa mũthya thĩna ũla mũnene ũtanamba kwambĩĩa. O na ũ thĩna mũnene ũyĩsa kũtw’ĩka nĩwambĩĩa, angĩ aĩkĩĩku makethĩwa metĩkĩiw’e mauta. Na ĩndĩ thĩna ũsu wambĩĩa, ala atumanu nĩmatonya kwĩsa kũtelema mũno moona Mbaviloni Ĩla Nene ĩyanangwa. Vau nĩvo matonya kwĩsa kũmanyĩa kana mainamweteele Mũtwaani nesa. Makesa kwĩsũvana matetheew’e maseleetwe ũu maseleetwe nĩ kyaũ kĩthĩwa? Ngelekany’o ya Yesũ nĩsũngĩĩte. Eĩtu ala oĩ nĩmaleile kũnenga ala atumanu mauta na mamea mathi kũla kwĩ athoosya makethooee. Ĩndĩ lilikana kana kwaĩ “ũtukũ katĩ.” Mo nĩmaĩ mesa kwona athoosya ma mauta ĩsaa yĩu? Aiee. Maĩ aselee mũno.

12. (a) Ĩvindanĩ ya ũla thĩna mũnene, ala maĩ etĩkĩw’a mauta na maema kũmĩĩsya nginya mekĩwe ũsiĩlo wa mũthya, makatata kwĩka ata? (b) Nĩ kyaũ kĩkwata ala makekala ta ala eĩtu atumanu?

¹² O ta ũu, ĩvindanĩ yĩu ya ũla thĩna mũnene etĩkĩw’a mauta ala aĩkĩĩku maikethĩwa matonya kũtetheesya ala mate aĩkĩĩku. Mwa vaikethĩwa ũtethyo o na ũmwe. Nĩkĩ? Nũndũ asu mate aĩkĩĩku makethĩwa me aselee mũno. Kwoou makakwatwa nĩ kyaũ? Yesũ nĩwaeleisye kĩla kyakwatie ala eĩtu atano atumanu ĩla menoisye o mana maithi kũmantha mauta. Aisye: “Mũtwaani ooka; na ala meyũmbanĩtye mavota vamwe nake mbokanĩ ya mũtwaano: na mũomo wavingwa.” Mũthyanĩ wa ũla thĩna mũnene, Klĩsto akoka na ũtheu wake mũtisu na ayũmbany’a etĩkĩw’a mauta ala aĩkĩĩku mathi ĩtunĩ. (Mt. 24:31; 25:10; Yoa. 14:1-3; 1 Ath. 4:17) Na kwa nzĩa ĩsu, ala mate aĩkĩĩku nũndũ wa kwĩkala ta ala eĩtu atumanu, no ũndũ ũmwe na makethĩwa mavingĩwa nza. Na ĩndĩ kwa nzĩa ya ngelekany’o nĩmatonya kwĩsa kwĩkaĩla mũtwaani mayasya: “Mwĩaĩi, Mwĩaĩi, tũvingũĩe.” Ĩndĩ makasũngĩwa ũsũngĩo ũvw’aa ũla ũkasũngĩwa ala maelekanĩtw’e na mbũi, ala makasũngĩwa ũũ ĩvinda yĩla makethĩwa maisilĩlwa: “Nĩ w’o nĩngũmwĩa, ndimwĩsĩ inyw’ĩ.” Ũsu ũkethĩwa wĩ ũndũ wa kũmakya mũno!—Mt. 7:21-23; 25:11, 12.

13. (a) Nĩkĩ tũyaĩle kwĩsilya kana aatĩĩi aingĩ ma Klĩsto makeethĩwa mate aĩkĩĩku? (b) Nĩkĩ tũtonya kwasya kana ũkany’o wa Yesũ wĩonany’a nĩwaĩ na mũĩkĩĩo kana Aklĩsto etĩkĩw’a mauta makaendeea nesa? (Sisya visa ĩthangũnĩ ya 12.)

¹³ Kwoou yu kũvikĩĩa vu tũtonya kwasya ata? We Yesũ nĩwĩthĩwa endaa kwasya kana aingĩ ma aatĩĩi make etĩkĩw’a mauta  makaemwa nĩ kũmĩĩsya na mwanya woo ũyoswa nĩ angĩ? Ti w’o. Ethĩwa nũũlilikana, atanamba kũnengane ngelekany’o ya ala eĩtu aĩ anakany’a “ngombo yĩ na kĩthito na mbũĩ,” aimĩa ndĩkaaĩse kũtw’ĩka ngombo nthũku. Ĩndĩ ũu ti kwasya kana nĩweekwatasya maũndũ makathi ũu. O ta ũu, ngelekany’o ĩsu ya eĩtu ĩkũmi yĩkĩte kũnengane ũkany’o ũte wa ngũĩ. O tondũ eĩtu atano maĩ atumanu na atano maĩ oĩ, kĩla ũmwe wa etĩkĩw’a mauta e na mwanya wa kwĩtw’ĩĩa eĩkala eyũmbanĩtye na e metho, kana eatĩĩa nzĩa ya ũtumanu na ayĩkala ate mũĩkĩĩku. Mũtũmwa Vaulo nĩwaveveewe aandĩkĩe etĩkĩw’a mauta ala angĩ ũndũ ta ũsu. (Soma Aevelania 6:4-9; sianĩsya na Kũtũngĩlĩlwa Kwa Mĩao 30:19.) Wasisya ũtao ũsu wa Vaulo nũkwona kana ndwaĩ wa ngũĩ, ĩndĩ amina kũwumya asyokie oonany’a kana nĩwaĩ na wĩkwatyo wa kana ana-a-asa na eĩtu-a-asa asu make nĩmekũendeea nesa. Ata? Awetie kana “maũndũ maseo” maĩ mbee woo. O ta ũu, ũkany’o ũla wĩ nthĩnĩ wa ngelekany’o ya Yesũ woonanisye kana o nake aĩ na wĩkwatyo o ta ũsu. Klĩsto nĩwĩsĩ kana athũkũmi asu make etĩkĩw’a mauta no mekale me aĩkĩĩku na mayĩsa kũkwata mũthĩnzĩo ũsu wa kwendeesya!

14. Nĩkĩ “malondu angĩ” matonya kũtetheka nĩ ngelekany’o ya ala eĩtu ĩkũmi?

¹⁴ Yo nĩtwaĩle kwasya kana ũtao wa Yesũ ndũkonetye “malondu angĩ” ma Klĩsto atĩ nũndũ we aneenaa na etĩkĩw’a mauta ĩla wanenganie ngelekany’o ĩsu ya eĩtu ĩkũmi? (Yoa. 10:16) Ũu ti w’o! Lilikana kana ngelekany’o yake yĩ na ũvoo ũũ wa vata na wĩ laisi kũeleeka: “Syaĩĩsyai.” W’o ũndũ ũsu ũandĩkĩwe etĩkĩw’a mauta me oka? Aiee, nũndũ Yesũ ĩvinda yĩmwe aisye atĩĩ: ‘Ũu ngũmũtavya inyw’ĩ, nĩmatavya onthe, Syaĩĩsyai.’ (Mko. 13:37) Yesũ endaa aatĩĩi make onthe mekalae me metho na meyũmbanĩtye kũmũthũkũma Yeova me aĩkĩĩku. Kwoou Aklĩsto onthe nĩmaatĩĩaa nyaaĩ sya etĩkĩw’a mauta maũndũnĩ asu, na mekaa ũu kwa kũatĩĩa ngelekany’o yoo nzeo na kwa kwona ũtavany’a new’o wĩa ũla wa vata. O na ĩngĩ, kĩla ũmwe witũ nĩwaĩlĩte kũlilikana kana ala eĩtu atumanu nĩmeeie ala oĩ nĩmamanenge mauta amwe moo. Ũndũ ũsu meekie wĩtũlilikany’a kana vai mũndũ wĩsa kwĩthĩwa e mũĩkĩĩku kwondũ witũ kana akalũmya ũla w’o kwondũ witũ, o na vai mũndũ wĩsa kwĩkala asyaĩĩsye kwondũ witũ. Vandũ va ũu, kĩla ũmwe witũ akasilĩlwa e weka nĩ Mũsili mũlũngalu ũla ũnyuvĩtwe nĩ Yeova. Nake akilyĩ anavika! Kwoou no nginya twĩyũmbany’e.

15. Nĩkĩ Aklĩsto onthe ma w’o nĩmew’aa mũyo nũndũ wa mũtwaano ũla ũkethĩwa katĩ wa Klĩsto na mũtwawa wake?

¹⁵ Ũndũ ũngĩ nĩ kana Aklĩsto onthe nĩmatonya kũathimĩka nũndũ wa mũtwaano ũla ũwetetwe ngelekany’onĩ ĩsu ya Yesũ. Na nengĩ we nũũ wĩthĩwa ateteele mũtwaano ũsu na mea? Etĩkĩw’a mauta makethĩwa me ĩtunĩ kaũ wa Ali–Maketoni ũtanambĩĩa, na ĩndĩ wathela nĩw’o makatw’ĩka mũtwawa wa Klĩsto. (Ũvu. 19:7-9) Namo ala onthe makethĩwa kũũ nthĩ makaunwa mũno nĩ mũtwaano ũsu ũkekĩwa ĩtunĩ nũndũ ũkatuma kwĩthĩwa na silikalĩ nzeo vyũ ĩla ĩkasumbĩka andũ onthe. Twĩthĩwe twĩ na wĩkwatyo wa kũthi ĩtunĩ, kana wa kwĩkala kũũ nthĩ, ekai tũtw’e kũatĩĩa ũtao ũla wĩ ngelekany’onĩ ya eĩtu ĩkũmi. O na ĩngĩ ekai twĩkale twĩyũmbanĩtye ngoonĩ na twĩ alũmu, na tũiendeea kwĩkala twĩ metho ĩndĩ yonthe, nĩ kana twĩĩthĩwa tũtonya kũtanĩa maũndũ maseo ala Yeova ũtũmbanĩsye!