1, 2. (a) Jesu oigire atĩa ũhoro-inĩ wĩgiĩ matukũ ma kũrigĩrĩria? (b) Nĩ ciũria irĩkũ tũkwarĩrĩria?

TA HŨŨRA mbica Jesu aikarĩte thĩ Kĩrĩma-inĩ kĩa Mĩtamaiyũ handũ hekarũ ĩrĩa ĩrĩ Jerusalemu ĩroneka wega. Arĩ hamwe na arutwo ake ana, Petero, Andarea, Jakubu, na Johana. Arutwo acio mamũthikĩrĩirie na kinyi akĩmataarĩria ũhoro wa ũrathi wa magegania wa ihinda rĩrĩa rĩroka. Akamataarĩria maũndũ marĩa mageekĩka matukũ-inĩ ma kũrigĩrĩria ma thĩ ĩno njũru rĩrĩa agaakorũo arĩ Mũthamaki wa Ũthamaki wa Ngai. Ningĩ akamera atĩ matukũ-inĩ macio “ngombo [yake] ĩrĩa ĩĩhokekete na njũgĩ” nĩ ĩgaakorũo ĩgĩtabania maũndũ make gũkũ thĩ na ĩkĩhe arũmĩrĩri ake irio cia kĩĩroho ihinda rĩrĩa rĩagĩrĩire.—Mat. 24:45-47.

² Ũrathi-inĩ o ũcio, Jesu agacoka akamaganĩra rũgano rũrĩa rwa airĩtu ikũmi. (Thoma Mathayo 25:1-13.) Rekei twarĩrĩrie ciũria ici ithatũ: (1) Ũrutani ũrĩa mũnene thĩinĩ wa rũgano rũu nĩ ũrĩkũ? (2) Akristiano aitĩrĩrie maguta arĩa ehokeku mahũthĩrĩte atĩa ũtaaro wa rũgano rũu, na moimĩrĩro nĩ marĩkũ? (3) Ithuothe tũngĩgunĩka atĩa nĩ rũgano rũu?

3. Tene mabuku maitũ maataragĩria atĩa rũgano rwa airĩtu ikũmi, na no kũhoteke moimĩrĩro mararĩ marĩkũ?

³ O ta ũrĩa tuoonire gĩcunjĩ-inĩ kĩrĩa kĩhĩtũku, mĩaka-inĩ ya ica ikuhĩ ngombo ĩrĩa ĩĩhokekete ĩthiĩte ĩgĩcenjagia njĩra ya gũtaarĩria mohoro mamwe marĩa marĩ thĩinĩ wa Bibilia. Handũ ha gũtĩtĩrithia mũno atĩ mohoro macio nĩ kĩĩruru kĩa maũndũ mangĩ, ngombo ĩyo ĩtũteithagia kuona ũrĩa tũngĩhũthĩra mootaro marĩa marĩ thĩinĩ wa mohoro macio. Tene mabuku maitũ makĩaria ũhoro wa rũgano rwa Jesu rwĩgiĩ airĩtu ikũmi, rĩmwe moonanagia atĩ nginya tũmaũndũ tũrĩa tũnini mũno ta matawa, maguta, na cuba, nĩ kĩĩruru kĩa maũndũ mangĩ. Hihi no kũhoteke atĩ nĩ ũndũ wa gũtindanĩra mũno na tũmaũndũ tũnini, nĩ twaagaga kuona wega ũrutani mũhũthũ na wa bata thĩinĩ wa rũgano rũu? O ta ũrĩa tũkuona, macokio ma kĩũria kĩu nĩ ma bata mũno.

4. Thĩinĩ wa rũgano rũu-rĩ, tũmenyaga atĩa (a) mũhikania nũ? (b) airĩtu nĩa?

⁴ Rekei twarĩrĩrie ũndũ ũrĩa mũnene Jesu eendaga kũrutana rũgano-inĩ rũu. Tamba wĩcirie andũ arĩa magwetetwo thĩinĩ waruo. Mũhikania nũ? Hatarĩ nganja, Jesu aaragia ũhoro wake mwene. Tũmenyaga ũguo tondũ kũrĩ hĩndĩ ĩngĩ eeĩtire mũhikania! (Luk. 5:34, 35) Ĩ nao airĩtu? Thĩinĩ wa rũgano rũu, Jesu oigire atĩ mũhikania agĩũka, airĩtu acio maagĩrĩirũo nĩ gũkorũo meharĩirie na matawa mao magĩakanaga. Ũngĩrora nĩ ũkuona atĩ Jesu nĩ aaheete ‘karũũru kanini’ ka Akristiano aitĩrĩrie maguta ũtongoria o ta ũcio. Aamerĩte ũũ: “Ikaragai mwĩhotorete, na mũrĩ na matawa manyu magĩakanaga; na inyuĩ ene mũtuĩke ta andũ metereire mwathani wao, agĩcoka oimĩte iruga-inĩ rĩa kĩhikanio.” (Luk. 12:32, 35, 36) Makĩria ma ũguo, mũtũmwo Paulo na Johana matongoretio nĩ roho wa Jehova, maaringithanirie arũmĩrĩri a Kristo aitĩrĩrie maguta na airĩtu thingi. (2 Kor. 11:2; Kũg. 14:4) Ma nĩ atĩ, Jesu aarongoreirie rũgano rũu rũrĩ thĩinĩ wa Mathayo 25:1-13 rũkorũo rũrĩ ũtaaro na mũkaana harĩ arũmĩrĩri ake aitĩrĩrie maguta.

5. Jesu akĩheana ũtaaro ũrĩa ũrĩ rũgano-inĩ rwa airĩtu ikũmi onanirie atĩa ihinda rĩrĩa aaragia ũhoro warĩo?

⁵ Ningĩ-rĩ, Jesu aaragia ũhoro wa ihinda rĩrĩkũ akĩheana ũtaaro ũcio? Mũico-inĩ wa rũgano rũu Jesu nĩ atũteithĩtie kũmenya wega nĩ rĩrĩkũ tondũ oigire ũũ: ‘Mũhikania agĩũka.’ (Mat. 25:10) O ta ũrĩa tuoonire thĩinĩ wa ngathĩti ya Mũrangĩri ya Julaĩ 15, 2013, ũrathi wa Jesu thĩinĩ wa Mathayo 24 na 25 warĩtie ũhoro wa “gũũka” gwake maita manana. Akĩgweta “gũũka” gwake, Jesu aaragia ũhoro wa hĩndĩ ya thĩna ũrĩa mũnene rĩrĩa agooka gũtuĩra andũ na kũniina mũtabarĩre ũyũ mũru. Kwoguo no tuuge atĩ Jesu akĩheana ũtaaro ũrĩa ũrĩ thĩinĩ wa rũgano rũu aaragia ũhoro wa matukũ maya ma kũrigĩrĩria na atĩ agooka hĩndĩ ya thĩna ũrĩa mũnene.

6. Kũringana na maũndũ marĩa mathiũrũrũkĩirie rũgano rũu-rĩ, ũrutani ũrĩa mũnene waruo nĩ ũrĩkũ?

⁶ Ũrutani ũrĩa mũnene thĩinĩ wa rũgano rũu nĩ ũrĩkũ? Ririkana maũndũ marĩa marũthiũrũrũkĩirie. Jesu aakoretwo o hĩndĩ arĩrĩria ũhoro wa ‘ngombo yake ĩrĩa ĩĩhokekete na njũgĩ.’ Ngombo ĩyo nĩ gakundi kanini ka athuri aitĩrĩrie maguta arĩa matongoragia arũmĩrĩri a Kristo matukũ-inĩ maya ma kũrigĩrĩria. Jesu aaheire athuri acio mũkaana akĩmeera atĩ no mũhaka maikare marĩ ehokeku. Agĩcoka akĩhũthĩra rũgano rwa airĩtu ikũmi kũhe arũmĩrĩri ake othe aitĩrĩrie maguta matukũ-inĩ ma kũrigĩrĩria ũtaaro atĩ maikarage ‘mehũgĩte’ nĩguo matikanorũo nĩ ngerenwa yao ya goro. (Mat. 25:13) Rekei rĩu twarĩrĩrie rũgano rũu rũrĩ ruothe nĩguo tuone ũrĩa Akristiano aitĩrĩrie maguta mahũthĩrĩte ũtaaro waruo.

7, 8. (a) Airĩtu arĩa ogĩ moonanirie atĩa atĩ nĩ meethagathagĩte? (b) Akristiano aitĩrĩrie maguta monanĩtie atĩa atĩ nĩ meharĩirie?

⁷ Rũgano rũu rwa Jesu nĩ ruonanagia wega atĩ, ngũrani na airĩtu arĩa akĩgu, airĩtu arĩa ogĩ nĩ meethagathagĩte wega nĩ ũndũ wa gũka kwa mũhikania. Nĩ kĩĩ kĩngĩtũma tuuge ũguo? Tondũ nĩ meeharĩirie na nĩ meehũgĩte. Airĩtu acio othe ikũmi maagĩrĩirũo gũikara meiguĩte na maigĩte matawa mao magĩakanaga ũtukũ ũcio. Ngũrani na airĩtu arĩa akĩgu, airĩtu arĩa atano ogĩ nĩ meeharĩirie tondũ maakuĩte matawa na magakuua maguta na cuba. Akristiano arĩa aitĩrĩrie maguta ehokeku monanĩtie atĩa atĩ nĩ mehaarĩirie nĩ ũndũ wa gũka kwa Jesu?

⁸ Kuuma o rĩrĩa matukũ ma kũrigĩrĩria maambĩrĩirie, Akristiano aitĩrĩrie maguta makoretwo magĩka o ta airĩtu acio ogĩ, na njĩra ya gũkorũo mehaarĩirie kũruta na wĩhokeku wĩra ũrĩa maheetwo nginya maũrĩkie. Nĩ mamenyaga atĩ nĩguo matungatĩre Ngai no mũhaka meime maũndũ maingĩ ma thĩ ĩno ya Shaitani, na ũguo nĩguo mekĩte. Merutagĩra na magatungatĩra Jehova marĩ ehokeku nĩ ũndũ wa kũmwenda na kwenda Mũriũ wake, no ti tondũ atĩ mũico ũrĩ hakuhĩ. Maikaraga marũmĩtie wĩkindĩru wao na matiĩtĩkagĩra gũthũkio nĩ mĩerekera ya gũkũ thĩ ya kwenda indo cia kĩĩmwĩrĩ, ya waganu, na ya kwĩyenda. Nĩ ũndũ ũcio, magaikara methagathagĩte makĩhenagia ta ũtheri, metereire gũka kwa Mũhikania mategũthethũka, o na angĩoneka ta aikarĩte.—Afil. 2:15.

9. (a) Jesu onanirie atĩa ũhoro-inĩ wĩgiĩ gũkoma? (b) Akristiano aitĩrĩrie maguta moete ikinya rĩrĩkũ thutha wa kũigua gũkĩanĩrĩrũo: “Mũhikania nĩ mũũku!”? (Rora kohoro ka magũrũ-inĩ.)

⁹ Ningĩ airĩtu arĩa ogĩ nĩ meehũgĩte nĩ ũndũ wa gũka kwa mũhikania. O na kũrĩ ũguo, thĩinĩ wa rũgano rũu, airĩtu othe ikũmi ‘nĩ maacũngire na magĩkoma’ rĩrĩa meetereire mũhikania, ũrĩa woonekaga ta aaikarĩte. Nĩ ũndũ ũcio-rĩ, hihi no kũhoteke Akristiano aitĩrĩrie maguta ‘makome,’ ihinda-inĩ rĩrĩ metereire gũka gwa Kristo? Ĩĩ no kũhoteke. Jesu nĩ onanirie wega atĩ o na mũndũ ũrenda gũikara eiguĩte no orũo nĩ hinya. Nĩ ũndũ wa kũmenya ũguo, Akristiano aitĩrĩrie maguta arĩa ehokeku nĩ merutanagĩria mũno gũikara mehũgĩte kana meiguĩte. Thĩinĩ wa rũgano rũu rwa Jesu, airĩtu othe nĩ mooire ikinya maigua gũkĩanĩrĩrũo: “Mũhikania nĩ mũũku!” O na kũrĩ ũguo, arĩa maarĩ ogĩ nĩo maaikarire meehũgĩte. (Mat. 25:5, 6; 26:41) Ĩ nao Akristiano aitĩrĩrie maguta ũmũthĩ? Kuuma o rĩrĩa matukũ ma kũrigĩrĩria maambĩrĩirie, Akristiano acio nĩ moete ikinya thutha wa kũigua gũkĩanĩrĩrũo “Mũhikania nĩ mũũku!” Nĩ meyoneire ũira mũiganu ũrĩa ũronania atĩ Jesu arĩ hakuhĩ gũkinya, na nĩ methagathagĩte nĩ ũndũ wa gũka gwake. * O na kũrĩ ũguo, ciugo iria irĩ mũico-inĩ wa rũgano rũu rwa Jesu cionanagia ũndũ ũgekĩka ihinda rĩna. Nĩkĩ?

10. Mĩario gatagatĩ-inĩ ka airĩtu arĩa akĩgu na arĩa ogĩ ĩngĩtũma twĩyũrie kĩũria kĩrĩkũ?

¹⁰ Thĩinĩ wa rũgano rũu, no kũhoteke gĩcunjĩ kĩrĩa kĩngĩoneka kĩrĩ kĩritũ gũtaũkĩrũo, nĩ harĩa airĩtu arĩa akĩgu maaranĩirie na arĩa ogĩ. Maahoyaga maheo maguta, no arĩa ogĩ makĩrega kũmahe. (Thoma Mathayo 25:8, 9.) Ũndũ ũcio no ũtũme twĩyũrie ũũ: “Hihi nĩ kũrĩ hĩndĩ Akristiano aitĩrĩrie maguta  marĩ marega gũteithia mũndũ ũrĩ na ũbataro?” No tũgĩe na macokio ma kĩũria kĩu tũngĩĩciria Jesu aaragia ũhoro wa ihinda rĩrĩkũ akĩheana ũtaaro ũcio. Ririkana tuonire atĩ Mũhikania agoka gũtuĩra andũ mũico-inĩ wa thĩna ũrĩa mũnene. Nĩ ũndũ ũcio, no kũhoteke atĩ mĩario gatagatĩ-inĩ ka airĩtu arĩa akĩgu na arĩa ogĩ ĩronania ũndũ ũrĩa ũkaahanĩka kahinda kanini mbere ya thĩna ũrĩa mũnene gũthira. No tuuge ũguo tondũ gũkinyĩria ihinda-inĩ rĩu, Akristiano aitĩrĩrie maguta magaakorũo mekĩrĩtwo rũũri rwa mũico.

11. (a) Nĩ ũndũ ũrĩkũ ũgeekĩka thĩna ũrĩa mũnene ũtanambĩrĩria? (b) Airĩtu arĩa ogĩ meendaga kuuga atĩa rĩrĩa meerire arĩa akĩgu makegũrĩre maguta?

¹¹ Kwoguo thĩna ũrĩa mũnene ũtanambĩrĩria, Akristiano aitĩrĩrie maguta arĩa othe ehokeku magaakorũo mekĩrĩtwo rũũri rwa mũico. (Kũg. 7:1-4) Kuuma hĩndĩ ĩyo, nĩ magaakorũo na ma biũ atĩ nĩ magaathiĩ igũrũ. No ta wĩcirie ũhoro wa mĩaka ĩrĩa ĩrĩ ho mbere ya kwambĩrĩria gwa thĩna ũrĩa mũnene. Gũkaahanĩka atĩa harĩ aitĩrĩrie maguta arĩa magaakorũo matatũũrĩtie wĩkindĩru wao nĩ ũndũ wa kwaga kwĩhũga? Acio nĩ makoorũo nĩ mweke wa gũthiĩ igũrũ. Ũrĩa kũrĩ nĩ atĩ, matigekĩrũo rũũri rwa mũico. Gũkinyĩria hĩndĩ ĩyo, gũgaakorũo gũthurĩtwo Akristiano angĩ ehokeku na magaitĩrĩrio maguta. Rĩrĩa thĩna ũrĩa mũnene ũkaambĩrĩria, Akristiano acio akĩgu nĩ makamaka kuona Babuloni Ũrĩa Mũnene akĩninwo. No kũhoteke hĩndĩ ĩyo nĩrĩo makaagutũka atĩ matiĩhaarĩirie nĩ ũndũ wa gũka kwa Mũhikania. Gũkaahanĩka atĩa angĩkorũo nĩ makaageria kũhoya ũteithio? No tuone macokio rũgano-inĩ rũu. Airĩtu arĩa ogĩ nĩ maaregire kũhe arĩa akĩgu maguta, makĩmera mathiĩ makagũre mao. O na kũrĩ ũguo, ririkana atĩ kwarĩ “ũtukũ gatagatĩ.” Ma nĩ atĩ, maarĩ acerere mũno tondũ matingĩakorire endia a maguta mathaa macio.

12. (a) Hĩndĩ ya thĩna ũrĩa mũnene, gũgaathiĩ atĩa harĩ Akristiano arĩa maarĩ aitĩrĩrie maguta no makĩaga gũtũũria wĩkindĩru wao? (b) Ituĩro rĩa arĩa magaakorũo matariĩ ta airĩtu arĩa akĩgu nĩ rĩrĩkũ?

¹² O ũndũ ũmwe na ũguo, hĩndĩ ya thĩna ũrĩa mũnene, aitĩrĩrie maguta arĩa ehokeku matikahota gũteithia arĩa magaakorũo matarĩ ehokeku. Gũtirĩ mũndũ ũkaamateithia tondũ ihinda rĩgaakorũo rĩrĩ ithiru. Gũkaahanĩka atĩa harĩ o? Jesu nĩ aatarĩirie ũrĩa kwahanĩkire rĩrĩa airĩtu arĩa akĩgu maathire kũgũra maguta. Oigire ũũ: “Mũhikania agĩũka; na arĩa methagathagĩte magĩtonyania nake iruga-inĩ rĩa kĩhikanio: naguo mũrango ũkĩhingwo.” Rĩrĩa Jesu agooka na riri wake hakuhĩ mũico-inĩ wa thĩna ũrĩa mũnene, nĩ akoya Akristiano arĩa aitĩrĩrie maguta ehokeku athiĩ nao igũrũ. (Mat. 24:31; 25:10; Joh. 14:1-3; 1 Thes. 4:17) O ta airĩtu arĩa akĩgu, Akristiano aitĩrĩrie maguta arĩa magaakorũo matarĩ ehokeku nĩ makaahingĩrĩrio nja. No kũhoteke makaarĩra makiugaga ũũ: “Mwathani, Mwathani, tũhingũrĩre.” Jesu akaamacokeria o ta ũrĩa agacokeria andũ aingĩ aaganu hĩndĩ ya ituĩro, ameere ũũ: “Ngũmwĩra atĩrĩ na ma, Ndimũũĩ.” Kaĩ ũcio nĩ ũgaakorũo ũrĩ ũndũ wa kĩeha-ĩ!—Mat. 7:21-23; 25:11, 12.

13. (a) Nĩkĩ tũtingiuga atĩ nĩ kũrĩ Akristiano aingĩ aitĩrĩrie maguta makaaga wĩhokeku? (b) Nĩ kĩĩ kĩngĩtũma tuuge atĩ ciugo iria Jesu aahũthĩrire akĩheana mũkaana ningĩ nĩ cionanagia aarĩ na mwĩhoko biũ harĩ arũmĩrĩri ake? (Rora mbica kĩambĩrĩria-inĩ gĩa gĩcunjĩ gĩkĩ.)

¹³ Kũringana na maũndũ macio twarĩrĩria-rĩ, tũngiuga atĩa? Hihi Jesu eendaga kuuga atĩ nĩ kũrĩ na Akristiano aingĩ aitĩrĩrie maguta matakaarũmia wĩkindĩru wao na nĩ ũndũ ũcio kũbatare gũthurũo angĩ a gũcoka ithenya rĩao? Aca. Nĩ wega kũririkana atĩ aakoretwo o hĩndĩ ahee “ngombo ĩrĩa ĩĩhokekete na njũgĩ” mũkaana ndĩkanagarũrũke ĩtuĩke ngombo njũru. Ũguo ti kuuga atĩ nĩ aatanyaga ngombo ĩyo nĩ ĩngĩgaatuĩka  njũru. O ũndũ ũmwe na ũcio, rũgano rũu rwa Jesu nĩ rũkoragwo na mũkaana wa bata mũno. O ta ũrĩa kwarĩ na airĩtu atano akĩgu na atano ogĩ, Mũkristiano o wothe mũitĩrĩrie maguta arĩ na kĩhooto gĩa gwĩthurĩra gũikara ehaarĩirie na ehũgĩte kana gũikara atehũgĩte na atarĩ mwĩhokeku. Mũtũmwo Paulo nĩ aaririe ũndũ o ta ũcio rĩrĩa aandĩkagĩra Akristiano aitĩrĩrie maguta a hĩndĩ yake. (Thoma Ahibirania 6:4-9; ringithania Gũcokerithia Maathani 30:19.) Ũngĩrora nĩ ũkuona atĩ Paulo nĩ aahũthĩrire ciugo irĩ na hinya mũno akĩheana mũkaana ũcio, ĩndĩ agĩcoka akĩonania na njĩra ya wendo atĩ aarĩ na ma biũ atĩ kwarĩ na “maũndũ mega” meetereire aarĩ na ariũ a Ithe witũ acio. Ũguo noguo Jesu thĩinĩ wa rũgano rũu rwake aheanĩte mũkaana na njĩra ya wendo na arĩ na mwĩhoko biũ na arũmĩrĩri ake. Kristo nĩ oĩ atĩ arũmĩrĩri ake othe aitĩrĩrie maguta no mahote gũikara marĩ ehokeku na makaaheo kĩheo kĩu kĩa goro.

14. Nĩkĩ arĩa a “ng’ondu ingĩ” o nao no magunĩke nĩ rũgano rwa airĩtu ikũmi?

¹⁴ Tondũ Jesu eerekeirie rũgano rwa airĩtu ikũmi harĩ arũmĩrĩri ake aitĩrĩrie maguta-rĩ, hihi rũgano rũu nĩ rũkoragwo na ũguni harĩ Akristiano arĩa a “ng’ondu ingĩ”? (Joh. 10:16) Ĩĩ nĩ rũkoragwo. Ririkana atĩ ũrutani ũrĩa mũnene thĩinĩ wa rũgano rũu nĩ ũyũ: “Ikaragai mwĩhũgĩte.” Hihi ũtaaro ũcio wagĩrĩire o arĩa aitĩrĩrie maguta? Hĩndĩ ĩmwe Jesu oigire ũũ: ‘Na ũguo ndamwĩra inyuĩ, noguo ndera andũ othe, atĩrĩ, Ikaragai mwĩhũgĩte.’ (Mar. 13:37) Jesu endaga arũmĩrĩri ake othe maikarage mahaarĩirie ngoro ciao nĩguo matungatage marĩ ehokeku na meiguĩte. Akristiano othe no mahote kũrũmĩrĩra kĩonereria kĩega kĩa Akristiano aitĩrĩrie maguta, arĩa maigaga ũtungata wa Ngai mbere ũtũũro-inĩ wao. Ningĩ o mũndũ nĩ agĩrĩirũo nĩ kũririkana atĩ airĩtu arĩa akĩgu nĩ meerire airĩtu arĩa ogĩ mamahe maguta mamwe mao. Ũrĩa maacokeirio nĩ ũtũteithagia kuona atĩ gũtirĩ mũndũ ũngĩtuĩka mwĩhokeku ithenya-inĩ ritũ, arũmĩrĩre ũhoro wa ma ithenya-inĩ ritũ, kana aikare ehũgĩte ithenya-inĩ ritũ. O mũndũ nĩ agaacirithio nĩ Mũtuanĩri Cira mwĩhokeku ũrĩa Jehova athurĩte. No mũhaka tũikarage twĩthagathagĩte tondũ ica ikuhĩ nĩ egũka!

15. Nĩkĩ ũhiki wa Kristo nĩ ũkaaguna Akristiano othe?

¹⁵ Ningĩ Akristiano othe no magunĩke nĩ ũhiki ũrĩa ũgwetetwo thĩinĩ wa rũgano rũu. Thutha wa mbaara ya Hari-Magedoni, Akristiano aitĩrĩrie maguta nĩ magaatuĩka mũhiki wa Kristo. (Kũg. 19:7-9) Hĩndĩ ĩyo andũ othe gũkũ thĩ nĩ makaagunĩka kuumana na ũhiki ũcio ũgaakorũo igũrũ, tondũ nĩ ũgaatũma gũkorũo na thirikari nginyanĩru. O na angĩkorũo kĩĩrĩgĩrĩro gitũ nĩ gĩa gũthiĩ igũrũ kana nĩ gĩa gũgaatũũra gũkũ thĩ, rekei tũtue itua rĩa kũgunĩka nĩ ũrutani wa bata ũrĩa ũrĩ thĩinĩ wa rũgano rũu rwa airĩtu ikũmi. Rekei tuonanagie atĩ nĩ twĩthagathagĩte na njĩra ya gũikaraga tũhaarĩirie ngoro citũ na twĩhandĩte, ningĩ hingo ciothe tũikarage twĩhũgĩte nĩguo tũgaakenera ihinda rĩega rĩrĩa Jehova atwĩrĩire.