1, 2. (a) Ñanyi kintu kyaambile Yesu amba kikamweka mu moba akupelako? (b) Tusakwisamba pa ñanyi mepuzho?

BAFWAINWA baumvwine bingi bulongo byo bajinga pa Mutumba wa Maolivi—saka babena kutala nzubo ya Lesa mu Yelusalema—kimye Yesu kyo aambilenga bungauzhi bwanema bingi. Ba Petelo, Andeleo, Yakoba ne Yoano bateleko bingi muchima kimye Yesu kyo aambilenga bungauzhi bwa bintu bikamweka kulutwe. Yesu wibabujile byavula pa bikamweka mu moba atama akupelako, kimye kyo akalamanga mu Bufumu bwa Lesa. Wibabujile ne kuba’mba mu kyonkakya kimye, ‘kalume wanji wakishinka kabiji wa maana’ ye ukamwimenangako pano pa ntanda kabiji ye ukapananga kajo ka ku mupashi ka pa kimye kyafwainwa.—Mat. 24:45-47.

² Kepo Yesu aambile ne kishimpi kya bazhike jikumi mu bonka buno bungauzhi. (Tangai Mateo 25:1-13.) Twayai twisambe pa ano mepuzho alondelapo: (1) Kino kishimpi kitufunjishapo ka? (2) Bashingwa  bakishinka balondela byepi lujimuno luji mu kino kishimpi kabiji mwafuma ka? (3) Atweba bonse pa muntu pa muntu tufunjilako ka ku kino kishimpi?

3. Kala mabuku etu alumbululanga byepi kishimpi kya bazhike jikumi, kabiji kino kyalengelanga kuba ka?

³ Byonka byo twisambile mu mutwe wafumako kuba’mba mu myaka ya kulutwe kuno, kalume wakishinka pa kulumbulula Binembelo wata muchima pa byo tufunjilako kechi pa byo bilumbulula mu bungauzhi ne. Kala, mabuku etu alumbululanga mwatala byonsetu biji mu kishimpi kya kwa Yesu kya bazhike jikumi, bintu nabiji malampi, manyi ne mitumwa ne bintutu bikwabo. Nanchi kuba bino kwalengejilenga kine kintu kyanema kyo twafwainwa kufunjilako ku kino kishimpi kubula kumvwanyika nyi? Byonka byo tusakumona, mukumbu wa buno bwipuzho wanema bingi.

4. Mu kino kishimpi, twakonsha kuyuka byepi (a) musongoshi? (b) bazhike?

⁴ Twayai twisambe pa bintu biji mu kishimpi kya kwa Yesu. Patanshi twayai twisambe pa bo baambapo mu kino kishimpi. Musongoshi mu kino kishimpi ye ñanyi? Kwa kubula nangwa kuzhinaukatu ne, Yesu waambilenga pe aye mwine. Mambo pa kimye kimo witongwele aye mwine amba musongoshi. (Luka 5:34, 35) Nga bazhike bo bañanyi? Mu kino kishimpi, Yesu waambile kuba’mba musongoshi pa kufika wafwainwe kutaana bazhike nangwa’mba ba bisungu benengezha ne malampi abo saka abena kutema. Akyumvwai byambo bipasha na bino, Yesu byo aambijile ba mu “kajitanga kacheche” ka baana banji ba bwanga bashingwa bya kuba’mba: “Vwalai ne kwinengezhezha jimo ne kwambula malampi enu, kabiji mwikale nobe banabalume babena kupembelela nkambo yabo kufuma ku masongola.” (Luka 12:32, 35, 36) Kabiji mutumwa Paulo ne mutumwa Yoano bebatangijile ku mupashi kwesakanya bashingwa ba kwa Kilishitu ku bisungu biilama. (2 Ko. 11:2; Lum. 14:4) Kyamwekeshatu patoka kuba’mba byambo biji mu kishimpi kya Yesu kiji mu Mateo 25:1-13 byajinga bya kufunjisha ne kujimunako baana banji ba bwanga bashingwa.

5. Yesu wamwesheshe byepi kimye kikafika kishimpi kyanji?

⁵ Pano twayai twisambe pa kimye. Ñanyi kimye kikafika luno lujimuno lwa kwa Yesu? Yesu watongola kimye ku mpelo ya kino kishimpi amba: ‘Musongoshi wafikile.’ (Mat. 25:10) Byonka byo twisambile mu Kyamba kya Usopa kya July 15, 2013, bungauzhi bwa kwa Yesu bwanembwa mu Mateo kitango 24 ne 25 bwaamba pa ‘kufika’ bimye bitanu na bisatu, kabiji ponse po aambile bino waingijishe kyambo kimotu kya Kingiliki. Kabiji ponse po aambile bino, Yesu waambilenga pa kimye kya malwa akatampe, kimye kyo akeya na kuchibila mambo bantu ne konauna bwikalo bwa ino ntanda ibi. Onkao mambo, kino kishimpi kibena kufika mu ano moba akupelako, pano bino kikafika pa kankomo mu kimye kya malwa akatampe.

6. Ñanyi kishinka kikatampe kiji mu kino kishimpi?

⁶ Twakonsha kufunjilako ka ku kino kishimpi? Akivulukai kine kyo babena kwambapo mu buno bungauzhi. Yesu popo apwishishetu kwamba pa “kalume wa kishinka kabiji wa maana.” Uno kalume ke kajibumba kacheche ka banabalume bashingwa ba mu baana ba bwanga ba kwa Kilishitu bakatangijilanga mu moba akupelako. Yesu wajimwineko bano banabalume kuba’mba bafwainwa kutwajijila kwikala bakishinka. Kepo avwangilemo bakwabo byo aambile kishimpi kya kutundaika bonse bashingwa mu moba akupelako kuba’mba bafwainwa ‘kulabanga ne kukenkenta,’ kuchina’mba bakeya kutaya mfweto yabo. (Mat. 25:13) Pano twayai twisambe pa kino kishimpi ne kumona bashingwa byo babena kulondela luno lujimuno.

7, 8. (a) Ñanyi bintu bibiji byalengejile bazhike ba maana kwikala benengezha? (b) Bashingwa bamwesha byepi amba benengezha?

⁷ Kishimpi kya kwa Yesu kyaamba’mba bazhike babula maana kechi benengezhezhe ne, pa kuba bazhike ba maana abo benengezhezhe byo bapembelejilenga musongoshi kufika. Mambo ka? Mambo a bino bintu bibiji, benengezhezhe kabiji balabilenga. Bano bazhike bebapele mwingilo wa kupembelela musongoshi bufuku, onkao mambo bafwainwe kwikala na malampi abena kutema saka balaba kufikatu ne byo afikile musongoshi. Kupusanako na boba babujile maana, bazhike batanu ba maana abo benengezhe, basendelepo ne manyi akwabo a mu malampi mu mitumwa. Nanchi bena Kilishitu bashingwa benengezha nyi?

⁸ Kya kine benengezha bingi. Mu ano moba apelako, bena Kilishitu bashingwa bajitu nobe boba bazhike ba maana, benengezha kwingila mwingilo wabo mu bukishinka kufikatu ne ku mpelo. Bayuka byo kyakatazha kwikala bakishinka mu mwingilo wabo, kabiji bayuka ne kuba’mba mwingilo wabo wavwangamo kusankilapo byavula mu ino ntanda ya kwa Satana. Bepana kwingijila Yehoba na muchima yense, kechi na mambo a kuba’mba mpelo yafwenya kala pepi ne, bino na mambo a kumutemwa ne kukeba kwikala bakishinka kwi aye ne ku Mwananji. Balama bukishinka bwabo, bakanatu nsalansala mupashi wa ino ntanda ibi wa kutemwa bya bunonshi, wa bubi ne wa kwitemwatu obe mwine. Onkao mambo, benengezha kutwajijila kusama nobe byeya, kechi babwela panyuma na mambo a kumona nobe Musongoshi wabanda kufika ne.—Fili. 2:15.

9. (a) Ñanyi lujimuno lwapaine Yesu pa mambo a kukunuka? (b) Bashingwa bamwesha byepi kuba’mba bomvwina lujimuno lwa kuba’mba, “Musongoshi waiya”? (Monai tubyambo twamunshi.)

⁹ Kya bubiji kyakwashishe bazhike kwinengezha ke kwikala saka balaba. Nanchi baji mu jibumba ja bashingwa bakonsha kutendeka kukunuka ne kukankalwa kulaba nyi? Ee, vulukai kuba’mba Yesu waambile pa bano bazhike jikumi amba “bonse batatwile kukunuka ne kuponena mu tulo” na mambo a kubanda kwa musongoshi. Yesu wayukishetu bulongo kuba’mba nangwatu boba baji na muchima wa kwipana ne kizaku kimye kimo bakonsha kukankalwa na mambo a kukoka kwa mubiji. Onkao mambo, bashingwa bakishinka batwajijila kulondela luno lujimuno kabiji bebikako kutwajijila kulaba ne kukenkenta. Mu ñanyi jishinda? Mu kishimpi, bazhike bonse baumvwine pakachi ka bufuku kubijika kwa kuba’mba, “Musongoshi waiya!” Pano bino bonkatu bazhike ba maana bo bashajile na kulaba ne kukenketa kufikatu ne ku mpelo. (Mat 25:5, 6; 26:41) Pano nga bashingwa ba mu ano moba kiji byepi? Mu ano moba akupelako, bashingwa bakishinka bomvwina kuno kubijika kwa kuba’mba, “Musongoshi waiya.” Bashiinwa kuba’mba Yesu katatakatu afike, kabiji benengezha kutambwila Musongoshi kimye kiji kyonse kyo akonsha kufika. * Pano bino, kino kishimpi kyaamba kikatakata pa kimye kimo kyatongolwa. Ñanyi kimye kyonka kyo?

10. Kwisamba kwa bazhike ba maana na bazhike babula maana kuleta ñanyi bwipuzho?

¹⁰ Lubaji lwanema bingi lwa kino kishimpi lwaiya kumvwanyika na ku mpelo ya kino kishimpi, kimye kisambilenga bazhike babula maana na bazhike ba maana. (Tangai Mateo 25:8, 9.) Kuno kwisamba kwabo kuleta bwipuzho bwa  kuba’mba: “Nanchi bena Kilishitu bashingwa bakishinka bakikanapo kala kukwasha bantu bakebelenga kwibakwasha nyi?” Tutaana mukumbu wa buno bwipuzho inge twalanguluka pa kimye. Vulukai byo balumbulwile katataka papo kuba’mba Yesu, aye Musongoshi ukeya na kuchibila bantu mambo kwipi na ku mpelo ya malwa akatampe. Kino kishimpi kyamweka kibena kwamba pa bintu bikamweka mu kimye kya ku mpelo ya malwa akatampe. Kyamweka byobyo kikekala, mambo pa kyo kya kimye bashingwa saka batambula kala tutetesho twabo twapelako.

11. (a) Ki ka kikamweka saka kwashalatu pacheche malwa akatampe kutendeka? (b) Bazhike ba maana batazhizhe mwepi pa kutuma bakwabo kuya na kukeba manyi ku bapotesha?

¹¹ Bashingwa bonse bakishinka bakatambula tutetesho twabo twapelako, malwa akatampe saka akyangye kutendeka. (Lum. 7:1-4) Kyamwekeshatu patoka kuba’mba bakaya mwiulu pa kikye kimye. Pano akilangulukai pa myaka ikapitapo malwa akatampe saka akyangye kutendeka. Ki ka kikamwekela bashingwa babujilenga kulaba ne kukenkenta, bakankelwe kwikala bakishinka? Kechi bakatambula mfweto yabo ya kuya mwiulu ne. Kyamweka kechi bakatambula tutetesho twapelako ne. Pa kyokya kimye bakishinka bamo bakashingwa. Kimye malwa akatampe kyo akatendeka, aba babula maana bakakumya bingi pa kumona bikonaunwa Babilona Mukatampe. Kyamweka pa kyokya kimye popo bakayuka kuba’mba kechi benengezha kutambwila Musongoshi pa kufika ne. Mwalanguluka’mba, ki ka kikebamwekela inge bakakebe bukwasho pa kyo kya kimye? Byaambile Yesu mu kishimpi bitulengela kuyuka mukumbu. Bazhike ba maana bakaine kupapo manyi bazhike babula maana, bebabujile’mba yainga ku bapotesha manyi. Vulukai kuba’mba pajinga “pakachi ka bufuku.” Nanchi bakonsheshe kutaana bapotesha manyi pakachi ka bilo nyi? Ine, mambo bwaijile.

12. (a) Mu kimye kya malwa akatampe, bintu bikekala byepi ku bashingwa bakakankalwa kwikala bakishinka kufika kimye kya kutambula tutetesho twapelako? (b) Ki ka kikamwekela boba bakekala nobe bazhike batanu babula maana?

¹² Kyo kimotu, mu kimye kya malwa akatampe, bashingwa bakishinka kechi bakakwasha yense ukabula kwikala wa kishinka ne. Kechi kukekalapo wa kwibakwasha ne. Bunga bukapwila pa mpuki. Ki ka kikebamwekela? Yesu walumbulwile kikebamwekela amba bazhike babula maana byo bayile na kukabakana na kukeba manyi: ‘Musongoshi wafikile.’ Bazhike benengezhezhe bayile nanji ku kijiilo kya masongola kabiji bashinkile ne kinzhilo.’ Yesu byo akeya mu lukumo kwipi na ku mpelo ya malwa akatampe, ukakonkanya bonse banji bashingwa mwiulu. (Mat. 24:31; 25:10; Yoa. 141-3; 1 Tesa. 4:17) Kinzhilo bakekishinka, bakebashinkila pangye babula bukishinka, aba bakekala nobe bazhike babula maana. Kikekalatu nobe babena kujila muteeto amba: “Musongoshi, Musongoshi, tushinkwilaiko!” Bakebakumbula byonka byo bakakumbula aba baji nobe bambuzhi mu kimye kya kuchibilamo mambo amba: “Kine nemwambila namba, kechi nemuyuka ne.” Kikebatamina bingi.—Mat. 7:21-23; 25:11, 12.

13. (a) Mambo ka o twafwainwa kubujila kupwisha kuba’mba baana ba bwanga ba kwa Yesu bashingwa bavula kechi bakekala bakishinka ne? (b) Mambo ka o twafwainwa kumwenanga lujimuno lwa kwa Yesu kuba’mba lumwesha byo ebaketekela? (Monai kipikichala kitanshi.)

¹³ Nanchi twafwainwa kupwisha’mba ka kwesakana na bino byo twisambapo? Nanchi Yesu waambilenga’mba bashingwa bavula kechi bakekala bakishinka ne, kabiji amba bakapingizhapo bantu bakwabo nyi? Ine. Vulukai kuba’mba Yesu byo ajimwineko “kalume wa kishinka kabiji wa maana” kuba’mba kechi wafwainwa kwikala nobe kalume watama ne, kechi walumbulwilenga kuba’mba kino kyo kikebamwekela ne. Kyo kimotu, mu kino kishimpi namo muji lujimuno lwanema bingi. Byonkatu bazhike batanu byo bajinga babula  maana ne bakwabo batanu byo bajinga ba maana, ko kuba’mba yense washingwa wakonsha kusalapo mwine kwinengezha ne kulabanga nangwa kusalapo bwikalo bwa kubuula bukishinka mukafuma kalulu kuvimba meso. Mutumwa Paulo bamutangijile ku mupashi kunembela bakwabo bena Kilishitu bashingwa kishinka kipasha na kino. (Tangai Bahebelu 6:4-9; esakanyaiko Mpitulukilo ya mu Mizhilo 30:19.) Paulo wapaine lujimuno lwakosa bingi, bino walondezhepo ne byambo byamwesheshenga kuba’mba wibaketekela bya kuba’mba balongo ne banyenga bena Kilishitu bakamona “bintu byawama.” Onkao mambo, lujimuno luji mu kishimpi kya kwa Yesu lumwesha ne byo ebaketekela. Kilishitu wayuka kuba’mba bakalume banji bashingwa bonse bakonsha kwikala bakishinka ne kutambula mfweto yabo yawama bingi.

14. Nanchi ba mu “mikooko ikwabo” bakonsha kufunjilako ku kishimpi kya bazhike jikumi nyi?

¹⁴ Yesu mu kino kishimpi kya bazhike jikumi waambijilenga bena Kilishitu bashingwa. Pano nanchi kibena kulumbulula’mba kafwako kyo bakonsha kufunjilako ba mu “mikooko ikwabo” nyi? (Yoa. 10:16) Ine mwane, kechi ibyo ne. Vulukai kuba’mba, kishinka kine kiji mu kino kishimpi ke kya kuba’mba: “Labainga ne kukenkenta.” Nanchi bino byambo bya bashingwa bonkatu nyi? Yesu waambile ne kuba’mba: “Byo nemwambila anweba, naambila ne bonse namba: Labainga ne kukenkenta.” (Mako 13:37) Yesu ukeba baana banji ba bwanga bonse kunengezha michima yabo ne kutwajijila kwikala bakishinka ne kufikizha bikebewa pa kwikala balaba. Onkao mambo, bena Kilishitu bonse balondela bashingwa, kulondela byo boba ne kutangizhako patanshi mwingilo wa kusapwila mu bwikalo bwabo. Atweba bonse twafwainwa kuvulukanga bazhike babula maana balombelenga bakwabo manyi a mu malampi. Kulomba manyi kwabo kwituvululamo kuba’mba kafwako wafwainwa kwitwikelako wa kishinka ne, nangwa kwitwikelako mu bukine ne, nangwa kwitulabilangako ne. Atweba bonse tuketotolwela kwi aye Mutonyi waoloka watongolwa kwi Yehoba. Twayai twikalenga benengezha kimye kyonse. Katatakatu Yesu afike!

15. Mambo ka kulanguluka pa masongola akifwanyikizho a kwa Kilishitu o kuletela lusekelo ku bonse bena Kilishitu bakine?

¹⁵ Bena Kilishitu bonse bakamwenamo mu kintu kikatampe kikamweka kyatongolwa mu kishimpi kya kwa Yesu. Ñanyi mwi atweba ubula kusekela na mambo a ano masongola akifwanyikizho? Bashingwa bakekala mwiulu; panyuma ya nkondo ya Amagedonyi bo bakekala musongwa wa kwa Kilishitu. (Lum. 19:7-9) Bonse bakekala pano pa ntanda pa kyo kya kimye bakamwenamo byawama mu ano masongola akekela mwiulu, mambo akaleta kafulumende walumbuluka ukalama bulongo bantu bonse. Nangwa tuji na luketekelo lwa kuya mwiulu, nangwa lwa kwikala pano pa ntanda, atweba bonse twafwainwa kufunjilako ku kishimpi kya kwa Yesu kya bazhike jikumi. Twayai twikale benengezhezha jimo kupichila mu kunengezha michima yetu ne kutwajijila kwikala bakishinka. Tulabenga ne kukenkenta, pa kuba’mba tukeyowe bwikalo bwa lukumo, Yehoba bo etunengezhezha buji kulutwe.