1, 2. (a) Oityi Jesus apopile konthele yononthiki mbonthyulilo? (b) Omapulo patyi matukumbulula?

SOKA Jesus upumphi Komphunda Yomindyambi utala kondyuo ya Huku ko Jelusalei. Una ovalongwa vae vekuana, Petulu, na Andre, na Tiago, na João. Ovalongwa vatehelela nawa Jesus putyina evepopila eulo lihuvisa konthele yetyi matyiya komutwe. Eulo lipopia etyi matyimoneka mokueenda kuononthiki mbahulilila mbouye uno wovivi putyina Jesus atumina Mouhamba wa Huku. Jesus evepopila okuti mokueenda kuomuwo oo, maavela “omupika wekolelo nokualunguka,” otyilinga tyokuavela okulia kuopaspilitu ovalongwa vae momuwo watyo.—Mateus 24:45-47.

² Meulo olio, Jesus apopi onthengele-popia yovamphembela ekwi. (Tanga Mateus 25:1-13.) Monthele ei, matukumbulula omapulo aa: (1) Oityi onthengele-popia ihangununa? (2) Oñgeni ovalembulwa vekolelo vekahi nokulandula  etyi tyipopia onthengele-popia ya Jesus, iya oityi tyaeta? (3) Oñgeni onthue hono tupola ouwa konthengele-popia ya Jesus?

3. Kohale, oñgeni omikanda vietu ankho vihangununa onthengele-popia yovamphembela ekwi, iya oityi tyaeta?

³ Monthele yokualamba tuelilongesa okuti, momanima ano, omupika wekolelo wapilulula onkhalelo yokuhangununa omahipululo amwe Ombimbiliya. Pahe omupika wekolelo utala vali kuetyi tulilongesilako tyipona kovipuka vikahi mehipululo. Mongeleka, tala onthengele-popia ya Jesus yovamphembela ekwi. Omikanda vietu ankho vipopia okuti okandiyelo, nomulela, nounthenda, vilekesa otyipuka tyimwe ine omunthu. Okuti okuapopia ovipuka ovinyingi monthengele-popia kamatunoñgonoka etyi ihangununa? Ngetyi matutale, ekumbululo liakolela.

4. Monthengele-popia (a) omphunga olie, iya oñgeni tutyii? (b) ovamphembela ovalie, iya oñgeni tutyii?

⁴ Pahe tutalei etyi tyihangununa onthengele-popia ya Jesus. Tete, soka kovanthu vapopiwa monthengele-popia yovamphembela ekwi. Omphunga olie? O Jesus. Onthue tutyii mokonda Jesus welipopile okuti omphunga. (Lucas 5:34, 35) Ovamphembela ovalie? “Otyiunda otyitutu,” Ovakristau ovalembulwa. Oñgeni tutyii? Monthengele-popia, ovamphembela ankho vena okukala novikandiyelo viavo viatema putyina omphunga ameya. Pahe tala etyi Jesus apopila ovalanduli vae ovalembulwa: “Valei amukala tyafuapo amutemesa ovikandiyelo vienyi. Kalei ngomulume ukevelela omuhona wae, utunda kotyipito.” (Lucas 12:32, 35, 36) Tupu, tyilinge apostolu Paulu na João, vaeleka ovalanduli ovalembulwa va Kristu novamphembela. (2 Coríntios 11:2; Revelação 14:4) Ngotyo, tupondola okutala okuti elondolo likahi mu Mateus 25:1-13, liapewa ovalanduli va Jesus ovalembulwa.

5. Oñgeni Jesus alekesa omuwo welikuata kumwe nonthengele-popia yae?

⁵ Elondolo lia Jesus malifuisuapo momuwo patyi? Etyi Jesus apopia pokumanuhula onthengele-popia, tyitukuatesako okutyinoñgonoka. Wati: “Omphunga yeya.” (Mateus 25:10) Omutala Womulavi 15 ya Kakwenye yo 2013, tuelilongesamo okuti eulo lia Jesus likahi mu Mateus 24 no 25 lipopia ovikando etyinana “okuya” kwa Jesus. Etyi Jesus apopia “okuya” kwae ankho ukahi nokupopia omuwo wononkhumbi ononene putyina ameya opo akoyese nokuhanyako ouye uno wovivi. Ngotyo, tupondola okupopia okuti onthengele-popia ya Jesus yelikuata nononthiki mbahulilila, mahi “meya” mokueenda kuononkhumbi ononene.

6. Oityi onthengele-popia ihangununa?

 ⁶ Oityi tulilongesila konthengele-popia oyo? Hinangela onondaka mbatetekela nombu mbalandula kehipululo. Mu Mateus mokapitulu 24, Jesus wapopia “omupika wekolelo nokualunguka.” Omupika wekolelo ovalume vehehi vapolwa povalembulwa opo vahongolele ovalanduli va Kristu kononthiki mbonthyulilo. Jesus walondola ovalume ovo okuti vena okutualako nekolelo. Mokapitulu 25, Jesus wapopia onthengele-popia yovamphembela ekwi opo alondole ovalanduli vae aveho ovalembulwa kononthiki mbonthyulilo. Wevelondola “vatualeko tyalunguka” opo vahapumbwe ondyambi yavo yokuenda keulu. (Mateus 25:13) Pahe matulilongesa onthengele-popia noñgeni ovalembulwa valandula elondolo olio.

7, 8. (a) Omokonda tyatyi ovamphembela ovana-ndunge ankho vafuapo? (b) Oñgeni ovalembulwa velipongiya?

⁷ Monthengele-popia Jesus wapopia unene okuti ovamphembela vehena onondunge velikalela novamphembela ovana-ndunge ankho vafuapo etyi omphunga yehika. Omokonda yatyi? Omokonda ankho velifuiika ine velipongiya nokualunguka. Ovamphembela aveho ekwi ankho vesukisa okutualako tyalunguka nokukala novikandiyelo viavo viatema otyinthiki atyiho. Tyelikalela novamphembela vehena onondunge, ovamphembela ovana-ndunge ankho velifuiika ine velipongiya mokonda ankho vatyinda vali omulela opo vapake movikandiyelo viavo. Oñgeni Ovakristau ovalembulwa vekolelo velifuiika pala okuya kwa Jesus?

⁸ Ovalembulwa vafuapo pala okufuisapo otyilinga tyavo alo konthyulilo. Vaimbuka okuti opo vaumbile Huku vesukisa okuyekapo omalumono ouye wa Satanasi, iya vafuapo pala okutyilinga. Vatokola okuumbila Jeova noukuatyili, hamokonda onthyulilo ikahi popepi, mahi omokonda vehole Jeova Nomona wae. Vatualako nekolelo liavo nokuhayeke omalumono, noundalelapo notyituwa tyokulipakako vivenyone. Ngovamphembela ovana-ndunge ankho vena ovikandiyelo viavo viatema, ovalembulwa vatualako nokuliaima, otyo vakevelela noumphwa-lundo okuya Kuomphunga, namphila mokutala ngoti waseta.—Filipenses 2:15.

9. (a) Elondolo patyi Jesus aava konthele yokupoila? (b) Omokonda tyatyi ovalembulwa vakumbulilila okuti: “Omphunga oyei”? (Tala onondaka pokatoi.)

⁹ Ovamphembela ovana-ndunge ankho tupu vafuapo pala okuya kuomphunga mokonda ankho valunguka. Mahi monthengele-popia, ovamphembela ekwi aveho “vapoila avalala” putyina ankho vakevelela omphunga ankho imoneka ngoti yaseta. Okuti hono Ovakristau ovalembulwa vapondola “okulala” ine okutalukwa putyina  vakevelela okuya kwa Kristu? Enga. Jesus ankho utyii okuti alo umwe omunthu wafuapo upondola okusoya nokutalukwa putyina akevelela okuya kwae. Ngotyo Ovakristau ovalembulwa vekolelo vekahi nokulinga atyiho vevila opo vatualeko tyalunguka. Ñgeni ngotyo? Monthelenge-popia, ovamphembela aveho ekwi vakumbulula okuti: “Omphunga oyei!” Mahi ovamphembela ovana-ndunge ovo vala vatualako tyalunguka. (Mateus 25:5, 6; 26:41) Tupu, mokueenda kuononthiki mbonthyulilo, Ovakristau ovalembulwa vekolelo vekahi nokukumbulula okuti “Omphunga oyei!” Vetavela omalekeso aeho okuti Jesus ukahi nokuya, iya vafuapo pala okuya kwae. * (Tala onondaka pokatoi.) Tutalei onondaka Jesus apopia pokumanuhula onthengele-popia, nomuwo maifuisuapo.

10. Oityi tupondola okulipula konthele yetompho liovamphembela ovana-ndunge no vokuhena onondunge?

¹⁰ Konthyulilo yonthengele-popia, ovamphembela vokuhena nondunge vaita kovana-ndunge opo vevetililemo omulela movikandiyelo viavo. Mahi ovamphembela ovana-ndunge avaanye. (Tanga Mateus 25:8, 9.) Mahi onalupi Ovakristau ovalembulwa vaanya okukuatesako omunthu wesukisa? Hinangela omuwo onthengele-popia maifuiswapo. Jesus, omphunga, meya okukoyesa konthyulilo yononkhumbi onene. Ngotyo tyafuile etompho olio lipopia etyi matyimoneka tyina nkhele ononkhumbi onene mbehenepwe. Omokonda yatyi tupopila ngotyo? Omokonda momuwo oo, ovalembulwa mavapakuale enyingilikilo liahulilila.

11. (a) Oityi matyimonekapo tyina ononkhumbi onene mbehenehimbike? (b) Oityi ovamphembela ovana-ndunge ankho vahanda okupopia etyi vapopila vokuhena onondunge okuti, endei mukalande omulela?

¹¹ Ngotyo, tyina ononkhumbi onene nkhele mbehenehimbike, ovalembulwa aveho pano pohi mavapakwa enyingilikilo liahulilila. (Revelação 7:1-4) Otyo otyilekeso tyokuti mavaende keulu. Mahi soka komuvo tyina nkhele ononkhumbi onene mbehenehimbike. Oityi matyiende novalembulwa vahatuaileko tyalunguka nokuhena ekolelo? Kamavapakwa enyingilikilo liahulilila. Pomuwo opo Ovakristau ovakuavo vekolelo vapondola okulembulwa. Tyina ononkhumbi onene mbamehimbika, ovalembulwa vahatuaileko nekolelo mavatumphuluka nehanyauno lio Mbambilonia Onene. Opo vala mavaimbuka okuti kavafuilepo pala okuya kwa Jesus. Pomuvo opo, oityi matyimonekapo tyina vamaiti ekuateso? Ekumbululo likahi monthengele-popia. Ovamphembela ovana-ndunge vaanya okuavela omulela ovamphembela vehena onondunge, avevepopila opo vakalande omulela. Mokonda ankho “omokati kovinthiki” ankho petupu omunthu mevelandesa omulela. Ankho lietaka unene!

12. (a) Mokueenda kuononkhumbi onene, oityi matyiende novalembulwa vahatuaileko nekolelo tyina vehenepakwe enyingilikilo liahulilila? (b) Oityi matyiende na vana vaelekwa novamphembela vehena onondunge?

 ¹² Mokueenda kuononkhumbi onene, ovalembulwa vekolelo kamavetyivili okukuatesako nawike wahatuaileko nekolelo. Malitake unene. Ngotyo, oityi matyiende na vana vahatuaileko nekolelo? Tala etyi tyaenda novamphembela vehena onondunge vakalanda omulela: “Omphunga aiya. Ovamphembela vokuafuapo avanyingila nae motyipito tyotyinepo iya epito aliikwa.” Putyina Jesus ameya nomunkhima wae konthyulilo yononkhumbi ononene, matuala ovalembulwa vekolelo keulu. (Mateus 24:31; 25:10; João 14:1-3; 1 Tessalonicenses 4:17) Mahi, Jesus maanye vana vahatuaileko nekolelo. Ngetyi tyalingile ovamphembela vehena onondunge, navo mavati: “Tatekulu, Tatekulu, tuyelule!” Mahi oñgeni Jesus makumbulula? Mevekumbulula ngetyi makakumbulula ovanyingi vaelekwa novinkhombo, okuti: “Ame ndyimupopila otyili okuti: Ame himwii.”—Mateus 7:21-23; 25:11, 12.

13. (a) Omokonda yatyi katyaviukile okusoka okuti ovalanduli ovanyingi ovalembulwa va Kristu kamavatualako nekolelo? (b) Omokonda yatyi tupopila okuti onthengele-popia ilekesa okuti Jesus uyumba onthumbi Movakristau ovalembulwa? (Tala olutalatu pefo pahimbikila onthele.)

¹³ Okuti Jesus ankho ukahi nokupopia okuti ovalembulwa ovanyingi kamavatualako nekolelo atyisukisa okulembula ovakuavo? Au. Mu Mateus 24, tutangamo okuti Jesus walondola omupika wekolelo nokualunguka opo ahakale omupika ondingavivi. Otyo katyilekesa okuti Jesus ankho uhanda tyimonekepo. Tupu, onthengele-popia yovamphembela ekwi elondolo. Ngetyi tyaendele novamphembela vetano vehena onondunge, novamphembela vetano ovana-ndunge, kese Omukristau omulembulwa wesukisa okuholovona okulifuiika nokukala tyalunguka. Tupu, upondola okukala tyehena onondunge nekolelo. Paulu waavela elondolo ngolio ovalembulwa. (Tanga Hebreus 6:4-9; tyieleka na Deuteronômio 30:19.) Melondolo olio Paulu kelisetaile vali, mokonda ankho una onthumbi yokuti ovalembulwa mavatambula ondyambi yavo. Elondolo likahi monthengele-popia yovamphembela ekwi, lilekesa okuti Jesus nae una onthumbi ngoyo kovalembulwa. Ankho utyii okuti ovalembulwa aveho vapondola okutualako nekolelo avatambula ondyambi yavo ongwa!

14. Omokonda yatyi “onongi ononkhuavo” nambo mbupola ouwa konthengele-popia yovamphembela ekwi?

¹⁴ Onthengele-popia ya Jesus opala  Ovakristau ovalembulwa. Mahi okuti “onongi ononkhuavo” navo vapondola okupola ouwa konthengele-popia ya Jesus? (João 10:16) Enga! Onthengele-popia ilongesa okuti: “Tualeiko tyalunguka.” Iya Jesus wapopia okuti: “Etyi ndyimupopila ndyityipopila aveho, okuti tualeiko tyalunguka.” (Marcos 13:37) Jesus uhanda ovalongwa vae aveho velifuiike ine okulipongiya nokukala tyalunguka. Iya Ovakristau aveho vapondola okuhetekela ongeleka ongwa yovalembulwa vapaka tete momuenyo wavo ovilinga viokuivisa. Hinangela okuti ovamphembela vehena onondunge vaita kovana-ndunge veveavele omulela. Mahi aveheveavela. Otyo tyituhinangelesa okuti kese umwe puonthue wesukisa okutualako nekolelo mu Huku, pokulifuika nokutualako tyalunguka. Petupu omunthu upondola okutulingilako. Atuho matukakoyeswa Nomukoyesi omuviuki, Jesus Kristu meya apa katutu. Ngotyo tuna okukala tyafuapo!

15. Omokonda yatyi otyinepo tya Kristu nondombwa yae matyihambukiswa Ovakristau aveho votyotyili?

¹⁵ Ovakristau aveho vahambukwa notyinepo tyapopiwa monthengele-popia ya Jesus. Konyima yo Armagedon, Ovakristau ovalembulwa mavakakala ondombwa ya Kristu. (Revelação 19:7-9) Aveho mavakala pano pohi, mavapolo ouwa kotyinepo matyilingwa keulu. Omokonda yatyi? Omokonda otyo tyituavela onthumbi yokuti makukala vala outumini wike wafuapo maukatumina ovanthu aveho. Tyilinge tuna ekevelelo liokuenda keulu ine liokukala pano pohi, tutokolei okutualako tyafuapo, nokualunguka. Inkha tulinga ngotyo, matukahambukilwa ovipuka oviwa Jeova etupakela komutwe!