1, 2. (a) Yesu akagamba ki aha bikwatiraine n’ebiro by’emperu? (b) Ni bibuuzo eki ebi turikuza kushwijuma?

TEERA akashushani Yesu ashutami aha Rushozi rwa Zeituuni arikureeba hekalu omuri Yerusaalemu, arikugamba bumwe aha bunabi bwe oburikushemeza. Petero, Anderea, Yakobo, na Yohaana, bakaba bamuteireho omutima arikubamanyisa obunabi oburikukwata aha biro by’omumaisho. Akabagambira ebirikukwata aha biro by’emperu eby’ensi egi embi, obu yaakubaire naategyeka omu Bukama bwa Ruhanga. Akabagira ngu omu bwire bukuru obwo, ‘omwambari omwesigwa’ akaabaire ari omu nsi, arikuha abakuratsi be eby’okurya eby’omwoyo ebi barikwetenga omu bunaku obuhikire.—Mat. 24:45-47.

² Ekyakuratsireho, omu bunabi nibwo bumwe, Yesu akagamba aha nfumu y’abaishiki ikumi. (Shoma Matayo 25:1-13.) Ka tute omutima aha bibuuzo ebi: (1) Enfumu egi erimu butumwa ki? (2) Abashukirweho amajuta abeesigwa bagyendeire bata aha buhabuzi oburi omu nfumu egi, kandi harugiremu ki? (3) Buri omwe ahariitwe naabaasa kugasirwa ata omu nfumu ya Yesu obunaku obu?

3. Enyima, ebitabo byaitu bikaba nibishoboorora bita enfumu y’abaishiki ikumi, kandi eki nikibaasa kurugamu ki?

³ Omu kicweka eky’enyima tureebire ngu omu myaka egi, omwambari omwesigwa naashoboorora Ebyahandiikirwe atarikuta omutima munonga aha bunabi n’eki burikujwekyera, kureka aha ki turikubyegaho. Enyima, ebitabo byaitu bikaba nibigira ngu ebintu byona ebirikugambwaho omu nfumu ya Yesu ey’abaishiki ikumi nk’etabaaza, amajuta, ecupa, n’ebindi biine eki birikujwekyera. Mbwenu shi okushoboorora buri kintu ekiri omu nfumu egi tikirikubaasa kuba kibaire nikishweka obutumwa bukuru kandi obworobi? Nk’oku turikuza kureeba, eky’okugarukamu ni kikuru munonga.

4. Omu nfumu ya Yesu nitubaasa kumanya tuta (a) kishwera? (b) abaishiki?

⁴ Ka tureebe obutumwa bworobi obw’enfumu egi. Ka tubanze twetegyereze abantu abarikugambwaho. Omu nfumu egi kishwera n’oha? Hatariho kubanganisa Yesu akaba naayegambaho. Ahakuba emirundi etari emwe n’emwe akeegambaho nka kishwera. (Luk. 5:34, 35) Kandi shi abaishiki? Omu nfumu egi, Yesu naagira ngu abaishiki bashemereire kuba beteekateekire baine etabaaza nari etaara zaabo zirikwaka kishwera yaaza kwija. Yetegyereze obuhabuzi nibwo bumwe obu Yesu yaahaire ‘ab’obusyo obukye’ abakuratsi be abashukirweho amajuta. Akabagira ati: “Mugume mwezirikire enkoba zaanyu, n’etabaaza zaanyu zigume nizaaka; naimwe mube nk’abantu abategyereize mukama waabo okugaruka omuka naaruga omu bugyenyi.” (Luk. 12:32, 35, 36) Kandi, entumwa Paulo n’entumwa Yohaana bakagyeragyeranisa abakuratsi ba Kristo abashukirweho amajuta aha baishiki abashugaine. (2 Kor. 11:2; Kush. 14:4) Buzima, Yesu akaba naayenda ngu enfumu eri omuri Matayo 25:1-13 abakuratsi be abashukirweho amajuta bagitware nk’obuhabuzi n’okurabura.

5. Yesu akooreka ngu enfumu ye neekwata aha bwire ki?

⁵ Ekindi, teekateeka aha bwire. Obuhabuzi bwa Yesu bukaba nibukwata aha bwire ki? Yesu naatuhwera kumanya gye obwire obwo aha muheru gw’enfumu ye arikugira ati: “Kishwera yaija.” (Mat. 25:10) Nk’oku kyagambirwe omu Munaara ogwa Gyuraayi 1, 2013, obunabi bwa Yesu oburi omu Matayo 24 na 25 nibugamba aha ‘kwija’ kwe emirundi munaana, buri murundi ekigambo ky’Orugriika ekiine amakuru g’okwija nikikoresibwa. Buri murundi, Yesu akaba naagamba aha bunaku bw’okubonabona kwingi obu araije kucwa orubanja n’okucwekyereza ensi egi embi. Hatariho kubanganisa, enfumu egi neekwata aha biro by’emperu, na munonga byaba nibihendera omu bunaku bw’okubonabona kwingi.

6. Enfumu ya Yesu erimu butumwa ki kurugiirira aha bigyetooroire?

⁶ Enfumu egi erimu butumwa ki obworobi? Ijuka ebyetooroire enfumu egyo. Yesu akaba yaaheza kugamba aha ‘mwambari omwesigwa kandi ow’obwengye.’ Ab’eishe-emwe bakye abashukirweho amajuta nibo baakubaire bari omwambari barikwebembera abakuratsi ba Kristo omu biro by’emperu. Yesu akarabura ab’eishe-emwe abo ngu baine kuguma bari abeesigwa. Bwanyima, omutima akaguta aha bakuratsi be boona abashukirweho amajuta abaakubaire bariho omu biro by’emperu, yaabehanangiriza ngu ‘bagume nibareeba’ kugira ngu batafeerwa ekiconco kyabo eky’omuhendo. (Mat. 25:13) Hati ka tushwijume enfumu egi kandi tureebe oku abashukirweho amajuta bagyendeire aha buhabuzi bwayo.

7, 8. (a) Ni bintu ki bibiri ebyahwereire abaishiki kuguma beeteekateekire? (b) Abashukirweho amajuta boorekire bata ngu beeteekateekire?

⁷ Enfumu ya Yesu neeyoreka ngu abaishiki ab’obwengye bakaba beeteekateekire okutashushana  n’abashema. Niki ekyabahwereire? Ebintu bibiri ebi: okwetebeekanisa n’okuguma nibareeba. Abaishiki aba abaabaire bahairwe obujunaanizibwa bw’okutegyereza kishwera, bakaba baine kurinda etabaaza zaabo zikaguma nizaaka kandi bakaguma beeteekateekire kuhitsya yaija. Bataano bakeetebeekanisa baija n’etabaaza zaabo zirimu amajuta, kandi baija n’amajuta agandi omu cupa okutashushana n’abashema. Mbwenu shi abashukirweho amajuta nabo boorekire ngu betebeekaniise?

⁸ Buzima bagumire betebeekaniise! Omu biro by’emperu byona, Abakristaayo abashukirweho amajuta batwarize nk’abaishiki abo ab’obwengye, betebeekaniise kukora omurimo gwabo kuhitsya aha mperu. Nibakora embariirira y’obuheereza bwabo, barikumanya ngu kuruga aha kutandika baine kwefeerereza eby’obutungi bingi ebiri omu nsi ya Sitaane. Nibeemarira ahari Yehova booreka ngu nibamukunda barikumuheereza kandi nibeega ebirikumukwataho hamwe n’omwana we, kwonka tibarikuheereza barikuteekateeka aha bwire obu omurimo gwabo guraahwe. Nibaguma bari abeesigwa, barikwanga kugira omwoyo gw’ensi egi embi n’okwebembeza eby’obutungi, ebikorwa by’obushambani, n’okweyendeza. N’ahabw’ekyo nibaguma beeteekateekire, barikuguma nibaaka nk’etabaaza, bategyereize okwija kwa Kishwera okurikurebeeka nk’okutwireho.—Fil. 2:15.

9. (a) Yesu akaha kurabura ki okurikukwata aha kuhungira? (b) Abashukirweho amajuta bagyendeire bata aha bigambo ebirikugira ngu, “reeba, kishwera yaija”? (Reeba n’obugambo obw’ahansi.)

⁹ Ekindi ekirikuhwera abashukirweho kuba beeteekateekire n’okuguma bategyereize. Kwonka shi nikibaasika bamwe aha Bakristaayo abashukirweho amajuta kugwejegyera obwo bategyereize kishwera? Eego nikibaasika. Yesu akagira ngu abaishiki ikumi ‘boona bakahungira, baagwejegyera’ kishwera ku yaareebekire nk’otwireho kwija. Akaba naamanya ngu n’obu omutima gwakuba nigwenda, nigubaasa kuremesibwa omubiri omweremwa. Abashukirweho amajuta abeesigwa batwire nibaijuka okurabura okwo, kandi nibateeraho munonga kuguma nibareeba. Omu nfumu egi, abaishiki boona nyekiro bakahurira orwari ngu, “reeba, kishwera yaija!” Kwonka abaabaire betebeekaniise nibo bagumisiriize kuhika aha muheru. (Mat. 25:5, 6; 26:41) Kandi shi abashukirweho amajuta abeesigwa obunaku obu? Omu biro by’aha mperu byona, hariho obuhame oburikworeka ngu bagyendeire aha bigambo ebirikugira ngu, “reeba, kishwera yaija” ari haihi kuhika aha. Kandi bagumisiriize, baaguma bategyereize Kishwera kwija. * Kwonka, ebigambo ebirikuhererukayo omu nfumu egi nibigamba aha bwire bukuru. Mu muringo ki?

10. Ebigambo ebi abaishiki ab’obwengye baagambiire abashema nibireetaho kibuuzo ki ekigumire?

¹⁰ Ebigambo by’enfumu ebigumire n’ebiri aha muheru gwayo, ebi abaishiki ab’obwengye baagambiire abashema. (Shoma Matayo 25:8, 9.) Ebigambo byabo ebyo nibireetaho ekibuuzo eki: “Ni ryari omu byafaayo by’abantu ba Ruhanga obu abeesigwa barangire kuhwera omuntu owaashaba obuhwezi?” Eky’okugarukamu ky’ekibuuzo ekyo nitukitunga twateekateeka aha bwire oburikugambwaho. Ijuka enyetegyereza ei twaheza kugambaho neegira ngu Yesu, Kishwera,  naza kwija kucwa orubanja okubonabona kwingi kuri haihi kuhendera. N’ahabw’ekyo, ebigambo ebirikuhererukayo omu nfumu egi nibibaasa kuba nibikwata aha kiraabeho okucwa orubanja orwo kurikuburayo kakye kukahika. Ekyo kiri kityo, ahakuba omu bwire obwo abashukirweho amajuta nibaija kuba baateirweho akamanyiso ak’ahamuheru.

11. (a) Niki ekirikwija kubaho harikuburayo obwire bukye okubonabona kwingi kukatandika? (b) Abaishiki ab’obwengye bakaba nibamanyisa ki obu baagambira abashema ngu bagyende ahu barikutundira amajuta?

¹¹ N’ahabw’ekyo, okubonabona kwingi kutakatandikire, abashukirweho amajuta boona abeesigwa abaraabe bakiri omu nsi nibaija kuba baateirweho akamanyiso ak’ahamuheru. (Kush. 7:1-4) Kuruga obwo, nibaija kuba nibahamya gye ngu nibaza omu iguru. Kwonka teekateeka aha bwire, okubonabona kwingi kutakahikire. Omu bwire obwo bamwe aha bashukirweho amajuta baaremwa kuguma nibareeba nari bakaremwa kurinda obwesigwa bwabo niki ekiraabahikyeho? Nibaija kufeerwa omugisha gwabo gw’okuza omu iguru. Hatariho kubanganisa, tibarikwija kuteebwaho akamanyiso ak’ahamuheru okubonabona kwingi kutakatandikire. Omu bwire obwo, abandi abeesigwa nibaija kushukwaho amajuta. Okubonabona kwingi ku kuraatandikye, abashema nibabaasa kutangaara kureeba Babulooni Orukuru rurikucwekyerezibwa. Obwo nibwo barikwija kumanya ngu babaire bateetekateekiire okwija kwa Kishwera. Omu bwire obwo, baateeraho kushaba obuhwezi, niki ekiraabeho? Enfumu ya Yesu neetuhwera kutunga eky’okugarukamu. Abaishiki ab’obwengye bakanga kuha abashema amajuta gaabo, barikubagira ngu bagyende ahu barikugatundira. Kwonka ijuka ngu bukaba buri “nyekiro omu itumbi.” Mbwenu bakaba nibaija kushangayo abarikutunda amajuta omu shaaha ezo? Ngaaha. Obwire bukaba bwahwaireyo.

12. (a) Omu okubonabona kwingi, niki ekirikwija kuhika aha babaire bashukirweho amajuta abaraaremwe kurinda obwesigwa bwabo batakateirweho akamanyiso ak’ahamuheru? (b) Abo abaraabe bari nk’abaishiki abashema nibaija kuhendera bata?

¹² Nikyo kimwe, omu bunaku bw’okubonabona kwingi, abashukirweho amajuta abeesigwa tibarikwija kubaasa kuhwera omuntu weena oraabe atari mwesigwa. Nihaija kuba hatariho buhwezi bwona. Obwire nibwija kuba bwahweireyo. Mbwenu shi niki ekirikwija kuhika aha bantu nk’abo? Yesu akashoboorora ngu abaishiki abashema ku baabaire bagiire kugura amajuta, “kishwera yaija; abaabaire beeteekateekire baataaha nawe omu nju omu bugyenyi bw’okushwera; orwigi rwakingwa.” Kristo ku araizire omu kitiinisa okubonabona kwingi kuri haihi kuhendera, naija kurundaana abashukirweho amajuta abeesigwa kutwarwa omu iguru. (Mat. 24:31; 25:10; Yoh. 14:1-3; 1 Tes. 4:17) Buzima, abaraabe batari beesigwa nibaija kukiingirwa aheeru nk’oku kyabaire aha baishiki abashema. Nk’abaishiki abashema, nabo nibabaasa kuba nk’abarikugira bati: “Mukama waitu, Mukama waitu, twigurireho!” Kwonka nibaija kugarukwamu nk’oku baingi abaraabe bari nk’embuzi baraagarukwemu bati: “Buzimazima nimbagambira nti: Tindikubamanya.” Ekyo ka nikiija kuba eky’obusaasi!—Mat. 7: 21-23; 25:11, 12.

13. (a) Ahabw’enki tutashemereire kuteekateeka ngu baingi aha bakuratsi ba Kristo abashukirweho amajuta tibarikwija kuguma bari abeesigwa? (b) Ahabw’enki okurabura kwa Yesu kurikworeka ngu naayesiga abashukirweho amajuta? (Reeba ekishushani aha kutandika.)

¹³ Kurugiirira aha bi twareeba, nitubaasa kuhendera tuta? Mbwenu shi Yesu akaba naamanyisa ngu baingi aha baheereza be abashukirweho amajuta tibarikwija kuba beesigwa reero hatooranwe abandi omu mwanya gwabo? Ngaaha. Ijuka ngu akaba yaaheza kurabura ‘omwambari omwesigwa kandi ow’obwengye’ kutaba mubi. Ekyo  tikirikumanyisa ngu akaba naamanya ngu nihaija kubaho omwambari omubi. Nikyo kimwe, enfumu egi erimu okurabura kw’amaani. Nk’oku abaishiki bataano baabaire bari ab’obwengye abandi bataano bari abashema, buri omwe aha bashukirweho amajuta naabaasa kucwamu kuguma naareeba kandi ayeteekateekire nari naabaasa kutaba mwesigwa. Entumwa Paulo akahwerwa Ruhanga kugamba aha nshonga niyo emwe obu yaabaire naagambira Abakristaayo abashukirweho amajuta bagyenzi be. (Shoma Abaheburaayo 10:29, 39; gyeragyeranisa na Eky’Ebiragiro 30:19.) Yetegyereze ngu okurabura kwa Paulo kukaba kuri okw’amaani, kwonka akakukuratsa ebigambo ebirikworeka ngu akaba naayesiga Abakristaayo bagyenzi be arikugira ngu “tituri muri abo abarikugaruka enyima.” Nikyo kimwe, okurabura okuri omu nfumu ya Yesu kurimu obwesigye. Kristo naamanya ngu buri omwe aha baheereza be abashukirweho amajuta naabaasa kuguma ari omwesigwa kandi atungye ekihembo kye!

14. Ahabw’enki ‘ab’entaama ezindi’ nabo barikubaasa kugasirwa omu nfumu y’abaishiki ikumi?

¹⁴ Mbwenu shi ahabw’okugira ngu enfumu y’abaishiki ikumi Yesu akagigambira abakuratsi be abashukirweho amajuta, tugire ngu terikugasira ‘ab’entaama ezindi’? (Yoh. 10:16) Ngaaha buzima! Ijuka ngu obutumwa oburi omu nfumu egi nibugira ngu, “mugume nimureeba.” Mbwenu shi ekyo nikikwata aha bashukirweho amajuta bonka? Izooba rimwe Yesu akagira ati: “Eki ndikubagambira imwe, nikyo ngambira boona, nti: Mugume nimureeba!” (Mak. 13:37) Yesu naayenda ngu abakuratsi be boona batebeekanise emitima yaabo kuheereza n’obwesigwa kandi bakuratire emitindo niyo emwe ey’okuguma nibareeba. N’ahabw’ekyo, Abakristaayo boona nibakuratira obwebembezi bw’abashukirweho amajuta barikutooreza eky’okureeberaho kyabo kirungi, kandi bakeebembeza okubuurira. Buri omwe ahariitwe ashemereire kuguma naijuka ngu abaishiki abashema bakashaba ab’obwengye aha majuta gaabo. Okushaba kwabo nikutwijutsya ngu tihariho orikubaasa kutubeera omwesigwa, tihaine orikubaasa kutubeera omu mazima, nari kuguma naatureebera. Buri omwe ahariitwe naija kwegarukiramu omu maisho g’Omuramuzi ohikiriire ou Yehova atooraine. Twine kuba tweteekateekire. Kandi naija juba!

15. Ahabw’enki Abakristaayo boona bainiire ekihika obugyenyi bwa Kristo obw’okushwera omugore we?

¹⁵ Abakristaayo boona nibabaasa kugasirwa omu mukoro mukuru ogurikugambwaho omu nfumu ya Yesu. N’oha omuriitwe otaine kihika ky’obugyenyi bw’okushwera obwo? Abashukirweho amajuta nibaija kuba bari omu iguru bwanyima ya Haramagedoni, nibaija kuba omugore wa Kristo. (Kush. 19:7-9) Buri omwe omu nsi naija kugasirwa omu bugyenyi obwo obw’omu iguru, ahakuba nibuhamiza buri omwe ngu nihaija kubaho gavumenti ehikiriire. Yaaba twine amatsiko g’okutunga amagara agatahwaho omu iguru nari omu nsi, ka tumariirire kwega enshonga nkuru omu nfumu y’abaishiki ikumi. Ka tugume tweteekateekire turikutebeekanisa emitima yaitu, kandi tugume nitureeba, kugira ngu tubaase kutunga ebiro birungi by’omumaisho!