1, 2. (a) Antoy impropesiya nen Jesus ya nagawad kaunoran iran agew? (b) Anto ran tepet so ebatan tayo?

SEGURADON nikadkaduman eksperiensya ya nakaibay Jesus diman ed Palandey na Olibo—ya sankabantag so templo ed Jerusalem—nen imbaga to so sakey ed saray makapakelaw ya propesiya to. Madengedengel si Pedro, Andres, Santiago, tan Juan legan ya ipropropesiya nen Jesus so nagawad arapen. Impasakbay to so nagawad kaunoran iran agew na sayan mauges ya sistema na mundo, sano sikatoy manuley la bilang Ari ed Panarian na Dios. Impropesiya to ya legan na satan a panaon, sikatoy irepresenta na “matoor tan makabat ya aripen” to diad dalin, ya mangiter ed saray lingkor to na espiritual a naakan diad dugan panaon.—Mat. 24:45-47.

² Insan diad satan met lanlamang ya propesiya, insalaysay nen Jesus so parabolo nipaakar ed samploran mamarikit. (Basaen so Mateo 25:1-13.) Diad sayan artikulo, ebatan tayo irayan tepet: (1) Antoy mensahe na satan a parabolo? (2) Panon itan ya  inyaplika na saray matoor ya alanaan, tan antoy resulta? (3) Panon ya minabang so balang sakey ed sikatayo natan ed satan ya parabolo nen Jesus?

3. Nensaman, panon ya impaliwawa na literatura tayo so parabolo nipaakar ed samploran mamarikit, balet antoy resulta?

³ Inaral tayod imbeneg ya artikulo ya diad apalabas iran dekada, inuman na matoor ya aripen so paraan na panangipaliwawa ed saray salaysay ed Biblia. Mas idadanet la na matoor ya aripen so praktikal iran leksion imbes ya saray mapropetikon kabaliksan. Nensaman, nabasad literatura tayo iray espisipikon isisimbolo na anggan saray angkekelag ya detalye na parabolo nen Jesus nipaakar ed samploran mamarikit—singa say lamparaan, larak, kargaan na larak, tan arum ni. Balet, agta lapud satan et nibabaliwala lay simpli tan importantin mensahe na parabolo? Say ebat ed satan a tepet et importantin maong.

4. Diad parabolo, panon tayon naamtaan no siopa so (a) nobyo? (b) mamarikit?

⁴ Nengnengen tayoy mensahe nen Jesus ed sayan parabolo. Unona, isipen iray manunan karakter. Siopa so nobyo ed parabolo? Malinew ya say tutukoyen nen Jesus et say sarili to. Diad tua, antis ni na satan et direkta ton inkomparay sarili to ed sakey a nobyo! (Luc. 5:34, 35) Iramay mamarikit ey? Diad parabolo, imbaga nen Jesus ya nepeg ya iparaan na saray mamarikit so lamparaan da parad isabi na nobyo. Imanoen so miparan bilin nen Jesus ed “melag a pulok” na saray alanaan a patumbok to: “Komon ta akaparaan kayo tan pandarlangen yo iray lamparaan yo, tan magmaliw kayon singa saray lalaki a manaalagar ed ipawil na katawan da manlapud bansal.” (Luc. 12:32, 35, 36) Ontan met, pinuyanan si apostol Pablo ya ikompara iray alanaan ya patumbok nen Kristo ed masimpit iran birhen. (2 Cor. 11:2) Malinew sirin ya say parabolo ed Mateo 25:1-13 et bilin tan pasakbay nen Jesus parad saray alanaan ya patumbok to.

5. Panon ya impaamta nen Jesus so peryodo na panaon ya tutukoyen to ed samay parabolo to?

⁵ Komadua, usisaen tayoy peryodo na panaon ya tutukoyen nen Jesus. Nawalaan tayoy ideya ed samay imbaga to diad bandad sampot na parabolo: “Sinmabi so nobyo.” (Mat. 25:10) Singa inaral tayo ed Hulyo 15, 2013 ya isyu na sayan magasin, amin-walon tinukoy nen Jesus so “isabi” to diad samay propesiya ton nabasad Mateo kapitulo 24 tan 25. Sanen imbaga nen Jesus so nipaakar ed “isabi” to, say tutukoyen to et say peryodo na panaon legan na baleg a kairapan sano sikatoy onsabi lan mangukom tan maneral ed sayan sistema. Mapatnag sirin ya sayan parabolo et ontutukoy ed kaunoran iran agew, balet say kapantokan to et nagawa legan na baleg a kairapan.

6. Base ed konteksto, anto so mensahe na parabolo?

⁶ Kanian anto sirin so mensahe na parabolo? Tandaan so konteksto na satan. Kakkapangibaga nen Jesus so nipaakar ed “matoor tan makabat ya aripen” to. Satan ya aripen et melag ya grupo na alanaan a lalaki ya mangidaulo ed saray patumbok nen Kristo legan na kaunoran iran agew. Pinasakbayan nen Jesus iratan ya lalaki ya nepeg iran mansiansian matoor. Insan diad tinmumbok ya kapitulo, inusar nen Jesus so parabolo nipaakar ed samploran mamarikit pian bilinen so amin ya alanaan a patumbok to ed kaunoran iran agew ya ‘mantultuloy a manbantay’ pian agnaandid sikara so mablin premyo da. (Mat. 25:13) Usisaen tayo pa iyan parabolo tan  nengnengen tayo no panon ya inyaplika na saray alanaan so bilin na satan.

7, 8. (a) Anton duaran kualidad so akatulong kanian akapansiansian akabantay iramay makabat ya mamarikit? (b) Akin ya nibagan akaparaan iray alanaan?

⁷ Indanet na parabolo nen Jesus ya saramay makabat ya mamarikit et nansiansian akabantay ed isabi na nobyo, aliwan singa saramay makulangkulang. Akin? Lapud duaran kualidad: akaparaan ira tan alerto ira. Responsabilidad na saramay amin ya mamarikit ya alagaren so isabi na nobyo, pansiansiaen ya mandarlang so lamparaan da, tan mansiansian alerto anggano lablabi la. Balet, saramay limaran makabat labat so akaparaan lapud angawit ira na reserban larak. Kasin nibagan akaparaan met iray matoor ya alanaan parad isabi nen Jesus?

⁸ On! Diad sarayan kaunoran ya agew, kinmiwas iray alanaan a Kristiano ya singa saramay makabat ya mamarikit, ya akaparaan iran gawaen so asainmin da anggad anggaan. Amta ra ya pian nalingkoran da so Dios et kaukolan dan taynan so mainawan bilay ya iyoopresi na mundo nen Satanas. Determinado iran manlingkor ed si Jehova, aliwan lapud walay sankanonot dan petsa odino deadline, noagta lapud inar-aro day Jehova tan si Jesus. Matoor ira tan ag-ira manpapaimpluensia ed materyalistiko, imoral, tan makasarilin ugali na sayan mauges a mundo. Atan so rason no akin ya akaparaan ira, tan lanang iran onsisinag a singa silesilew, anggano singa nababayagan so isabi na Nobyo.—Fil. 2:15.

9. (a) Anton pasakbay so inter nen Jesus nipaakar ed posibilidad na pakateglep? (b) Panoy inkiwas na saray alanaan ed eyag ya: “Wadia la so nobyo”? (Nengnengen met so footnote.)

⁹ Say komaduan kualidad no akin ya akapansiansian akabantay iramay mamarikit et say inkaalerto da. Posible kasin makateglep iray alanaan ya Kristiano legan dan aalagaren so isabi na nobyo? On, posible. Imanoen ya imbaga nen Jesus ya ‘sanen abayagan so nobyo, amin ya samploran mamarikit et akateglep tan akaugip.’ Amta nen Jesus ya anggano magunaet so espiritu, nayarin napugeran itan na maletey a laman. Satan ya pasakbay et impapuso na saray matoor ya alanaan tan lalo iran nansagpot pian makapansiansian alerto. Diad samay parabolo, binmangon ya amin iramay mamarikit kasabi na pegley-labi nen nadngel da so eyag ya: “Wadia la so nobyo!” Balet saramay makabat ya mamarikit labat so nansiansian akabantay. (Mat. 25:5, 6; 26:41) Saray matoor ya alanaan natan ey? Diad sarayan kaunoran ya agew, kinmiwas ira ed saray malinew ya ebidensyan singa mangiyeeyag ya: “Wadia la so nobyo”—ya asingsingger lay isabi to. Nansiansia met iran akabantay, ya lawas iran akaparaan parad isabi na Nobyo. * Usisaen tayo natan so bandad sampot na parabolo nen Jesus, ya ontutukoy ed mas espisipikon peryodo na panaon.

10. Antoy linmesan tepet lapud samay impantongtong na makabat tan makulangkulang a mamarikit diad bandad sampot na parabolo?

¹⁰ Diad bandad sampot na parabolo, saramay makulangkulang ya mamarikit et onkekerew na larak ed saramay makabat  ya mamarikit, balet agda ra inikdan. (Basaen so Mateo 25:8, 9.) Nia sirin so onlesan tepet: “Kapigan ya saray matoor ya alanaan a Kristiano et agtinmulong ed saray mankaukolan?” Tandaan so peryodo na panaon ya tutukoyen na sayan parabolo. Inaral tayo ya si Jesus, say Nobyo, et onsabi pian mangukom diad bandad sampot na baleg a kairapan. Kasin posible ya sayan parte na parabolo et ontutukoy ed nagawa antis ya manampot so baleg a kairapan? Posible, lapud diad satan ya panaon et naawat la na saray alanaan so permanentin tatak da.

11. (a) Antoy nagawa antis ya onggapo so baleg a kairapan? (b) Antoy labay ya ibaga na saray makabat ya mamarikit nen imbaga dad saray makulangkulang ya onla ran mangaliw na larak?

¹¹ Kanian, antis ya onggapo so baleg a kairapan, naawat la na amin ya matoor ya alanaan diad dalin so permanentin tatak da. (Apo. 7:1-4) Manlapud satan, segurado la ya onla rad tawen. Balet nonoten pa iray taon antis na baleg a kairapan. Antoy nagawa ed saray alanaan ya agnansiansian akabantay tan agnanmatoor? Agda naawat so permanentin tatak. Diad satan a panaon, wala ray arum ya matoor a Kristiano ya nalanaan na masanton espiritu ya onsalat ed sikara. Sano onggapo lay baleg a kairapan, saramay makulangkulang et nabigla no nanengneng day kaderal na Makapanyarin Babilonia. Nayarin diad satan da labat namoria ya ag-ira akaparaan parad isabi na Nobyo. Diad satan ya panaon, antoy nagawa anggano mikakasi ni ran onkerew na tulong? Naamtaan tayoy ebat diad samay parabolo nen Jesus. Ag-inter na saray makabat ya mamarikit so larak da ed saramay makulangkulang, tan imbaga dad sikaran onla ra laingen ya mangaliw ed saray manlalako na larak. Balet tandaan ya “pegley-labi” la, kanian wala ni kasi napangaliwan day larak ed ontan ya oras? Anggapo la. Atrasado la!

12. (a) Legan na baleg a kairapan, antoy naeksperiensya na siopaman ya datin alanaan balet agnanmatoor antis ya niiter so permanentin tatak? (b) Antoy pansumpalan na saramay miparad makulangkulang ya mamarikit?

¹² Mipadpara, legan na baleg a kairapan, agnatulongan na saray matoor ya alanaan so siopaman ya agnanmatoor. Atrasado la. Anto sirin so nagawad sikara? Impaliwawa nen Jesus no antoy agawa ed saramay makulangkulang a mamarikit nen linma ran mangaliw na larak: “Sinmabi so nobyo, tan saray akaparaan a mamarikit so akiulop ed sikaton linmoob ed pambansalan, insan inkapot lay puerta.” Sano onsabi so Kristo ed gloria to diad bandad sampot na baleg a kairapan, tiponen to lad tawen iray matoor ya alanaan. (Mat. 24:31; 25:10; Juan 14:1-3; 1 Tes. 4:17) Aliling to sirin et inkapot la so puerta ed saray agmatoor, ya singa saramay makulangkulang ya mamarikit. Singa met ira oneeyag ya: “Katawan, katawan, paloob mo kami!” Balet say iyebat nen Jesus et miparad samay ibaga to met ed dakel ya naukom bilang kanding: “Ibagak so tua ed sikayo, Agta kayo kabat.” Talagan makapaermen!—Mat. 7:21-23; 25:11, 12.

13. (a) Akin ya agtayo nepeg ya isipen ya agmanmatoor so dakel ed saray alanaan ya patumbok nen Kristo? (b) Akin ya say pasakbay nen Jesus et pakapatnagan met na talek to? (Nengnengen so litrato ed gapo na artikulo.)

¹³ Anto siri’ konklusyon tayod sarayan inaral tayo? Kasin labay ya ibaga nen Jesus ya dakel ed saray alanaan ya lingkor to so agmanmatoor tan kaukolan ya salatan? Andi. Tandaan, diad Mateo kapitulo 24 et pinasakbayan labat nen Jesus so “matoor tan makabat ya aripen” to ya ag-ira magmamaliw ya mauges ya aripen. Balet agto labay ya ibagan iilaloan to ya ontan so  nagawa. Mipadpara, say parabolo nipaakar ed samploran mamarikit et sakey met a pasakbay. Tua, limaran mamarikit so makulangkulang tan limara met so makabat, balet aglabay ya ibaga na satan ya kapaldua na bilang na alanaan so agmanmatoor. Ipapatnag labat na satan ya kada alanaan et bulos ya mandesisyon no kasin sikatoy manmatoor odino andi. Pinuyanan si apostol Pablo pian idanet itan ya punto ed saray kapara ton alanaan ya Kristiano. (Basaen so Hebreos 6:4-9; ikompara so Deuteronomio 30:19.) Imanoen ya diretsaan so pasakbay nen Pablo balet maaro to lanlamang ya imbalikas so talek to ya seguradon awaten na saray agagi to so kilalaban. Mipadpara, samay pasakbay ya walad parabolo nipaakar ed samploran mamarikit et pakapatnagan ya walay talek nen Jesus ed saray alanaan. Amta to ya kada alanaan ya lingkor to et sarag day manmatoor tan awaten da so alay abig ya premyo!

14. Akin ya minabang met iray ‘arum a karnero’ ed parabolo nipaakar ed samploran mamarikit?

¹⁴ Tua, say imbaga nen Jesus ya parabolo nipaakar ed samploran mamarikit et parad saray alanaan ya patumbok to. Balet kasin minabang met ed satan iray ‘arum a karnero’ nen Kristo? (Juan 10:16) On! Tandaan, simpli so mensahe na parabolo: “Mantultuloy kayon manbantay.” Kasin saray alanaan labat so nepeg ya mangiyaplikad satan? Imbaga nen Jesus: “Say ibabagak ed sikayo et ibabagak ed amin, Mantultuloy kayon manbantay.” (Mar. 13:37) Igaganggan nen Jesus so amin ya patumbok to ya iparaan day puso ra pian makapanmatoor ira tan mansiansian akabantay. Naalig na amin ya Kristiano so maong ya alimbawa na saray alanaan diad pangiyuuna dad ministeryo diad bilay da. Tandaan, kinmerew iramay makulangkulang ya mamarikit na larak ed saramay makabat ya mamarikit. Ipapanonot na satan ed sikatayo ya say panmatoor, pansiansiad katuaan, tan pambantay et responsabilidad tayon mismo. Agtayo mandedepende ed arum. Balang sakey ed sikatayo et walaan na eebatan ed si Jesu-Kristo, say matunong ya Ukom ya tinuro nen Jehova. Asingsingger lay isabi to. Kanian nepeg ya akaparaan tayo!

15. Akin ya makapaliket ed amin a tuan Kristiano so pambansal nen Kristo tan say nobya to?

¹⁵ Malikeliket met so amin ya Kristiano ed bansal ya abitla nen Jesus diad parabolo. Diad arapen, amin ya alanaan et wala lad tawen. Kayari Armagedon, magmaliw iran nobya nen Kristo. (Apo. 19:7-9) Amin ya wadiad dalin et minabang ed satan ya bansal ed tawen. Akin? Lapud gagarantiyaan na satan ya perpekto la so gobiernon manuley ed amin ya totoo. Antokaman so ilalo tayod arapen, balanglan diad tawen odino diad dalin, komon ta determinado itayon iyaplika so mensahe na parabolo nipaakar ed samploran mamarikit. Paneknekan tayon akabantay itayo diad pangiparaan tayod puso tayo tan ed pansiansian matoor tan alerto, pian panliketan tayo so maglorian arapen ya ipaparaan nen Jehova parad sikatayo!