1, 2. a) Иса соңкы гүнлер барада нәхили пыгамберлик этди? б) Биз хайсы сораглара середерис?

ИСА Зейтун дагындан Иерусалимиң ыбадатханасына сын эдип, өрән тәсин пыгамберлиги айдяр. Петрус, Андреас, Якуп ве Яхя гелеҗек барада айдылян затлары үнсли диңлейәрлер. Иса бу залым дүнйәниң соңкы гүнлеринде Худайың Патышалыгында хөкүм сүрҗекдигини гүррүң берйәр. Шейле-де ол өз ёлбашчылыгында «садык хем акыллы хызматкәриң» вагтлы-вагтында рухы иймити пайлаҗакдыгыны айдяр (Мат. 24:45—47).

² Шонда Иса он гыз тымсалыны хем гүррүң берйәр (Матта 25:1—13-нҗи аятлары окаң). Гелиң, тымсал билен баглы үч сорага середелиң: 1. Он гыз тымсалының эсасы манысы нәме? 2. Месх эдилен  месихчилер тымсалдан нәме өвренйәрлер ве нетиҗеси нәхили боляр? 3. Биз он гыз тымсалындан нәхили сапак эдинйәрис?

3. Он гыз тымсалы өң нәхили дүшүндирилйәр ве нәхили сораг йүзе чыкяр?

³ Садык хызматкәр гечен макалада Мукаддес Язгылардакы вакаларың улы мөчберде ерине етиши дәл-де, олардан нәхили сапак эдинмелидиги барада дүшүндирипди. Исаның айдан он гыз тымсалындакы чыраларың, ягың, гапларың ве бейлеки затларың өң гөчме манысы өвредилйәрди. Эмма тымсалың эсасы манысы нәме? Бу сорагың җогабыны билмек өрән ваҗып.

4. Тымсалдакы а) өйленйән йигидиң ве б) гызларың кими аңладяндыгыны нәдип билмели?

⁴ Гелиң, Исаның айдан тымсалының манысына середелиң! Илки билен, тымсалда агзалян адамлары билелиң. Өйленйән йигит ким? Элбетде, Иса! Себәби ол өң хем өзүни өйленйән йигит билен деңешдирйәр (Лука 5:34, 35). Гызлар ким? Иса тымсалында гызларың гиевиң гелерине гарашып, чыраларыны тайярлап дурҗакдыгыны айтды. Иса месх эдилен месихчилере: «Биллериңиз гушалгы, чыраларыңыз якылгы болсун. Агалары тойдан гелип, гапыны каканда, тиз оңа ачмак үчин гарашян адамлар ялы болуң» дийип гөркезме берди (Лука 12:32, 35, 36). Мундан башга-да, Павлус билен Яхя ресул Худайың ылхамы билен Исаның месх эдилен гуллукчыларыны вепалы гызлара меңзедйәр (2 Кор. 11:2; Ылх. 14:4). Иса Матта 25:1—13-нҗи аятлардакы тымсалы месх эдилен гуллукчыларына маслахат ве дуйдурыш хөкмүнде айдяр.

5. Исаның айдан тымсалы хайсы дөвре дегишли?

⁵ Инди болса, вагт барада ойланалың! Исаның тымсалы хайсы дөвре дегишли? Тымсалың соңунда Исаның «гиев гелйәр» диен сөзлери муны айдың эдйәр (Мат. 25:10). 2013-нҗи йылың 15-нҗи июлында чыкан «Гаравул диңи» журналында айдылышы ялы, Матта 24 ве 25-нҗи бапларда язылан пыгамберликде «гелйәр» диен грек сөзи 8 сапар агзаляр. Бу болса Исаның агыр мушакгатда залым дүнйәниң үстүнден хөкүм этмәге гелҗекдигини гөркезйәр. Он гыз тымсалына дегишли вакалар соңкы гүнлерде ерине етип, агыр мушакгатда долы берҗай болар.

6. Он гыз тымсалының эсасы манысы нәме?

⁶ Он гыз тымсалының эсасы манысы нәме? Матта китабының 24-нҗи бабында Иса «садык хем акыллы хызматкәр» барада гүррүң эдйәр. Хызматкәр соңкы гүнлерде шәгиртлере гөркезме берйән месх эдилен месихчилериң кичиҗик топарыны аңладяр. Иса тымсал аркалы әхли месх  эдиленлере умыдына говушмак үчин «оя болмалыдыгыны» ве Худая вепалы галмалыдыгыны айдяр (Мат. 25:13). Месх эдиленлер тымсалдан нәме өвренйәрлер?

7, 8. a) Акыллы гызлар нәмеде тапавутланярлар? б) Месх эдиленлер нәхили тайярлык гөрйәрлер?

⁷ Исаның тымсалындакы акыллы гызлар акылсыз гызлардан нәмеде тапавутланярлар? Олар оя болуп, өйленйән йигидиң гелерине өңүнден тайярлык гөрдүлер. Гызлар бу шатлыклы пурсаты гөрмек үчин, бүтин гиҗесини укламан ве чыраларыны сөндүрмән гечирмелидилер. Акылсыз гызлардан тапавутлылыкда бәш саны акыллы гыз чыралары үчин габа яг салып алдылар. Садык хем акыллы хызматкәр Исаның гелмегине долы тайярлык гөрйәрми?

⁸ Месх эдиленлер тә соңуна ченли өз борчларыны долы ерине етирмек үчин тайярлык гөрйәрлер. Олар Худая вепалы гуллук этмек үчин, Шейтаның дүнйәсинден долы пейдаланмалы дәлдигине дүшүнйәрлер. Месх эдиленлер Ехова гуллук этмек үчин өзлерини долы багыш этдилер. Олар вепалы болуп, Ехованы ве Онуң Оглуны сөйүп, эбедилик гуллук этмек ислейәрлер. Шейле-де олар бу залым дүнйәниң байлыгына ковалашмак, ахлаксызлык ве диңе өзүңи билмеклик рухуна гаршы гөрешип, айыпсыз галярлар. Шейдип, олар өйленйән йигит гиҗә галса-да, хемише чыра кимин ягты сачып, тайяр дурярлар (Флп. 2:15).

9. a) Иса нәхили дуйдурыш берди? б) Месх эдиленлер «Ине, гиев гелйәр!» диен сеси эшиденлеринде нәме эдйәрлер? (Чыкгыда середиң).

⁹ Гызлар тайяр болмагы үчин оя болмалыдылар. Месх эдиленлериң гиҗе оя болмалы вагты укламагы мүмкинми? Элбетде! Иса өйленйән йигит гиҗә галанда, он гызың «хеммесиниң иркилип укландыгыны» айдяр. Иса «рух ислегли, йөне тениң эҗиздигини» дуйдуряр. Вепалы месх эдиленлер бу дуйдурыша гулак асып, хүшгәр болмага җан эдйәрлер. «Ярыгиҗе: „Ине, гиев гелйәр!“ диен сеси эшиденлеринде», гызларың хеммеси туряр. Эмма диңе акыллы гызлар соңуна ченли тайяр дурярлар (Мат. 25:5, 6; 26:41). Шу гүнлер месх эдиленлер барада нәме дийсе болар? Олар соңкы гүнлерде «Ине, гиев гелйәр!» диен сесе ояндылар. Олар тә өйленйән Йигит гелйәнчә тайяр дурарлар *. Эмма тымсалың  соңунда айдылан вакалар өрән ваҗып дөвре дегишли.

10. Акыллы ве акылсыз гызларың эден гүррүңи себәпли нәхили сораг йүзе чыкяр?

¹⁰ Тымсалың соңунда өрән гызыклы вака гүррүң берилйәр (Матта 25:8, 9-нҗы аятлары окаң). Акыллы ве акылсыз гызларың эден гүррүңи себәпли шейле сораг йүзе чыкяр: «Вепалы месх эдилен месихчилер имандашларына хачан көмек этмезлер?» Бу сорагың җогабыны билмек үчин тымсалдакы айдылан дөвүр барада ойланалың. Өйленйән Йигит, ягны Иса агыр мушакгатың ахырында хөкүм этмәге гелер. Тымсалдакы гызларың арасындакы гүррүңдешлик болса, мушакгатың өң янындакы болҗак ваканы аңладяр. Шол дөвүрде месх эдиленлере соңкы мөхүр басылар.

11. a) Агыр мушакгатың өң янында нәхили вака болар? б) Акыллы гызларың җогабы нәмәни гөркезйәр?

¹¹ Агыр мушакгатың өң янында месх эдилен вепалы месихчилере иң соңкы мөхүр басылар (Ылх. 7:1—4). Бу болса оларың гөкде яшамага болан умыдына говушҗакдыгыны тассыклаяр. Онда агыр мушакгат башламанка айыпсыз галмадык ве оя болмадык месх эдиленлере нәме болар? Олара мөхүр басылмаз ве гөкдәки яшайша болан умыдындан махрум эдилер. Олара дерек башга вепалы месихчилер сайланар. Бу акылсыз месх эдиленлер агыр мушакгат башланда Бейик Бабылың йыкылышыны гөрүп, хайран галарлар. Шонда олар өйленйән йигидиң гелмегине тайярлык гөрмәндиклерине гөз етирерлер. Олар соңкы пурсатда ховсала дүшүп, көмек соранларында нәме болар? Тымсалда олара көмек эдилмеҗекдиги айдыляр. Акыллы гызлар акылсызлара көмек этмегиң дерегине, ягы сатын алмалыдыкларыны айдярлар. «Ярыгиҗе» сатыҗылары тапып болармы? Ёк!

12. a) Соңкы мөхүре мынасып болмадык месх эдиленлер билен нәхили паҗыгалы вака болар? б) Акылсыз гызлара меңзейәнлере нетиҗеде нәме болар?

¹² Агыр мушакгатда месх эдилен вепалы месихчилериң айыпсыз галмадыклара көмек этмәге вагты ве мүмкинчилиги болмаз. Олара нәме болар? Тымсалдакы акылсыз гызлар яг сатын алмага гиденлеринде, «гиев гелйәр ве тайяр болуп дуранлар онуң билен тойхана гирйәрлер велин, гапы япыляр». Агыр мушакгатың ахырында Иса шан-шөхрат ичинде месх эдилен вепалы месихчилери гөкде йыгнамага гелер (Мат. 24:31; 25:10; Яхя 14:1—3; 1 Сел. 4:17). Акылсыз гызлара меңзейән месх эдилен месихчилере гапы ачылмаз. Шонда олар: «Ага! Ага! Гапыны ач» диерлер. Иса-да олара  гечилере айдышы ялы: «Сизе догрусыны айдярын, мен сизи танамаярын» диер (Мат. 7:21—23; 25:11, 12).

13. a) Иса кәбир месх эдиденлериң вепалы галмаҗакдыгыны айтдымы? б) Иса месх эдиленлери нәмә ынандыряр? (Макаланың башындакы сурата середиң).

¹³ Иса он гыз тымсалы аркалы көп месх эдиденлериң вепалы галмаҗакдыгыны ве башгалары сайлаҗакдыгыны айтдымы? Ёк. Ол Матта китабының 24-нҗи бабында «садык хем акыллы хызматкәре» залым болмалы дәлдигини дуйдуряр. Он гыз тымсалында хем олара ваҗып маслахат берилйәр. Месх эдилен месихчилер тайяр ве оя я-да акмак хем бивепа болмагы сайламалы. Павлус ресулың месх эдиленлере язан хатына үнс берелиң (Еврейлер 6:4—9-нҗы аятлары окаң; Канун таглыматы 30:19-ы деңешдириң). Павлус олара берк дуйдурыш берсе-де, сөйги билен «хас оңат затлара эе» болҗагыны айтды. Иса хер бир месх эдилен месихчиниң соңуна ченли вепалы галып, аҗайып сылагың эеси болҗакдыгыны ынандыряр!

14. «Башга гоюнлар» он гыз тымсалындан нәхили сапак эдинйәрлер?

¹⁴ Исаның бу тымсалы месх эдиленлере дегишли болса-да, «башга гоюнлар» нәме өвренйәрлер? (Яхя 10:16). Тымсалда эсасанам «оя болмак» барада айдыляр. Бир сапар Иса: «Сизе айдянларымы хеммелере айдярын: оя болуң!» дийди (Мар. 13:37). Ол шәгиртлериниң әхлисиниң тайяр ве оя болмалыдыгыны айтды. Олар Патышалык ишини ваҗып сайян месх эдиленлерден гөрелде алмалы. Тымсалдакы акылсыз гызлар акыллы гызлардан яг сораярлар. Бу бизиң хер биримизиң вепалы, тайяр ве оя болмалыдыгымызы гөркезйәр. Бизе дерек муны хич ким эдип билмез! Тизден адалатлы Казы Иса гелер ве хер кимиң өзи онуң өңүнде җогап берер. Гелиң, онуң гелмегине тайяр болалың!

15. Гөкде болҗак той нәхили берекет гетирер?

¹⁵ Исаның айдан тойы әхли месихчилере шатлык гетирер. Месх эдилен месихчилер Армагеддондан соң Месихиң «гелни» боларлар (Ылх. 19:7—9). Гөкдәки той кәмил хөкүмдарлыгы беркарар эдип, ерде яшаянларың әхлисине берекет эчер. Гелиң, гөкде я-да ер йүзүнде яшамага умыт эдйәндигимизе гарамаздан, он гыз тымсалындан сапак эдинип, оя ве тайяр болалың. Шонда биз Ехованың тайярлан аҗайып совгадына мынасып боларыс!