1, 2. a) Kakɔna kakate Yeso lo dikambo dia nshi y’ekomelo? b) Naa ambola wayotɔsɛdingola lo sawo nɛ?

AKI mɛtɛ dui dia diambo dia mbidjasɛ lo Dikona di’esongo w’ɔlivɛ mbɛlɛnganɛ la tɛmpɛlɔ ka la Jɛrusalɛma etena kakate Yeso prɔfɛsiya kande kɛmɔtshi k’oleki diambo. Petero, Andɛlɛ, Jakɔba ndo Joani wakadje yimba lo yoho ya laande etena kakataka Yeso prɔfɛsiya kande ka lo nshi yayaye. Nde akawatɛ awui efula w’endana la nshi y’ekomelo ka dikongɛ di’andja ɔnɛ wa kɔlɔ, mbuta ate etena kakandahombe tolɛ lo Diolelo dia Nzambi. Nde akawatɛ dia l’etena ka paa kɛsɔ, “ɔhɔmbɔ wa kɔlamelo ndo kɛsɔ” ayonga onyimpala ande la nkɛtɛ dia mbishaka ekambi ande mbo ya ndɛ ya lo nyuma yayonga lawɔ ohomba.—Mat. 24:45-47.

² Ndo nto, lo prɔfɛsiya kakɔ kaamɛ, Yeso akasha wɛɛla wendana la esekaseka dikumi wa dimuma. (Adia Mateo 25:1-13.) Nyɛsɔ tɔsɛdingole ambola anɛ: 1) Naa losango l’ohomba lele lo wɛɛla ɔnɛ? 2) Ngande wakamba akitami la dako dia lo wɛɛla ɔnɛ, ndo naa etombelo wele la dui sɔ? 3) Ngande wakoka onto tshɛ  la l’atei aso nkondja wahɔ oma lo wɛɛla waki Yeso ɔsɔ ɛlɔ kɛnɛ?

3. Lo etena kɛmɔtshi, ngande wakalembetshiyaka ekanda aso wɛɛla waki Yeso wa esekaseka dikumi wa dimuma, ndo etombelo akɔna ondo wakonge la dui sɔ?

³ Lo sawo di’etshi takɛnyi dia lo ɛnɔnyi akumi weke kambeta, etshikitanu wakasalema lo woho wakalembetshiyamaka ɛkɔndɔ wa lo Bible. Nshi nyɛ, ɔhɔmbɔ wa kɔlamelo ndo kɛsɔ oleka mbika epole ɔsɛkɛ lo wetshelo wakokaso nkondja koko hayoleka ntɛkɛta d’awui wa didjidji kana kitshimudi ya prɔfɛsiya. Lo etena kɛmɔtshi, ekanda aso wakalembetshiyaka lo yoho ya didjidji wɛɛla waki Yeso wa esekaseka dikumi wa dimuma, mbidja ndo atala, esɔ, ɛlɔndɔ ndo diangɔ dikina. Ko onde sho koka mbuta dia ondo yoho ya nembetshiya ɛkɔndɔ wa lo Bible shɔ akatokonya dia sho minya yimba oma lo losango la wɔdu ndo la wanyandja latanema lo wɛɛla ɔnɛ? Oko wayangaso diɛna, okadimwelo wa dimbola sɔ wekɔ ohomba.

4. Lo wɛɛla ɔnɛ, ele a) otshuki a wadi? b) esekaseka dikumi wa dimuma?

⁴ Nyɛsɔ tɔsɛdingole losango l’ohomba lele lo wɛɛla waki Yeso ɔnɛ. Tɔsɛdingole ntondotondo anto watɛkɛtama lo wɛɛla akɔ. Ele otshuki a wadi lo wɛɛla ɔnɛ? Lo mɛtɛ, Yeso akatɛkɛta dikambo diande ndaamɛ. Diakɔ diele lo waaso wotshikitanyi, nde akatɛkɛta lo dikambo diande ndaamɛ oko otshuki a wadi. (Luka 5:34, 35) Ko waa na wele esekaseka wa dimuma? Lo wɛɛla ɔnɛ, Yeso akate dia esekaseka wa dimuma pombaka ndjalɔngɔsɔla wele la atala awɔ etena kayokoma otshuki a wadi. Yeso akasha “lemba la tshitshɛ” l’akitami ande ɛlɔmbwɛlɔ ɔnɛ: “Nyɔlɔtɛ ahɔndɔ w’olimu, nyoyalɔngɔsɔlɛ ndo atala anyu wahɛtake, ndo nyamɛ nyonge oko anto wakonga owandji awɔ lam’ayondokalola oma lo fɛtɛ ka diwala.” (Luka 12:32, 35, 36) Laadiko dia laasɔ, lo ɛlɔmbwɛlɔ ka nyuma k’ekila ɔpɔstɔlɔ Pɔɔlɔ ndo Joani wakɛdika Akristo w’akitami waki Yeso la esekaseka wa dimuma. (2 Kɔr. 11:2; Ɛny. 14:4) Mbokɛmaka hwe dia wɛɛla waki Yeso wele lo Mateo 25:1-13 wekɔ la dako ndo ɔhɛmwɛlɔ le ambeki ande w’akitami.

5. Etena kakɔna kakɛnya Yeso kahomba wɛɛla ande kotshama?

⁵ Nyɛsɔ tɔsɛdingole etena kakahombe wɛɛla ɔsɔ kotshama. Lo etena kakɔna kakahombe dako dia lo wɛɛla ɔsɔ kotshama? Oya l’ekomelo ka wɛɛla ande, Yeso akɛnya etena shikaa kakahombe dui sɔ kotshama lo mbuta ɔnɛ: “Otshuki a wadi akakome.” (Mat. 25:10) Oko wakatadiɛnyi lo Tshoto y’Etangelo ya Ngɔndɔ k’esambele 15, 2013, prɔfɛsiya ka Yeso kɔkɔndwami lo Mateo tshapita 24 ndo 25 tɛkɛtaka mbala enanɛi dia tshɛkɛta ‘oyelo’ ande ndo lo ahole tshɛ watanema tshɛkɛta ya lo Grɛkɛ shɔ, yɔ mendanaka la dui diakɔ diaamɛ. Lo ahole asɔ tshɛ, Yeso akatɛkɛtaka dia etena kayoya mfɔnu ka woke kayondoya dia ndjolombosha anto ko oma laasɔ ko nde nanya dikongɛ nɛ di’akambo. Mbokɛmaka hwe dia wɛɛla ɔnɛ mendanaka la nshi y’ekomelo ndo ɔnɛ Yeso ayoya lo mfɔnu ka woke.

6. Lo menda awui watɛkɛtama lo wɛɛla ɔnɛ, naa losango l’ohomba lele lɔkɔ?

⁶ Naa losango l’ohomba lele lo wɛɛla ɔnɛ? Ekɔ ohomba mbohɔ awui watɛkɛtama lo wɛɛla akɔ. Yeso akatɛkɛta dia “ɔhɔmbɔ wa kɔlamelo ndo kɛsɔ.” Ɔhɔmbɔ ɔsɔ akahombe monga djui y’apami w’akitami wanɛ wakahombe ndjɔlɔmbɔla ambeki wa Kristo lo nshi y’ekomelo. Yeso akɛnya dia apami asɔ wayohomba ntshikala la kɔlamelo. Oma laasɔ, nde akatɔtɔmiya dui sɔ ndo akakambe la wɛɛla ɔnɛ lo mɛnya dia akitami ande tshɛ wa lo nshi  y’ekomelo wayohomba ndjotetemala ‘nsungukala’ diaha vɔ nshisha difuto diawɔ dia nɛmɔ. (Mat. 25:13) Nyɛsɔ tɔsɛdingole wɛɛla ɔnɛ dimɛna kele tende woho wakamba akitami la dako diakɔ.

7, 8. a) Lo waonga akɔna ahende wakɛnya esekaseka wa totshundju dia vɔ wakayalɔngɔsɔla? b) Ngande wɛnya akitami dia vɔ wakayalɔngɔsɔla?

⁷ Wɛɛla waki Yeso tɔtɔmiyaka dia otshikitanyi la esekaseka wa dinginya, esekaseka wa totshundju wakayalɔngɔsɔla dikambo di’oyelo wa otshuki a wadi. Lande na? L’ɔtɛ wakiwɔ la waonga ahende anɛ: Ndjalɔngɔsɔla ndo nsungukala. Esekaseka ɛsɔ wakakongɛka otshuki a wadi wakahombe ntshika atala awɔ wahɛta ndo ntetemala nsungukala polo l’etena k’ɔngɛnɔngɛnɔ kɛsɔ. Otshikitanyi l’esekaseka wa dingiya, esekaseka etanu wakayalɔngɔsɔla lo ndja la esɔ k’efula lo ɛlɔndɔ awɔ ndo lo atala. Onde akitami wa kɔlamelo mɛnyaka dia vɔ la wɔ wakayalɔngɔsɔla?

⁸ Eelo. Lo nshi y’ekomelo nyɛ, Akristo w’akitami wekɔ lo nsala akambo oko esekaseka wa totshundju lo ndjalɔngɔsɔla dia mɛmba ɔkɛndɛ awɔ la kɔlamelo polo l’ekomelo. Vɔ mbeyaka dia olimu wakambɛwɔ Nzambi mbalɔmbaka diaha vɔ ndjasha lo lomombo la lo andja waki Satana ndo vɔ hawosale dui sɔ. Vɔ wakayakimɔ tshɛ le Jehowa ndo wekɔ lo mbokambɛ aha lo nshi mɔtshi tsho kana minya yimba koko wekɔ lo nsala dui sɔ l’ɔtɛ wa ngandji ndo kɔlamelo yele lawɔ le nde ndo le Ɔnande. Vɔ wekɔ lo nama olowanyi awɔ lo ntona mbokoya yimba y’andja ɔnɛ wa kɔlɔ wele la yimba ya lomombo, lɔkɛwɔ la mindo ndo lokaki. Kɛsɔ mbakimanyiyaka dia vɔ monga suke lo pɛtaka oko atala ndo lo nama lo yimba oyelo wa Otshuki a wadi.—Flpɛ. 2:15.

9. a) Ɔhɛmwɛlɔ akɔna wakasha Yeso lo dikambo dia olalelo wa djɔ? b) Kakɔna kakasale akitami etena kakawoke dui ɔnɛ “he otshuki a wadi amboya”? (Enda ndo nɔtɛ ka l’ɛse ka dikatshi.)

⁹ Dionga dia hende diakakimanyiya esekaseka wa totshundju dia vɔ ndjalɔngɔsɔla ele nsungukala. Onde okitami koka mɛtɛ ndjokoma lo ndala djɔ lo etena k’otale kalɔmba dia nsungukala? Eelo. Tolembete dia Yeso akate dia esekaseka dikumi wa dimuma “vɔ tshɛ wakanyingɔnyingɔ ndo wakalale djɔ” lo etena k’oyelo w’otshuki a wadi. Yeso akeyaka dia kaanga onto lele la lolango ndo la yimba y’ɔlɔlɔ koka ndjoshisha waonga asɔ l’ɔtɛ wa wɔdu wa demba. Akitami wele la kɔlamelo kambaka la ɔhɛmwɛlɔ ɔsɔ ndo salaka la wolo dia sungukalaka. Etena kakawoke dui l’otsho ɔnɛ “he otshuki a wadi amboya,” esekaseka wa dimuma wa lo wɛɛla ɔnɛ waketɔ vɔ tshɛ. (Mat. 25:5, 6; 26:41) Ko kayotota dikambo di’akitami wa kɔlamelo ɛlɔ kɛnɛ? Etena kakawoke dui lo nshi y’ekomelo nyɛ ɔnɛ “he otshuki a wadi amboya” akitami wakatatɛ ndjalɔngɔsɔla. Vɔ wekɔ lo mbikikɛ ndo wekɔ lo ntetemala monga suke dia nkonga oyelo wa Otshuki a wadi. * Koko wɛɛla ɔnɛ wekɔ lo mbika epole ɔsɛkɛ lo etena kɛmɔtshi shikaa. Lo woho akɔna?

10. Sawo dia lam’asa esekaseka wa totshundju la wa dinginya monyiyaka dimbola diakɔna dia wolo nshihodia?

¹⁰ Ondo etenyi koleki wolo nshihodia ka lo wɛɛla kaya suke la kotshama, mbuta ate sawo dia lam’asa esekaseka wa dinginya la  wa totshundju. (Adia Mateo 25:8, 9.) Sawo sɔ monyiyaka dimbola nɛ: “Etena kakɔna ka lo ɔkɔndɔ w’ekambi waki Nzambi kayohomba Akristo wa kɔlamelo ntona nkimanyiya wanɛ wayɔlɔmba ekimanyielo?” Etena koleki wolo nshihodia ka lo wɛɛla mɛnamaka etena kasɛdingolaso woho wayoyelana akambo. Tohɔ dia taya la eokelo k’ɔlɔlɔ k’ɔnɛ Yeso lele Otshuki a wadi ayoya dia ndjolombosha oya l’ekomelo ka mfɔnu ka woke. Shi mbokɛmaka dia etenyi ka lo wɛɛla kɛnɛ tɔtɔmiyaka kɛnɛ kayosalema la ntondo ka etena ka wolo ka dombwelo? Ondo ekɔ ngasɔ, nɛ dia lo etena kɛsɔ ko akitami wamboshila mbidjama djembetelo y’ekomelo.

11. a) Kakɔna kayotomba la ntondo ka mfɔnu ka woke ntatɛ? b) Kakɔna kakalange esekaseka wa totshundju mbuta etena kakawatome wanɛ wa dinginya le asondji wa bisɔ?

¹¹ Ɔnkɔnɛ, la ntondo ka mfɔnu ka woke ntatɛ, akitami wa kɔlamelo tshɛ wa la nkɛtɛ wayodjama djembetelo y’ekomelo. (Ɛny. 7:1-4) Dui sɔ mbayoshikikɛ leeta lawɔ. Koko tokanyiya yema di’ɛnɔnyi wele la ntondo ka mfɔnu ka woke ntatɛ. Kakɔna kayokomɛ akitami wahatotetemala nsungukala ndo wayoshisha olowanyi awɔ? Naka vɔ nsala ngasɔ, kete wayoshisha difuto diawɔ dia l’olongo ndo hawotodjama djembetelo y’ekomelo yayosalema yema tshitshɛ la ntondo ka mfɔnu ka woke ntatɛ. L’etena kɛsɔ, anto akina wayonga la kɔlamelo wayɔsɔnama oko akitami. Etena kayotatɛ mfɔnu ka woke, ondo akitami wele oko esekaseka wa dingiya asɔ wayonyanga lo menda elanyelo ka Babilɔna ka Woke. Ondo l’etena kɛsɔ mbayowɛna dia vɔ kondjalɔngɔsɔla dia oyelo wa Otshuki a wadi. Ko naka vɔ nɔmba ekimanyielo l’etena kɛsɔ, kakɔna kayotomba? Wɛɛla waki Yeso toshaka okadimwelo w’oshika. Esekaseka wa totshundju wakatone mbisha wanɛ wa dingiya esɔ lo mbatɛ dia vɔ tosomba le asondji wa bisɔ. Tohɔ dia dui sɔ diakasalema “la midi k’otsho.” Onde vɔ wakakoke ntana asondji wa bisɔ lo wenya ɛsɔ? Ndooko, nɛ dia wonya wakaleke mbeta.

12. a) Lo mfɔnu ka woke, naa dui dia lonyangu diayokomɛ akitami wayoshisha kɔlamelo yawɔ la ntondo ka wodjelo wa djembetelo y’ekomelo? b) Kakɔna kayokomɛ akitami tshɛ wele oko esekaseka wa dinginya?

¹² Woho akɔ waamɛ mbele lo mfɔnu ka woke, akitami wayonga la kɔlamelo hawotokimanyiya wanɛ wahatonga la kɔlamelo. Ndooko ekimanyielo kayonga, nɛ dia laasɔ ko wonya wambeta. Ko kakɔna kayowakomɛ? Yeso nembetshiyaka kɛnɛ kakatombe etena kakatshu esekaseka wa dimuma dia tosomba esɔ lo mbuta ɔnɛ: “Otshuki a wadi akakome ko esekaseka wa dimuma waki laawɔ wakɔtɔ la nde lo fɛtɛ ka diwala ko lokuke lakadihama.” Etena kayoya Kristo lo lotombo lande la ntondo ka ekomelo ka mfɔnu ka woke, nde ayotshumanya akitami ande wa kɔlamelo otsha l’olongo. (Mat. 24:31; 25:10; Jni. 14:1-3; 1 Tɛs. 4:17) Lokuke layodihama diaha wanɛ tshɛ wahatonga la kɔlamelo mbɔtɔ, nɛ dia vɔ wekɔ oko esekaseka wa dinginya. Ondo vɔ wayoda ekoko ɔnɛ: “Nkumadiɔndjɔ, Nkumadiɔndjɔ, otodihole.” Koko l’etena k’elombwelo kɛsɔ, vɔ wayolongola okadimwelo wele oko wɔnɛ wakalongola waa mbudi ɔnɛ: “Lo mɛtɛ kanyotɛmi nte: Dimi halanyeye.” Ande lonyangu lee!—Mat. 7:21-23; 25:11, 12.

13. a) Lande na kele bu ohomba mbuta dia efula k’akitami wa Kristo hawototshikala la kɔlamelo? b) Lande na kakokaso mbuta dia Kristo akasha ɔhɛmwɛlɔ l’eshikikelo? (Enda osato wele lo mbɔtwɛlɔ.)

¹³ Lo ndjela awui wambotɔsɛdingola, kakɔna kakokaso mbuta? Onde Yeso akate dia akitami hawototshikala la kɔlamelo ndo ɔnɛ wayohomba pɛnama? Ndooko. Tohɔ dia nde akasha ɔhɛmwɛlɔ diaha “ɔhɔmbɔ  wa kɔlamelo ndo kɛsɔ” ndjonga ɔhɔmbɔ wa kɔlɔ. Kɛsɔ hɛnya dia nde akalongamɛka dia dui sɔ ndjosalema. Diakɔ diele, wɛɛla ɔnɛ wekɔ la ɔhɛmwɛlɔ w’ohomba efula. Oko waki esekaseka etanu wakikɔ dinginya ndo etanu wakikɔ totshundju, okitami tshɛ ekɔ la lotshungɔ la nsɔna dia ndjalɔngɔsɔlaka ndo sungukalaka, nshisha kɔlamelo kana ntshikala la kɔlamelo. Lo tshimbo ya nyuma k’ekila, ɔpɔstɔlɔ Pɔɔlɔ akate woho akɔ waamɛ etena kakandafundɛka asekande akitami. (Adia Hɛbɛru 6:4-9; ɛdika la Euhwelu k’Elembe 30:19.) Tolembete dia Pɔɔlɔ akasha ɔhɛmwɛlɔ wa wolo koko nde akayokambaka l’ɛtɛkɛta wa la ngandji lo nshikikɛ ɔnɛ “kɛnɛ koleki ɔlɔlɔ” kaki la ntondo k’anango l’akadiyɛnde w’Akristo. Woho akɔ waamɛ mbele, ɔhɛmwɛlɔ wa lo wɛɛla waki Yeso wakashama la ngandji ndo l’eshikikelo. Kristo mbeyaka dia okitami tshɛ koka ntshikala la kɔlamelo ndo nongola difuto di’ɔngɛnɔngɛnɔ.

14. Lande na kakoka “ɛkɔkɔ ekina” vɔ la wɔ nkondja wahɔ oma lo wɛɛla wa esekaseka dikumi wa dimuma?

¹⁴ Lam’ele Yeso akakambe la wɛɛla ande wa esekaseka dikumi wa dimuma lo dikambo di’ambeki ande w’akitami, onde laasɔ sho koka mbuta dia divɛsa nɛ bu la wahɔ le “ɛkɔkɔ ekina” wa Kristo? (Jni. 10:16) Aha ngasɔ. Losango la lo wɛɛla ɔnɛ mbutaka ɔnɛ “nyosungukalake.” Onde dui sɔ mendanaka paka l’akitami? Yeso akate nto ɔnɛ: “Kɛnɛ kanyotɛmi, mbatɛmi ndo anto tshɛ nte: Nyosungukalake.” (Makɔ 13:37) Nde akalɔmbɛ ambeki ande tshɛ dia vɔ nɔngɔsɔla etema awɔ dia nkamba olimu wa kɔlamelo ndo dia vɔ tshɛ sungukalaka. Mbokɛmaka di’Akristo tshɛ ndjelaka ɛlɔmbwɛlɔ kasha akitami lo dikambo sɔ ndo mbetshaka olimu wa Diolelo lo dihole dia ntondo lo nsɛnɔ yawɔ. Tolembete dia esekaseka wa dinginya wakalɔmbɛ dia esekaseka wa totshundju mbasha yema y’esɔ. Woho wakawalɔmbɛ esɔ ko hawowasha toholaka dia ndooko onto lakoka ntshikala la kɔlamelo, ntshikala lo akambo wa mɛtɛ kana nsungukala lo dihole diaso. Onto tshɛ ayolombola la ntondo ka Shushi yele la losembwe yakasɔnama oma le Jehowa. Sho pombaka ndjalɔngɔsɔlaka nɛ dia nde ekɔ lo ndjaye keema edja.

15. Lande na kele diwala dia Kristo la wadɛnde diayosha Akristo wa mɛtɛ tshɛ ɔngɛnɔngɛnɔ?

¹⁵ Akristo tshɛ koka nkondja nto wahɔ oma lo dui dioleki ohomba dia lo wɛɛla wa Yeso. Akɔna l’atei aso ahangɛnangɛna diwala dia laande sɔ? L’ɔkɔngɔ wa ta di’Armangɛdɔna, akitami wayokoma wadi aki Kristo l’olongo. (Ɛny. 19:7-9) L’etena kɛsɔ, anto tshɛ wa la nkɛtɛ wayokondja wahɔ oma lo diwala dia l’olongo sɔ nɛ dia diɔ diayosala di’anto nɔmbwama lo yoho ya dimɛna efula. Oyadi tekɔ la elongamelo ka tɔsɛna l’olongo kana la nkɛtɛ, ekɔ ohomba sho nkondja wahɔ oma lo wetshelo w’ohomba watanema lo wɛɛla wa esekaseka dikumi wa dimuma. Nyɛsɔ tongake suke lo nɔngɔsɔlaka etema aso lo tshikalaka nge ndo lo sungukalaka dia sho ndjɔngɛnangɛna la shi yayaye ya diambo yatolakiya Jehowa.