1, 2. (a) Ana Yesu ŵasasile yatuli pakwamba ya masiku gambesi? (b) Ana citutagulilane yiwusyo yapi mungani ajino?

YALIJI yangaliŵalicika pandaŵi jele Yesu ŵasalilaga ŵakulijiganya ŵakwe yakulocesya ali atemi petumbi lya Olifi pele nyumba jakulambilila ja ku Yelusalemu jawonecelaga cenene. Petulo, Andileya, Yakobo, soni Yohane ŵapikanilaga mwa lung’wanu Yesu ali mkusala yakulocesya yakwamba msogolo. Ŵasalile jemanjaji yakutendekwa m’masiku gambesi gacilambo cakusakalaci, soni ndaŵi jele jwalakwe cacitanda kulamulila mu Ucimwene wa Mlungu. Ŵasalilesoni kuti m’masiku gambesi ‘kapolo jwakulupicika ni jwalunda’ cacimjimilaga jwalakwe pacilambo pano, soni kupeleka cakulya causimu cakusosekwa pandaŵi jakwe.—Mat. 24:45-47.

² Ali mkusalape yakulocesya ya m’masiku gambesi, Yesu ŵasasilesoni citagu ca ŵali likumi. (Aŵalanje Matayo 25:1-13.) Kwende tulole yiwusyo ayi: (1) Ana citaguci cikwamba yatuli? (2) Ana ŵasagulwe akamulicisye masengo catuli songa sya m’citagu ca ŵali likumi, soni yakuyicisya yakwe yili yatuli? (3) Ana citagu ca Yesuci mpaka citukamucisye catuli wosopewe?

3. Ana mabuku getu kalakala gatagulilaga mwatuli citagu ca ŵali likumi, soni ana yeleyi yakwete yakuyicisya yatuli?

³ Mungani jipite jila twalijinganyisye kuti yaka yapacangakaŵapa kapolo jwakulupicika aŵele ali mkutagulila panandipanandi malemba, pagombelecesya mnope songa syakamucisya pa umi ngaŵa kwanilicikwa kwa yakulocesya ya paujo. Kalakala mabuku getu gasalaga ngopolelo sya citagu ca Yesu ca ŵali likumi atamose yindu yamwanamwana mpela nyali, mawuta ga nyali, mabotolo, soni yine ni yine. Komboleka kuti kutagulila citaguci m’litala lyeleli nganikukamucisyaga mnope kumanyilila ngopolelo sya songa syekulungwa. Mu ngani ajino citulole ligongo lyakwe tukuti m’yoyo.

4. (a) Ana mlombela akwimila ŵani, soni akumanyilila catuli yeleyi? (b) Ana ŵali akwimila ŵani, soni akumanyilila catuli yeleyi?

⁴ Kwende tulole songa syekulungwa sya m’citaguci, soni ngopolelo syakwe. Candanda, citulole ŵandu ŵaŵakolasile m’citaguci. Ana mlombela jwa m’citaguci akwimila ŵani? Pelepa Yesu ŵalisalaga msyene ngaŵa mundu jwine. Tukuti m’yoyo ligongo lyakuti muyakutendekwa yine Yesu ŵalisalaga kuti ali mlombela. (Luka 5:34, 35) Nambi wuli pakwamba ya ŵali? M’citaguci Yesu watite ŵali ŵasosekwaga kwembeceya kwisa kwa mlombela ali ŵakosece, nyali syawo sili mkukolela. Yesu ŵaŵecetesoni maloŵe mpela gelega pakusaka kalamusya ‘kakuga kangondolo’ ka ŵakumkuya ŵakwe ŵasagulwe. Jwalakwe ŵatite: “M’ŵeje ŵacile kutumicila ndaŵi syosope soni nyali syenu siŵeje sili mkukolela. M’ŵeje mpela ŵakutumicila ŵele ŵakumjembecela mbuje gwawo jwakutyocela kucindimba ca ulombela.” (Luka 12:32, 35, 36) Konjecesya pelepa, ndumetume Paulo, soni Yohane ŵalongoleledwe ni msimu weswela kulemba kuti ŵakumkuya Klistu ŵasagulwe mpaka twawanicisye ni ŵali ŵakulupicika. (2 Akoli. 11:2; Ciu. 14:4) Yeleyi yikulosya kuti Yesu pakusala citagu ca pa Matayo 25:1-13 ŵasakaga kwakalamusya, soni kwakamucisya ŵakumkuya ŵakwe ŵasagulwe.

5. Ana Yesu ŵasasile kuti citaguci cicikwanilicikwa cakaci?

⁵ Sano kwende tulole kagopolele kandaŵi jaŵajisasile Yesu m’citaguci. Ana ndaŵi jaŵajisalagajo jili japi? Yesu akutumanyisya msyene ndaŵi jisyesyene jaŵajisalaga cakumbesi kwa citaguci. Jwalakwe ŵatite, “Mlombela ŵayice.” (Mat. 25:10) Sanja ja Mlonda ja July 15, 2013, pakusala yakulocesya ya Yesu yayili pa Matayo mtwe 24 ni mtwe 25 jasasile mbali msano ni sitatu pakwamba ya ‘kwika’ kwakwe. Pakusala mbali jilijose jakwamba kwika kwakwe ŵakamulicisye masengo liloŵe limo lya Cigiliki. Yesu pakusala mbali syelesi ŵagopolelaga yakwika kwakwe pa ndaŵi ja yisawusyo yakogoya, pacaciyika kukwalamula ŵandu, soni konanga cilambo cakusakalaci. Yeleyi yigopolela kuti citaguci cikwamba ya moŵa gambesi, nambo kwanilicikwa kwakwe kwekulungwa kucitendekwa pandaŵi ja yisawusyo yakogoya.

6. Ana utenga wekulungwa wa m’citaguci wuli watuli?

⁶ Ana utenga wekulungwa wa m’citaguci uli watuli? Akaliŵalila ngani jaŵasasile Yesu mkanasale citaguci. Jwalakwe ŵasasile ngani jakwamba “kapolo jwakulupicika ni jwalunda.” Kapolo jwakulupicika ni jwalunda ŵaliji jwakuti caciŵa kakuga kamnono ka acalume ŵasagulwe kele kacilongolela ŵakumkuya ŵa Yesu m’moŵa gambesi. Yesu ŵakalamwisye ŵandu ŵacaciŵa m’kakugaka kuti cacisosekwa kwendelecelape kuŵa ŵakulupicika. Kaneko, ŵasalile citagu pakusaka kwakalamusya ŵasagulwe wosope m’moŵa gambesi kuti cacisosekwa ‘kuŵa mesope,’ naga ngasatenda m’yoyo cacijasa mbote jawo japenani jakuja kutama kwinani. (Mat. 25:13) Kwende sano tutagulilane citaguci, soni citulole yatesile ŵasagulwe  pakamulicisya masengo songa sya m’citaguci.

7, 8. (a) Ana ndamo siŵili syapi syasyakamucisye ŵali ŵakalamuka kuŵa ŵakoseka? (b) Ana ŵasagulwe alosisye catuli kuti ali ŵakosece?

⁷ Yesu ŵasasile kuti ŵali ŵakalamuka ŵakosecele cenene kwika kwa mlombela, kulekangana ni ŵali ŵakuloŵela. Ligongo cici tukuti m’yoyo? Ligongo lyakuti jemanjaji ŵaliji ŵakoseka cenene soni ŵaliji mesope. Ŵali wosope ŵasalile kuti mlombela cayice cilo, m’yoyo jemanjaji ŵasosekwaga kupamba nyali syawo kuti siŵeje syakolela soni kuti aŵeje mesope cilo cosope kwembeceya ndaŵi jakusangalasya jakwika kwa mlombela. Kulekangana ni ŵali ŵakuloŵela ŵala, ŵali ŵakalamuka ŵakosecele, ŵajigele mawuta ganyali gakonjecesya m’mabotolo. Ana ŵasagulwe ŵakulupicika aŵelesoni ŵakosece mpela ŵali ŵakalamuka ŵa m’citaguci?

⁸ Elo kwene! M’masiku gambesi gosope, Aklistu ŵasagulwe atesile yindu mpela ŵali ŵakalamuka. Aŵele ŵakoseka kamula masengo gawo mwakulupicika mpaka pambesi pa umi wawo. Jemanjaji akusamanyilila kuti kutenda undumetume wawo mwakulupicika kukusasosekwa kulijima yindu ya kucilu ya m’cilambo ca Satanaci. Akusalipeleka mnope pakumtumicila Yehofa ngaŵa ligongo lyakuti mbesi jiŵandicile nambo ligongo lyakumnonyela, soni kulupilila Yehofa ni Mwanagwe. Akusajendelecela kuŵa ŵagoloka, pakana kujigalila msimu wa m’cilambo cakusakalaci, soni pangajigalika ni yindu yakucilu, ndamo syakusakala, soni kulinonyela. Akusajendelecelape kuŵa ŵakoseka kuŵala mpela yakumulicila, mwangadandawula cilicose ni kokoŵa kwika kwa Mlombela.—Afi. 2:15.

9. (a) Ana Yesu ŵapelece cikalamusyo catuli pakwamba ya kugwesela? (b) Ana ŵasagulwe akutenda yatuli paŵapikene maloŵe gakuti “Mlombela ali mkwisa”? (Alole maloŵe gamwiŵanda.)

⁹ Ndamo jaŵili jajakamucisye ŵali ŵala kuŵa ŵakosece jili kuŵa mesope. Ana mpaka yikombolece kuti Mklistu jwamsagulwe agweseleje pakwembeceya kwika kwa mlombela? Elo mpaka yikombolece. Alole yaŵaŵecete Yesu yakwamba ŵali likumi ŵala. Jwalakwe ŵatite, “Wosope ŵatandite gwesela ni ŵagonile” ligongo mlombela jula ŵacelewaga. Yesu akusamanyilila kuti mtima wetu wakusacilila kutenda yindu yambone, kapena msimu wakulipeleka mpaka usokonecele ni kulopotoka kwa cilu. Ŵasagulwe ŵakulupicika apikanile cikalamusyo celeci ni aŵele ali mkukamula masengo mwamtawu kuti aŵeje mesope kupunda kalakose. Ŵali wosope ŵa m’citagu cila ŵapikene maloŵe gakuti, “Mlombela ali mkwisa!” Nambo ŵali ŵaŵaliji mesope ŵapilile mpaka kwisa kwa mlombela. (Mat. 25:5, 6; 26:41) Nambi wuli pakwamba ya ŵasagulwe ŵakulupicika ŵa moŵa agano? M’masiku gosope gambesiga jemanjaji aŵele ali mkutenda yindu mwakalamuka ni maloŵe gapikene gakuti, “Mlombela ali mkwisa” asigele panandi kopocela. Jemanjaji alosisyesoni kuti ali ŵakupilila mwakulikosecelesya kwika kwa Mlombela. * Nambotu kwanilicikwa kwekulungwa kwa citaguci kwaliji kwakuti kucitendekwa pandaŵi jine jakwe. Ligongo cici tukuŵeceta m’yoyo?

10. Ana kuŵecetana kwa ŵali ŵakalamuka ni ŵali ŵakuloŵela kukutendekasya kuti paŵe ciwusyo catuli?

¹⁰ Mbali jakusosekwa mnope ja citaguci  jikumalisya ni kuŵecetana kwa ŵali ŵakuloŵela ni ŵali ŵakalamuka. (Aŵalanje Matayo 25:8, 9.) Kuŵecetana kwakwapaliku kukutendekasya kuti paŵe ciwusyo cakuti, “Ana ŵasagulwe ŵakulupicika ŵakanile kwakamucisya acimjawo cakaci?” Kwanga kwa ciwusyo celeci kukuwonecela cenene patukulolasoni ndaŵi jele Yesu ŵajisasile m’citaguci. Akaliŵalila kuti Yesu, jwali Mlombela, caciyika kumbesi kwa yisawusyo yakogoya kukulamula. Ana yeleyi ngayikulosya kuti mbali ja citagu jeleji jikwamba ya yindu yayicitendekwa lisiku lyakulamula lili lisigele panandi kutanda? Mpaka yiwonece m’yoyo, ligongo pandaŵijo ŵasagulwe caciŵa ali apocele cidindo cakumalisya.

11. (a) Ana cici cacicitendekwa yisawusyo yakogoya yili yisigele panandi kutanda? (b) Ana ŵali ŵakalamuka ŵagopolelaga cici paŵasalile ŵali ŵakuloŵela ŵala kuti ajawule kwa ŵakusumisya mawuta?

¹¹ M’yoyo, yisawusyo yakogoya mkaniyitande, ŵasagulwe wosope ŵakulupicika ŵacaciŵa ali asigele pacilambo capasi cacipocela cidindo cawo cakumalisya. (Ciu. 7:1-4) Kutandila ndaŵi jelejo kwawula msogolo caciŵa ŵakusimicisya kuti akwawula kwinani. Nambi ŵasagulwe ŵanganaŵa mesope, soni ŵanganaŵa ŵagoloka ana cicatendecela cici? Cacijasa mbote jawo jakuja kutama kwinani. Jemanjaji ngasapocela cidindo cakumalisya pandaŵi jeleji. Ndaŵi jijojo cacisagula ŵane ŵakulupicika. Payicitanda yisawusyo yakogoya, mwangakayicila ŵasagulwe ŵakuloŵela cacisimonga kulola Babulo jwamkulungwa ali mkonasika. Pandaŵi jeleji cacimanyilila kuti nganakosecela kwika kwa Mlombela. Ndaŵi jili jimasile, soni ali asoŵile cakutenda cacijawula kukuŵenda cikamucisyo. Ana yakuyicisya yakwe yiciŵa yatuli? Kwanga kwa ciwusyo celeci kukusimanikwa m’citagu ca Yesu. Jwalakwe ŵasasile kuti ŵali ŵakalamuka ŵala ŵakanile kwagaŵila mawuta ga nyali acimjawo ŵakuloŵela, m’malo mwakwe ŵasalile kuti ajawule akasume kwa ŵakusumisya mawuta. Akumbucile kuti ndaŵi jeleji jaliji ‘pasikati cilo.’ Ana ŵasimene ŵakusumisya mawuta ndaŵi jelejo? Iyayi, ligongo lyakuti ŵaliji ali akokweŵe.

12. (a) Ana pandaŵi jakupocela cidindo cakumalisya, ŵasagulwe ŵanganaŵa ŵagoloka cicatendecela cici? (b) Ana ŵasagulwe ŵacaciŵa mpela ŵali ŵakuloŵela yicamalila wuli?

¹² Pandaŵisoni ja yisawusyo yakogoya, ŵasagulwe ŵakulupicika ngasamkamucisya mundu jwalijose jwangakulupicika. Ngasipapagwa cikamucisyo cilicose. Ndaŵi jiciŵa jili jimasile. Ana ŵasagulwe ŵangakulupicikawo cicatendecela cici? Yesu ŵasasile yayatendekwe ŵali ŵala ali ajesile ulendo ŵangali mate wakwawula kwa ŵakusumisya mawuta. Jwalakwe ŵatite, “Mlombela ŵayice. Ŵiŵaliŵicile cilepe ŵala ni ŵajinjile najo pampepe m’nyumba ja cindimba, panyuma pakwe ŵawugele pamlango.” Pacaciyika Yesu mu lumbili lwakwe cakumbesi kwa yisawusyo yakogoya, cacajigala ŵasagulwe wosope ŵakulupicika ni kwawula nawo kwinani. (Mat. 24:31; 25:10; Yoh. 14:1-3; 1 Ates. 4:17) Litanga liciŵa lili liwugalidwe kwa ŵasagulwe ŵangakulupicika. Jemanjaji caciŵa mpela ŵali ŵakuloŵela. Ligongo lya yeleyi cacigumila kuti: “Ambuje, Ambuje atuwugulile!” Nambo cacajanga mpela mwacacajanjila ŵandu ŵajinji ŵacacalamula kuti ali mpela mbusi pandaŵijo. Jwalakwe ‘tacasalila mwangasisa kuti, ngangummanyilila kose.’ Yeleyi yiciŵa yakutesa canasa—Mat. 7:21-23; 25:11, 12.

13. (a) Ligongo cici ngatukusosekwa ganisya kuti ŵajinji mwa ŵasagulwe caciŵa ŵangakulupicika? (b) Ligongo cici maloŵe gakutukalamusya ga Yesu mpaka tugawonejesoni mpela gakutulimbikasya? (Alole ciwulili cacili kundanda kwa nganiji.)

¹³ Mwakamulana ni yatuyiweniyi, ana mpaka tujile kuti wuli? Ana Yesu pakusala yeleyi ŵagopolelaga kuti ŵajinji mwa ŵasagulwe ŵakwe caciŵa ŵangakulupicika ni pacisosekwa kusagula ŵane? Iyayi. Akaliŵalila kuti Yesu  ŵamkalamwisye “kapolo jwakulupicika ni jwalunda” kuti akacenga ni kuŵa kapolo jwakusakala. Yeleyi ngayikugopolela kuti Yesu ŵajembeceyaga kuti kapolojo cacitenda m’yoyo. Citaguci cikwetesoni utenga wamacili mnope wakutukalamusya. Mpela muyaŵelele kuti ŵali msano ŵaliji ŵakalamuka, soni ŵane msano ŵaliji ŵakuloŵela, m’yoyosoni jwakusagulwa jwalijose mpaka asagule jika kuŵa jwakoseka soni mesope kapena kuŵa jwakuloŵela soni jwangakulupicika. Msimu weswela wamkamucisye ndumetume Paulo kusala yakulandana ni yeleyi paŵaŵecetaga ni Aklistu ŵasagulwe acimjakwe. (Alaŵalanje Ahebeli 6:4-9; awanicisye ni Deuteronomo 30:19.) Cikalamusyo caŵapelece Pauloci caliji camacili mnope, nambo pambesi pakwe ŵasasile maloŵe gakulosya cinonyelo soni gakwasimicisya Aklistu acimjakwewo kuti ŵajembeceyaga “yindu yambone.” M’yoyosoni, kupitila m’citaguci, Yesu ŵapelece cikalamusyo cakwe mwacinonyelo pakusaka kutulimbikasya. Klistu akusamanyilila kuti jwamsagulwe jwalijose mpaka ajendelecele kuŵa jwakulupicika ni kupocela mbote jakwe.

14. Ligongo cici citagu cakwamba ŵali likumi mpaka cakamucisyesoni “ŵangondolo sine”?

¹⁴ Pakuŵa citagu ca Yesu ca ŵali likumici cikwamba ya ŵasagulwe, ana mpaka tujile kuti ngaŵa mkwakamucisyasoni “ŵangondolo sine”? (Yoh. 10:16) Mpaka cakamucisye. Akaliŵalila kuti utenga wa m’citaguci uli wakuti ‘Aŵeje mesope.’ Ana ŵasagulwepe ni ŵakusosekwa kuŵa mesope? Ndaŵi jine Yesu ŵatite, “Yindu yele yingumsalilayi, ngangumsalila jemanjape iyayi, nambo ngwasalila ŵandu wosope kuti, aŵeje mesope.” (Maliko 13:37) Yesu akusasaka kuti ŵakumkuya ŵakwe wosope akosecelesyeje mitima jawo kuti aŵeje ŵakulupicika pa undumetume wawo, soni kuti aŵeje mesope. M’yoyo, Aklistu wosope akusosekwa kuya cisyasyo cambone ca ŵasagulwe pangani jeleji, soni kuŵika undumetume pamalo gandanda pa umi wawo. Tukaliŵalila kuti ŵali ŵakuloŵela ŵaŵendile ŵali ŵakalamuka ŵala mawuta. Kwakanya mawutako kukutukamucisya kumanyilila kuti pangali mundu jwampaka aŵe jwakulupicika, kuŵa mu usyesyene kapena kuŵa mesope m’malo mwa m’weji. Jwalijose jwetuwe cacijanga jika kwa Jwakulamula jwacilungamo jwesagulwe ni Yehofa. Tukusosekwa kuŵa ŵakoseka. Jwalakwe akwika pacangakaŵapa!

15. Ligongo cici ulombela wa Klistu watukuwujembeceya wuli wakusangalasya kwa Aklistu wosope?

¹⁵ Cakutendekwa cekulungwa ca m’citagu ca Yesu cila mpaka cikamucisye Aklistu wosope. Ana ŵani mwa m’weji ŵampaka aŵe ŵangasangalala ni ulombela wawucitendekwawo? Ŵasagulwe caciŵa ali kwinani, soni panyuma pa ngondo ja Alamagedo caciŵa jwamkongwe jwa Klistu. (Ciu. 19:7-9) Ulombela wakwinaniwu ucimkamucisya jwalijose jucacitama pacilambo capasi ligongo ucitamilikasya boma jambone mnope. Cinga tukwete cembeceyo cakwawula kwinani kapena cakutama pacilambo capasi, kwende tuŵe ŵakusimicisya kamulicisya masengo songa jekulungwa ja m’citagu ca ŵali likumi. Kwende tukosecelesyeje mitima jetu, tuŵeje ŵakulimba soni kuŵa mesope kupunda kala kose ni cakulinga cakuti msogolo citusangalale ni yindu yambone yatusunjile Yehofa.