1, 2. (a) Ginipai Yesu ayuguhe tipa yangara arame? (b) Gini asanahe ani nika wisigopai tipaha?

MO BERẼNGA gupai nga Yesu gu sungu rii Bagangara Aeraya yo kaa bi gu yekaru du Yerusarema yo wa ko afura tipa gu bawene sangbanebi dagba gako sangbaanebi yo. Petero, Andarea, Yakoba, na Yoane nadegatuyo fuko wa ko afura tipa gu sangbanebi nika manga ku mbatayo gizo. Ko nafura fuyo tipa gu bakerepai nika manga ti yangara arame nga ga gi zegino re, nga gu regbo ko nika tona zogarago ti ni rogo ga Mbori Kindo. Ko aya fuyo wẽ, gako ‘ruru kangara moyambu’ nikaa mangapai kubako auru kpotosende ti gu regbo re, kaa fu gu riahe nga ga toro gako amoyambu aida na ni.—Mt. 24:45-47.

² Fuo gure, rogo kina gu bangisa sangbanebi re, Yesu ape gu sanza du tipa ngasu adee bawe. (Oni gedi Matayo 25:1-13.) Ani gbenga berã rani awere kuti agi asanahe re: (1) Gini pangbanga  gu sanza re aida ka fura tipaha? (2) Wai mbedimbedi aKristano amangipai kuti gu rugute du rogo gu sanza re, na sangbanaha nga gine? (3) Wai rengbe ani ni basasa ka gbia undo be gi ga Yesu sanza re areme?

3. Mbata kusayo, ginipai gaani waraga apehe tipa gu sanza nga ga ngasu adee bawe, na gini sangbanaha?

³ Ani abipai rogo gu kekeapai naaye mbata fu gere nga, vuru agu agarã susi kusayo, kangara moyambu aima diaberã tipa ka zanga sakarogo averesi yo dunduko ni sangbanebi, ono i nafura gbe tipa gupai rengbe ani ka wirikaha behe. Mbata kusayo, gaani waraga asakirogo ga Yesu sanza nga ga ngasu adee bawe na gu rukutu apai dunduko du tipaha, nakoda atara watadu we, nzeme, ndukura, na gu kura apai. Ya mo runga ha ani ya ka ani gbeberã rani kuti gu futufutuapai dunduko du rogo gu sanza re bangirani ago tipa gu taatapai si afura tipaha te? A wa ani nika bihe, gu karagapai du tipaha na nyanyaki paha.

4. Rogo gu sanza re, wai rengbe ani ka ino (a) gu kumba nadia dee? (b) ngasu adee?

⁴ Ani bingo gupai du rogo gu ga Yesu pangbanga nga ga sanza re. Bambataha nga, ani bingo agu aboro du rogoho. Da nga gu kumba nadia dee rogo gu sanza re? Nirengo, Yesu aafura tipa tiko. Ti gu kura regbo, ko anaafura tipa tiko wa gu kumba nadia dee! (Rk. 5:34, 35) Na ginipai du tipa ngasu adee? Rogo gu sanza re, Yesu aya gu ngasu adee re na sunge beyo nga ka mbakadatiyo na gayo atara si niki akii wa i apido gu kumba nadia dee. Ani bingo gu rugute Yesu afuhe fu gako “umba rika aboro” nga mbedimbedi aKristano ki ya: “Oni síkpa gaoni remu, ki tigi gaoni baro; oni tigaoni ki du wa agu aboro nasunguda gayo gbia, ho ko ka ye ni kporo pumbo dia de yo.” (Rk. 12:32, 35, 36) Kurigure, gu mokedi nangia Pauro na gu ko nangia Yoane ga Mbori toro adu kugiiyo i ringbisi mbedimbedi aKristano kuti iriiri ngasu adee. (2 Kor. 11:2; Yugo. 14:4) Si tie ziazia nga, Yesu aape gu sanza du rogo Matayo 25:1-13 re ni gu rugute nga ga zahe fu agu awirinako nga mbedimbedi aKristano.

5. Wai Yesu ayugupa gu regbo si adu nga gi sanza re nika manga ti ni?

⁵ Fuo gure, ani wisigingo gupai du tipa regbo. Gini regbo du Yesu afu gi rugute re ti ni? Gupai Yesu apehe ti digido gu sanza re naundo rani ani ini gu regbo: ‘Gu kumba nadia dee ada’ ti ni. (Mt. 25:10) A wa i asakipai tipaha rogo gu Ngbaõbambu Sinziri nangia ga Bamburu 1, 2013, Yesu aafura tipa gu sangbanebi du rogo Matayo kapita 24 na 25 du na apai rogoho muambe nafura tipa pa ‘ye’ ko. Rogo agu aba re ni basasa, Yesu aafura tipa bakere gberãngbi ti gu regbo ko nika ye ka sapangbanga na ki gbarasi gi gbegberẽ zegino re. Si ziazia nga, gi sanza re nafura tipa yangara arame, ono gu bakerehe digisidigisihe nika manga ti regbo bakere gberãngbi.

6. Nibi gu banguapai Yesu aafura tipaha, gini pangbanga du rogo gi sanza re?

⁶ Ginipai nzunzu gi sanza re aida ka fura tipaha? Oni tingidi gu banguapai ko afura tipaha. Gipai re adu fuo nyasa ko sakapai tipa ruru kangara moyambu. Si adu nga gu moyambu re nika ngia tooni badona nga ga mbedimbedi aKristano nga aguyo nikaa ngbembatayo fu apefuo Yesu ti digido arame. Yesu afu zahe fu agu akumba re nga, si naida i nye ni ruruyo. Fuo gure, ko agbeberã ko ka ruga gako mbedimbedi aKristano dunduko du rogo yangara arame nga i ni ‘ngere’ angera kindi i andu ka zanga gayo mosoro. (Mt. 25:13) Ani ndunga awere ku rogo gu sanza re ka bingo wai mbedimbedi aKristano namangipai kuti gu rugute re.

7, 8. (a) Gini asino ue naasa gupai nga ngasu adee mbakaditiyo? (b) Wai mbedimbedi aKristano nambakaditiyo?

⁷ Ga Yesu sanza anyakasi gupai nga gi ruru ngasu adee re, i aadunga wa gu mumungo yo te, i aima mbakadatiyo tipa gu kumba nadia dee. Tipagine? Mbiko asino ue: mbakadatise na sungo kaa ngera angera kindi. Gi ngasu adee re asungu yuru ki ongo kii tipa ka ngera tipa gu regbo badidee ka da ti ni, na kini sa gayo atara watadu awe si niki akii na i nye ni ungayo zanga ra daho gu wene regbo i apidoho nika da ni. Ono tie, i aadunga wa mumungo ngasu adee te, i aima mbakadatiyo, na ki ye na gu kura nzeme rogo ndukura tipa gayo atara. Ya mo mbedimbedi aKristano ima mbakadatiyo a wo?

⁸ I ima mangaha nirengo! Vuru gi yangara arame re, mbedimbedi aKristano mangipai wakina gu ruru ngasu adee re, i mbakaditiyo ka manga gayo sunge ni ruruyo. I kakuti ruru mangapai na ki bihe nga gayo sunge naida i mbu kura apai ambu wa agu ahe du rogo gi ga Satana zegino re. I futiyo kakaka fu Yekova tipa ka mangasunge fuko, i amaanga regbo kuriyo yo nga si i nika nyasa gu sunge re ti ni te, ono i namangaha mbiko nyemuse na padu yo ni ruruyo fuko na Wiriko. I nakakuti gayo ruru mangapai, i aidanga ka dia gu gbegberẽ toro nga ga gi zegino re na gaha nyemuahe, wasiwasi mangapai gbiati gbangbati te. I ima mbakadatiyo wenengai, i nakika wakina imahe, na pa ima gu kumba nadia dee afudanga yo te.—Frp. 2:15.

9. (a) Wai Yesu afu zahe tipa gu sino nga ga yukuro? (b) Wai mbedimbedi aKristano nakaragapai kuti gu tangbaa nga: “Oni ngere, gu kumba nadi[a] de”? (Oni bi gu kekeapai du bandu waraga yo.)

⁹ Gu kura ue sino naaundo gu ngasu adee re tipa i mbakaditiyo angia ngera angera kindi. Ya mo si rengbe kadu taata tipa mbedimbedi aKristano ti ni rame rogo gi gbanga regbo nga ga yuru re? Ii, si ima rengba ka manga. Oni kparia gupai nga Yesu aya tipa gu ngasu adee bawe re “i ayukura ki nira ara dunduko” wa badidee aima koyo. Yesu aima inoho nga zavura gu boro du na nyemu ka mangapai, gu rungbura nga ga borose ima rengba ka gbarasapaha. Mbedimbedi aKristano ima mangapai kuti gu zahe re na ki mangi ome tipa kaa ngera angera kindi. Rogo gu sanza re, gu ngasu adee re dunduko naakaragapai kuti gu tatangbaa naadu yuru nga: “Oni ngere, gu kumba nadi[a] de!” Ono kina aguyo naangera angera kindi nasungu dati digidoho. (Mt. 25:5, 6; 26:41) Na ginipai namanga tipa mbedimbedi aKristano arame? Rogo gi yangara arame, i ima karagapai kuti gu tangbaa a naya, “Oni ngere, gu kumba nadi[a] de!” Na i ima ida kuti gu nyanyaki gopai nayugo gupai nga Yesu ima mbeda ka ye. Na i ima hipai na ki mbakaditiyo tipa gu uru Badidee nika da ti ni. * Ono tie, pa digo gu sangbanebi re naruriipa ringbisiringbisi bagizo regbo. Rogo gini gene?

10. Gu fugo naadu dagba gu ngasu adee bawe re akusi gini vunduvundu sanahe?

¹⁰ Si nawira wa gu vunduvundupai du tipa gi sanza re nabipa digidoho, gu regbo gu ngasu adee naadu bawe re aafura dagbatiyo. (Oni gedi Matayo 25:8, 9.) Gu fugo  naadu dagbayo nakusa sanahe nga: “Gini regbo rogo gu pangbanga nga ga ga Mbori aboro ruru amoyambu aka ka undo aguyo naasana yo?” Ani rengbe ka gbia karagapai kuti gu vunduvundupai re ka ani berẽkuriipa gu regbo si adihe. Gu vovo giarogopaiyo du bera ni awere naya Yesu nga gu Badidee re nika ye ka sapangbanga mbembedi na bakere gberãngbi. Ya mo anga si nawira wa gu papara sanza re nafura tipa gupai namangi mbata fu gu bakere uru sapangbanga re da te? Si ima rengba kadu wo, mbiko ti gu regbo re mbedimbedi aKristano aima gbia gayo yangada dikohe.

11. (a) Ginipai nika manga mbata fu tonatona bakere gberãngbi? (b) Ginipai tatamanatatamana ngasu adee aaida ka pehe ti gu regbo i aya fu gu mumungo yo i ndu fuo ababagi nzeme?

¹¹ Sidu tie, mbata fu bakere gberãngbi tona, mbedimbedi aKristano dunduko auru kpotosende i nika dikohe tiyo ni yangaraha. (Yugo. 7:1-4) Tona ti gu regbo re ka ndu ku mbatayo, si nika du nirengo nga i naga ku ngbangbaturũ yo. Ono oni berẽnga tipa agu agarã nika du mbata fu gberãngbi tona. Ginipai nika manga fu gu mbedimbedi aKristano angeranga angera kindi ya, na akanga kuti gayo ruru mangapai ya? I i azanga gu gayo mosoro nga ga ngbangbaturũ. Si ziazia tie nga, i adikongo he tiyo mbata fu tona bakere gberãngbi te. Ti gu regbo re, i nika dikohe ti aguyo du ni ruruyo. Ho bakere gberãngbi nika tona ni, si nika iriwo ti gu mumungo mbedimbedi aKristano re ka bi gupai nga i ima gbarasa Bakere Babera. Si nawira wa gu regbo re du i nika mbakadanga tiyo tipa pada Badidee ya. Ti gu ngbatunga regbo re, ka i sanahe tipa undo, ginipai nika manga fuyo? Ga Yesu sanza nafu wiri karagapai furani tipaha. Gu ngasu adee nadu na tatamana aaidanga ka fu gayo nzeme fu gu mumungo yo te, kuba gure, i aya fuyo i ndu ka ngbehe. Oni tingidi gupai nga, “bebere yuru” naadu. Ya mo i arengbe ka gbia abagi nzeme ti gu regbo re? Oó. Regbo aima susa.

12. (a) Ti regbo bakere gberãngbi, ginipai nika manga fu gu mbedimbedi aKristano akanga kuti ruru mangapai ya mbata fu i dikohe tiyo? (b) Ginipai nika manga fu aguyo du wa gu mumungo ngasu adee re?

¹² Wakina gure a, ti regbo bakere gberãngbi, ruru mbedimbedi aKristano arengbanga ka undo aguyo adunga ni ruruyo ya te. Undoho nika du fuyo te mbiko regbo ima susa. Ono digido gayo pai nika ngia gine? Yesu asakipai tipa gupai namangi gu mumungo ngasu adee naandu ka ngbe nzeme nga: “Gu kumba nadi de ki da; agu yo ki rimi na ko naasunguda ko ku pati pumbo diade; i ki kisi ngbadimo.” Ho Kristo nika ye ni rogo gako taarimo ti digido bakere gberãngbi, ko nika dungura gu gako mbedimbedi aKristano du ni ruruyo ku ngbangbaturũ yo. (Mt. 24:31; 25:10; Yo. 14:1-3; 1 Tesa. 4:17) Ngbadimo nika duadu nirengo ni kisikisihe be aguyo adunga ni ruruyo ya, du wakina gu ngasu adee nangia airamungo re. Si nawira wa i nika kpara ki ya: “Gbia, mo uru ngbadimo fu rani.” I nika gbia gu ngbatunga karagapai agu aboro du wa ameme nika gbiaha ti regbo sapangbanga nga: “Ya mi fu roni ni rengo, mi aina nga roni te.” Nagberẽ gupai re!—Mt. 7:21-23; 25:11, 12.

13. (a) Tipagine si aidanga ani berẽ gupai ti ni nga kura ga Yesu mbedimbedi amoyambu nika da ni irairayo ya? (b) Tipagine rengbe agu afugo Yesu nga ga zahe kadu a wa afugo nga ga kido? (Oni bi gu sura du ti tonatonaha.)

¹³ Gini digisopai rengbe ani kada kutini nibipa gipai re? Ya mo Yesu aaida ka ya dungu mbedimbedi aKristano nika zanga du ni ruruyo si ki idi gupai nga i moi aguyo kubayo? Oó. Oni tingidi gupai nga ko aima za gako ‘ruru kangara moyambu’ nga ka ni danga ni gbegberẽ moyambu ya. Anga ko amaabangiriko nga pai nika manga wa gure  te. Teketeke a, gi sanza re nayugo nyanyakipa pai. A wa ngasu adee bisue angia airamungo na aguyo bisue kingia airatatamana, mbedimbedi aKristano ni basasa du na rengba beyo ka sia ka mbakadatiyo na kini ngere angera watadu ka zanga du ni ruruyo. Ga Mbori toro adu kugii gu mokedi nangia Pauro ko ke ngbatungapai wa gure ho ko aafura ni fu agu akurako nangia mbedimbedi aKristano. (Oni gedi AEbere 6:4-9; oni ringbisihe na Pa Fu Rugute ni Ue he 30:19.) Oni bi gupai nga Pauro afu nyanyakihe zahe fuyo, ono fuo gure ko afura fuyo rogo nyemuse nakido nga “wene pai” gu du kina mbatayo fu agu awirinako nangia aKristano. Wakina gure a, gu zahe du rogo ga Yesu sanza ko afuhe na nyemuse gbiati kido. Kristo ima inoho nga gako mbedimbedi amoyambu rengbe arengba ka nye ni ruru yo na ki gbia gayo mosoro!

14. Wai rengbe “kura akandoro” ka gbia undo be gu sanza nga ga ngasu adee bawe?

¹⁴ Wa duhe nga Yesu ape gu sanza nga ga ngasu adee bawe fu mbedimbedi apefuoko, ya mo ani rengbe ka ya si afunga undo fu gako “kura akandoro” te? (Yo. 10:16) Wagu sa te! Oni tingidi gupai nga, gu sanza re nape gupai du taata niya: Oni ‘ngere’ angera kindi. Ya mo kina mbedimbedi aKristano du gipai re fuyo? Yesu aya: ‘Gupai mi agumba furoni kina ha mi agumba fu aboro dũ, oni ngére angera.’ (Mk. 13:37) Yesu naida apefuoko dunduko mbakadi ngbaduyo yo tipa gako sunge na i ni ngere angera kindi. AKristano dunduko napekafuo gu ngbembatayo nga ga mbedimbedi aKristano rogo gi bangiriba re, na kini pekefuo gayo wene kpiapai nga ga tungusapai. Ani ni basasa si aida ani ini gupai nga gu mumungo ngasu adee re asana aguyo naadu na tatamana tipa i fu nzeme fuyo. Pa zanga fu akurayo nzeme fuyo nayugo gupai nga boro arengbanga kadu ni ruru ni, ka nye ku rogo rengo yo, watadu ka ngera angera kindi fu kurani te. Ani dunduko nika karagapai fu gu ruru basapungbanga Yekova namoiko. Si naida ani mbakaditirani. Ko nika da barambeda!

15. Tipagine du aKristano naabayo ti ni dunduko na ngbarago tipa gu diadee nika ngia ga Kristo?

¹⁵ AKristano dunduko rengbe arengba ka gbia undo be gu nyanyakipai ga Yesu sanza afura tipaha. Nirengo, da dagbarani adunga na ngbarago tipa gu rogatise nika manga ku mbatayo re ya? Mbedimbedi aKristano nika du ngbangbaturũ yo; fuo gu vura nga ga Aramegido, i nika da ni gu dee Kristo nika diari. (Yugo. 19:7-9) Aboro dunduko auru kpotosende nika gbia undo ti gu rogatise nika manga ngbangbaturũ yo re, si nika ngia wene zogarago. Ka si vura du nga ani na maabangirise ka ga ku ngbangbaturũ yo watadu ka raka auru kpotosende, ani dinga berã adia tipa ka wirika gu nyanyakipai du rogo gu sanza nga ga ngasu adee bawe. Ani mbakaditirani na ngbaduraniyo dunduko na ki ru nyanyaki kaa ngera angera kindi, tipa wa ka ani gbia ngbarago be gu bakere wenepai Yekova namangihe furani ku mbatayo re!