1, 2. ¿Kunatsa Jesusajj qollqe katoqerinaka uñachtʼäwit parläna?

QOLLQE katoqerinaka uñachtʼäwit parlasajja, kunsa ajllit cristianonakajj lurapjjañapa ukwa Jesusajj amuytʼayañ munaskäna. Ukampis ajllit cristianöstansa janisa, taqeniw uka uñachtʼäwit yateqasiñasa. Ukatakejja, uka uñachtʼäwejj kun sañsa muni uk yatiñasawa.

² ¿Kunapachas Jesusajj uka uñachtʼäwit parläna? Diosan Reinopan Reyjam apnaqjjatapsa ukat qhepa urunakan jakaskatassa, kunanakas uñachtʼayañapäna, uka toqet parlasaw Jesusajj qollqe katoqerinaka uñachtʼäwit parläna (Mat. 24:3). Ukhamajj uka uñachtʼäwejja, kunanakatï qhepa urunakan pasañapäkäna ukanakat maynïriwa, ukat ukajj jichhürunakanwa phoqasiski.

3. Mateo 24 ukat 25 jaljanakan jikjjataski uka uñachtʼäwinakajja, ¿kunanaksa qhanañchi?

³ Mateo 24:45 qellqatat Mateo 25:46 qellqatkamajja, pusi uñachtʼäwinakatwa parli. Ukanakat maynïrejja qollqe katoqerinakat uñachtʼäwiwa. Mayni kimsa uñachtʼäwinakasti, amuyasiri cheqapa uywatata, tunka virgen tawaqonakata, uwijanakampita cabritonakampitwa parli. Discipulonakapajj kuttʼaniñapat jisktʼapkäna ukar qhanañchkasaw Jesusajj uka uñachtʼäwinakat parläna. Ukat  arkirinakaparojj kunjamatsa aka qhepa urunakan uñtʼasiñapäna uka toqetsa parlarakiwa. Sañäni, amuyasiri cheqapa uywatat parlir uñachtʼäwisa, tunka virgen tawaqonakata ukat qollqe katoqerinaka uñachtʼäwisa alajjpachar sarañatak ajllitäpki uka cristianonakatakiwa. Utankirinakar manqʼa churañatak ajllit cristianonakajja, amuyasirïñapawa ukat cheqaparakïñapawa, ukaw amuyasiri cheqapa uywatat parlir uñachtʼäwin qhanañchasi. Tunka virgen tawaqonakat parlir uñachtʼäwirjamajja, alajjpachar sarañatak ajllit cristianonakajj taqpachaniw Jesusan jutañap suyapjjañapa, ¿kunatsa? Kunapachas Jesusajj jutani ukjja janiw yatipkiti, ukatwa wakichtʼata jan ikjas suyapjjañapa, ukaw uka uñachtʼäwin qhanañchasiraki. Qollqe katoqerinakat uñachtʼäwirjamasti, ajllitanakajj Jehová Diosan munañap phoqañatakejj wali irnaqtʼirïpjjañapawa, ukaw uñachtʼayasi. Uwijanakampita cabritonakampita qhepïri uñachtʼäwirjamasti, aka Oraqen jakañatak suytʼäwinïpki ukanakajj jan jitheqtasaw ajllit cristianonakar yanaptʼapjjañapa, ukaw qhanañchasiraki. * Jichhajja, qollqe katoqerinaka uñachtʼäwit parltʼapjjañäni.

4, 5. 1) Qollqe katoqerita uñachtʼäwinjja, ¿khitis uywirejja? 2) Jesusan urunakapanjja, ¿mä talento qollqejj qawqhänsa?

⁴ (Mateo 25:14-30 liytʼañataki.) Bibliat apstʼat qellqatanakasanjja, walja maranakaw akham qhanañchasjje: ‘Qollqe katoqerinakat uñachtʼäwinjja, uywirejj Jesusawa, ukat 33 marana alajjpachar sarjjäna ukhaw yaqha markarus sarkaspa ukhamänjja’ sasa. Qollqe katoqerinakat janïr parlkasinjja yaqha uñachtʼäwitwa Jesusajj parläna. Ukan jupa pachpat akham sänwa: ‘Jaya markaruw reyit uttʼayatäñajatakejj sarañaja’ sasa (Luc. 19:12). * Jesusajja alajjpachar makatasajj janiw ukspach reyit uttʼayatäkänti, jan ukasti ‘Diosan kupëjjaparuw qontʼasïna’, ukatsti 1914 marakamaw ‘taqe uñisirinakapajj kayupar uchatäñapkama’ suyaskäna (Heb. 10:12, 13).

⁵ Qollqe katoqerinaka uñachtʼäwinjja, ‘uywirejj kimsaqallq waranqa qollqenïnwa’ sasaw Jesusajj säna, uka tiempotakejja ukajj walja qollqënwa. * Uywirejja, janïr yaqha markar sarkasajj uywatanakaparuw negociapjjañapatak qollq lakirawayäna. Uka kimsaqallqo waranqa qollqejj uka jaqetakejj wali wakiskirïnwa. Jesusatakejja, janïr alajjpachar sarkasajj Diosan arunakapat yatiyañajj ukham wali wakiskirirakïnwa.

6, 7. Uñachtʼäwinjja, ¿qollqejj kunampi sasisa?

⁶ Diosan arunakapat parlañaw Jesusatakejj wali wakiskirïnjja, ukhamatwa waljanejj jupan arkiripar tukupjjäna (Lucas 4:43 liytʼañataki). Ukampis walja lurañanakajj utjaskakïnwa, uk Jesusajj sumwa yatïna, ukatwa arkirinakapar akham säna: “Uñtapjjam, yapunakajj niyaw poqoratäjje” sasa (Juan 4:35-38). ¿Kuna toqetsa Jesusajj parlaskäna? Tiempompejja cheqa chuymani walja jaqenakaw kayup arkapjjañapäna, uka toqetwa parlaskäna. Kunjamtï mä yapuchirejj yapupan apthapiñ horasäjjatap uñjasajj jan ukhamak jaytkejja, ukhamarakiw Jesusajj jaqenakar jan ukhamak jaytkänti.  Ukatwa alajjpachar janïr sarkasajj arkirinakapar akham säna: “Jaqenakar yatiyir sarapjjam nayar arkir tukuyapjjam” sasa (Mat. 28:18-19). Jesusan arkirinakapajj Diosan arunakapwa jaqenakar yatiyapjjañapäna, ukajj wali wakiskir churäwïnwa (2 Cor. 4:7).

⁷ ¿Kunsa ukanakajj amuytʼayistu? Kunjamtï uywirejj uywatanakapar qollqe jaytawaykänjja, ukhamarakiw Jesusajj arkirinakapar Diosan arunakap yatiyapjjañapatak jaytawayi (Mat. 25:14). Ukhamajja, qollqejj jaqenakar yatiyañampi, Jesusan arkiripar tukuyañampi sasiwa.

8. ¿Uywatanakapan kun lurapjjañapsa uywirejj munäna?

⁸ Uywirejj kimsa uywatanïnwa. Maynirusti phesqa waranq qollqe churäna, maynirusti pä waranqa, maynirusti mä waranqaraki (Mat. 25:15). Janis taqpachanejj igual qollqe katoqapkchïnjja, kimspachan uka qollqemp negociapjjaspa ukwa uywirejj munäna, ukatakejj wal irnaqapjjañapäna. ¿Kunsa ukajj sañ munpacha? Jesusan arkirinakapajj taqe chuymaw yatiyapjjañapäna (Mat. 22:37; Col. 3:23). Jesucriston arkirinakapajja, Pentecostés 33 maranwa uka qollqempejj negociañ qalltapjjäna. ¿Jupanakajj taqe chuymati yatiyapjjpachäna, ukat Jesusan arkiripäpjjañapatakit jaqenakar yanaptʼapjjpachäna? Jïsa, ukhamwa lurapjjäna. Hechos librow uk uñachtʼayi (Hech. 6:7; 12:24; 19:20). *

9. 1) ¿Kunsa pä uywatanakajj qollqemp lurapjjäna, ukat kunsa yateqsna? 2) ‘Yaqha uwijanakajja’, ¿kunsa lurapjjañaparaki?

⁹ Aka qhepa urunakan 1919 marat aksarojja, ajllit cristianonakajj uywirin qollqepampiw negocio lurasipki. Kunjamatï qollqe katoqerinak uñachtʼäwin pä uywatanakajj jan jayrasis irnaqapkänjja, ukhamarakiw ajllit cristianonakajj taqe jaqenakar yatiyañatak wal chʼamachasiwayapjje. Uñachtʼäwinjja, maynïr uywatajj phesqa waranqa qollqwa katoqäna, maynïristi pä waranqaraki. Ukampis ukajj janiw pä kasta ajllit cristianonakas utjkaspa ukham sañ munkiti, jan ukasti uywatanakajj wal irnaqtʼasajja, qollqe jiltayapjjañapänwa ukat uywirirojj mä ukhampwa kuttʼayapjjañapäna. Ukhamajja, ¿ajllit cristianonakakit Diosan arunakapat yatiyapjjañapa? Janiwa. Uwijanakampita cabritonakampita uñachtʼäwirjamajja, aka Oraqen wiñay jakañ suytʼäwinïpki ukanakajj jan jitheqtasaw ajllit cristianonakar yanaptʼapjjañapa. Jupanakatakejja ukham lurañajj wali askiwa. Cheqansa, alajjpachar sarañataki ajllit cristianonakasa, aka Oraqen jakañataki suytʼäwinïpki uka cristianonakasa ‘mä tamakiw’ Diosan arunakap yatiyapjje (Juan 10:16).

10. ¿Kunas qhepa urunakan jakatas uñachtʼayi?

¹⁰ Jesusajja, arkirinakapan taqe chuyma irnaqtʼapjjañapwa muni. Kunjamtï yatjjatawayktanjja, nayrïr patak maranakan jakir cristianonakajj taqe chuymaw Diosan arunakap yatiyapjjerïna, Jesusan arkiripar tukupjjañapatakis jaqenakar yanaptʼapjjänwa. Ukampis Jesusajj qollqe katoqerinakat parlasinjja, aka qhepa urunakatwa parlaskäna. Jichhürunakanjja, ¿Jesusan arkirinakapajj ukarjamat lurasipkpacha? Jïsa. Oraqpachanwa Diosan arunakapat yatiyasipki, janipuniw kunapachas ukhamajj yatiyasiwaykiti. Ukham jan qarjtas yatiyapjjatapatjja, walja jaqenakaw sapa mara bautisasipjje, ukatjja jupanakas Diosan arunakap yatiyapjjarakiwa. Ukaw qhepa urunakan jakatassa, Jesusan apnaqjjatapsa uñachtʼayistu. Cheqas ukham yatiyapjjatap uñjasajja, Jesusajj wali kusisitaw jikjjataspacha.

11. Jachʼa tʼaqhesïwi tiemponwa Jesusajj uywatanakapar cuenta mayini sasajja, ¿kunatsa sistanjja?

¹¹ Jesusajj jachʼa tʼaqhesïwi niya tukuyaruw  uywatanakapar cuenta mayir jutani. ¿Kunatsa ukham sistanjja? Mateo 24 ukat 25 jaljanakan jikjjataski uka profeciarjamajja, Jesusajj walja kutiw kuttʼaniñapata jan ukajj puriniñapat parläna. Mä kutejj akham sänwa: ‘Jachʼa tʼaqhesïwin juzgatäpkani ukhaw Jaqen Yoqaparojj qenayjjan jachʼa chʼamampi jutaskiri uñjapjjani’ sasa. Ukatjja, qhepa urunakan jakiri cristianonakan wakichtʼat suyapjjañapatakejja, aka arunakampiw Jesusajj ewjjtʼäna: “Janiw yatipktati kunürutejj Tatitojj jutkan ukjja” ukat “jaqen Yoqapasti jan amtat horasaruw jutani” sasa (Mat. 24:30, 42, 44). Ukatsti sarakïnwa: ‘Patronajj jaypachatwa kuttʼanjjäna utaparojja, ukatsti servirinakapampirakiw jakthapiña qalltaraki’ sasa. Ukham sasajja, Jesusajj jupan kuttʼaniñapata, mä arunjja, jachʼa tʼaqhesïwi tukuyataru jaqenakar juzgañataki ukhamaraki Supayan apnaqat akapachar tʼunjañataki jutkani uka toqetwa parlaskäna (Mat. 25:19). *

12, 13. 1) ¿Uywirejj kamsis pä uywatarojja, ukat kunatsa? 2) ¿Kunapachas uywatanakajj qhepïr sello katoqapjjani? (“ Jiwjjasinwa cuenta churjjapjje” siski uka recuadro uñjjattʼäta.) 3) Uwijanakjam uñtʼatäpki ukanakajja ¿kunsa katoqapjjani?

¹² Qollqe katoqerinakat uñachtʼäwirjamajja, kunapachatï uywirejj kuttʼanjjäna ukhajja, phesqa waranqa ukhamaraki pä waranqa qollqe katoqer uywatanakajja, wal irnaqasin mä ukhampwa qollq jiltayapjjäna. Ukatwa uywirejj sapa maynir akham säna: “Walikiwa, jumajj wali suma servirïtawa. Jukʼäkis ukaru wali sum phoqhatamatjja nayajj jichhajj waljäkis ukarurakiw uchäma” sasa (Mat. 25:21, 23). Jesucristojj jaqenakar juzgañataki jutkani ukhajja, ¿kunas pasani?

¹³ Jachʼa tʼaqhesïwi niya qalltañampïkani ukhaw ajllitanakajj qhepïr sello katoqapjjani (Apo. 7:1-3). Ukatjja, janïr Armagedón qalltkipanwa jupanakajj alajjpachar apatäjjapjjani. Ukampis ajllitanakaru Diosan arunakap yatiyañ yanaptʼirinakarojj ¿kunas pasani? Jupanakajj uwijanakjam uñtʼatäjjapjjaniwa. Ukatsti Diosan Reinopampi apnaqataw aka Oraqen wiñayataki jakasipjjani (Mat. 25:34).

14, 15. ¿Ajllit cristianonakat waljanejja jan wali jayra uywataruw tukupjjani sañti Jesusajj munpachäna? Uk qhanañchtʼam.

¹⁴ Qhepïr uywatajja, negociañat sipansa oraqeruw qollqjja imantäna, janiw bancorus jiltañapatakejj uchkänti. Ukham jan wal luratapatjja, uywirejj “ñanqha jan wali serviri, jayrätawa” sasaw säna. Ukatjja qollq aparasin nayrïr uywataruw churäna. Ukjjarojja, ‘anqa chʼamakanakaruw jaqonuküna’ ukanwa uywatajj wararïna, laka chʼaksa tʼurusirakïna (Mat. 25:24-30; Luc. 19:22, 23).

¹⁵ Uñachtʼäwinjja Jesusajj mayni uywatarojj  sänwa: “Ñanqha jan wali serviri, jayrätawa” sasa. Ukham sasinjja, ¿kimsa ajllit cristianonakat mayniw uka jan wali uywatjamäni sañti munpachäna? Uk amuytʼañatakejja, kuna toqetsa Jesusajj parlaskäna uk uñjañäni. Amuyasiri cheqapa uywata uñachtʼäwit parlkasajja, mä jan wali uywatatwa parläna, uka uywatajj ‘mayni uywatanakaruwa’ jan walinak lurani sasaw säna. Ukampis ukham sasinjja, ¿jan wali uywataw utjani sañti Jesusajj munpachäna? Janiwa. Jan ukasti uka jan wali uywatjam jan sarnaqapjjañapatakiw ewjjtʼaskäna. Tunka virgen tawaqonakat parlkasinsti, Jesusajj chikat ajllitanakaw phesqa jan amuytʼasir virgen tawaqonakjamäni ¿sañti munpachäna? Janiwa. Jan ukasti jan ikjas wakichtʼat suyapjjañapatakiw ewjjtʼaskäna. * Ukhamajja, Jesusajj qollqe katoqerinakat parlasinjja, ajllit cristianonakat waljanejj jan wali jayra uywataruw tukupjjani sasin janiw siskänti, jan ukasti ajllitanakarojj jan wali esclavjam jan sarnaqapjjañapataki ukat wal irnaqtʼapjjañapataki, mä arunjja, talento qollqemp negociapjjañapatakiw ewjjtʼaskäna (Mat. 25:16).

16. 1) ¿Kunsa qollqe katoqerinaka uñachtʼäwit yateqtanjja? 2) Uka uñachtʼäwit sumpach amuytʼañatakejja, ¿kunjamsa aka yatichäwejj yanaptʼawayistu? (“ Amuykañaw qhanañchasjje” siski uka recuadro uñjjattʼäta.)

¹⁶ Qollqe katoqerinaka uñachtʼäwitjja akanakwa yateqtanjja. Maya, Jesucristojja, ajllit cristianonakaruw mä wakiskir luräwi churawayi. Jupanakaw Diosan arunakap yatiyapjjañapäna, jaqenakarus Jesusan arkiripar tukuyapjjañapäna. Paya, Diosan arunakap taqe chuyma jan jayrasis taqenis yatiysna, ukwa Jesusajj muni. Ukhamajja, Diosan arunakap taqe chuyma yatiyapjjañäni, Jesusan ewjjanakaparus istʼapjjarakiñäni. Ukhamtï lurañänejja, jupajj bendicistaniwa (Mat. 25:21, 23, 34).