1, 2. Akoz Zezi ti donn sa parabol konsernan bann talan?

DAN sa parabol konsernan bann talan, Zezi ti fer son bann disip swazir konpran klerman sa lobligasyon ki zot ti annan. Nou bezwen konpran sinifikasyon sa parabol, parski i annan en lefe lo tou vre Kretyen ki swa zot annan sa lespwar pour al viv dan lesyel oubyen lo later.

² Zezi ti donn sa parabol konsernan bann talan ler i ti pe reponn son bann disip konsernan “siny ki pou endik [son] prezans ek konklizyon sa move lemonn.” (Mat. 24:3, NW) Alor sa parabol i ganny akonplir dan nou letan e i form parti sa siny ki Zezi i la e i pe rennyen konman Lerwa.

3. Ki leson nou tire atraver sa bann parabol dan Matye sapit 24 ek 25?

³ Sa parabol konsernan bann talan i enn parmi sa kat parabol ki dan Matye 24:45 ziska 25:46. Sa trwa lezot parabol, setadir lesklav fidel e pridan, dis zenn fiy ek mouton ek kabri i osi form parti larepons Zezi konsernan siny son prezans. Dan tou le kat parabol, Zezi ti pe koz lo bann kalite ki ti pou disteng son bann vre adorater dan bann dernyen zour. Sa parabol konsernan lesklav, zenn fiy ek talan ti pe  ganny dir avek son bann disip swazir. Dan sa parabol lesklav fidel, Zezi pe fer resorti ki sa pti group Kretyen swazir ki’n ganny konfye pour donn manze lezot serviter pandan bann dernyen zour i bezwen fidel e pridan. Dan sa parabol bann zenn fiy, Zezi pe montre ki i enportan ki tou son bann disip swazir i prepare e vizilan, vi ki zot konnen ki Zezi pe vini me zot pa konn ni zour ni ler. Dan parabol konsernan bann talan Zezi pe montre ki bann Kretyen swazir i bezwen travay dir pour desarz zot responsabilite konman Kretyen. Zezi i adres sa dernyen parabol konsernan mouton ek kabri avek bann ki pou viv lo later. I met lanfaz ki zot ti pou bezwen fidel e donn tou zot sipor bann frer swazir Zezi lo later. * Aprezan annou konsantre lo sa parabol konsernan bann talan.

4, 5. Ki sa zonm oubyen sa met i reprezante e ki valer en talan i annan?

⁴ Lir Matye 25:14-30. Depi byen lontan nou bann piblikasyon in eksplike ki sa zonm oubyen sa met dan sa parabol i Zezi e i ti al dan en lot pei kan i ti mont dan lesyel lannen 33 N.L. Dan en parabol avan sa, Zezi ti dir i pe al dan en lot pei “pour li ganny kouronnen konman lerwa.” (Lik 19:12) Zezi pa ti vin Lerwa dek ki i ti remont dan lesyel. * O kontrer, i’n “asiz . . . dan kote drwat Bondye . . . e la aprezan i pe espere ki Bondye i fer son bann lennmi vin son marspye.”—Ebr. 10:12, 13.

⁵ Sa zonm dan sa parabol ti annan wit talan ki ti vo en ta larzan sa letan. * Avan ki i ti vwayaze pour al dan en lot pei, i ti distribye bann talan parmi son bann serviter e ekspekte ki zot fer komers avek ler i ale. Parey sa zonm, Zezi ti annan en keksoz ki ti annan en gran valer avan i al dan lesyel. Kwa sa? Larepons i annan pour fer avek sa travay ki i ti fer ler i ti lo later.

6, 7. Ki sa bann talan i reprezante?

⁶ Pour Zezi, son travay predikasyon ek lansennyman ti vreman enportan. (Lir Lik 4:43.) Bokou dimoun ti vin son disip par sa travay. Me i ti konnen ki i ti ankor annan bokou travay pour fer e ki plis dimoun ti pou aksepte sa bon nouvel. Pli boner i ti dir son bann disip: “Lev lizye e get byen bann plantasyon, bann lagrenn in mir e in pare pour larekolt.” (Zan 4: 35-38) I ti pe mazin sa rasanbleman bann ki annan en leker senser ki ti pou vin son bann disip. Parey en bon fermye, Zezi pa ti pou zis kit an plan en plantasyon ki’n pare pour rekolte. Alor, pa bokou letan apre ki i ti resisite e avan ki i ti mont dan lesyel i ti donn son bann disip sa gro responsabilite: “Ale e fer tou pep vin mon bann disip.” (Mat. 28:18-20) Zezi ti konfye zot avek en trezor, sa responsabilite pour prese.—2 Kor. 4:7.

⁷ Ki konklizyon nou tonm lo la? Kan Zezi ti donn son bann disip sa responsabilite pour fer lezot disip, anfet i ti pe  “met zot ansarz son propriyete,” setadir son bann talan. (Mat. 25:14) Andotmo, sa bann talan pe refer avek sa responsabilite pour prese e fer disip.

8. Ki sa met ti ekspekte avek sak son bann serviter menm si zot pa ti ganny menm kantite talan?

⁸ Dan sa parabol konsernan bann talan sa met ti donn enn son serviter senk talan, en lot de e en trwazyenm en sel. (Mat. 25:15) Menm si sak serviter pa ti ganny menm kantite talan, sa met ti ekspekte ki zot tou zot fer zot mye pour fer plis larzan pour li. Pareyman, Zezi ti ekspekte ki son bann disip swazir i fer zot mye dan predikasyon dapre zot abilite. (Mat. 22:37; Kol. 3:23) Dan premye syek, apartir Lapannkot 33 N.L., bann disip Kris ti konmans fer komers avek bann talan. Nou vwar sa dan Labib dan liv Akt kot i dekrir zot devouman pour prese e fer disip. *—Akt 6:7; 12:24; 19:20.

9. (a) Ki sa de serviter fidel ti fer avek zot talan e ki sa i montre? (b) Ki rol bann ki annan sa lespwar pour viv lo later i zwe?

⁹ Pandan letan lafen, espesyalman apartir 1919 an montan, bann lesklav  swazir Kris ki fidel ti konmans fer komers avek bann talan sa Met. Parey sa de premye serviter, bann frer ek ser swazir in fer zot mye avek sa ki zot annan. I napa okenn rezon pour esey rode lekel ki ti ganny senk talan e lekel ki ti ganny de. Dan sa parabol, tou le de serviter ti double sa ki zot met ti’n donn zot, alor, tou le de ti’n montre menm devouman. Me ki rol bann ki annan sa lespwar pour viv lo later i zwe? En rol ki annan en gran lenportans. Parabol Zezi lo mouton ek kabri i ansenny nou ki bann ki annan sa lespwar pour viv lo later i annan sa privilez pour siport bann frer swazir Zezi dan sa travay pour prese e ansenny lezot. Pandan sa bann dernyen zour difisil, tou le de group i travay ansanm konman “en sel troupo” anmezir ki zot partisip dan sa travay fer disip avek devouman.—Zan 10:16.

10. Kwa ki en laspe enportan dan siny prezans Zezi?

¹⁰ Sa Met i annan rezon ekspekte ki i annan rezilta. Parey nou’n mansyonnen avan, son bann disip fidel dan premye syek ti sertennman ogmant son propriyete, setadir bann talan. Me ki nou pou dir ozordi konsernan sa parabol bann talan ki pe ganny akonplir dan letan lafen? Bann serviter Zezi ki fidel in travay dir e zot in fer sa pli gran travay predikasyon dan listwar. Atraver sa zefor ki tou bann disip Zezi pe fer, plizyer milye dimoun i batize sak lannen e sa i fer ki sa travay predikasyon ek lansennyman i en laspe enportan dan siny prezans Zezi konman Lerwa. San dout, zot Met i bezwen byen kontan!

11. Akoz nou tonm lo sa konklizyon ki Zezi pou regle son kont pandan gran ladetres?

¹¹ Zezi pou vin regle son kont avek son bann serviter ver lafen gran ladetres ki pros pour arive. Kwa ki fer nou tonm lo sa konklizyon? Dan profesi Zezi dan Matye sapit 24 ek 25 i koz lo son larive plizyer fwa. I ti dir ki dimoun “pou war Fis-de-Lonm vini lo nyaz dan lesyel.” Sa i refer avek sa letan pandan gran ladetres kot Zezi pou egzekit zizman  lo tou dimoun. I ti osi ankouraz son bann disip ki viv dan bann dernyen zour pour reste vizilan. I ti dir ki “zot pa konnen ki zour zot Senyer pou arive” e ki “Fis-de-Lonm pou vini ler ki zot pa pe ekspekte li.” (Mat. 24:30, 42, 44) Alor, ler Zezi ti dir ki “met sa bann serviter ti retournen e regle son kont avek zot,” i fer sans ki i ti pe refer avek sa letan ler i pou egzekit zizman a lafen sa move lemonn. *—Mat. 25:19, nou ki’n met an italik.

12, 13. (a) Ki mannyer sa met i reakte anver de parmi sa trwa serviter e akoz? (b) Kan ki bann Kretyen swazir i resevwar zot dernyen sele? (Vwar bwat “ Rann kont ler zot mor.”) (c) Ki rekonpans bann dimoun ki ganny zize konman mouton pou gannyen?

¹² Dapre sa parabol, ler sa met ti retournen, i ti vwar ki de parmi sa trwa serviter ti’n reste fidel, sa enn ki ti’n ganny senk talan ti ganny senk an plis e sa enn ki ti’n ganny de talan ti ganny de an plis. Sa met ti dir menm keksoz avek sa de serviter: “Ou’n byen fer. Ou en serviter bon e fidel! Ou’n fer byen avek en pti sonm alor mon pou met ou ansarz en pli gran sonm.” (Mat. 25:21, 23) Alor ki nou ekspekte i kapab arive ler Zezi sa Met i vini pour egzekit zizman a lavenir?

¹³ Son bann disip swazir ki byen devoue dan zot travay e ki ganny reprezante par de parmi sa trwa serviter, pou’n fini resevwar zot dernyen sele avan gran ladetres i konmanse. (Rev. 7:1-3) Avan Armagedon, Zezi pou donn zot zot rekonpans dan lesyel. Bann dimoun ki annan sa lespwar pour viv lo later, ki’n siport bann frer Kris dan travay predikasyon, pou’n fini ganny zize konman mouton e pou ganny sa privilez pour viv lo later anba dominasyon Rwayonm Bondye.—Mat. 25:34.

14, 15. Eski Zezi ti pe dir ki en kantite parmi son bann frer swazir ti pou vin move e pares? Eksplike.

¹⁴ Dan sa parabol en serviter ti al fouy en trou e kasyet son talan olye fer komers avek oubyen met dan labank. Sa serviter ti demontre en move leta lespri akoz i ti fer ekspre pour ki son met pa ganny plis larzan. Sa met ti annan rezon dir avek sa serviter ki i “move e pares.” I ti pran sa talan avek li e donn sa enn ki ti annan dis. Sa move serviter ti ganny zet “deor dan fernwanr; la [i ti] pou annan depler ek grensman ledan.”—Mat. 25:24-30; Lik 19:22, 23.

¹⁵ Enn parmi sa trwa serviter ti al kasyet son talan, alor eski Zezi ti pe dir ki en tyer son bann disip swazir ti pou  move e pares? Non. Annou egzamin konteks sa verse. Dan parabol lesklav fidel e pridan, Zezi ti koz konsernan en move lesklav ki ti bat lezot lesklav. Zezi pa ti pe dir ki serten parmi sa lesklav fidel e pridan ti pou vin move. O kontrer, i ti pe averti sa lesklav fidel pou pa devlop menm tre ki sa move serviter. Pareyman, dan sa parabol dis zenn fiy, Zezi pa ti pe dir ki lanmwatye son bann disip fidel ti pou parey sa senk zenn fiy fol. O kontrer, i ti pe averti son bann frer spirityel konsernan sa ki ti pou arive si zot pa ti’n prepare e zot pa ti vizilan. * Dapre konteks, i paret rezonnab pour dir ki dan sa parabol konsernan bann talan, Zezi pa ti pe dir ki en kantite son bann frer swazir ti pou vin move e pares pandan bann dernyen zour. O kontrer, Zezi ti pe averti son bann disip swazir konsernan sa nesesite pour kontinyen travay dir pour “fer komers” avek zot talan e evite annan menm latitid e azir parey en move serviter.—Mat. 25:16.

16. (a) Ki leson nou aprann atraver sa parabol konsernan bann talan? (b) Ki mannyer sa lartik in ed nou konpran sa parabol konsernan bann talan? (Vwar sa bwat “ Konpran sa parabol konsernan bann talan.”)

¹⁶ Ki sa de leson nou aprann atraver sa parabol konsernan bann talan? Premyerman, sa Met, Kris in konfye en keksoz ki i konsider konman enportan avek son bann disip swazir, sa i sa responsabilite pour prese e fer disip. Dezyenmman, Kris i ekspekte ki nou tou nou travay dir dan predikasyon. Si nou fer sa, nou kapab asire ki sa Met pou rekonpans nou pour nou lafwa, vizilans ek fidelite.—Mat. 25:21, 23, 34.