1, 2. Na cava e talanoataka kina o Jisu na vosa vakatautauvata me baleta na taledi?

ENA vosa vakatautauvata me baleta na taledi, e vakamatatataka o Jisu na itavi era lesi kina na nona imuri lumuti. Bibi meda kila na kena ibalebale ni na yaga vei keda kece na lotu vaKarisito dina, e noda inuinui na bula i lomalagi se vuravura.

² E talanoataka o Jisu na vosa vakatautauvata me baleta na taledi me saumi kina na nodratou taro na nona tisaipeli me baleta na ‘ivakatakilakila e dusia ni sa tiko kei na ivakataotioti ni veika vakavuravura.’ (Maciu 24:3) E vakayacori na vosa vakatautauvata qori ena noda gauna, e tiki tale ga ni ivakatakilakila ni sa tiko o Jisu qai veiliutaki tiko vakatui.

3. Na cava eda vulica ena vosa vakatautauvata e volai ena Maciu wase 24 kei na 25?

³ Na vosa vakatautauvata ni taledi e okati ena va na vosa vakatautauvata e volai ena Maciu 24:45 ina 25:46. Na tolu tale na vosa vakatautauvata me baleta na dauveiqaravi yalodina e vuku, na tini na goneyalewa, na sipi kei na me, e okati ena isaunitaro i Jisu me baleta na ivakatakilakila ni nona tiko. Ena va  na vosa vakatautauvata qori, e vakaraitaka o Jisu na itovo era na kilai tani kina na nona imuri dina ena iotioti ni veisiga qo. Na vosa vakatautauvata me baleta na dauveiqaravi, ratou na goneyalewa, kei na taledi e vagolei vei ira na nona imuri lumuti. Ena vosa vakatautauvata me baleta na dauveiqaravi yalodina, e vakabibitaka o Jisu me yalodina me vuku na ilawalawa lailai ni dauveiqaravi lumuti e lesi me vakania na lewenivuvale ena iotioti ni veisiga. Ena vosa vakatautauvata me baleti ratou na goneyalewa, e vakabibitaka o Jisu ni vinakati mera vakarau tu na nona lumuti yalodina kece, mera yadrayadravaki tale ga. Era kila ni sa lako tiko mai o Jisu, ia era sega ni kila na siga kei na aua. Ena vosa vakatautauvata ni taledi, e vakaraitaka o Jisu ni bibi mera gugumatua na lumuti nira qarava tiko nodra itavi vaKarisito. Na iotioti ni vosa vakatautauvata me baleta na sipi kei na me e baleti ira na nuitaka na bula e vuravura. E tukuna ni bibi mera yalodina ra qai tokoni ira na imuri lumuti i Jisu e vuravura. * Meda veivosakitaka mada na vosa vakatautauvata me baleta na taledi.

4, 5. O cei na turaga ena vosa vakatautauvata? E vakacava na levu ni dua na taledi?

⁴ Wilika Maciu 25:14-30. E dau vakamacalataka na noda ivola ni dusi Jisu na turaga ena vosa vakatautauvata qo, e lako i vanuatani ni gole i lomalagi ena 33 G.V. Ena dua na vosa vakatautauvata e cavuta e liu, e vakaraitaka o Jisu na inaki ni nona gole i vanuatani, oya me “lai vakadeitaka nona itutu vakatui.” (Luke 19:12) E sega ni soli kece vei Jisu na veiliutaki vakatui ni lesu i lomalagi. * Ia e “dabe ena ligaimatau ni Kalou me waraka tiko mai na gauna ya mera vakamalumalumutaki mada na kena meca mera itutu ni yavana.”—Iper. 10:12, 13.

⁵ Na turaga ena vosa vakatautauvata qo e taukena e walu na taledi, na iyau levu ena gauna ya. * E wasea na taledi vei ratou na nona dauveiqaravi ni bera ni gole i vanuatani, e namaka me ratou cakacakataka. Me vakataki koya na turaga qori, e taukena o Jisu e dua na iyau levu ni bera ni gole i lomalagi. Na iyau cava qori? Na kena isau e laurai ena ka e cakava ena nona bula.

6, 7. Na cava e dusia na taledi?

⁶ E vakabibitaka o Jisu na cakacaka vakavunau kei na veivakavulici. (Wilika Luke 4:43.) E levu era mai nona tisaipeli ena vuku ni nona cakacaka vakavunau. E tukuna ena dua na gauna e liu vei ratou na nona tisaipeli: “Dou tacake mo dou raica na were, ni sa matua vinaka tu me tamusuki.” (Joni 4:35-38) E vakasamataka tiko o koya na nodra kumuni mai e levu na yalomalumalumu mera mai nona tisaipeli. Me vaka ga e dua na dauteitei maqosa, e sega ni vakawalena na were sa matua tu me tamusuki. Ni oti ga nona vakaturi ni bera ni lako i lomalagi, e lesia e dua na itavi bibi vei ratou nona tisaipeli: ‘Ni lako moni veivakavulici.’  (Maciu 28:18-20) E tataunaka gona o Jisu vei ira e dua na iyau talei, na cakacaka vakaitalatala.—2 Kor. 4:7.

⁷ Na cava gona eda rawa ni kaya? Ni lesi ratou nona imuri ena itavi mera veivakatisaipelitaki, sa tataunaka sara tiko ga vei ratou o Jisu na “nona iyau,” oya na taledi. (Maciu 25:14) Kena ibalebale ni taledi e dusia na itavi ni vunau kei na veivakatisaipelitaki.

8. Na cava e namaka na turaga vei ratou na dauveiqaravi e duidui na iwiliwili ni taledi e soli vei ratou?

⁸ Ena vosa vakatautauvata, e solia na turaga e lima na taledi vua na imatai ni dauveiqaravi, e solia e rua vua na kena ikarua, e solia e dua vua na kena ikatolu. (Maciu 25:15) E duidui na iwiliwili ni taledi e soli vei ratou na dauveiqaravi, ia e namaka na turaga me ratou cakacakataka kece na taledi. Ena sala vata ga qori, e namaka o Jisu mera gugumatua ena cakacaka vakaitalatala na nona imuri lumuti. (Maciu 22:37; Kolo. 3:23) Ena imatai ni senitiuri, era cakacakataka na taledi na imuri i Karisito me tekivu ena Penitiko 33 G.V. E volaitukutukutaki ena ivola na Cakacaka na nodra gumatua ena vunau kei na veivakatisaipelitaki. *—Caka. 6:7; 12:24; 19:20.

9. (a) Na cava erau cakava na rua na dauveiqaravi ena taledi e soli vei rau, na cava e dusia qori? (b) Na cava na nodra itavi na ‘so tale na sipi’?

⁹ Ena gauna ni ivakataotioti, vakauasivi ni tekivu ena 1919, era cakacakataka na taledi ni Turaga na imuri lumuti yalodina e vuravura. Me vakataki rau na imatai ni rua na dauveiqaravi, era gumatua na mataveitacini lumuti ena cakacaka vakavunau. E sega ni bibi me kilai o cei e soli vua e lima na taledi kei koya e soli vua e rua na taledi. Ena vosa vakatautauvata, erau vakaruataka na dauveiqaravi na ka e soli vei rau, e dusia ni rau gugumatua ruarua. Na cava na nodra itavi na nuitaka na bula e vuravura? E dua na itavi bibi! Na vosa vakatautauvata i Jisu me baleta na sipi kei na me e dusia ni o ira na nuitaka na bula e vuravura era raica me itavi dokai na nodra tokoni ira na imuri lumuti i Jisu ena vunau kei na veivakavulici. Ena iotioti ni veisiga qo, e cakacaka vata na rua na ilawalawa qo me “dua ga na qelenisipi,” rau gumatua ena veivakatisaipelitaki.—Joni 10:16.

10. Na cava e dua na ka vakasakiti me baleta na ivakatakilakila ni nona tiko o Jisu?

¹⁰ E namaka na Turaga na tubu. Me vaka sa tukuni oti mai, era vakalevutaka na nona imuri ena imatai ni senitiuri na ka e taukena. Vakacava na gauna ni ivakataotioti ni vakayacori kina na vosa vakatautauvata qo? Era vakaitavi na imuri i Jisu ena cakacaka levu duadua ni vunau kei na veivakatisaipelitaki ena itukutuku ni veigauna. Na nodra cakacaka vata e laurai kina na tubu e veiyabaki nira mai tisaipeli e vica vata na drau na udolu. Qo e dua na ivakatakilakila vakasakiti ni nona tiko o Jisu me veiliutaki vakatui. E sega ni vakabekataki ni marau na Turaga!

11. Na cava eda kaya kina ni na mai raica o Jisu ena veivakararawataki levu na taledi a tataunaka?

¹¹ Ena icavacava ni veivakararawataki levu sa tu qo e matada, ena lako mai o Jisu me raica na taledi a tataunaka vei ira na nona dauveiqaravi. Eda kila vakacava? Ena nona parofisai ena Maciu wase 24 kei na 25, e cavuta kina vakavica o Jisu na nona lako mai. E tukuna me baleta na lewa  e tau ena veivakararawataki levu nira na ‘raica na Luve ni tamata ni lako mai ena o kei lomalagi.’ E uqeti ira nona imuri ena iotioti ni veisiga mera yadrayadravaki, e kaya: “Dou sega ni kila na siga ena lako mai kina nomudou Turaga” kei na “dou sega ni kila na aua ena lako mai kina na Luve ni tamata.” (Maciu 24:30, 42, 44) O koya gona ni tukuna o Jisu ni “suka mai na nodratou turaga me mai raici iratou me baleta nona taledi a tataunaka vei iratou,” e dusia tiko na gauna ena lako mai kina me tauca na lewa ena icavacava ni tuvaki qo. *—Maciu 25:19.

12, 13. (a) Na cava e kaya na turaga vei rau na dauveiqaravi, na vuna? (b) Gauna cava era na dregati kina ena iotioti ni gauna na lumuti? (Raica na kato “Lewai ena Gauna e Mate Kina.”) (c) Na cava na nodra icovi o ira na digitaki mera sipi?

¹² Ena vosa vakatautauvata, ni lako mai na turaga e raica ni rawata tale e lima na taledi na dauveiqaravi e soli vua e lima kei koya e soli vua e rua na taledi e rawata tale e rua. E kaya na turaga vei rau na dauveiqaravi: “Vinaka vakalevu. O iko na dauveiqaravi vinaka o qai yalodina! O a dina ena ka lailai. Au na lesia mo lewa e levu tale na ka.” (Maciu 25:21, 23) Na cava ena cakava na Turaga, o Jisu, ni mai vakataulewa ena gauna se bera mai?

¹³ O rau na dauveiqaravi e dusi ira na nona tisaipeli lumuti gugumatua, era na dregati ena iotioti ni gauna ni bera ni tekivu na veivakararawataki levu. (Vkta. 7:1-3) Ni bera na Amaketoni, ena solia o Jisu nodra icovi ni bula i lomalagi. O ira na nuitaka na bula e vuravura, era tokoni ira na taci Karisito ena cakacaka vakavunau era sa digitaki mera sipi ra qai vakaicovitaki mera bula e vuravura ena ruku ni veiliutaki ni Matanitu ni Kalou.—Maciu 25:34.

14, 15. E tukuna tiko o Jisu ni na ca qai vucesa e dua na iwiliwili levu ni tacina lumuti? Vakamacalataka.

¹⁴ Na ikatolu ni dauveiqaravi ena vosa vakatautauvata e buluta na nona taledi, e sega ni cakacakataka se vakacuruma ena baqe. E yalo ca na dauveiqaravi qo ni nakita me saqata na nona turaga. Sa rauta me vakatokai koya na turaga me ‘dauveiqaravi ca qai vucesa.’ E kauta tani vua na nona turaga na taledi qai solia vei koya e tini nona taledi. E kolotaki na dauveiqaravi ca ina “butobuto e tautuba. Oya na vanua ena lai tagi qai katibati kina.”—Maciu 25:24-30; Luke 19:22, 23.

¹⁵ E dua vei ratou na dauveiqaravi e buluta na nona taledi. Vakacava, e tukuna tiko o Jisu ni dua na iwase ni nona imuri lumuti era na ca ra qai vucesa? Sega. Vakasamataka mada na veitikina wavolita. Ena vosa vakatautauvata ni dauveiqaravi yalodina e vuku, e vakamacalataka o Jisu  na dauveiqaravi ca kei na nona mokuti ira nona itokani dauveiqaravi. E sega ni tukuna tiko o Jisu ni na basika e dua na ilawalawa dauveiqaravi ca. A vakasalataki koya tiko ga na dauveiqaravi yalodina me kua ni vakaraitaka na itovo ni dauveiqaravi ca. E tautauvata tale ga ena vosa vakatautauvata ni tini na goneyalewa, e sega ni tukuna tiko o Jisu ni veimama nona imuri yalodina era na vakataki ratou na lima na goneyalewa lialia. Ia e vakasalataki ira na tacina vakayalo ena ka e rawa ni yaco ke ra sega ni yadrayadravaki qai sega ni vakavakarau. * O koya gona ena vosa vakatautauvata ni taledi, e sega ni tukuna tiko o Jisu nira na ca qai vucesa e dua na iwiliwili levu ni tacina lumuti ena iotioti ni veisiga. E vakasalataki ira tiko ga na nona imuri lumuti ni bibi na yadrayadravaki, oya mera “cakacakataka” na nodra taledi. Mera kua ni vakaraitaka na itovo kei na ivalavala ni dauveiqaravi ca.—Maciu 25:16

16. (a) Na cava eda vulica ena vosa vakatautauvata ni taledi? (b) E yaga vakacava na ulutaga qo ena noda kila vinaka na vosa vakatautauvata ni taledi? (Raica na kato “Kilai na Vosa Vakatautauvata ni Taledi.”)

¹⁶ Na cava e rua na ka eda vulica ena vosa vakatautauvata ni taledi? iMatai, e tataunaka na Turaga, o Karisito, e dua na ka vakamareqeti vei ira nona dauveiqaravi lumuti, oya na kena vunautaki na itukutuku vinaka kei na veivakatisaipelitaki. iKarua, e namaka o Karisito meda guta kece na cakacaka vakavunau. Nida cakava qori, eda kila deivaki ni na vakaicovitaka na noda vakabauta, noda yadrayadravaki, kei na noda yalodina.—Maciu 25:21, 23, 34.