1, 2. Bukin tera ngkai e taekina Iesu te kaikonaki ae te tarena?

E KAOTAKI raoi n te kaikonaki ae te tarena taekan Iesu ngke e mwiokoia taan rimwina aika kabiraki. Ti riai n ota n nanon te kaikonaki aei ibukina bwa a irekereke iai Kristian ni koaua ake a kantaningaa kaniwangaia ae te nako karawa ke i aon te aba.

² E taekina Iesu te kaikonaki ae te tarena bwa iteran raoi kaekaan aia titiraki taan rimwina ibukin “te kanikina bwa [e] a oki ma n tiku, ao kanikinaean tain tokin te waaki ae ngkai i aon te aba.” (Mat. 24:3) Ngaia are, e na boni kakoroaki bukin te kaikonaki aei n ara bong aikai ao bon iteran naba kanikinaean ae e a mena Iesu i rarikia aomata ao n tautaeka bwa te Uea.

3. Baikara reirei aika reiakinaki man te kaikonaki ae ni Mataio mwakoro 24 ao 25?

³ Te kaikonaki ae te tarena bon teuana mai buakoni kabotau ake aua aika ni Mataio 24:45 nakon 25:46. Ake tenua riki bon iteran naba ana kaeka Iesu ibukini kanikinaean okina ma tikuna ae taekan te toro ae kakaonimaki, ataeinnaine aika tengaun ao tiibu ma kooti. E katuruturua Iesu ni kaikonaki aika  aua aikai aroaroia aika kaokoro taan rimwina ni koaua ni kabaneani boong. A a kaineti raoi kaikonaki ae taekan te toro, ataeinnaine ao te tarena nakoia taani kabiraki. E kairekerekea te kaikonaki aei Iesu ma te toro ae kakaonimaki are e a katuruturua iai kainnanoan te kurubu ae uarereke, ake a mwiokoaki bwa a na kakaamwarakeia ana tabonibai ni kabaneani boong bwa a riai ni kakaonimaki ma ni wanawana. E katereterea Iesu n te kaikonaki ae taekaia ataeinnaine, bwa a riai n tauraoi ao n taratara raoi taani kabiraki ni kabane, n ataan ae e na bon roko ma a aki ataa te bong ma te aoa arei. N te kaikonaki ae te tarena, ao e kaotia iai Iesu bwa a kainnanoaki taani kabiraki bwa a na tataningamarau ni mwiokoaia ni Kristian. E kaineta raoi te kabanea ni kaikonaki Iesu ae taekaia tiibu ma kooti nakoia te koraki aika kantaningaa te maiu i aon te aba. E katereterea naba bwa a riai ni kakaonimaki ni boutokaiia taani kabiraki i aon te aba. * Ti na katuuaa riki ngkai iangoan te kaikonaki ae te tarena.

4, 5. E tei ibukin antai te aomata ke te toka ao tera te tarena ni koaua?

⁴ Wareka Mataio 25:14-30. E kamatataaki raoi n ara boki taekan te kaikonaki ae te aomata ke te toka are tei ibukin Iesu are e nako n te aba teuana ngke e a rierake nako karawa n 33 C.E. N te kaikonaki are e moan taekinaki, e a kaota iai ana kantaninga Iesu ibukin nakona nakon te aba teuana “bwa e na karekea mwaakana n uea” iai. (Ruka 19:12) E aki waekoa ni karekea te mwaaka n Tautaeka Iesu ngke e okira karawa. * N oneani mwin anne, e “kume ni kantaningaa kaakiaia akana kairiribai nakoina, bwa nneni katokaani waena.”—Ebera 10:12, 13.

⁵ E taekinaki n te kaikonaki te aomata are karekea wanua ana tarena, ae te mwane ae rangi ni mwaiti ni boong akanne. * Imwain nakona, e a tibwaa te tarena nakoia ana toro ni kantaningaan are a na karikirakea ngkana e a nako. N aron te aomata anne, a a bati naba kaubwain Iesu aika kakawaki imwain rierakena nako karawa. Tera te bwai anne? E kaineti kaekaan anne ma ana mwakuri ni maiuna.

6, 7. E tei ibukin tera te tarena?

⁶ E rangi ni kakawaki iroun Iesu ana mwakuri n uarongorongo ao n angareirei. (Wareka Ruka 4:43.) E nanonaki iai bwa e a tia n ribanaa te tawaana bwa e na maiureirei. E a kaman tuangia taan rimwina ni kangai: “Kam na tabeki matami ao tarai tawaana, bwa a a tai ibukin te taiaki.” (Ioa. 4:35-38) E a kaman ataia naba bwa a na bobotaki aomata aika raoiroi nanoia aika a na riki bwa taan rimwina. E na bon aki kitana te tawaana Iesu are e a tai ibukin te taiaki n aron te tia ununiki ae raoiroi. Ngaia are, tabeua te tai imwini kautana ao imwain rierakena nako karawa, e a angania taan rimwina mwiokoaia ae kakawaki ni kangai: “Mangaia are naako, reireinia aomata . . . bwa a na riki  bwa taan rimwiu.” (Mat. 28:18-20) E bae n tia n onimakinia Iesu ibukin te mwakuri ni Kristian ae rangi ni kakawaki aei.—2 Kor. 4:7.

⁷ Tera ngkanne ae ti kona n taekinna? Ngke e baireiia taan rimwina Iesu bwa a na karekeia taan rimwina, ni koauana e boni mwiokoiia iai n “ana bwai” ae te tarena. (Mat. 25:14) Ni kakimototoana, e tei te tarena ibukin te uarongorongo ao karekeaia taan rimwini Kristo.

8. E ngae ngke a kakaokoro mwaitin te tarena are a reke irouia tooro, ma tera ae kantaningaia te toka mairouia?

⁸ E kaotaki n te kaikonaki aei bwa e anga te toka nakon ana toro temanna nimaua te tarena, te kauoman uoua ao te kateniman tii teuana. (Mat. 25:15) E ngae ngke a kakaokoro mwaitin te tarena ae a karekea tooro ma titeboo te bae kantaningaia te toka mairouia ae a na kabanea korakoraia ni kabongana te tarena n aia mwakuri ni minita. (Mat. 22:37; IKoro. 3:23) A a moana karikirakean te tarena taan rimwini Kristo n te moan tienture mani Bentekota  33 C.E. A bane ni koreaki n te boki ae Mwakuri taekan aia mwakuri korakora ibukin te uarongorongo ao karekeaia taan rimwini Kristo. *— Mwa. 6:7; 12:24; 19:20.

9. (a) Tera ae a karaoia ma te tarena tooro ake uoman aika kakaonimaki, ao tera ae kaotaki iai? (b) Tera mwiokoaia “tiibu tabemwaang”?

⁹ I nanoni kabaneani boong ni moa man 1919, a a tia taani kabiraki aika kakaonimaki ni karikirakea ana tarena aia Toka i aon te aba. A a tia ni karaoa aia kabanea n tamaroa taari mwaane ao aine aika kabiraki ibukin te toka, n aroia tooro ake uoman. Ma e aki riai n iangoaki bwa antai ae karekea nimaua te tarena ao antai ae uoua. N te kaikonaki ao titeboo aroia tooro ake uoman bwa a karakaa te tarena are e angania aia toka. Tera mwiokoaia te koraki ake a kantaningaa te maiu i aon te aba? Bon te bwai ae kakawaki! N ana kaikonaki Iesu ae taekaia tiibu ma kooti, e a kaotia nakoira bwa te koraki ake a kantaningaa te maiu i aon te aba, a na kakabwaiaaki ibukini boutokaaia taani kabiraki n te uarongorongo ao n te angareirei. Ni boong aika karuanikai aikai, a a uaia ni mwakuri kurubu aika uoua aikai bwa “tii tenanaina” ni boutokaa karekeaia taan rimwini Kristo.—Ioa. 10:16.

10. Tera te kanikina ae rangi ni kakawaki ae kaotaki iai rokon Iesu?

¹⁰ E kantaningaia te toka bwa iai mwina ae raoiroi. N aron ae taekinaki mai imwaina, a karikirakeaki mwaitin ana bwai irouia ana abotoro aika kakaonimaki n te moan tienture. Ma tera ae na riki ngkana e a kakoroaki nanon te kaikonaki ae te tarena ni kabaneani boong? E a rikirake karaoan te uarongorongo ao karekeaia taan rimwini Kristo irouia ana toro aika kakaonimaki. E noraki mwina bwa iai bubua ma bubua tenga aika a katabui maiuia ni katoa ririki ao n uataboa te uarongorongo ao te angareirei ae te bwai ae kakawaki riki ibukini kanikinaean rokon Iesu ma mwaakana n Tautaeka. Akea te nanououa bwa e boni kukurei aia Toka!

11. Tera ae kairira bwa ti na ataia ae e na bon roko Iesu ni kaeta ana mwane n tain te rawawata ae korakora?

¹¹ E na oki Iesu ni kaeta ana mwane ma ana toro ngkana e a uakaan tokin te rawawata ae korakora ae imwaira. Ti kangaa n ataa anne? E kaokioka taekan rokona Iesu n ana taetae ni burabeti ni Mataio mwakoro  24 ao 25. E taekinna Iesu bwa aomata “a na nora Natin te aomata n roko i aon nangini karawa” ae taekan te motikitaeka n tain te rawawata ae korakora. E kaumakiia naba taan rimwina ni kabaneani boong bwa a na teimatoa n tantani ngke e kangai: “Kam aki ataa te bong are e na roko iai ami Uea” bwa “e na roko Natin te aomata n te aoa are kam taku bwa e na aki roko iai.” (Mat. 24:30, 42, 44) Mangaia are ngke e taekinna Iesu bwa ngkana “e a roko aia toka tooro akanne, ao e kaeta ana mwane ma ngaiia,” e nanona iai te tai are e nang roko ni motikitaeka n tokin te waaki ae ngkai i aon te aba. *—Mat. 25:19.

12, 13. (a) Tera ana taeka te toka nakoia ana toro ake uoman ao bukin tera? (b) N ningai te tai are e na roko iai n tokina kanikinaeaia taani kabiraki? (Nora te bwaoki ae  “A na Anga Taekan Aroia ni Mateia.”) (c) Tera kaniwangaia te koraki ake a motikaki taekaia bwa tiibu?

¹² N te kaikonaki aei, ngke e a oki te toka ao e a noriia ana toro ake uoman bwa a kakaonimaki ni katoboroa mwaitin ana tarena, teuare e anganaki nimaua ao teuare e anganaki uoua. Titeboo ana taeka te toka nakoia ana toro ni kauoman ngke e kangai: “E tamaroa am mwakuri, te toro ngkoe ae ko raoiroi ma ni kakaonimaki! Ko kakaonimaki ni kaineti ma au bwai tabeua, mangaia ae N na mwiokoiko i aoni baika bati riki.” (Mat. 25:21, 23) Tera ae ti kantaningaia bwa e na karaoia te toka are karineaki ae Iesu ngkana e a roko ni motikitaeka n te tai ae imwaira?

¹³ Imwaini moanakin te rawawata ae korakora ao e nang roko n tokina kanikinaeaia taani kabiraki aika mwakuri korakora ae te koraki ake a tei tooro ake uoman ibukia. (TeKao. 7:1-3) E na angania Iesu kaniwangaia are beritanna ae te maiu i karawa imwain Aremaketon. A a motikaki taekaia te koraki ake a boutokaiia tarini Kristo n uarongorongo bwa tiibu ae te koraki ake a na kantaningaa te maiu i aon te aba i aani mwaakan te Tautaeka n Uea.—Mat. 25:34.

14, 15. E koaua ae taekinna Iesu bwa a na bati taani kabiraki aika a na riki ni buakaka ma n taningaroti? Kabwarabwaraa.

¹⁴ E taekinaki n te kaikonaki bwa e tauna te tarena te toro are te kateniman, n oneani mwin are e na karikirakea ke ni karinna n te bangke. E kaota te aroaro ae buakaka te toro aei ibukina bwa e aki karaoa are tangiria te toka. E atongaki iroun te toka bwa e “buakaka ma n taningaroti.” E anaa te tarena mairouna te toka ao n angan are e a tia ni karekea tebwina. Imwina, e a tewenakoa te toro ae buakaka nakon “te roo are i tinaniku ike e na tang ma n tenai bukini mwangaina.”—Mat. 25:24-30; Ruka 19:22, 23.

¹⁵ E koaua ae taekinna Iesu bwa a na riki ni buakaka ma n taningaroti taani  kabiraki ae teuana te katenimwakoro mwaitiia, bwa e karabaa te tarena temanna ana toro te toka? E aki! Iangoa aei. N te kaikonaki ae taekan te toro ae kakaonimaki ma ni wanawana, e taekina iai Iesu taekan te toro ae buakaka are e oreia raona n toro. E aki taekinna Iesu bwa a na kaoti te koraki n toro aika buakaka. Ma e kauringa te toro ae kakaonimaki bwa e na aki arona aron te toro ae buakaka. Ai aron naba te kaikonaki ae taekaia ataeinnaine, e aki taekinna Iesu bwa a na riki n nanobaba iterani mwaitiia taani kabiraki n aroia ataeinnaine ake niman. Ma e kauringia tarina aika kabiraki taekan te bwai ae na riki ngkana a aki taratara raoi ao ni kaotia bwa a aki tauraoi. * N te kaongora aei, e taraa n eti taekinan te kaikonaki ae te tarena bwa e aki taekinna Iesu bwa a na bati tarina aika kabiraki ake a na riki ni buakaka ma n taningaroti ni kabaneani boong. Mangaia are iai bukina ngkai e kauringia taani kabiraki Iesu, bwa a riai ni mwakuri korakora “ni karikirakea” aia tarena ao n rarawa nakon aroaron ao ana mwakuri te toro ae buakaka.—Mat. 25:16.

16. (a) Baikara reireiara aika uoua man te kaikonaki ae te tarena? (b) E kangaa ni kaboouaki otara n te kaikonaki ae te tarena? (Nora te bwaoki “ Otara n te Kaikonaki ae te Tarena.”)

¹⁶ Baikara reirei aika uoua ake ti reiakini man te kaikonaki ae te tarena? Te moan, e a tia te Toka ae Kristo ni mwiokoiia ana toro aika kabiraki n te bwai ae kakawaki irouna ae te uarongorongo ao karekeia taan rimwina. Te kauoua, e kantaningaira Kristo bwa ti na tataningamarau n uarongorongo. Ni karaoan aei, ti aki nanokokoraki bwa e na boni karekea kaniwangara te Toka ibukin ara onimaki, ara taratara raoi ao ara kakaonimaki.—Mat. 25:21, 23, 34.