1, 2. Dahaka dainai Iesu ese talent parabolena ia herevalaia?

IESU ese talent parabolena ia herevalaia amo ena horoa tadikaka edia maduna ia hahedinaraia. Ita ese unai parabole ena anina ita lalopararalaia be namo, badina unai parabole be Keristani momokani ibounai—guba o tanobada maurina idia abia taudia—ia herevalaia.

² Iesu ese talent parabolena ia herevalaia amo ena hahediba tauna ta ena henanadai ia haerelaia. Iesu ia nanadaia, ia gwau: “Do oi noho negana bona inai nega oromana ena dokona ena toana be dahaka?” (Mat. 24:3) Unai parabole be iseda negai ia guguru noho bona ia hahedinaraia Iesu be hari King bamona ia lohia noho.

3. Mataio karoa 24 bona 25 ese idia herevalaia parabole amo dahaka ita dibaia?

³ Mataio 24: 45 ela bona 25: 46 ai talent parabolena bona parabole ma toi idia noho. Unai parabole toi be inai: Igui hesiai tauna mai ena kamonai bona mai ena kara maoromaoro, rami-hebou kekenidia 10, bona mamoe bona nanigosi. Iesu ese unai parabole toi amo ena mai karana ia herevalaia. Unai parabole foa be Iesu ena murinai idia raka taudia ese inai nega dokona ai do idia hahedinaraia karadia idia herevalaia. Igui hesiai tauna, rami-hebou kekenidia, bona talent edia parabole ese Iesu ena horoa tadikaka  idia herevalaia. Igui hesiai tauna mai ena kamonai ena parabole lalonai, Iesu ese ia hahedinaraia nega dokonai horoa taudia, orea maragina unai, be kamonai bona kara maoromaoro taudia ai idia lao totona, Iesu ena hesiai taudia do idia hadibaia. Rami hebou kekenidia ena parabole lalonai, Iesu ese ia hahedinaraia ena murinai idia raka horoa taudia ibounai be do idia hegaegae bona gima noho, badina idia diba Iesu do ia mai, to dina bona hora idia diba lasi. Talent parabolena lalonai, Iesu ese ia hahedinaraia namona be horoa taudia idia gaukara goada edia Keristani maduna idia huaia namonamo totona. Unai murinai, Iesu ese mamoe bona nanigosi ena parabole ia herevalaia amo tanobada helarona idia abia taudia ia herevalaia. Bona ia hahedinaraia idia ese tanobada ai ena horoa tadikakadia do idia badinaia bona durua. * Inai stadi lalonai talent ena parabole do ita herevalaia.

4, 5. Unai tau o biaguna ese daika ia laulaulaia, bona talent ena anina be dahaka?

⁴ Mataio 25:14-30 duahia. Nega momo iseda pablikeisen ese idia hahedinaraia unai parabole lalonai biaguna be Iesu, bona ia be gabu daudau ia lao, unai be lagani 33 C.E. ai guba ia lao. Parabole ta lalonai Iesu ese ia hahedinaraia ia be gabu daudau ia lao “king siahuna ia abia totona.” (Luka 19:12) Iesu be guba ia lao neganai, maoromaoro Basileia ena King ai ia lao lasi. * To, ia be “Dirava ena idibana kahanai ia helai vadaeni, unai nega amo ia naria noho ela bona Dirava ese ena inai taudia be iena aena atoa gauna ai do ia halaoa.”—Heb. 10:12, 13.

⁵ Talent parabolena ai Iesu ia gwau biaguna be mai ena talent eit, unai negai unai be moni bada herea. * Gabu daudau ia do lao lasi neganai, unai talent be ena igui hesiai taudia ta ta ia henia bona ia hamaorodia bisinesi do idia karaia. Unai biaguna hegeregerena, Iesu be guba ia do lau lasi neganai, ia dekenai be mai anina bada gauna ta ia noho. Unai be dahaka? Haere be ena mauri lalonai ia karaia gaukarana ese ia hahedinaraia.

6, 7. Talent ese dahaka ia laulaulaia?

⁶ Iesu be ena haroro bona hadibaia gaukarana ia laloa bada. (Luka 4:43 duahia.) Unai gaukara amo momo ia durua diba hereva momokani idia dibaia totona. Matamatana ai, ena hahediba taudia ia hamaoroa, ia gwau: “Emui kwarana umui abia isi bona witi uma umui itaia, idia kurokuro vadaeni gogoa totona.” (Ioa. 4:35-38) Iesu ia ura kudou-maoro taudia momo be ena hahediba taudia ai do idia lao. Ia be biru tauna namona ta bamona, uma ena huahua idia mage bona gogoa negana ia ginidae neganai ena uma ia rakatania lasi. Unai dainai, Iesu ia toreisi lou bona guba ia do lao lasi neganai, ena hahediba taudia dekenai hahegani badana ta ia henia. Ia gwau: “Unai dainai umui lao, bese ibounai taudia be hahediba taudia ai umui halaoa.” (Mat. 28:18-20) Oibe, Iesu ese idia dekenai mai anina bada maduna ia henia, unai be haroro gaukara do idia karaia.—2 Kor. 4:7.

⁷ Unai amo dahaka ita dibaia? Iesu ese ena hahediba taudia dekenai unai hahegani ia henia neganai, ia be idia dekenai “ena  kohu” o talent ia henidia. (Mat. 25:14) Ita gwau diba talent ese haroro bona hadibaia taudia halaoa gaukarana ena maduna ia laulaulaia.

8. Ena be igui hesiai taudia ta ta ese idia abia talent edia bada be idauidau, to biaguna ia ura dahaka do idia karaia?

⁸ Talent parabolena ai biaguna ese igui hesiai tauna ta dekenai talent faiv ia henia, ma ta dekenai talent rua ia henia, bona ma ta dekenai talent tamona ia henia. (Mat. 25:15) Ena be idia ta ta ese idia abia talent edia bada be idauidau, to biaguna ia ura idia ibounai ese unai talent idia gaukaralaia namonamo. Unai hegeregerena, Iesu ia ura ena horoa tadikaka ese haroro gaukara do idia karaia namonamo. (Mat. 22:37; Kol. 3:23) Aposetolo edia negai, Pentekoste 33 C.E. ena matamanai, Keriso ena murinai idia raka taudia ese bese ibounai hahediba taudia halaoa gaukarana idia hamatamaia. Kara bukana ese ia hahedinaraia idia be unai haroro bona hadibaia taudia halaoa gaukarana idia karaia goadagoada. *—Kara 6:7; 12:24; 19:20.

9. (a) Igui hesiai taudia rua ese edia talent be edena bamona idia gaukaralaia, bona dahaka ita dibaia? (b) Tanobada helarona idia abia taudia be dahaka do idia karaia?

⁹ Nega dokonai, lagani 1919 amo Keriso  ena horoa igui hesiai mai ena kamonai tanobada ai, be Biaguna ena talent amo bisinesi idia karaia. Talent parabolena ai igui hesiai taudia rua hegeregerena, horoa tadikaka bona taihu ese idia abia talent idia gaukaralaia namonamo. To daika ese talent faiv ia abia bona daika ese talent rua ia abia ita tahua be anina lasi. Parabole ai unai igui hesiai taudia ruaosi be idia gaukara goada edia talent o moni idia habadaia totona. Tanobada helarona idia abia taudia be dahaka do idia karaia? Idia ese mai anina bada gaukarana ta do dia karaia! Iesu ese ia herevalaia mamoe bona nanigosi parabolena amo ita diba, tanobada helarona idia abia taudia be Iesu ena horoa tadikaka idia durua haroro bona hadibaia gaukarana idia karaia totona. Inai nega dokonai, unai orea rua be “mamoe serina tamona” bamona, hahediba taudia halaoa gaukarana idia karaia hebou.—Ioa. 10:16.

10. Dahaka ese ia hahedinaraia hari Iesu be Basileia lalonai ia lohia noho?

¹⁰ Iesu ia ura ena murinai idia raka taudia idia gaukara goada taunimanima momo be hahediba taudia ai idia halaoa.Aposetolo edia negai, Iesu ena hahediba taudia be unai bamona idia karaia. Inai nega dokonai talent parabolena ia guguru lalonai, Iesu murinai idia raka taudia be unai bamona idia karaia danu, a? Oibe, histori lalonai Iesu ena kamonai hesiai taudia be haroro bona hahediba taudia halaoa gaukara badana idia karaia. Edia gaukara namona dainai, lagani ta ta ai taunimanima tausen momo be Basileia harorolaia taudia ai idia lao bona haroro bona hahediba taudia halaoa gaukarana idia karaia. Unai ese ia hahedinaraia hari Iesu be Basileia lalonai ia lohia noho. Momokani edia Biaguna be idia dekenai ia moale!

11. Edena dala ai ita diba Iesu be hisihisi badana ai do ia mai?

¹¹ Iesu ia gwau: “Nega daudau murinai, unai igui hesiai taudia edia biaguna ia mai bona ena moni idia gaukaralaia dalana ia herevalaia.” (Mat. 25:19) Hisihisi badana ena dokonai ia kahirakahira neganai, Biaguna, Iesu unai, be unai bamona do ia karaia. Edena dala ai unai ita diba? Mataio karoa 24 bona 25 ai ia noho peroveta herevana lalonai, Iesu ese ena mai be nega momo ia herevalaia. Hisihisi badana lalonai do ia vara hahemaoro karana ia herevalaia neganai, ia gwau taunimanima do idia itaia:  “Taunimanima ena Natuna ena toa be guba ai do ia hedinarai.” Inai nega dokonai, ena murinai idia raka taudia ia hagoadaia idia noga noho totona. Ia gwau: “Badina emui Lohiabada ia mai dinana be umui diba lasi” bona “umui laloa lasi horana ai, taunimanima ena Natuna do ia mai.” (Mat. 24:30, 42, 44) Unai dainai, Iesu ia gwau, “biaguna ia mai bona ena moni idia gaukaralaia dalana ia herevalaia” neganai, ia be inai nega oromana ena dokona ai do ia mai bona taunimanima ia hahemaoro henia karana ia herevalaia. *—Mat. 25:19.

12, 13. (a) Biaguna be igui hesiai taudia rua dekenai dahaka ia gwau, bona dahaka dainai? (b) Horoa taudia be edena negai edia maka ginigabena idia abia? ( Maua ladana “Gaukara Idia Karaia Dalana Idia Herevalaia” itaia.) (c) Mamoe bamona taudia be dahaka hahenamo do idia abia?

¹² Talent parabolena ai, biaguna ia mai neganai ia davaria igui hesiai taudia rua—talent faiv ia henia tauna bona talent rua ia henia tauna—be idia kamonai bona edia talent idia habadaia. Biaguna be idia ruaosi dekenai ia gwau: “Namo herea, oi be kamonai igui hesiai tauna namona! Mai kamonai ida gau haida oi naria vadaeni. Unai dainai lau ese oi do lau abia hidi gau momo oi naria totona. Emu biaguna ida do oi moale hebou.” (Mat. 25:21, 23) Vadaeni, vaira neganai Biaguna, Iesu unai, be hahemaoro totona ia mai neganai, dahaka do ia karaia?

¹³ Unai parabole ai igui hesiai taudia rua ese idia laulaulaia taudia—Iesu ena horoa hahediba taudia—be hisihisi badana do lasi neganai edia maka ginigabena idia abia. (Apok. 7:1-3) Aramagedono do lasi neganai, Iesu ese idia dekenai ia gwauhamatalaia guba ahuna do ia henidia. Tanobada helarona idia abia bona Keriso ena tadikaka idia durua haroro gaukara idia karaia taudia, be Iesu ese do ia gwauraia mamoe bamona taudia. Idia be Basileia ese ia lohiaia tanobada ai mauri hanaihanai ena hahenamo do idia abia.—Mat. 25:34.

14, 15. Iesu ia gwau ena horoa tadikaka haida be kara dika bona lahedo taudia ai do idia lao, a? Herevalaia.

¹⁴ Parabole lalonai igui hesiai tauna ginigabena be ena talent amo bisinesi ia karaia lasi o banika taudia ia henia lasi, to tano lalonai ia hunia. Ena biaguna ena ura ia badinaia lasi dainai, ia be hesiai tauna dikana. Biaguna ese ia gwauraia, “kara dika bona lahedo igui hesiai tauna.” Bena biaguna ese ena talent ia abia bona talent 10 ia haboua tauna dekenai ia henia. Unai kara dika igui hesiai tauna be “murimuri ena dibura ai [idia] negea. Unuseniai do ia taitai bona ena isena do ia koria” totona.—Mat. 25:24-30; Luka 19:22, 23.

¹⁵ Unai biaguna ena igui hesiai tauna ta be ena talent ia hunia dainai, do ita gwau  Iesu ena horoa tadikaka haida be kara dika bona lahedo taudia ai do idia lao, a? Lasi. Mani inai oi laloa. Igui hesiai tauna mai ena kamonai bona mai ena kara maoromaoro parabolena ai, Iesu ia gwau igui hesiai tauna dikana ta be igui hesiai taudia ma haida ia dadabaia. Unai parabole ai Iesu be ia gwau lasi igui hesiai tauna dikana oreana ta do ia hedinarai. To, ia be ena kamonai hesiai taudia ia hadibaia unai igui hesiai tauna dikana ena kara bamona do idia karaia lasi. Unai hegeregerena, rami-hebou kekeni 10 ena parabole ai, Iesu be ia gwau lasi ena horoa tadikaka haida be kavakava kekeni faiv bamona. To, ia ese ena Keristani tadikaka ia hadibaia dahaka do ia vara bema idia noga lasi bona hegaegae lasi. * Unai dainai, talent parabolena ai, Iesu be ia gwau lasi nega dokona ai ena horoa tadikaka momo be kara dika bona lahedo taudia. To, Iesu ese ena horoa tadikaka ia hadibaia haroro gaukara do idia goadalaia bona igui hesiai tauna dikana ena lalohadai bona kara idia badinaia lasi.—Mat. 25:16.

16. (a) Talent parabolena amo dahaka ita dibaia? (b) Edena dala ai inai stadi ese ita ia durua talent parabolena ita lalopararalaia totona? (Maua ladana “ Talent Parabolena Ita Lalopararalaia Dalana” itaia.)

¹⁶ Talent parabolena amo dahaka gau rua ita dibaia? Ginigunana be inai: Biaguna, Keriso unai, ese ena horoa igui hesiai taudia dekenai mai anina bada gauna ta ia henia—idia ia hagania haroro bona hahediba taudia halaoa gaukarana do idia karaia. Iharuana be inai: Keriso ia ura ita ibounai ese haroro gaukara do ita goadalaia. Bema unai ita karaia, ita diba iseda Biaguna ese eda abidadama, gima noho, bona badinaia karana dainai ita do ia hanamoa.—Mat. 25:21, 23, 34.