1, 2. Fikieme Jesu ọ rọ kẹ ọtadhesẹ etalẹnte na?

JESU ọ jọ ọtadhesẹ riẹ ọrọ etalẹnte na dhesẹ owha-iruo nọ o rrọ obọ ilele riẹ nọ a rọ ẹzi wholo na vevẹ. O gwọlọ nọ ma re wo otoriẹ ọtadhesẹ nana, keme u kpomahọ Ileleikristi uzẹme kpobi, te enọ i wo ẹruore obọ odhiwu hayo otọakpọ.

² Jesu ọ kẹ ọtadhesẹ etalẹnte na okenọ ọ jẹ kẹ ilele riẹ uyo onọ nọ a nọ riẹ kpahe “oka ọzino [riẹ] gbe orọ oke urere uyero-akpọ na.” (Mat. 24:3) Fikiere orugba ọtadhesẹ na o kiekpahe oke mai nana, o tẹ jẹ rrọ abọjọ oka nọ u dhesẹ ọzino Jesu gbe inọ o muhọ esuo no evaọ Uvie Ọghẹnẹ.

3. Eme ma wuhrẹ no etadhesẹ nọ e rrọ Matiu uzou avọ 24 gbe 25 na ze?

³ Ọtadhesẹ etalẹnte na yọ ọjọ evaọ usu etadhesẹ ene nọ i wobọ kugbe ohwohwo nọ a gbiku rai fihọ obe Matiu 24:45 rite 25:46. Etadhesẹ esa nọ i kiọkọ, koyehọ ọrọ ọrigbo nọ a re fievahọ nọ o wo areghẹ na, emetẹ-kọkọ ikpe na, gbe igodẹ avọ ewe na, e rrọ usu etadhesẹ nọ Jesu ọ rọ kẹ uyo onọ nọ a nọ riẹ kpahe oka ọzino riẹ na. Evaọ etadhesẹ ene na, Jesu ọ fodẹ eware nọ i ti ru uvi ilele riẹ wo ohẹriẹ evaọ edẹ urere na. Ileleikristi nọ a rọ ẹzi wholo na Jesu o wo họ iroro  rọ kẹ ọtadhesẹ ọrigbo na, emetẹ-kọkọ na, gbe etalẹnte na. Jesu ọ jọ ọtadhesẹ ọrigbo nọ a re fievahọ na dhesẹ nọ u wuzou gaga re Ileleikristi nọ a rọ ẹzi wholo na, enọ ọ kẹ owha-iruo nọ a rẹ rọ ko ahwo uwou riẹ evaọ edẹ urere na a jọ ahwo nọ a re fievahọ nọ i wo areghẹ. Evaọ ọtadhesẹ emetẹ-kọkọ na, Jesu ọ kẹ unuovẹvẹ inọ o gwọlọ nọ Ileleikristi nọ a rọ ẹzi wholo na kpobi a rẹ ruẹrẹ oma kpahe jẹ jaja aro vi keme a riẹ nọ Jesu ọ te seba ẹnyaze he dede nọ ọ vuẹ rai uzedhe ẹdẹ hayo auwa na ha. Jesu ọ rọ ọtadhesẹ etalẹnte na fodẹ epanọ u wuzou te re Ileleikristi nọ a rọ ẹzi wholo na a rọ osegboja ru iruo nọ ọ kẹ rai. Okenọ Jesu ọ kẹ ọtadhesẹ riẹ ọrọ igodẹ gbe ewe na, enọ i wo ẹruore otọakpọ o wo họ iroro. O dhesẹ nọ u wuzou gaga re a romakpotọ jẹ rọ uketha kẹ ilele Jesu nọ a rọ ẹzi wholo nọ e rrọ otọakpọ. * Obọnana, joma ta kpahe ọtadhesẹ etalẹnte na.

4, 5. Ono ọzae hayo olori nọ a fodẹ evaọ ọtadhesẹ na o dikihẹ kẹ, kọ ẹvẹ etalẹnte e ghare te?

⁴ Se Matiu 25:14-30. Evaọ oke nọ u kpemu, ma jọ ebe mai ta nọ ọzae na, hayo olori nọ Jesu ọ fodẹ evaọ ọtadhesẹ na o dikihẹ kẹ ọyomariẹ, gbe inọ obọ odhiwu nọ o kpohọ evaọ ukpe 33 C.E. họ erẹ ugbothabọ nọ ọ nya na. Evaọ ọtadhesẹ jọ nọ Jesu ọ kake kẹ, ọ ta nọ ẹjiroro nọ o ro kpohọ erẹ ugbothabọ na họ re ọ “nyai wo ogaga uvie tobọ.” (Luk 19:12) Orọnikọ okenọ Jesu ọ nwani te obọ odhiwu no ogaga Uvie u ro tei obọ họ. * Ukpoye, ọ “keria obọze Ọghẹnẹ, no oke yena vrẹ, ọ tẹ be hẹrẹ bẹsenọ a re ru ewegrẹ riẹ họ oria nọ ọ rẹ rọ awọ riẹ kpahe.”—Hib. 10:12, 13.

⁵ Ọzae nọ a fodẹ evaọ ọtadhesẹ na o wo etalẹnte eree, yọ evaọ oke yena, etalẹnte eree yọ igho buobu. * Taure o te ti kpohọ erẹ ugbothabọ na, ọ ghale etalẹnte na kẹ idibo riẹ, bi rẹro nọ a te rehọ igho na thueki okenọ o te kpohọ erẹ no. Wọhọ ọzae nana, Jesu o wo oware oghaghae jọ taure o te ti kpobọ odhiwu. Didi oware? U wobọ kugbe iruo nọ ọ rọ uzuazọ riẹ ru.

6, 7. Eme etalẹnte na i dikihẹ kẹ?

⁶ Jesu o se iruo usiuwoma ota na gboja gaga. (Se Luk 4:43.) Iruo usiuwoma ota riẹ na u ru nọ ọ rọ ruẹrẹ udhu họ nọ ẹvi ologbo o ti no ze. Ọ vuẹ ilele riẹ nọ: “Wha kpare aro rai re wha rri idhu na, inọ e who no kẹ ivuẹvu.” (Jọn 4:35-38) Ọ jẹ ta kpahe epanọ a ti ro koko amọfa buobu họ, enọ i ti zihe ruọ ilele riẹ evaọ obaro. Wọhọ emamọ ọwhẹrẹ, Jesu ọ sae kuvẹ vievie he re a gbabọkẹ udhu riẹ nọ o who no. Fikiere, nọ Jesu ọ nwane kparoma no uwhu ze no, taure o te ti zihe kpobọ odhiwu ọ kẹ ilele riẹ iruo ilogbo jọ, inọ: “Wha nyai wuhrẹ ahwo erẹwho kpobi re a zihe ruọ ilele.” (Mat. 28:18-20) Jesu ọ tẹ rọ ere kẹ ilele riẹ efe ọghaghae, iruo odibọgba Ileleikristi na.—2 Kọr. 4:7.

 ⁷ Fikiere ma sae ta nọ, okenọ Jesu ọ jẹ vuẹ ilele riẹ nọ a nyai wuhrẹ ahwo zihe ruọ ilele na, yọ “ekwakwa riẹ” hayo etalẹnte riẹ ọ rọ kẹ ae na. (Mat. 25:14) Ẹme na họ, etalẹnte na i dikihẹ kẹ iruo usiuwoma ota nọ ọ kẹ ilele na.

8. Dede nọ unu etalẹnte evona a kẹ erigbo na kpobi hi, eme olori na o rẹro mi ai?

⁸ Evaọ ọtadhesẹ etalẹnte na, olori na ọ kẹ ọrigbo jọ etalẹnte isoi, ọ kẹ ọfa ivẹ, ọ tẹ kẹ ọrigbo nọ o kiọkọ ọvo. (Mat. 25:15) Dede nọ etalẹnte nọ ọ kẹ rai e jọ ẹrẹrẹ hẹ, olori na o rẹro nọ a te rọ etalẹnte na ruiruo ziezi, koyehọ a rẹ rọ osegboja ru iruo odibọgba na. (Mat. 22:37; Kọl. 3:23) No umuo Pẹntikọst 33 C.E. vrẹ, ilele Jesu a tẹ rọ etalẹnte na mu eki họ. A jọ obe Iruẹru Ikọ gbiku oghẹrẹ nọ a se iruo usiuwoma ota na gboja te. *—Iruẹru 6:7; 12:24; 19:20.

9. (a) Eme erigbo ivẹ ọsosuọ na a rọ etalẹnte nọ a kẹ rai ru, kọ eme oyena u dikihẹ kẹ? (b) Kọ abọ vẹ “igodẹ efa” na a wo evaọ ẹme etalẹnte na?

⁹ Evaọ edẹ urere na, maero no umuo 1919 ze, Ileleikristi nọ a rọ ẹzi wholo na nọ i kiọkọ otọakpọ a daoma gaga  no be rọ etalẹnte nọ Olori na ọ kẹ rae na thueki wọhọ erigbo ivẹ ọsosuọ na. U du gwọlọ nọ ma ruawa ha kpahe ugogo ahwo nọ ọrigbo nọ a kẹ etalẹnte isoi hayo ọnọ a kẹ ivẹ na a dikihẹ kẹ. Evaọ ọtadhesẹ na, erigbo ivẹ na a wo erere nọ o te unuigho nọ a kẹ rai na, onọ u dhesẹ nọ a rọ igho na thueki avọ osegboja. Obọ vẹ enọ i wo ẹruore otọakpọ a wo evaọ ẹme nana? Abọ ologbo. Ọtadhesẹ Jesu ọrọ igodẹ gbe ewe na u wuhrẹ omai nọ ahwo nọ a wo ẹruore otọakpọ a wo uvẹ-ọghọ nọ a te rọ tha Ileleikristi nọ a rọ ẹzi wholo na uke evaọ iruo usiuwoma ota na. Evaọ oke urere obẹbẹ nana, utu ahwo ivẹ nana a be rọ ajọwha ru iruo usiuwoma ota na kugbe wọhọ “uthuru ọvo.”—Jọn 10:16.

10. Oka ulogbo vẹ u dhesẹ nọ Jesu o zihe ruọ Ovie no?

¹⁰ Olori na o bi rẹro iyẹrẹ evaọ iruo nana. Wọhọ epanọ ma ta no vẹre na, Ileleikristi ikpe-udhusoi ọsosuọ na a ginẹ daoma ru ekwakwa riẹ vihọ. Kọ ẹvẹ kpahe edẹ urere nana nọ ọtadhesẹ na o bi jo rugba na? Idibo Jesu a be dao omarai kpobi ta usiuwoma na vi epaọ anwẹdẹ kpobi evaọ ikuigbe ohwo-akpọ. Omodawọ rai evaọ iruo usiuwoma ota na u ru nọ idu ahwo buobu a bi ro kurẹriẹ kukpe kukpe je bi kuomagbe ai whowho ovuẹ Uvie na, onọ u ru nọ usiuwoma ota na o rọ rrọ oka ulogbo nọ u dhesẹ nọ Jesu o muhọ esuo no. Avro ọ riẹ hẹ, eva e be were Olori rai gaga.

11. Fikieme ma rọ ta nọ Jesu ọ te nyaze te nekpẹ mi ilele riẹ evaọ etoke uye ulogbo na?

¹¹ Jesu ọ te nyaze te nekpẹ mi erigbo na evaọ ubrobọ ekuhọ uye ulogbo na. Fikieme ma rọ ta ere? Evaọ eruẹaruẹ Jesu nọ e rrọ obe Matiu uzou avọ 24 gbe 25 na, ọ ta kpahe ẹnyaze riẹ unuẹse buobu. Okenọ ọ jẹ ta kpahe ẹdhoguo nọ ọ te romavia evaọ etoke uye ulogbo na, ọ ta nọ ahwo a te “ruẹ Ọmọ ohwo nọ ọ be nyaze evaọ ẹgho.” Kẹsena ọ tẹ tuduhọ ilele riẹ nọ e te jariẹ evaọ edẹ urere na awọ inọ a jaja aro vi. Ọ vuẹ rai nọ: “Wha riẹ ẹdẹ nọ Olori rai  ọ te nyaze he” gbe inọ “Ọmọ ohwo ọ te nyaze evaọ auwa nọ wha roro ho.” (Mat. 24:30, 42, 44) Fikiere ẹme nọ Jesu ọ ta inọ “olori erigbo na o te kpozi, o te se ai re a vuẹe epanọ a rọ igho na ru te” na u kiekpahe okenọ ọyomariẹ ọ te rọ nyaze ti guẹdhọ akpọ na evaọ ekuhọ uyerakpọ nana. *—Mat. 25:19.

12, 13. (a) Eme olori na ọ ta kẹ erigbo ivẹ ọsosuọ na, kọ fikieme? (b) Oke vẹ Ileleikristi nọ a rọ ẹzi wholo na a ti ro wo oka ukpehọ urere rai? (Rri ẹkpẹti na, “ A ti Bruoziẹ Kẹ Ae Okenọ A te Whu.”) (c) Osohwa vẹ enọ a bruoziẹ rai nọ igodẹ a ti wo?

¹² Wọhọ epanọ ọtadhesẹ na o dhesẹ, okenọ olori na ọ nyaze ọ tẹ ruẹ nọ ọrigbo nọ ọ kẹ etalẹnte isoi gbe ọnọ ọ kẹ ivẹ na a rọ igho na thueki ziezi, onọ u ru nọ a ro wo erere nọ o bu te unuigho nọ a kẹ rae omomọvo na. Ẹme ọvona olori na ọ ta kẹ erigbo ivẹ na, inọ: “Whẹ kobiruo, emamọ ọrigbo nọ a re fievahọ! Whọ riẹ ru evaọ umutho eware nọ a muhọ owhẹ obọ. Me ti mu eware buobu họ owhẹ obọ.” (Mat. 25:21, 23) Kọ eme ọ te via okenọ Olori na Jesu Kristi ọ te ze kẹ ẹdhoguo evaọ obaro?

¹³ Oke yena yọ enọ i dikihẹ kẹ erigbo ivẹ nọ e romatotọ ru iruo rai na a wo oka ukpehọ urere na no taure uye ulogbo na u te ti muhọ. (Evia. 7:1-3) Yọ taure ẹmo Amagẹdọn o te ti du lahwe, Jesu ọ te kẹ ae osohwa obọ odhiwu nọ ọ ya eyaa riẹ kẹ ae na. Evaọ oke yena yọ a gu ẹdhọ otu nọ i wo ẹruore otọakpọ nọ e tha Ileleikristi nọ a rọ ẹzi wholo na uke no wọhọ igodẹ, a ve ti wo uvẹ-ọghọ nọ a te rọ jọ otọ esuo Uvie na evaọ otọakpọ na.—Mat. 25:34.

14, 15. Kọ Jesu ọ jẹ ta nọ ibuobu ilele riẹ nọ a rọ ẹzi wholo na a ti wo eva imuomu jẹ jọ eyẹlẹ? Ru ei vẹ.

¹⁴ Evaọ ọtadhesẹ na, ọrigbo avesa na ọ tọ etalẹnte riẹ họ otọ viukpenọ ọ rẹ rehọ iẹe thueki hayo tube fi ei họ ebanke. Ekpehre uruemu ọrigbo nana o dhesẹ na, keme o keke aro fihọ gbabọkẹ oware nọ o hae te wha erere se olori riẹ. Olori na o se rie “ọrigbo omuomu, ọyẹlẹ,” yọ o se rie ere thọ họ. Olori na o te mi ei etalẹnte na jẹ rehọ iẹe kẹ ọrigbo nọ o wo ikpe na. Kẹsena a te gbolo ọrigbo omuomu na fihọ “ebi obọ otafe.” “Etẹe ọ te jọ vioja jẹ reakọ.”—Mat. 25:24-30; Luk 19:22, 23.

¹⁵ Ọvo jọ evaọ usu erigbo esa na ọ tọ etalẹnte riẹ hotọ, kọ Jesu ọ jẹ rọ onana dhesẹ nọ abọvo abasa ilele riẹ nọ a rọ ẹzi wholo na a ti wo eva imuomu jẹ jọ  eyẹlẹ? Ijo. Roro kpahe eme nọ e wariẹ ọtadhesẹ na họ. Evaọ ọtadhesẹ ọrigbo nọ a re fievahọ nọ o wo areghẹ na, Jesu ọ ta kpahe ọrigbo omuomu nọ o je kpe ibe erigbo riẹ. Orọnikọ Jesu ọ jẹ rọ onana ta nọ ọrigbo omuomu jọ ọ te romavia ha. Ukpoye, ọ jẹ vẹvẹ ọrigbo nọ a re fievahọ na unu inọ o du dhesẹ uruemu ọrigbo omuomu hu. Epọvo na re, evaọ ọtadhesẹ emetẹ-kọkọ ikpe na, orọnikọ Jesu ọ jẹ ta nọ abọvo ilele riẹ nọ a rọ ẹzi wholo a te jọ wọhọ emetẹ-kọkọ igheghẹ isoi na ha. Ukpoye, ọ jẹ vẹvẹ ai unu kpahe oware nọ o rẹ sae via nọ a gbẹ jaja aro vi jẹ ruẹrẹ oma kpahe he. * Nọ o rrọ ere na, ma sae ta nọ evaọ ọtadhesẹ etalẹnte na, orọnikọ Jesu ọ jẹ ta nọ ibuobu ilele riẹ nọ a rọ ẹzi wholo evaọ oke urere na a ti wo eva imuomu jẹ jọ eyẹlẹ hẹ. Ukpoye, Jesu ọ jẹ vẹvẹ ilele riẹ nọ a rọ ẹzi wholo na unu inọ a daoma se iruo na gboja jẹ whaha uruemu ọrigbo omuomu, koyehọ a rọ etalẹnte na ‘thueki.’—Mat. 25:16.

16. (a) Eware ivẹ vẹ ma wuhrẹ no ọtadhesẹ etalẹnte na ze? (b) Ẹvẹ uzoẹme nana u ro ru otoriẹ mai vẹ kpahe ọtadhesẹ etalẹnte na? (Rri ẹkpẹti na, “ Wo Otoriẹ Ọtadhesẹ Etalẹnte Na.”)

¹⁶ Eware ivẹ vẹ ma wuhrẹ no ọtadhesẹ etalẹnte na ze? Orọ ọsosuọ, Olori na, Kristi, ọ kẹ ilele riẹ nọ a rọ ẹzi wholo na oware jọ nọ o rri ghaghae gaga, oyehọ iruo usiuwoma ota na. Orọ avivẹ, Kristi o rẹro nọ ma te rọ osegboja ru iruo usiuwoma ota na. Ma te ru ere, ma wo imuẹro nọ Olori na ọ te hwosa kẹ omai fikinọ ma wo ẹrọwọ, jaja aro vi, jẹ romakpotọ kẹe.—Mat. 25:21, 23, 34.