Lan Frɔm di Parebul bɔt di Talɛnt
“I gi fayv talɛnt to wan, tu talɛnt to di ɔda wan, ɛn wan talɛnt to di ɔda wan.”—MAT. 25:15.
1, 2. Wetin mek Jizɔs pul di parebul bɔt di talɛnt?
INSAY di parebul bɔt di talɛnt, Jizɔs sho di wok we in anɔyntɛd disaypul dɛn gɛt. Wi nid fɔ ɔndastand wetin dis parebul min, bikɔs i gɛt sɔntin fɔ du wit ɔlman we na tru Kristian, ilɛksɛf di op we yu gɛt na fɔ go na ɛvin ɔ na fɔ de na dis wɔl.
2 Jizɔs bin pul di parebul bɔt di talɛnt we i bin de ansa di kwɛstyɔn we in disaypul dɛn bin aks am. In disaypul dɛn aks am se: “Us sayn go sho se yu de na ya, ɛn us sayn go sho se di wɔl want dɔn?” (Mat. 24:3) So dis parebul go apin insay wi yon tɛm ɛn na wan sayn we de sho se Jizɔs dɔn bigin fɔ rul as Kiŋ ɛn di las dez dɔn bigin.
3. Us lɛsin dɛn de na di parebul dɛn we de na Matyu chapta 24 ɛn 25?
3 Jizɔs bin pul 4 parebul dɛn na Matyu 24:45 to Matyu 25:46. Wan pan dɛn parebul ya na di parebul bɔt di talɛnt. Ɔl 4 dɛn parebul ya de tɔk bɔt di sayn we Jizɔs bin gi bɔt di las dez. Tri pan di parebul dɛn na bɔt di slev we fetful ɛn we gɛt sɛns, di tɛn vajin dɛn, ɛn di ship ɛn di got. Ɔl dɛn parebul ya de insay di ansa we Jizɔs bin gi in disaypul dɛn bɔt di sayn we go sho se i dɔn bigin rul as Kiŋ. We Jizɔs bin de pul dɛn 4 parebul ya, i bin tɔk bɔt di tin dɛn we go sho se in disaypul dɛn difrɛn insay di las dez. Jizɔs bin pul di parebul bɔt di slev, di vajin dɛn, ɛn di talɛnt fɔ in anɔyntɛd disaypul dɛn. Insay di parebul bɔt di slev we fetful, Jizɔs bin sho se smɔl grup pan in anɔyntɛd disaypul dɛn go gɛt di wok fɔ fid in ɔda savant dɛn insay di las dez. Dis smɔl grup ya fɔ fetful ɛn gɛt sɛns. Insay di parebul bɔt di vajin dɛn, Jizɔs bin se ɔl in anɔyntɛd disaypul dɛn fɔ pripia ɛn dɛn fɔ de wach, bikɔs dɛn no se i gɛt fɔ kam, bɔt dɛn nɔ no di de ɔ di awa we i go kam. Insay di parebul bɔt di talɛnt, Jizɔs sho se di anɔyntɛd dɛn nid fɔ wok tranga wan. Jizɔs bin pul di las parebul bɔt di ship ɛn di got, fɔ di wan dɛn we gɛt di op fɔ de na dis wɔl. I bin se dɛn fɔ fetful ɛn sɔpɔt Jizɔs in anɔyntɛd brɔda dɛn we de na dis wɔl. * Bɔt naw lɛ wi pe atɛnshɔn to di parebul bɔt di talɛnt.
DI MASTA GI IN SLEV DƐN BƆKU BƆKU MƆNI
4, 5. Udat na di man, ɔ di masta na di parebul? Us valyu, wan talɛnt gɛt?
4 Rid Matyu 25:14-30. I dɔn te we wi buk ɛn magazin dɛn de ɛksplen se di man, ɔ di masta, na di parebul na Jizɔs, ɛn i travul we i bin go na ɛvin insay di ia 33. Insay wan ɔda parebul, Jizɔs bin sho wetin mek i gɛt fɔ travul; i se na fɔ “go gɛt pawa fɔ bi kiŋ.” (Lyuk 19:12) Jizɔs nɔ bin bi kiŋ wantɛm wantɛm we i go na ɛvin. * Bifo dat, i “go sidɔm na Gɔd in rayt an, frɔm da tɛm de, i de wet te dɛn put in ɛnimi dɛn ɔnda in fut lɛk smɔl bɛnch.”—Ibru 10:12, 13.
5 Di man na di parebul bin gɛt et talɛnt. Dɛn tɛm dɛn de, et talɛnt na bin bɔku bɔku mɔni. * Bifo i travul, i sheb di talɛnt to in slev dɛn, ɛn i bin want mek dɛn du biznɛs wit di talɛnt we i dɔn go. Jɔs lɛk dis man, Jizɔs bin gɛt sɔm tin we rili valyu bifo i go na ɛvin. Wetin i bin gɛt? Na di wok we i bin de du we i de na di wɔl.
6, 7. Wetin di talɛnt min?
6 Jizɔs bin tek in tichin ɛn prichin wok as sɔntin we rili impɔtant. (Rid Lyuk 4:43.) Bɔt i bin no se mɔ wok de fɔ du ɛn mɔ pipul dɛn de we go lisin to di gud nyus. Na dat mek i bin tɛl in disaypul dɛn se: “Una es una ed ɔp ɛn luk di fam dɛn, dɛn dɔn rich di tɛm fɔ avɛst.” (Jɔn 4:35-38) I bin no se bɔku ɔda pipul dɛn gɛt fɔ bi in disaypul dɛn. Fama we sabi in wok, nɔ de lɛf di tin dɛn we i dɔn plant we tɛm dɔn rich fɔ avɛst. Na di sem tin Jizɔs sɛf bin du. I bin no se pipul dɛn rɛdi fɔ lisin to di gud nyus, so i nɔ bin lɛf dɛn lɛk dat. Jɔs bifo i go na ɛvin, i tɛl in disaypul dɛn fɔ du wan impɔtant wok. I tɛl dɛn se: “Una go ɛn mek pipul dɛn bi mi disaypul dɛn.” (Mat. 28:18-20) We Jizɔs du dis, i gi dɛn sɔntin we rili valyu, dat na di prichin wok.—2 Kɔr. 4:7.
7 So, wetin wi go se naw? We Jizɔs bin tɛl in disaypul dɛn fɔ lɛ dɛn mek pipul dɛn bi in disaypul, i bin de gi dɛn “di tin dɛn we i gɛt,” dat na in talɛnt. (Mat. 25:14) Dis talɛnt we i gi dɛn na fɔ prich di gud nyus ɛn mek pipul dɛn bi in disaypul dɛn.
8. Pan ɔl we di slev dɛn nɔ gɛt di sem talɛnt, wetin di masta bin want mek dɛn ɔl du?
8 Insay di parebul bɔt di talɛnt, di masta gi fayv talɛnt to wan slev, tu talɛnt to ɔda slev, ɛn wan talɛnt to wan ɔda slev. (Mat. 25:15) Pan ɔl we di slev dɛn nɔ gɛt di sem talɛnt, di masta bin want mek dɛn ɔl yuz dɛn talɛnt di bɛst we. Semweso, Jizɔs bin want mek in anɔyntɛd disaypul dɛn du dɛn bɛst pan di prichin wok. (Mat. 22:37; Kɔl. 3:23) Krays in disaypul dɛn bigin fɔ du biznɛs wit di talɛnt insay Pɛntikɔst 33. Di Baybul buk we nem Akt sho wi aw di disaypul dɛn bin wok tranga wan fɔ prich ɛn mek pipul dɛn bi Jizɔs in disaypul dɛn. *—Akt 6:7; 12:24; 19:20.
DI SLEV DƐN DE YUZ DI TALƐNT FƆ DU BIZNƐS INSAY DI LAS DEZ
9. (a) Wetin di tu fetful slev dɛn du wit di talɛnt? Wetin dat de sho? (b) Us wok di “ɔda ship dɛn” de du?
9 Insay di las dez, mɔ frɔm 1919, Krays in fetful anɔyntɛd slev dɛn we de na di wɔl bin dɔn de du biznɛs wit di Masta in talɛnt. Jɔs lɛk dɛn fɔs tu slev dɛn, anɔyntɛd brɔda ɛn sista dɛn dɔn du dɛn bɛst wit wetin dɛn gɛt. Wi nɔ nid fɔ gɛs udat gɛt di fayv talɛnt ɛn udat gɛt di tu talɛnt. Insay di parebul, ɔl tu di slev dɛn dɔbul wetin di masta gi dɛn, so dɛn ɔl tu bin wok tranga wan. Us wok we di wan dɛn we gɛt di op fɔ de na dis wɔl de du? Dɛn de du impɔtant wok! Jizɔs in parebul bɔt di ship ɛn di got tich wi se di wan dɛn we gɛt di op fɔ de na dis wɔl gɛt di ɔnɔ fɔ sɔpɔt Jizɔs in anɔyntɛd brɔda dɛn fɔ du di prichin ɛn tichin wok. Insay dis las dez, di tu grup de wok togɛda as “wan grup” fɔ kɛr di prichin wok go bifo.—Jɔn 10:16.
10. Wetin na wan men sayn we de sho se Jizɔs dɔn bigin fɔ rul?
10 Di Masta want mek dɛn wok tranga wan. As wi bin dɔn tɔk, di disaypul dɛn we bin de insay di apɔsul dɛn tɛm bin mek mɔ disaypul dɛn. Wetin wi go se naw bɔt di las dez, we na naw di parebul de apin? Jizɔs in fetful savant dɛn we de wok tranga wan dɔn prich di gud nyus ɛn mek pipul dɛn bi Jizɔs in disaypul pas aw dɛn bin dɔn ɛva du am na di wɔl. Di wok we di anɔyntɛd dɛn ɛn di ɔda ship dɛn de wok togɛda dɔn mek bɔku bɔku pipul dɛn de jɔyn dɛn fɔ prich di gud nyus bɔt di Kiŋdɔm ɛni ia. Dis dɔn mek di prichin ɛn tichin wok bi wan men sayn we de sho se Jizɔs dɔn bigin rul na in Kiŋdɔm. Fɔ tru, dɛn Masta go mɔs dɔn gladi we dis wok de go bifo!
Krays dɔn gi in savant dɛn wan impɔtant wok, dat na fɔ prich di gud nyus (Luk na paregraf 10)
USTƐM DI MASTA GO KAM FƆ NO WETIN IN SLEV DƐN DƆN DU?
11. Wetin mek wi tɔk se Jizɔs go kam fɔ “no wetin” in slev dɛn dɔn du, di tɛm we da big trɔbul go de na di wɔl?
11 Jizɔs go kam fɔ no wetin in slev dɛn dɔn du, di tɛm we da big trɔbul go want dɔn. Wetin mek wi se so? We Jizɔs bin de tɔk na Matyu chapta 24 ɛn 25 bɔt di tin dɛn we gɛt fɔ apin, i bin tɔk bɔt in kam wan bɔku tɛm. We i bin de tɔk bɔt di tɛm we i go kam fɔ jɔj, we da big trɔbul go de na di wɔl, i bin se pipul dɛn “go si mɔtalman Pikin de kam na di klawd.” So i tɛl in disaypul dɛn we de liv insay di las dez se dɛn fɔ de wach. I tɔk se: “Una nɔ no di de we una Masta go kam” ɛn “mɔtalman Pikin de kam di tɛm we una nɔ de tink se i go kam.” (Mat. 24:30, 42, 44) So we Jizɔs bin de tɔk se “di slev dɛn masta kam, ɛn i kɔl dɛn fɔ no wetin dɛn dɔn du,” i bin de tɔk bɔt di tɛm we i go kam fɔ jɔj, we di wɔl want dɔn. *—Mat. 25:19.
12, 13. (a) Wetin di masta tɛl di fɔs tu slev dɛn? Wetin mek i tɛl dɛn dat? (b) Ustɛm di anɔyntɛd dɛn go gɛt dɛn las stamp? (Rid di bɔks we se “Ustɛm di Anɔyntɛd dɛn Go Gɛt Dɛn Las Stamp?”) (c) Di wan dɛn we Jizɔs go dɔn si as ship, us blɛsin dɛn go gɛt?
12 Insay di parebul, we di masta kam, i si se di fɔs tu slev dɛn yuz dɛn talɛnt fayn. Di wan we i gi di fayv talɛnt gɛt fayv talɛnt mɔ ɛn di wan we i gi di tu talɛnt gɛt tu talɛnt mɔ. Di masta tɛl ɔl tu di slev dɛn di sem tin. I kɔl di fɔs wan ɛn tɛl am se: “Yu dɔn du wɛl, yu na gud slev ɛn yu fetful! Yu dɔn du wɛl pan di smɔl wok we a gi yu. A go mek yu kia fɔ bɔku tin.” Dɔn, i kɔl di sɛkɔn slev ɛn tɛl am dis sem tin. (Mat. 25:21, 23) Wetin Jizɔs, we na di Masta, go du we i kam tumara bambay?
13 Jizɔs in anɔyntɛd disaypul dɛn we de wok tranga wan tan lɛk dɛn fɔs tu slev dɛn. Dɛn anɔyntɛd ya go dɔn gɛt dɛn las stamp bifo da big trɔbul bigin. (Rɛv. 7:1-3) Bifo Amagɛdɔn kam, Jizɔs go mek dɛn go na ɛvin. Wetin wi go se bɔt di wan dɛn we gɛt di op fɔ de na dis wɔl ɛn we de sɔpɔt Krays in brɔda dɛn fɔ du di prichin wok? Jizɔs go dɔn si dɛn as ship ɛn i go mek dɛn de na di wɔl di tɛm we di Kiŋdɔm go de rul.—Mat. 25:34.
DI SLEV WE WIKƐD ƐN LEZI
14, 15. Fɔ se Jizɔs bin de tray fɔ tɔk se bɔku pan in anɔyntɛd brɔda dɛn go tɔn to da wikɛd ɛn lezi slev? Ɛksplen.
14 Insay di parebul, di las slev nɔ bin du biznɛs wit in talɛnt ɔ put am na bank, bifo dat, i bɛr am na grɔn. Dis slev bin sho se i wikɛd bikɔs i nɔ bin gri fɔ du wetin in masta want. So di masta bin gɛt rayt we i tɛl am se i “wikɛd ɛn lezi.” Di masta tek di talɛnt na in an ɛn gi am to di ɔda slev we gɛt tɛn talɛnt. Dɔn i mek dɛn trowe di wikɛd slev “na do, . . . na di dak.” “Na de i go de kray ɛn gren in tit.”—Mat. 25:24-30; Lyuk 19:22, 23.
15 Insay di parebul, wan pan di slev dɛn ayd in talɛnt. Fɔ se Jizɔs bin de tray fɔ se bɔku pan in anɔyntɛd brɔda dɛn go tɔn to da wikɛd ɛn lezi slev? Nɔ, nɔto dat i bin de tray fɔ tɔk. I fayn fɔ luk di skripchɔ dɛn we de nia di say we Jizɔs pul dis parebul. Insay di parebul bɔt di slev we fetful ɛn gɛt sɛns, Jizɔs bin tɔk bɔt wan wikɛd slev we bit in kɔmpin slev dɛn. Jizɔs nɔ bin de tray fɔ tɔk se sɔm pan di slev dɛn we fetful ɛn gɛt sɛns go mek wan grup we go tan lɛk da wikɛd slev. Bɔt i bin de wɔn di fetful slev mek dɛn nɔ tan lɛk di wikɛd slev. Semweso, we Jizɔs bin de pul di parebul bɔt di tɛn vajin dɛn, i nɔ bin de tray fɔ tɔk se af pan in anɔyntɛd brɔda dɛn go tan lɛk di vajin dɛn we nɔ gɛt sɛns. Bifo dat, i bin de wɔn in brɔda dɛn bɔt wetin go apin to dɛn if dɛn nɔ pripia ɛn if dɛn nɔ de wach ɔltɛm. * Frɔm ɔl wetin wi dɔn tɔk, wi dɔn si se we Jizɔs pul di parebul bɔt di talɛnt, i nɔ bin de tray fɔ se bɔku pan in anɔyntɛd brɔda dɛn go tɔn to da wikɛd ɛn lezi slev insay di las dez. Bifo dat, Jizɔs bin de wɔn in anɔyntɛd disaypul dɛn fɔ wok tranga wan ɛn “du biznɛs” wit dɛn talɛnt. Dɛn nɔ fɔ tan lɛk da wikɛd slev.—Mat. 25:16.
16. (a) Wetin na di lɛsin dɛn we wi lan frɔm di parebul bɔt di talɛnt? (b) Us nyu we dis atikul dɔn ɛp wi fɔ ɔndastand di parebul bɔt di talɛnt? (Luk di bɔks we se “Ɔndastand di Parebul bɔt di Talɛnt.”)
16 Wetin na di tu lɛsin dɛn we wi lan frɔm di parebul bɔt di talɛnt? Fɔs, wi lan se di Masta, we na Krays dɔn gi in anɔyntɛd slev dɛn sɔntin we valyu to am, dat na di wok fɔ prich ɛn mek pipul dɛn bi in disaypul. Sɛkɔn, wi lan se Krays want lɛ wi ɔl tray tranga wan fɔ prich di gud nyus. If wi du dat, di Masta go blɛs wi bikɔs wi gɛt fet, wi dɔn sho se wi rɛdi, ɛn wi de du wetin i want.—Mat. 25:21, 23, 34.
^ par. 3 Di Julay 15, 2013, Wachtawa (Inglish), pej 21 to pej 22, paregraf 8 to 10 sho udat na di slev we fetful ɛn gɛt sɛns. Di las atikul we wi kɔmɔt, ɛksplen udat na di vajin dɛn. Di Ɔktoba 15, 1995, Wachtawa, pej 23 to pej 28, ɛksplen di parebul bɔt di ship ɛn di got, ɛn di las stɔdi atikul na dis magazin insɛf tɔk bɔt am.
^ par. 4 Rid di bɔks we se “Aw di Parebul bɔt di Talɛnt ɛn di Mayna Fiba?”
^ par. 5 Insay Jizɔs in tɛm, wan talɛnt bin ikwal to 6,000 dinaray. Ɛn dɛn tɛm dɛn de, na wan dinaray dɛn de pe pɔsin we i wok fɔ wan ol de. So dis min se fɔ lɛ pɔsin gɛt wan talɛnt, i fɔ wok fɔ lɛk 20 ia so.
^ par. 8 Afta di apɔsul dɛn day, Setan mek sɔm pipul dɛn bigin tich lay lay tin dɛn ɛn dis bin kɔntinyu fɔ lɔng tɛm. Insay da tɛm de, di prichin wok nɔ bin de go bifo. Bɔt ɔl dat bin chenj we “di avɛst” bigin, dat na di las dez. (Mat. 13:24-30, 36-43) Rid di Julay 15, 2013, Wachtawa (Inglish), pej 9 to pej 12.
^ par. 11 Rid di Julay 15, 2013, Wachtawa (Inglish), pej 7 to pej 8, paregraf 14 to 18.
^ par. 15 Rid di atikul we de bifo dis wan, we gɛt di taytul, “Yu ‘Go De Wach’?” I de na pej 13, paregraf 13.
