1, 2. Bua tshinyi Yezu uvua mufile tshilejilu tshia ntalanta?

MU TSHILEJILU tshia ntalanta, Yezu udi uleja patoke tshidi bayidi bende bela manyi ne bua kuenza. Tudi ne bua kujingulula diumvuija dia tshilejilu etshi bualu tshidi tshilenga nsombelu wa bena Kristo balelela bonso nansha bobu ne ditekemena dia kuya mu diulu anyi dia kushala pa buloba.

² Yezu wakafila tshilejilu tshia ntalanta mu diandamuna dia lukonko lua bayidi bende lua kumanya ‘tshimanyinu tshialeja ne: ukadiku ne tshia ku nshikidilu kua ndongoluelu wa malu eu.’ (Mat. 24:3) Nunku, tshilejilu etshi tshidi tshikumbana mu matuku etu aa ne tshidi tshitupa tshia tshimanyinu tshidi tshileja ne: Yezu udiku ne udi ukokesha bu Mukalenge.

3. Mmalongesha kayi adi mu bilejilu bidibu balonde mu Matayi nshapita wa 24 ne wa 25?

³ Tshilejilu tshia ntalanta ntshimue tshia ku bilejilu binayi bidibu balonde mu Matayi 24:45 too ne ku nshapita wa 25:46. Bilejilu bikuabu bisatu: tshia mupika wa lulamatu udi mudimuke, tshia nsongakaji dikumi itshivua tumama ne tshia mikoko ne mbuji, bidi pabi mu diandamuna dia Yezu dia lukonko lua kumanya tshimanyinu tshia dikalaku diende. Mu bilejilu bionso binayi ebi, Yezu udi uleja malu  masunguluke ikala mua kusunguluja bayidi bende balelela mu matuku a ku nshikidilu aa. Tshilejilu tshia mupika, tshia nsongakaji itshivua tumama ne tshia ntalanta bidi biakula bua bayidi bende bela manyi. Mu tshilejilu tshia mupika wa lulamatu, Yezu udi uleja muvuabi bikengela bua kuikale kasumbu kakese ka bela manyi kadi ne lulamatu ne kadimuke bua kudisha bena mudimu bende mu matuku a ku nshikidilu. Mu tshilejilu tshia nsongakaji itshivua tumama, Yezu udi uleja ne: bayidi bende bela manyi bonso bavua ne bua kuikala badilongolole ne badimuke, bamanye ne: Yezu udi ulua, kadi kabayi bamanye dituku ne dîba didiye ulua. Mu tshilejilu tshia ntalanta, Yezu udi uleja ne: bela manyi bavua ne bua kuikala ne tshisumi mu dikumbaja midimu yabu ya bena Kristo. Yezu udi ufila tshilejilu tshia ndekelu tshia mikoko ne mbuji bua bantu badi ne ditekemena dia kushala pa buloba. Udi uleja ne: badi ne bua kuikala ne lulamatu ne kuambuluisha bikole bana babu ne Yezu bela manyi batshidi pa buloba. * Tukonkononayi mpindieu tshilejilu tshia ntalanta.

4, 5. Muntu anyi mfumu udi tshimfuanyi tshia nganyi? Ntalanta muena dîna uvua ne mushinga kayi?

⁴ Bala Matayi 25:14-30. Katshia ku kale, mikanda yetu mmiumvuije ne: muntu anyi mfumu wa mu tshilejilu etshi n’Yezu, ne uvua muye mu luendu, mmumue ne: pakabandaye mu diulu mu tshidimu tshia 33. Musangu mukuabu, Yezu uvua mufile tshilejilu bua kuleja ne: tshipatshila tshia luendu tshivua tshia “kudia bukalenge.” (Luka 19:12) Yezu kavua mudie bukalenge diakamue pavuaye mupingane mu diulu to. * Kadi, ‘wakasomba ku tshianza tshia balume tshia Nzambi, kutuadijila pine apu windila too ne patekabu bena lukuna bende bu kabasa ka kutekela makasa ende.’​—Eb. 10:12, 13.

⁵ Muntu wa mu tshilejilu etshi uvua ne ntalanta muanda mukulu, tshivua bubanji bua bungi mu matuku au. * Kumpala kua kuya ku luendu, wakabanyina bapika bende ntalanta mutekemene ne: bavua ne bua kuenda nayi mushinga pavuaye uya. Anu bu muntu au, Yezu uvua ne tshintu kampanda tshia mushinga mukole kumpala kua kuyaye mu diulu. Ntshintu kayi atshi? Tudi tupeta diandamuna mu tshivuaye wenza mu nsombelu wende.

6, 7. Ntalanta idi ileja tshinyi?

⁶ Yezu uvua wangata mudimu wende wa kuyisha ne wa kulongesha ne mushinga wa bungi. (Bala Luka 4:43.) Ku diambuluisha dia mudimu eu, uvua mulongolole budimi buvua mua kukuama bintu bia bungi. Kumpala, uvua muambile bayidi bende ne: “Bandulukayi numone madimi mudiwu matoke bua kunowa.” (Yone 4:35-38) Uvua wela meji bua mudimu wa kusangisha bantu ba bungi ba muoyo muimpe bavua ne bua kulua bayidi bende. Anu bu tshidime muimpe, Yezu kavua mua kulekela budimi buvua ne bintu bia kunowa bimane kukola kabuyi ne muntu udi ubutangila to. Nunku, matuku makese yeye mumane kubishibua ku lufu, ne kumpala kua kubandaye mu diulu, wakapesha bayidi bende mudimu munene. Kubambilaye ne: “Nunku, ndayi nuvuije bantu ba mu bisamba bionso bayidi.” (Mat. 28:18-20) Nunku Yezu uvua mubapeshe tshiuma tshia mushinga mukole, mbuena kuamba ne: mudimu wa kuyisha.​—2 Kol. 4:7.

⁷ Mpindieu, ntshinyi tshitudi mua kuamba? Pavua Yezu mupeshe bayidi bende mudimu wa kuvuija bantu bayidi, uvua mu bulelela mubapeshe  “bintu biende,” mmumue ne: ntalanta yende. (Mat. 25:14) Mu mêyi mapepele, ntalanta idi ileja mudimu wa kuyisha ne kuvuija bantu bayidi.

8. Nansha muvua mupika yonso mupete bungi bua ntalanta bushilangane ne bua mukuabu, mfumu uvua mutekemene tshinyi?

⁸ Tshilejilu tshia ntalanta tshidi tshileja ne: mfumu uvua mupeshe mupika umue ntalanta itanu, mukuabu ibidi ne munga umue. (Mat. 25:15) Nansha muvua mupika yonso mupete bungi bushilangane ne bua mukuabu, mfumu uvua mutekemene bua buonso buabu benze nayi mudimu ne tshisumi, mbuena kuamba ne: bayishe ne muabu muonso. (Mat. 22:37; Kolos. 3:23) Mu bidimu lukama bia kumpala, kubangila mu Pentekoste wa 33, bayidi ba Kristo bakatuadija kuenda mushinga ne ntalanta eyi. Mbakule bua tshisumi tshiabu mu mudimu wa diyisha ne divuija bantu bayidi mu mukanda wa Bienzedi. *​—Bien. 6:7; 12:24; 19:20.

9. a) Ntshinyi tshivua bapika babidi ba lulamatu benze ne ntalanta? Bualu ebu budi buleja tshinyi? b) Mmudimu kayi udi nawu “mikoko mikuabu”?

⁹ Mu tshikondo tshia ku nshikidilu, nangananga katshia mu 1919, bapika ba Kristo ba lulamatu bela manyi badi pa buloba badi benda  mushinga ne ntalanta ya Mfumu. Anu bu bapika babidi ba kumpala, bana betu ba balume ne ba bakaji bela manyi mbenze mudimu ne muabu muonso ne bidibu nabi. Kabiena ne mushinga bua kumanya aba bavua bapete ntalanta itanu ne bavua bapete ntalanta ibidi to. Mu tshilejilu etshi, bapika bonso babidi bavua bavudije misangu ibidi tshivua mfumu mubapeshe, nunku bonso babidi bavua ne tshisumi tshia muomumue. Mmudimu kayi udi nawu aba badi ne ditekemena dia kushala pa buloba? Badi ne mudimu wa mushinga mukole. Tshilejilu tshia Yezu tshia mikoko ne mbuji tshidi tshitulongesha ne: bantu badi ne ditekemena dia kushala pa buloba badi ne diakalenga dia kuambuluisha bana babu ne Kristo bela manyi ne lulamatu mu mudimu wa kuyisha ne wa kulongesha. Mu matuku makole a ku nshikidilu aa, bena mu bisumbu bionso bibidi badi benza mudimu pamue bu “tshisumbu tshimue” padibu bakumbaja mudimu wa kuvuija bantu bayidi ne tshisumi.​—Yone 10:16.

10. Mbualu kayi bunene bua mu tshimanyinu tshia dikalaku dia Yezu?

¹⁰ Mfumu uvua muindile bipeta kampanda. Anu mutukavua baleje, bayidi bende ba lulamatu ba mu bidimu lukama bia kumpala bavua bushuwa bavudije bintu biende. Netuambe tshinyi bua mu tshikondo tshietu tshia ku nshikidilu etshi mudi tshilejilu tshia ntalanta tshikumbana? Bena mudimu ba Yezu ba lulamatu mbenze mudimu wa kuyisha ne kuvuija bantu bayidi bikole kupita ne kumpala. Madikolela abu adi ambuluisha bua kupeta bayidi bapiabapia binunu bia bungi badi babuela mu mulongo wa bamanyishi ba Bukalenge tshidimu tshionso, bavuija mudimu wa kuyisha ne kulongesha bualu bunene bua mu tshimanyinu tshia dikalaku dia Yezu bu Mukalenge wa bukole. Bushuwa, bidi ne bua kusankisha Mfumuabu bikole.

11. Ntshinyi tshidi tshitusaka bua kuamba ne: Yezu neajikijangane ne bapika bende mu dikenga dinene?

¹¹ Yezu nealue kujikijangana ne bapika bende ku ndekelu kua dikenga dinene ditshidi kumpala. Ntshinyi tshidi tshitusaka bua kuamba nanku? Mu mulayi wa Yezu wa buprofete udi mu Matayi nshapita wa 24 ne wa 25, uvua muambe muambulule bua dilua diende. Bu muvua dilua edi ditangila dilumbuluisha divua ne bua kuenzeka mu dikenga dinene, wakamba ne: bantu “nebamone Muana wa muntu ulua mu matutu a  mu diulu.” Wakadimuija bayidi bende bavua ne bua kuikala ne muoyo mu matuku a ku nshikidilu bua kuikalabu badimuke wamba ne: “Kanuena bamanye dituku didi Mukalenge wenu ulua” ne “Muana wa muntu udi ulua pa dîba dinudi kanuyi nuelela meji to.” (Mat. 24:30, 42, 44) Nunku, pavua Yezu muambe ne: “mfumu wa bapika abu wakapingana,” uvua bushuwa wakula bua tshikondo tshikalaye mua kulua bua kukumbaja dilumbuluisha ku nshikidilu wa ndongoluelu mubi eu. *​—Mat. 25:19.

12, 13. a) Ntshinyi tshidi mfumu wambila bapika babidi ba kumpala? Bua tshinyi? b) Ndîba kayi didi bela manyi bapeta tshitampi tshiabu tshia ndekelu? (Tangila kazubu ka ne: “ Kubadila Nzambi malu dîba dia lufu.”) c) Ndifutu kayi diapeta bantu badi bu mikoko?

¹² Bilondeshile tshilejilu etshi, padi mfumu ulua, udi usangana ne: bapika babidi ba kumpala: uvua mupete ntalanta itanu ne uvua mupete ibidi, bavua baleje mudibu ne lulamatu, yonso wa kudibu uvua muvudije ntalanta yende misangu ibidi. Mfumu udi ubambila bonso babidi mêyi a muomumue aa: “Udi muenze bimpe, mupika muimpe wa lulamatu! Uvua ne lulamatu mu bintu bikese. Nenkuteke ku mutu kua bintu bia bungi.” (Mat. 25:21, 23) Mpindieu, ntshinyi tshitudi mua kutekemena padi Mfumu anyi Yezu mutumbishibue ulua bua kulumbuluisha mu matuku atshilualua?

¹³ Bantu badi bapika babidi ba kumpala aba baleja, mbuena kuamba ne: bayidi bende bela manyi badi benza mudimu mukole, nebikale bamane kupeta tshitampi tshia ndekelu kumpala kua dikenga dinene kutuadija. (Buak. 7:1-3) Kumpala kua Armagedone, Yezu neikale mumane kubapesha difutu diabu mu diulu. Bantu badi ne ditekemena dia kupeta muoyo pa buloba bavua bambuluishe bana babu ne Kristo mu mudimu wa kuyisha nebikale babadibue bu mikoko ne nebapete diakalenga dia kuikala ne muoyo pa buloba pikala Bukalenge bukokesha.​—Mat. 25:34.

14, 15. Yezu uvuaku usua kuleja ne: tshisumbu tshinene tshia bana babu bela manyi tshivua mua kuenza malu bu mupika mubi muena lulengu anyi? Umvuija.

¹⁴ Mu tshilejilu etshi, mupika wa ndekelu uvua mujike ntalanta wende mu buloba pamutu pa kuenda nende mushinga anyi kumutekesha kudi bena nzubu ya dilamina makuta. Mupika eu uvua muleje muvuaye ne lungenyi lubi bualu uvua mubenge ku bukole bua kupetela mfumuende makasa. Mfumu wakamuamba muvuaye “mupika mubi muena lulengu.” Mfumu wakamunyenga ntalanta ne kumupesha eu uvua ne ntalanta dikumi. Bakela mupika mubi eu “mu mîdima ya pambelu. Muomu amu ke muadidilaye usumakaja menu.”​—Mat. 25:24-30; Luka 19:22, 23.

¹⁵ Mupika muisatu wa mfumu uvua musokoke ntalanta, nunku, Yezu uvuaku musue kuleja muaba eu ne: tshia bisatu tshimue tshia bayidi bende bela manyi tshivua mua kudileja  muvuatshi mupika mubi muena lulengu anyi? Tòo. Tumone tshivua Yezu mufume ku dileja. Mu tshilejilu tshia mupika wa lulamatu udi mudimuke, Yezu uvua muakule bua mupika mubi uvua ukuma bapika nende. Yezu kavua usua kuleja ne: kuvua ne bua kuikala kasumbu ka mupika mubi to. Kadi, uvua udimuija mupika wa lulamatu bua kubenga kuenza malu bu mupika mubi. Bia muomumue, mu tshilejilu tshia nsongakaji dikumi itshivua tumama, Yezu kavua uleja ne: tshia bibidi tshia bayidi bende bela manyi tshivua ne bua kuikala bu nsongakaji itanu mipote itshivua tumama to. Kadi, uvua udimuija bana babu ba mu nyuma bua tshivua mua kubafikila bobu kabayi badimuke ne kabayi badilongolole. * Bilondeshile malu aa, mbikumbane bua kuamba ne: mu tshilejilu tshia ntalanta, Yezu kavua wamba ne: tshisumbu tshinene tshia bana babu bela manyi ba mu matuku a ku nshikidilu tshivua mua kulua mupika mubi muena lulengu to. Kadi Yezu uvua udimuija bayidi bende bela manyi bua kuikalabu ne tshisumi tshia ‘kuenduluka mushinga ne ntalanta yabu’ ne kuepuka lungenyi ne bienzedi bia mupika mubi.​—Mat. 25:16.

16. a) Mmalongesha kayi atudi bapete mu tshilejilu tshia ntalanta? b) Mmunyi mudi tshiena-bualu etshi tshiakaje ngumvuilu wetu wa tshilejilu tshia ntalanta? (Tangila kazubu ka ne: “ Ngumvuilu wa tshilejilu tshia ntalanta.”)

¹⁶ Mmalongesha kayi abidi atudi bapete mu tshilejilu tshia ntalanta? Dia kumpala, Mfumu anyi Kristo mmupeshe bapika bende bela manyi tshintu tshidiye wangata ne mushinga wa bungi, mbuena kuamba ne: mudimu wa kuyisha ne kuvuija bantu bayidi. Dibidi, Kristo mmutekemene bua tuetu bonso tuikale ne tshisumi mu mudimu wa kuyisha. Tuetu benze nunku, netuikale batuishibue ne: Mfumu neatufute bua ditabuja dietu, budimu buetu ne lulamatu luetu.​—Mat. 25:21, 23, 34.