1, 2. Ang’o momiyo Yesu nogoyo ngero mar talanta?

E NGERO mare mar talanta, Yesu nonyiso maler ting’ ma jolupne mowal ne nigo. Dwarore wawinj tiend ngerono nikech omulo ngima Jokristo duto madier, bed ni gin gi geno mar dhi e polo kata mar dak e pinyka.

² Yesu nogoyo ngero mar talanta kaka achiel kuom dwoko ma nochiwo ne jopuonjrene ma nopenje kama: “En ranyisi mane ma biro nyiso ni intie, kendo ni giko mar ndalo okayo machiegni?” (Math. 24:3) Kuom mano, weche manie ngerono chopo e kindewagi kendo en achiel kuom gik ma nyiso ni Yesu nosebedo Ruoth.

3. Gin puonj mage ma wayudo e ngeche ma yudore e Mathayo sula 24 kod 25?

³ Ngero mar talanta en achiel kuom ngeche ang’wen ma yudore e Mathayo 24:45 nyaka 25:46. Ngeche adek mamoko ma Yesu nogoyo e wi jatichno mogen kendo mariek, nyiri apar ma silili, kod rombe gi diek bende gin dwoko ma nochiwo kowuoyo e wi gik ma ne dhi nyiso ni en e loch. E ngeche ang’wen-go duto, Yesu wuoyo e wi kido ma ne dhi fwenyo jolupne madier e ndalo mag giko. Ngero ma nogoyo e wi jatich mogen, nyiri ma silili, kod talanta, wuoyo achiel kachiel e wi jolupne mowal. E ngero mar jatich mogen, Yesu  jiwo kaka owete matin mowal ma nigi migawo mar pidho joode chiemb chuny e ndalo mag giko, nonego obed mogen kendo mariek. E ngero mar nyiri ma silili, Yesu nojiwo ni jolupne mowal duto ne dwarore obed moikore kendo motang’, ka ging’eyo ni Yesu ne biro kata bed ni ne ok ging’eyo odiechieng’ sie kata sa ma ne odhi moloe. E ngero mar talanta, Yesu nyiso ni Jokristo mowal ne dwarore obed gi kinda e tich momigi. E ngero mar rombe gi diek Yesu wuoyo e wi joma nigi geno mar dak e piny. Ojiwo ahinya ni ne dwarore gikony owete Yesu mowal ma pod nie piny kendo giriwgi lwedo. * Koro we wanon ane ngero mar talanta e yo matut.

4, 5. Ruoth ochung’ne ng’a e ngero mar talanta, to talanta achiel ne nengone romo nade?

⁴ Som Mathayo 25:14-30. Kuom kinde malach, bugewa osebedo ka lero ni ruoth manie ngerono en Yesu, kendo ni ne odhi wuoth mabor kane odok e polo e higa mar 33. E ngero machielo ma dwa chalo gi mano, Yesu nowacho gimomiyo nodhi e wuoth maborno. Ne odhi “mondo okete kaka ruoth.” (Luka 19:12) Kane odok e polo, Yesu ok noket ruoth e Pinyruodh Nyasaye kanyo gi kanyo. * Kar mano, ‘ne obet piny e bad Nyasaye korachwich chakre kindeno ka dhi nyime, korito nyaka chop kinde ma wasike ne onego oket obed kaka raten tiendene.’—Hib. 10:12, 13.

⁵ Ruoth ma nie ngerono ne nigi talanta aboro ma ne en mwandu mang’eny ahinya e kindego. * Ka pok nodhi e wuoth ma raborano, nomiyo wasumbnine talanta kogeno ni gidhi loko kodgi ohala kosedhi. Mana kaka ruodhno, Yesu bende ne nigi gimoro ma nengone tek ka pok odhi e polo. Gino ne en ang’o? Dwoko otudore gi tich ma notiyo e ngimane ka en e piny.

6, 7. Talanta ochung’ ne ang’o?

⁶ Yesu nokawo tij lendo kod puonjo ji kaka tich maduong’ ahinya. (Som Luka 4:43.) Kokalo kuom tij lendono, noyawo thuolo mondo tijno otim e okang’ malach kendo nyak ne dhi yudore e okang’ maduong’ miwuoro. Noyudo osenyiso jopuonjrene kama: “Ting’uru wang’u malo kendo une puothe, kaka gichiek moromo keyo.” (Joh. 4:35-38) Nong’eyo ni nitie ji mang’eny ma ne chunygi ni kare ne dhi bedo jopuonjrene. Mana kaka japur maber, Yesu ne ok nyal weyo ma ok olimo puodho ma nong’eyo ni ne dhi kelo nyak miwuoro. Omiyo, kinde matin bang’ chierne ka pok odhi e polo, nomiyo jopuonjrene ote mapekni: “Dhiuru e ogendni duto mondo ulok ji obed jopuonjrena.” (Math. 28:18-20) Omiyo, Yesu nomiyogi ting’ ma jaber minyalo pim gi mwandu ma nengone tek ahinya, ma en tij lando wach maber.—2 Kor. 4:7.

⁷ Kuom mano, wanyalo chopo e paro mane? Sama Yesu ne omiyo jolupne ting’ mar timo ji jopuonjrene, ne chal ka  gima omiyogi “gige,” ma tiende ni talanta mage. (Math. 25:14) Kokete e yo mayot, talanta ochung’ ne ting’ mar lendo kod timo ji jopuonjre.

8. Kata obedo ni wasumbni ok noyudo talanta marom, ruodhgi nogeno ang’o koa kuomgi?

⁸ Ngero mar talanta nyiso maler ni ruoth nomiyo misumba achiel talanta abich, machielo ariyo, to moro nomiyo talanta achiel. (Math. 25:15) Kata obedo ni misumba ka misumba noyudo talanta ma ok romre gi jowetene, ruoth nogeno ni ne gidhi bedo gi kinda mar tiyo gi talantago, ma tiende ni, tiyo gi nyalogi duto e tij lendo. (Math. 22:37; Kol. 3:23) E kinde Jokristo mokwongo kochakore Pentekost 33, jolup Kristo nochako loko ohala gi talanta ma nomigi. Kindagi e tij lendo kod timo ji jopuonjre ondik malong’o ndi e bug Tich Joote. *—Tich 6:7; 12:24; 19:20.

9. (a) Wasumbni ariyo notimo ang’o gi talanta ma nomigi, to mano nonyiso ang’o? (b) “Rombe mamoko” to nigi ting mane?

⁹ E kinde mag giko to ahinya wuon kochakre higa 1919, jolup Kristo mowal mosebedo komakore kode osebedo ka loko ohala gi talanta mag Ruodhgi. Mana kaka wasumbni ariyo mokwongo,  owete gi nyimine mowal osetemo kar nyalogi e timo tij lendo. Onge tiende mondo wachak nono ni ng’ano ma noyudo talanta abich to ng’ano ma noyudo ariyo. E ngerono, wasumbni ariyogo nomedo nyadiriyo mwandu ma ruodhgi nomiyogi. Kuom mano giduto ne gin jokinda. Joma nigi geno mar dak e piny nigi ting’ mane? Gin gi ting’ maduong’! Ngero ma Yesu nogoyo e wi rombe gi diek puonjowa ni joma nigi geno mar dak e piny nigi thuolo makende mar riwo lwedo owete Yesu mowal e tij lendo ka gipuonjo ji. E kinde gikogi ma ngima osebedo matek, grube ariyogi tiyo kanyachiel ka gin “kueth achiel” kendo gikonyo ji gi kinda mondo obed jopuonjre Yesu.—Joh. 10:16.

10. Gima duong’ ma nyiso ni Yesu nie e kom loch en mane?

¹⁰ Ruoth ne ni kare geno ni nyak ne dhi bedoe. Mana kaka osewach motelo, jopuonjrene mokwongo ma nomakore kode nomedo mwanduge adier. To nade e kinde mag gikogi ma weche ma nokor e ngero mar talantano chopoe? Jopuonjre Yesu osebedo ka tiyo matek e chwalo tij konyo ji obed jopuonjrene e okang’ ma pok notimgo tijno nyaka nene. Kindagi giduto osemiyo ji alufu miche omedre higa ka higa e kwan mar joland wach Pinyruoth, to mano osemiyo tij lendo kod puonjo ji obedo ranyisi makende ahinya ni Yesu nie e kom loch e Pinyruodh Nyasaye. Onge kiawa ni Ruodhgi mor sidang’!

11. Ang’o momiyo wanyalo wacho ni Yesu biro nono kar kwan mar pesane e kinde masira maduong’?

¹¹ Masira maduong’ sani okayo machiegni kendo kochomo gikone, Yesu nobi goyo kwan gi wasumbnine. Ang’o momiyo wanyalo wacho kamano? E weche ma Yesu nokoro ma yudore e Mathayo sula mar 24 kod 25, nowuoyo e wi birone nyadinwoya. Kowuoyo e wi ng’ado bura ma ne dhi timore kinde masira maduong’, nowacho ni ji ne dhi neno “Wuod dhano ka biro e boche polo.” Nojiwo jolupne modak e ndalo giko mondo obed motang’ kowachonegi niya: “Ok ung’eyo ni en chieng’ mane ma Ruodhu biroe.” Nomedo niya: “E sa ma  ok upar ni e en, e ma Wuod dhano biroe.” (Math. 24:30, 42, 44) Omiyo kane Yesu owacho ni “ruodh wasumbnigo nobiro mondo onon kwan pesago kodgi,” nyaka bed ni nowuoyo e wi kinde ma nodhi biro mondo ong’ad bura ne piny marachni. *—Math. 25:19.

12, 13. (a) Ang’o ma ruoth nyiso wasumbni ariyo mokwongo, to nikech ang’o? (b) En kinde mane ma Jokristo mowal iketonegie alama mogik? (Ne sanduku ma wiye wacho ni “ Gininyis Kaka Gisetiyo gi Talanta Sama Githoe.”) (c) En pok mane ma joma ibiro pwodhi ni gin rombe biro yudo?

¹² Kaluwore gi ngerono, kane ruoth obiro, noyudo ka wasumbnine ariyo, ma achiel nomiyo talata abich to machielo ariyo, nonyiso ni gin wasumbni mogen nikwop ne gitimo ohala ma pesgi onyuol nyadiriyo. Ruodhno nowacho gimoro achiel ne wasumbnigo duto: “Itimo maber, in misumba maber kendo mogen! Isebedo ng’at migeno kuom gik manok. Abiro keti e wi gik mang’eny.” (Math. 25:21, 23) Omiyo, en ang’o mwanyalo geno ni Yesu ka koro en Ruoth momi duong’, biro timo kobiro ng’ado bura kinde mabiro?

¹³ Joma ipimo gi wasumbni ariyo mokwongo tiende ni jopuonjrene mowal ma notiyo matek, biro yudo ka oseketnegi alama mogik ka masira maduong’ pok otugore. (Fwe. 7:1-3) Yesu biro miyogi pok mar bedo e polo ka pok Har–Magedon ochakore. Joma nigi geno mar dak e piny kendo mosebedo ka konyo owete Kristo e tij lendo, biro yudo kosepwodhi ni gin rombe kendo nomigi thuolo mar dak e piny ka gin raia mag Pinyruoth.—Math. 25:34.

14, 15. Be Yesu ne temo wacho ni kwan mogwaro mar owetene mowal ne dhi lokore ma bed maricho kendo ma josamwoyo? Ler ane.

¹⁴ E ngero mar talanta, misumba mogik noyiko talantane kar timogo ohala kata kete e bengi. Ne ni ne en misumba marach nikech noyiko talantane goyiem, ka ruodhe to nogeno ni odhi lokogo ohala. Mano e momiyo ruodhe noluonge ni “misumba marach kendo ma jasamwoyo.” Ruodhe nokawo talanta ma ne en godono mi omiyo misumba ma ne nigi talanta apar. Kae to misumba ma nonono ne owit “oko e mudho.” “Kanyo e kama ywagruokne kod muodo lekene” ne dhi bedoe.—Math. 25:24-30; Luka 19:22, 23.

¹⁵ Nikech misumba achiel kuom adekgo nopando talantane, be Yesu ne temo wacho ni kuom jolupne duto mowal achiel kuom adek e kindgi ne dhi bedo misumba marach kendo ma  jasamwoyo? Ooyo. Non ane weche molworo ngerono. E ngero mar jatich mogen kendo mariek, Yesu nowuoyo e wi jatich kata msumba marach ma ne ogoyo wasumbni wetene. Yesu ok ne wach kata koro ni kueth mar misumba marach ne dhi sieko bang’e. Kar mano, nosiemo jatich mogen kik bed gi kido kod timbe mag misumba marach. Bende, e ngero mar nyiri apar ma silili, Yesu ok ne wach ni nus mar jolupne mowal ne dhi bedo ka nyiri abich mofuwo. Kar mano, nonyiso owetene mowal gima ne dhi timorenegi kapo ni ok gitang’ kendo ok gibedo moikore. * Omiyo, ka luwore gi ndiko molworo ngero mar talantani, wanyalo wacho ni Yesu ok ne wach ni kwan mogwaro mar owete mowal ne dhi bedo maricho kendo ma josamwoyo e kinde giko. Kar mano, Yesu ne siemo jolupne mowal ni gisik gi kinda tiende ni ‘gilok ohala’ gi talanta maggi, kendo kik gibed gi paro kod timbe mag misumba marach.—Math. 25:16.

16. (a) Gin puonj mage ma wayudo e ngero mar talanta? (b) Sulani okonyowa nade medo ng’eyo maler tiend ngero mar talanta? (Ne sanduku ma wiye wacho ni “ Be Ing’eyo Tiend Ngero mar Talanta?”)

¹⁶ Gin puonj ariyo mage ma wayudo e ngero mar talanta? Mokwongo, Ruoth ma en Kristo osemiyo jolupne mowal tich moro minyalo pim gi mwandu ma nengone tek gilala. Tijno en ting’ mar lendo kendo timo ji jopuonjrene. Mar ariyo, Kristo dwaro ni wabed jokinda e tijwa mar lendo. Kwasiko ka wan gi yie, ka watang’, kendo ka wamakore kode, wanyalo bedo gadier ni Ruoth biro guedhowa.—Math. 25:21, 23, 34.