Talent Tehkhin Thu Aṭangin Inzir Rawh
“Bawi pakhat hnênah talent nga a pe a, bawi dang hnênah talent hnih a pe a, bawi dang hnênah talent khat a pe a.”—MT. 25:15.
1, 2. Engvângin nge Isua’n talent tehkhin thu hi a sawi?
TALENT tehkhin thu-ah Isua chuan a hnungzuitu hriak thihte mawhphurhna chu a târ lang chiang hle a. Lei lam beiseina kan nei emaw, vân lam beiseina kan nei emaw pawh ni se, Kristian dik zawng zawngte tân a pawimawh avângin, he tehkhin thu awmzia hi kan hriatthiam a ngai a ni.
2 Isua chuan a hnungzuite’n ‘a lo awm lehna leh khawvêl tâwpna chhianchhiahna’ an zawh khân, a chhânnaah talent tehkhin thu a sawi tel a. (Mt. 24:3) Chuvângin, tehkhin thu thlen famkimna chu tûn hunah hian kan hmu a, chu chu Isua a lo awm lehna leh Lal anga ro a rêl tawhzia chhinchhiahna a ni.
3. Matthaia bung 24 leh 25-a chhinchhiah tehkhin thute aṭangin eng thute nge zirtîr kan nih?
3 Talent tehkhin thu hi Matthaia 24:45 aṭanga 25:46-a chhinchhiah inzawmna nei tehkhin thu palite zînga mi a ni a. A dang pathumte—bâwih rinawm leh fing tak te, nula thianghlim sâwm te, leh kêl leh berâm te—chu Isua’n a lo awm lehna chhinchhiahna a sawite zîngah a tel vek a ni. He tehkhin thu pali-ah hian, Isua chuan hêng ni hnuhnûnga a hnungzuitu dik takte thliar hrangtu miziate a sawi lang a. Bâwih, nula thinghlim, leh talent tehkhin thute hi Isua hnungzuitu hriak thihte chungchâng a ni. Bâwih rinawm chungchâng tehkhin thu-ah, Isua chuan ni hnuhnûnga a chhûngte châwmtu tûr hriak thihte zînga pâwl tlêm tê tân rinawm leh fin a ngaihzia a sawi uar a. Nula thianghlim tehkhin thu-ah, a hnungzuitu hriak thih zawng zawngte chuan Isua a lo kal leh dâwn tih hre mah se, a nî leh a hun tûr an hriat loh avângin, inbuatsaih reng leh harhvâng taka an awm a ngai dâwn tih a sawi uar bawk a. Talent tehkhin thu-ah, Isua chuan hriak thihte’n an Kristian mawhphurhnate chu taima taka an hlen a ngai dâwn tih a târ lang a ni. Tehkhin thu hnuhnûng berah, Isua chuan lei lam beiseina neite tân kêl leh berâm tehkhin thu a sawi bawk. Anni chu an rinawmin, leia Isua hriak thih unaute chu an ṭanpui tûr a ni tih a sawi uar a ni. * Tûnah chuan talent tehkhin thu hi i lo ngaihtuah ang u.
PU BER CHUAN A BAWIHTE HNENAH SUM TAM TAK A PE
4, 5. Mi, a nih loh leh pu ber chuan tu nge a entîr a, talent khat chu eng ang taka hlu nge a nih?
4 Matthaia 25:14-30 chhiar rawh. Tehkhin thu-a mi, a nih loh leh pu ber chu Isua a nih thu leh ram danga a kalna chu C.E. 33-a vâna a lâwnna a ni tiin, hun rei tak ata tawh kan thu leh hla chhuahte chuan a lo hrilhfiah tawh a. A hmaa a sawi tehkhin thu dang pakhatah, Isua chuan a zin chhuah chhan chu, ‘ram awpna thu la tûr’ a nih thu a sawi lang a ni. (Lk. 19:12) Isua chuan vâna a lâwn veleh Lalram thu neihna a chelh nghâl lo. * Chu aimahin, “Pathian ding lamah a han ṭhu ta zâwk a; chuta chin chu a hmêlmate a kephah nghahchhana siam an nih hma loh zawng a nghâk reng” a ni.—Heb. 10:12, 13.
5 Tehkhin thu-a mi chuan talent riat a nei a, chu chu an hun lai tân chuan sum tam tham tak a ni. * A zin chhuah hmain, a bâwihte hnênah a talent neihte chu a sem a, a zin hlâna lo sumdâwng tûrin a beisei a ni. Chu pa ang bawkin, Isua chuan vâna a lâwn hmain thil hlu tak engemaw a nei a. Chu chu eng nge ni? Leia a awm laia a hnathawh hi a ni.
6, 7. Talent chuan eng nge a entîr?
6 Isua chuan thu hrilh leh zirtîrna hna chu a ngai pawimawh hle a. (Luka 4:43 chhiar rawh.) Chu mi hmang chuan, rah tam tak chhuah tûr lo a enkawl kan ti thei ang. A hmain, a zirtîrte hnênah: “Dâk ulang lote en rawh u, tûn apangin seng tûrin a êng a ni,” a ti a. (Joh. 4:35-38) A sawi tum chu a zirtîr lo la ni tûr mi rilru ṭha pu tam takte lâk khâwm hi a ni. Lo neitu ṭha ang bawkin, Isua chuan buh seng hun tawh a lo chu a kalsan mai lo vang. Chuvângin, a thawh leh hnua vâna a lâwn hmain, a zirtîrte hnênah mawhphurhna lian tak a pe a ni: ‘Chutichuan kal ula, zirtîrahte siam rawh u,’ tiin. (Mt. 28:18-20) Chutiang chuan, Isua’n anni chu Kristian rawngbâwlna ro hlu tak a kawltîr a ni.—2 Kor. 4:7.
7 Chuti chu, eng thu tâwp nge kan siam theih? A hnungzuitute hnêna zirtîr siam tûra mawhphurhna a pêk khân, Isua chuan an hnênah “a sumte”—a talent-te—a kawltîr tih theih a ni a. (Mt. 25:14) A awlsam zâwnga sawi chuan, talent chuan thu hrilh leh zirtîr siam tûra kan neih mawhphurhna a entîr a ni.
8. Bâwihte talent dawn zât chu inang lo mah se, pu ber chuan an lakah eng nge a beisei?
8 Talent tehkhin thu-ah, pu ber chuan bâwih pakhat hnênah talent nga, bâwih dang hnênah talent hnih, bâwih dang leh hnênah talent khat a pe tih târ lan a ni a. (Mt. 25:15) Talent an dawn zât chu inang lo mah se, pu ber chuan an talent dawnte chu taima taka hmang tûrin a beisei ṭheuh va, chu mi awmzia chu an theihna zawng zawngin rawngbâwlnaah an tel tûr a ni tihna a ni. (Mt. 22:37; Kol. 3:23) Kum zabi khatna, C.E. 33 Penticost nî aṭanga inṭanin, Krista hnungzuitute chuan talent nên an sumdâwng ṭan a. Thu hrilh leh zirtîr siamnaa an taihmâkzia chu Bible-a Tirhkohte bu-ah chhinchhiah a ni. *—Tirh. 6:7; 12:24; 19:20.
TAWPNA HUNA TALENT NENA SUMDAWNNA
9. (a) Bâwih pahnihte chuan an talent dawn chu engtin nge an hman a, chu chuan eng nge a târ lan? (b) ‘Berâm dangte’ chuan eng chanvo nge an neih?
9 Tâwpna hun, a bîk takin kum 1919 hnu lamah chuan, leia awm Krista hriak thih bâwih rinawmte chu an Pu talent hmangin an sumdâwng a. Bâwih pakhatna leh pahnihnate ang bawkin, hriak thih unaunu leh unaupate chuan theih tâwp chhuahin an thawk a ni. Tuin nge talent nga dawng a, tuin nge talent hnih dawng tih chu ngaihtuah buai a ngai lo. Tehkhin thu-ah, an pu thil pêk a lêta an tihpun ve ve avângin, an taihmâk dân chu a inang a ni. Lei lam beiseina neite chuan eng chanvo nge an neih? Chanvo pawimawh tak an nei! Isua sawi kêl leh berâm tehkhin thu chuan, lei lam beiseina neite’n Isua hriak thih unaute chu thu hrilhnaah leh zirtîrnaah rinawm taka ṭanpui theihna chanvo hlu an nei a. Hêng ni hnuhnûng hun khirh tak chhûng hian, pâwl hnihte chuan “pâwl khat” angin, zirtîr siamnaah ṭhahnemngai takin an thawk dûn a ni.—Joh. 10:16.
10. Isua lo kal lehna chhinchhiahna langsâr tak chu eng nge ni?
10 Pu ber tân a rah chhuah beisei chu thil inâwm tak a ni a. A hmaa kan sawi tawh angin, kum zabi khatnaa a hnungzuitu rinawmte chuan a sumte chu an tipung tak zet a ni. Talent tehkhin thu thlen famkimna he tâwpna hunah hian an tipung ve em le? Isua bâwih rinawm leh taima tam tak chuan mihring chanchina thu hrilh leh zirtîr siamna hna ropui ber chu an thawk chhuak a. A huhova theih tâwp an chhuahna zârah, kum tinin Lalram puang chhuaktu a nuai têlin an pung a, thu hrilh leh zirtîr siamna chu Isua Lalram thu neihna nêna a lo awm lehna chhinchhiahna langsâr tak a nihtîr a ni. An Pu ber chu a va lâwm dâwn tak êm!
Krista chuan a chhiahhlawhte chu thu hrilh theihna mawhphurhna sâng tak a kawltîr (Paragraph 10-na en rawh)
SUM CHANCHIN TIFEL TURIN ENG HUNAH NGE PU BER CHU A LO KAL ANG?
11. Isua’n a sum chanchin chu hrehawm nasa tak chhûngin a tifel ang tih engtin nge kan hriat theih?
11 Lo thleng thuai tûr hrehawm nasa tak tâwp dâwn lamah, Isua chu a bâwihte nêna sum chanchin tifel tûrin a lo kal dâwn a. Engtin nge kan hriat theih? Matthaia bung 24 leh 25-a chhinchhiah a hrilh lâwknaah, Isua chuan a lo kal tûr thu vawi tam tak a sawi a. Hrehawm nasa tak chhûnga a rorêlna tûr a sawinaah, Isua’n mite chuan “mihring Fapa hi . . . vân chhûm chunga lo kal an hmu ang,” tiin a sawi a. Ni hnuhnûnga awm a hnungzuitute chu harhvâng taka awm tûrin a hrilh a ni: “Eng niah nge in Lalpa a lo kal dâwn in hre si lo,” tiin leh “in rin loh hunah mihring Fapa a lo kal dâwn si a,” tiin. (Mt. 24:30, 42, 44) Chuvângin, Isua’n “chûng bawiho pu chu a lo haw a, an hnênah a sum chanchin a tifel a,” tia a sawi hian, he khawvêl tâwpa rorêl tûra a lo kal hun tûr a sawina a ni thei ang. *—Mt. 25:19.
12, 13. (a) Engtin nge pu ber chuan bâwih pahnihte chu a chhân lêt a, engvângin nge? (b) Engtikah nge hriak thihte chuan chhinchhiahna hnuhnûng ber chu an dawn ang? (“ Thih Huna Sum Chanchin Tihfelna,” tih thuziak chu en rawh.) (c) Rorêlnaa berâm anga pawmte chuan eng lâwmman nge an dawn ang?
12 Tehkhin thu-ah khân, pu ber a lo kal chuan bâwih pahnih te—talent nga leh talent hnih dawngte—chu an rinawmin, an talent dawnte chu a lêtin an tipung ve ve tih a hmu a. Pu ber chuan, chu bâwih pahnihte hnênah heti hian a hrilh ve ve a ni: “Bawi ṭha leh rinawm, i ti ṭha e; tlêmte chungah i rinawm a, tam tak chungah ka awmtîr ang che,” tiin. (Mt. 25:21, 23) Chuti chu, Pu ber, chawimawia awm Isua rorêl tûra a lo kal hunah eng nge kan beisei theih?
13 Chûng bâwih pahnihin a entîrte—hriak thih taima takte—chuan hrehawm nasa tak a lo thlen hmain chhinchhiahna hnuhnûng ber an dawng tawh ang. (Thup. 7:1-3) Armageddon a lo thlen hmain, Isua’n an beisei vân lam lâwmman chu an hnênah a pe ang. Thu hrilhnaa Krista unaute ṭanpuitu lei lam beiseina neite chu rorêlnaah berâm anga pawm an ni ang a, Lalram lei lam pênga nun theihna chanvo pêk an ni bawk ang.—Mt. 25:34.
BAWIH SUAL LEH ZAWMTHAW
14, 15. Isua chuan a unau hriak thih tam takte chu an sualin, an zawmthaw ang tih a sawi em? Hrilhfiah rawh.
14 Tehkhin thu-a bâwih hnuhnûng ber chuan a talent chu sumdâwn nâna hman emaw, sumdâwngtute hnêna dah emaw aiin a thukru zâwk a. He bâwih hian pu ber ṭhatna tûra thil a tih loh avângin, rilru put hmang ṭha lo a lantîr a ni. Pu ber chuan ani chu ‘bâwih sual leh zawmthaw,’ tiin a chung thu a rêl a ni. Pu ber chuan a hnêna a talent chu a lâksak a, talent sâwm neitu hnênah a pe a. Bâwih sual chu ‘thimah an paih chhuak a, chutah chuan ṭah leh ha ṭhialna chu a awm ang.’—Mt. 25:24-30; Lk. 19:22, 23.
15 Pu ber bâwih pathum zînga pakhatin a talent a thuhrûk avângin, Isua hnungzuitu hriak thih hmun thuma ṭhena hmun khat chu an sualin, an zawmthaw ve ang tihna a ni em? Ni lo. A chhehvêl thu kha han ngaihtuah teh. Bâwih rinawm leh fing tak tehkhin thu-ah, Isua chuan a bâwihpuite lo vêltu bâwih sual pakhat chungchâng a sawi a. Hei hi Isua’n bâwih sual pâwl an lo awm dâwn tih a sawina a ni lo. Chu aimah chuan, bâwih rinawm chu bâwih sual miziate la lo tûra a vaukhânna a ni. Chutiang bawkin, nula thianghlim sâwm tehkhin thu-ah, Isua chuan hriak thih a hnungzuitu zînga a zâtve chu nula thianghlim â pangate ang an ni ang tih a sawina a ni lo. Chu aimahin, thlarau lama a unaute chu harhvânna an hloh va, an inbuatsaih loh chuan an chungah eng nge thleng thei tih a vaukhânna a ni. * Hêng thute ngaihtuah hian, talent tehkhin thu-ah Isua chuan ni hnuhnûng chhûnga a unau hriak thih tam takte chu an sualin, an zawmthaw ang tih a sawina a ni lo tia thu tâwp siam chu a inâwm ngei ang. Chutianga sawi a hnêkin, Isua chuan a hnungzuitu hriak thihte tân bâwih sual rilru put hmang leh thiltih dânte pumpelh a, taihmâk chhuah reng—an talent neihte hmanga ‘sumdâwn’ reng—a pawimawhzia hriattîrin a vaukhânna zâwk a ni.—Mt. 25:16.
16. (a) Talent tehkhin thu aṭangin eng nge kan zir? (b) He thuziak hian talent tehkhin thu-a kan hriatthiam dân chu engtin nge a siam ṭhat? (“ Talent Tehkhin Thu Chu Hre Thiam Rawh,” tih thuziak chu en rawh.)
16 Talent tehkhin thu aṭangin eng thil pahnih nge kan zir? A hmasain, Pu ber, Krista chuan a ngaihhlut êm êm thu hrilh leh zirtîr siam hna chu a chhiahhlawh hriak thihte a kawltîr a. A pahnihnaah, Krista chuan kan vaiin thu hrilh rawngbâwlnaa taihmâk chhuah tûrin min beisei vek a ni. Chutianga kan tih chuan, Pu ber chuan kan rinna te, kan harhvânna te, leh kan rinawmna te chu mal a sâwm ang tih kan chiang thei a ni.—Mt. 25:21, 23, 34. (w15-E 03/15)
^ par. 3 Bâwih rinawm fing tak chungchâng chu Vênnainsâng, July 1, 2013, phêk 27-28, paragraph 8-10-naah târ lan a ni a. Nula thianghlimte nihna chungchâng chu he magazine-a thuziak hmasaah hrilhfiah a ni bawk. Kêl leh berâm tehkhin thu chu Vênnainsâng, [English] October 15, 1995, phêk 23-28-ah hrilhfiah a ni tawh a, he magazine-a a dawta thuziakah hrilhfiah leh a ni ang.
^ par. 4 “ Talent leh Rangkachak Tangka Tehkhin Thute Inanna” tih thuziak chu en rawh.
^ par. 5 Isua hun laiin, talent khat chu duli 6,000 nên a intluk a. Nikhatah duli pakhat an hlawh avângin, hna thawktu pângngai tân talent khat hmu tûrin kum 20 vêl thawh a ngai dâwn a ni.
^ par. 8 Tirhkohte an thih hnuah Setana chuan kal pênna chu a chawk chhuak a, chu chu kum zabi tam tak chhûng a ṭhang chho a ni. Chu mi hun chhûng chuan, Krista zirtîr dik tak siam tûra mawhphurhna hlen tûrin ṭan lâk reng a ni lo. Mahse, chu chu ni hnuhnûnga “buh seng” hun chhûngin a inthlâkthleng vek dâwn a ni. (Mt. 13:24-30, 36-43) Vênnainsâng, July 1, 2013, phêk 15-18-na en rawh.
^ par. 15 Tûn ṭum chhuaka, “I ‘Ngaihven’ Reng Ang Em?” tih thuziak, paragraph 13-na en rawh.
