1, 2. ¿Tiko Jesus tmaytyaky ja ijxpajtënë mä ja talentë?

JESUS ojts tmaytyaˈaky tuˈugë ijxpajtën mä ja talentë parë yˈëxpëjkpëty tnijawëdët ti yëˈë tsyejpy ets ttundët. Mbäät niˈamukë xypyudëjkëmë tyäˈädë maytyaˈaky oy nëjkxäˈänëm tsäjpotm o njukyˈatäˈänëm yä Naxwiiny. Pääty, tsojkëp jawyiin njaygyujkëm wiˈix nyikejˈyë tyäˈädë ijxpajtën.

² ¿Näˈä Jesus ttukmëtmaytyakyë tyäˈädë ijxpajtënë ja yˈëxpëjkpëty? Ko ojts tnaskäjpxë tijaty tunan jatanëp ko nety të tyëkë anaˈambë jam tsäjpotm ets ko nety të tsyondaˈaky ja tiempë diˈib jëjpkëxanëp (Mateo 24:3, TNM). Pääty ta tyam yˈadëy extëmë Jesus tmaytyaky ja talentë.

3. ¿Ti xytyukniˈˈijxëm tijatyë Jesus myaytyak mä Matewʉ kapitulo 24 etsë 25?

³ Ko Jesus ojts tnigajpxy tijaty tunan jatanëp mä tiempë diˈib jëjpkëxanëp, ta tmaytyaky taxkë ijxpajtën diˈib niˈamukë yˈëxpëjkpë mbäät ttundë. Tyäˈädë jap yajpääty mä Matewʉ 24:45 axtë 25:46. Diˈib tim jawyiin myaytyakypy yëˈë ja tuumbë diˈib kuwijy,  tuk grupë Dios mëduumbë diˈib nëjkxandëp tsäjpotm diˈib yajtijp, Diˈib wyooyoˈoytyëbë Jyobaa tyestiigëty. Ko Jesus tmaytyaky, yëˈë parë ttukniˈˈijxë pënaty nëjkxandëp tsäjpotm ko jëjpˈam ets nyayaˈitëdët kuwijy ets ninäˈä tkamastuˈuttëdë Dios. Myëmajtsk, yëˈë myaytyak ja nimäjkpë toˈoxyˈënäˈk. Mëdë tyäˈädë ijxpajtën, tˈanmääy niˈamukë pënaty nëjkxandëp tsäjpotm ko jëjpˈam nyayjëjpˈixëdët ets nyayaˈitëdët wijy mët ko kyaj tnijawëdë näˈä myinäˈäny. Myëdëgëëk yëˈë myaytyak ja talentë, parë ttukniˈˈixëyaˈany ko pënaty nëjkxandëp tsäjpotm tsojkëp ttundëdë mëjää parë mëk tyundët ets tkuytyundët diˈib të yajtuknipëktë. Myëmäjtaxk yëˈë myaytyak ja tsyiibë mëdë borreegë, diˈib xytyukniˈˈijxëm ko niˈamukë nuˈun njukyˈatäˈänëm yä Naxwiiny ninäˈä mbäät ngamastutëmë Dios ets ko tsojkëp nbudëjkëm pënaty nëjkxandëp tsäjpotm. * Mä tyäˈädë artikulo yëˈë yajnimaytyäˈägäämp ja talentë.

4, 5. 1) ¿Pën duˈun näjxp extëm ja wintsën diˈib yajmaytyakp mä ja talentë? 2) ¿Nuˈun ja meeny tyuktalentëty? (Ixë notë.)

⁴ (Käjpxë Matewʉ 25:14-30.) Ko Jesus tnimaytyaky ja talentë, yëˈë myaytyak tuˈugë wintsën diˈib ojts tsyoony. Ets nan ojts jatëgok tmaytyaˈaky tuˈugë yetyëjk diˈib ojts tsyoony parë tyunäˈäny rey (Lukʉs 19:12). * Mä ëxpëjkpajn kanäk jëmëjt të yajnimaytyaˈaky ko tyäˈädë nimajtskpë yetyëjk, yëˈë yˈandijpyë Jesus ets ko mä jëmëjt 33 ojts pyatëkë tsäjpotm. Per ko kyaj tyuundëjkë rey mä tadë jëmëjt, jaanëm 1914, ko tpëjtaky ja “myëtsipëty” extëmë tyeky pyatkëyë (Ebreeʉsʉty 10:12, 13).

⁵ Mä nety kyatsoonyëm ja wintsën, ta tmëjwooy ja tyuumbëtëjk ets tmooy tuktujkë talentë, tyäˈädë kajaa meeny ijty. * Ets tˈanmääy parë dyajtundët ets dyaˈuˈunkˈattët. Tyäˈädë wintsën mëjwiin kajaa nety dyajtsobääty ja tuktujkpë talentë. Duˈun extëmë Jesus mëjwiin kajaa dyajtsobaty ja tuunk diˈib tyuun yä Naxwiiny.

6, 7. ¿Ti yˈandijpy ja talentë?

⁶ Jesus jëjpˈam tpëjtaky tkäjpxwäˈkxët ja oybyë ayuk. Ko duˈun ttuuny, ta nimayë jäˈäy ojts pyanëjkxyëty (käjpxë Lukʉs 4:43). Per nyijäˈäwëbë nety ko kajaanëm ja tuunk yˈakwëˈëmy. Pääty tˈanmääy ja yˈëxpëjkpëty: “¡Ixtë kam! Të pëjtaˈaky tyëtsnë es të tpääty ja tiempë es pyëdëˈëgët” (Fwank 4:35-38). Jesus ojts tˈijxkijpxyë ko yajkäjpxwaˈkxy ja oybyë ayuk mëdë pëjtaˈaky diˈib të  tyëtsnë. Ets ko yëˈë, duˈun extëm tuˈugë oybyë kugam diˈib yajxon yˈijxypy ets ja pëjtaˈaky myujktäˈäyët. Pääty mä nety kyanëjkxynyëm tsäjpotm, ta ttuknipëjky ja yˈëxpëjkpëty ets kyäjpxwäˈkxtët (2 Korintʉ 4:7). Duˈun tˈanmääy: “Nëjx yaˈëxpëktë jäˈäyëty mä tëgekyë naxwinyëdë esëts ëj njäˈäyˈattët” (Matewʉ 28:18-20).

⁷ Duˈun extëm ja wintsën ojts ttmoˈoy ja talentë tyuumbëtëjk, nanduˈunë Jesus ojts ttuknipëky pënaty nëjkxandëp tsäjpotm ets tkäjpxwäˈkxtët ja oybyë ayuk (Matewʉ 25:14). Pääty ja talentë, yëˈë yˈandijpy ko tnikëjxmˈattë tkäjpxwäˈkxët ja oybyë ayuk ets tpudëkëdët ja jäˈäy parë tpanëjkxtëdë Jesus.

8. Ja wintsën wiˈixëm ja tyuumbëtëjk tmooy ja talentë, per ¿ti nety yˈawijxypy ttundët?

⁸ Ja wintsën ja tmooy ja tim jawyiimbë tyuumbë, mëgoxkë talentë, ja myëmajtskpë tmooy majtsk, ets ja myëdëgëëkpë jeˈeyë tmooy tuˈuk (Mateo 25:15, TNM). Wiˈixëm ja tyuumbëtëjk tmooy ja talentë. Per yˈawijxypyë nety ets nidëgëëk ttundëdë mëjää ets niˈigyë dyaˈuˈunkˈattët. Nanduˈunë Jesus, yˈawijxypyë nety ets pënaty nëjkxandëp tsäjpotm tpëjtäˈäktëdë jyot myëjää mä tkäjpxwäˈkxtë ja oybyë ayuk (Matewʉ 22:37; Kolosʉ 3:23). Mä jëmëjt 33, ko tyuunë ja Pentekostes xëë, ta dyajtuuntsondaktë ja talentë ko ttukmëtmaytyaktë ja oybyë ayuk pënatyë nety  wiink paˈis tsoˈondëp. Mä Apostʉlʉty jap yajnimaytyaˈaky ko mëk tyuundë (Apostʉlʉty 6:7; 12:24; 19:20). *

9. 1) ¿Ti tyuundë ja nimajtskpë tuumbë? 2) ¿Ti xytyukniˈˈijxëm? 3) ¿Ti tsojkëp ttundët pënaty jukyˈatandëp yä Naxwiiny?

⁹ Ja nimajtskpë tuumbë diˈib niˈigyë yajˈuˈunkˈäjttë ja meeny, yëˈë yˈandijpy pënaty nëjkxandëp tsäjpotm diˈib kyaj tmastuˈuttë Dios. Desde 1919, mëk tyundë parë tkäjpxwäˈkxtë ja oybyë ayuk. Jesus ojts jyënaˈany ko tyäˈädë nimajtskpë tuumbë kyaj tuknax yajmooytyë ja talentë. Per kyaj yëˈë tˈandijy ko majtsk grupë jyaˈˈaty pënaty nëjkxandëp tsäjpotm, mët ko nimajtsk mëk tyuundë ets tmooytyë ja wyintsën diˈibë nety të dyaˈuˈunkˈattë. Ets ¿ti tyuundëp pënaty jukyˈatandëp yä Naxwiiny? Ko Jesus tmaytyaky ja tsyiibë mëdë borreegë yëˈë xytyukˈijxëm ko tsojkëp tmëmëdowdët ets tpudëkëdët pënaty nëjkxandëp tsäjpotm. Ets mëjwiin kajaa tmëjjawëdë ko duˈun ttundë. Tuˈugyë tyundë extëmxyëp yajpäättë “tuk kajpëˈëk” mä tkäjpxwäˈkxtë ja oybyë ayuk ets tpudëkëdë jäˈäy parë tpanëjkxtëdë Jesus (Fwank 10:16).

10. ¿Ti tuk pëky diˈib jëjpˈamë Jesus ojts tnaskäjpxë yˈadëwäˈäny mä tiempë jyëjpkëxanë?

¹⁰ Jesus yˈawijxypy ets mëk nduˈunëm niˈamukë parë niˈigyë jäˈäy nyajtëjkëm ëxpëjkpë, extëm ttuundë ja Dios mëduumbë mä primer siiglë. Ets tyam, ¿tuundëp mëkë Dios mëduumbë mientrës yˈadëy extëmë Jesus tnimaytyaky ja talentë? Tuundëp, pes ninäˈänëmë nety duˈun kyayajkäjpxwaˈkxy ja oybyë ayuk extëm tyam. Ko niˈamukë mëk tyundë, ta milˈamë jäˈäy nyëbattë tuˈuk tuˈugë jëmëjt, diˈib nanduˈun käjpxwäˈkxtëp.  ¡Seguurë ko Jesus jantsy jotkujk nyayjawëty! Tukëˈëyë tyäˈädë, yëˈë xytyukˈijxëm ko tuk pëky diˈibë Jesus jëjpˈam ojts tnaskäjpxë mä tiempë jyëjpkëxanë, yëˈë ko yajkäjpxwäˈkxäˈäny ja oybyë ayuk.

11. ¿Wiˈix nnijäˈäwëm ko minäämbë Jesus ko nety tyunyëty ja mëk ayoˈon?

¹¹ Jesus jyënany: “Të naty oy jyajknë ko jyajty ja wyintsën. Ta tyëjkë kuentë tuumbë” (Matewʉ 25:19). ¿Näˈä jyäˈtäˈäny ja wintsën o Jesus? Ko nety jyëjpkëjxnë ja mëk ayoˈon. ¿Wiˈix nnijäˈäwëm? Min nˈokˈijxëm. Mä Matewʉ kapitulo 24 etsë 25, kanäkˈok japë Jesus jyënany ko myinäˈäny. Extëm nˈokpëjtakëm, jyënany ko jäˈäy tˈixäˈändë myiny “ja Naxwinyëdë Jäˈäyëtyë Kyudënaabyë, yootsoty”. Tyäˈädë ja yˈadëwäˈäny ko nety tyuny jyatyëty ja mëk ayoˈon, ko netyë Jesus myiny parë tpayoˈoyaˈanyë naxwinyëdë jäˈäy. Jesus nan ojts jyënaˈany ko tsojkëp nnayaˈijtëm wijy mä tiempë jyëjpkëxanë. Jyënany: “Kyaj xynyijawëdë ti oorë dëˈën myinäˈäny ja mWintsënëty”. Nanduˈun jyënany: “Mët ko mä naty xykyaˈˈawix xykyajëjpˈixtë, jaats nminäˈäny ëj, ja Naxwinyëdë Jäˈäyëtyë Kyudënaabyë” (Matewʉ 24:30, 42, 44). Pääty ko Jesus tmaytyaky ja talentë, nan ojts tmaytyaˈaky ko myinäˈäny parë jäˈäy tpayoˈoyaˈany ets dyajkutëgoyaˈanyë Satanásë jyaˈay. *

12, 13. 1) ¿Wiˈix ja wintsën tˈanmääy ja nimajtskpë tyuumbë, ets tiko? 2) ¿Näˈä yajtsäˈäyandäˈäy pënaty nëjkxandëp tsäjpotm? (Ixë rekuäädrë “ Ko yˈooktë, ta kyupëkëdë Dios”.) 3) ¿Ti Jesus tyukumayaampy pënaty pyudëjkëdëp diˈib nëjkxandëp tsäjpotm?

¹² Ko ja wintsën jyëmbijty, ta tˈanmääy ja nimajtskpë tyuumbë: “Oymyëduumbë mij. Extëm oy të mduny mä waanë të ndukëdëkë, nˈaktimtukëdëkëp waanë may” (Matewʉ 25:21, 23). ¿Tiko duˈun tˈanmääy? Yëˈko ja tim jawyiimbë tuumbë të nety dyaˈuˈunkˈaty nan ja mëgoxkë talentë ets ja myëmajtskpë tuumbë, nan të nety dyaˈuˈunkˈaty nan ja majtskë talentë. ¿Ti tyäˈädë yˈandijpy? O ja tuk pëky njënäˈänëm, ¿ti Jesus tyunaampy ko myinët?

 ¹³ Ko nety tsyondäˈäganë ja mëk ayoˈon, ta Jyobaa ttsäˈäyandäˈäy pënaty nëjkxandëp tsäjpotm, tyäˈädë yëˈë yˈandijpy ko Jyobaa kyupëkäˈänëdë (Diˈibʉ Jatanʉp 7:1-3). Ets mä kyaminynyëm ja Armajedon, ta Jesus yajnëjkxäˈänëdë tsäjpotm. ¿Ets wiˈix jyatäˈändë pënaty jukyˈatandëp yä Naxwiiny ets të tpudëkëdë pënaty nëjkxandëp tsäjpotm? Yëˈë Jesus payoˈoyanëdëp ets yëˈë yˈixaampy pënaty yajnäjxypy extëmë borreegë. Tyäˈädë yëˈë yˈandijpy ko ttukumayaˈanyë jukyˈäjtënë yä Naxwiiny mä yëˈë yajkutukäˈäny (Matewʉ 25:34).

14, 15. ¿Wiˈix nnijäˈäwëm ko Jesus kyaj yëˈë tˈandijany ko nimay diˈib nëjkxandëp tsäjpotm jyëmbitäˈändë axëkjäˈäy ets nuux?

¹⁴ ¿Ets ti tyuun ja myëdëgëëkpë tuumbë? Jesus tnimaytyaky ko kyaj dyaˈuˈunkˈäjty ja talentë. Nan kyaj ojts tmënëjkxy mä bankë parë tˈaxäjët ja yˈajuytyuk, jeˈeyë ojts tnitäjy. Ta ja wyintsën yˈanmääyë ko nyuuxëty ets ko yˈaxëkmëduumbëty. Ta ojts tpëjkë ja talentë ets tmooy ja tim jawyiimbë tuumbë. Ets ta ojts tniˈanaˈamë ets yajjëbijpëtsëmët mä ja tyëjk ets yajpëjtäˈägët “mä ja kootsˈat”. Mä ojts jyantsy jyëˈëy jyantsy yaˈaxy (Matewʉ 25:24-30; Lukʉs 19:22, 23).

¹⁵ Ko pyëtsëëmy tuˈugë axëkjäˈäy mä ja nidëgëëkpë mëduumbë, ¿yëˈë yˈandijpy ko mä nidëgëëkpë Dios mëduumbë diˈib nëjkxandëp tsäjpotm, tuˈuk diˈib myastutypyë Dios? Kyaj. ¿Wiˈix nnijäˈäwëm? Ko nˈijxkijpxyëm wiˈix yajnimaytyaˈaky ja tuumbë diˈib kuwijy ets  ja nimäjkpë toˈoxyˈënäˈk. Ko Jesus tnimaytyaky ja tuumbë diˈib kuwijy, ta jyënany ko tamë nety tuˈugë axëkmëduumbë diˈib pyajëdijtypy ja wiinkpë tuumbëtëjk. Perë Jesus kyaj nety yëˈë tˈandijäˈäny ko pyëtsëmäˈäny axëkjäˈäybyë mä diˈib yajtijtëp tuumbë diˈib kuwijy. Diˈibë nety myaytyäˈägaampy yëˈë ets nyaygyuentˈatëdët parë kyaj jyëmbittët extëm ja axëkmëduumbë. Ets ko Jesus nanduˈun tnimaytyaky ja nimäjkpë toˈoxyˈënäˈk, ta jyënany ko nimëgoxk diˈib tsuujëty. Per kyaj yëˈë tˈandijany ko nigujkwaˈkxy diˈib nëjkxandëp tsäjpotm yˈitäˈändë tsuu. Diˈibë Jesus myaytyäˈägan, yëˈë ko niˈamukë diˈib nëjkxandëp tsäjpotm, tsojkëp nyayjëjpˈixëdët ets nyayaˈitëdët wijy. * Nanduˈun mbäät njaygyujkëm ko tnimaytyaky ja talentë. Jesus kyaj yëˈë tmaytyäˈägany ko pënaty nëjkxandëp tsäjpotm nimay jyëmbitäˈändë axëkjäˈäy. Yëˈë duˈun tyukˈawäˈänë ets mëk tyundët ets kyaj jyëmbittët nuux extëm ja axëkmëduumbë (Matewʉ 25:16).

16. 1) ¿Ti xytyukniˈˈijxëm mä yajmaytyaˈaky ja talentë? 2) Extëm mä tyäˈädë artikulo të yajnimaytyaˈaky, ¿wiˈix mijts xynyimaytyäˈägët ja talentë? (Ixë rekuäädrë “ ¿Wiˈix nyiwijy nyikejy mä yajmaytyaˈaky ja talentë?”.)

¹⁶ ¿Ti xytyukniˈˈijxëm mä yajmaytyaˈaky ja talentë? Majtsk pëky diˈib xytyukniˈˈijxëm. Tuk pëky, ko Jesus të ttuknipëky pënaty nëjkxandëp tsäjpotm tuˈugë tuunk diˈib jëjpˈam. ¿Diˈibë tuunk? Ko yëˈë nyikëjxmˈäjttëp ets yajkäjpxwäˈkxët ja oybyë ayuk etsë jäˈäy tyëkëdët ëxpëjkpë. Majtsk pëky, ko Jesus yˈawijxypy ets niˈamukë mëk nduˈunëm mä ngäjpxwäˈkxëm. Pën xëmë ngäjpxwäˈkxëm ets nduˈunëm tukëˈëyë diˈibë Jesus xytyukˈanaˈamëm, ta nëjkx xymyoˈoyëm ja kumäˈäyën (Matewʉ 25:21, 23, 34).