1, 2. Etke Jijej ear kwal̦o̦k bũrabõl̦ eo kõn tal̦õn ko?

 JIJEJ ear kwal̦o̦k bũrabõl̦ eo kõn tal̦õn ko ñan kaalikkar ñan rũkkapit ro kõn ta jerbal ak eddo eo aer. Bõtab, bũrabõl̦ in ewõr tokjãn ñan aolep Kũrjin ro rem̦ool. Kõn men in, jej aikuj jel̦ã kõn mel̦el̦ein bũrabõl̦ in jekdo̦o̦n ñe kõjatdikdik eo ad ej ñan mour ilañ ak mour ilo lal̦ in.

² Ñããt eo Jijej ear kwal̦o̦k kõn bũrabõl̦ in? Ear kwal̦o̦ke ilo iien eo ke ear ba ñan rũkal̦oor ro an kõn kakõl̦l̦e ko me renaaj kaalikkar bwe em̦õj an jino Kiiñ im kõn raan ko ãliktata. (Matu 24:3) Kõn men in, bũrabõl̦ in kõn tal̦õn ko ej bar m̦õttan kakõl̦l̦e ko kar kwal̦o̦k kaki im ej kiiõ jejjet kitien ilo raan kein ad.

3. Ta ko jej katak jãn bũrabõl̦ ko ilo bokin Matu jebta 24 im 25?

³ Ke Jijej ear kwal̦o̦k kõn bũrabõl̦ eo kõn tal̦õn ko, ear bar kwal̦o̦k jilu bũrabõl̦ ko me rar bar m̦õttan kakõl̦l̦e ko kõn raan ko ãliktata. Aolep bũrabõl̦ kein rej kwal̦o̦k kõn men ko me Kũrjin ro rem̦ool rej aikuj kwal̦o̦ki. Jemaroñ riiti bũrabõl̦ kein ilo bokin Matu 24:45 ñan 25:46. Bũrabõl̦ eo kein kajuon ej kõn rũkarejar eo etiljek im mãlõtlõt, eo im ej juon kumi edik in rũkkapit ro im eddo eo aer ej ñan katakin armej ro an Jeova. Rein rej  aikuj tiljek im mãlõtlõt. * (Lale kõmel̦el̦e eo itulal̦.) Bũrabõl̦ eo tok juon ej kõn bõjin ro 10. Ilo bũrabõl̦ in, Jijej ear kakkõl aolep rũkkapit ro bwe rej aikuj pojak im ekkõl wõt kõnke rejaje raan eo im awa eo enaaj itok. * (Lale kõmel̦el̦e eo itulal̦.) Ãlikin men in, Jijej ear kwal̦o̦k kõn bũrabõl̦ eo kõn tal̦õn ko ñan katakin aolep rũkkapit ro bwe rej aikuj kate er ilo aer kõm̦m̦ane eddo ko aer. Innem ãliktata, Jijej ear kwal̦o̦k kõn bũrabõl̦ eo kõn jiip ko im koot ko. Bũrabõl̦ in ej ñan ro me kõjatdikdik eo aer ej ñan mour ilo lal̦ in. Jijej ear kwal̦o̦k bwe rein rej aikuj tiljek wõt im kate er joñan wõt aer maroñ ñan jipañ im rejetake rũkkapit ro jatin ilo lal̦ in. * (Lale kõmel̦el̦e eo itulal̦.) Katak in jej pojak in etale enaaj kwal̦o̦k mel̦el̦ein bũrabõl̦ eo kõn tal̦õn ko.

4, 5. (1) Em̦m̦aan eo ilo bũrabõl̦ eo kõn tal̦õn ko ej jitõñl̦o̦k ñan wõn? (2) Ta in tal̦õn?

⁴ Riit Matu 25:14-30. Ilo bũrabõl̦ eo kõn tal̦õn ko, Jijej ear kwal̦o̦k kõn juon em̦m̦aan me ear etal ñan juon jikin. Ilo bar juon bũrabõl̦ me ãinl̦o̦kwõt bũrabõl̦ in, Jijej ear kwal̦o̦k kõn juon em̦m̦aan me ear etal ñan juon jikin im erom kiiñ. * (Lale kõmel̦el̦e eo itulal̦.) (Luk 19:12, UBS) Elõñ iiõ in an bok ko ad kwal̦o̦k bwe em̦m̦aan eo ilo bũrabõl̦ kein ruo rej jitõñl̦o̦k ñan Jijej, eo im ear etal ñan lañ ilo iiõ eo 33. Bõtab, Jijej ear jab kajju erom juon Kiiñ ke ear etal ñan lañ. Ear kõttar m̦ae iiõ eo 1914 ke kar “likũt ro rej kõjdate bwe ren eran neen.”​—Hibru 10:12, 13, UBS.

⁵ Jijej ear ba bwe ear wõr an em̦m̦aan eo ilo bũrabõl̦ in 8 tal̦õn. Joñan oran jããn in ear lukkuun l̦ap. * (Lale kõmel̦el̦e eo itulal̦.) M̦okta jãn an kar em̦m̦aan in etal, ear lel̦o̦k jããn kein an ñan rũkarejar ro an. Ear ba ñan er bwe ren kõjerbal jããn kein an ñan koorl̦o̦ki. Em̦m̦aan in ear lukkuun kaorõk jããn kein an. Ejja ãindein wõt ippãn Jijej, ewõr juon men me el̦ap an kaorõke. Ta in? Ej jerbal eo me ear kõm̦m̦ane ke ear pãd ilo lal̦ in.

6, 7. Tal̦õn ko rej kõkkar kõn ta?

⁶ Jerbalin kwal̦o̦k naan ear l̦ap an aorõk ippãn Jijej. Kõn an kar kwal̦o̦k naan, elõñ rar erom rũkal̦ooran. (Riit Luk 4:43, UBS.) Bõtab, ear jel̦ã bwe ejjañin dedel̦o̦k jerbal in im ej lõñ wõt armej renaaj erom rũkal̦ooran. Ilo m̦ool, ear ba ñan rũkal̦oor ro an: “Kom̦win reilo̦k, im lale jikin kallib ko; bwe kiiõ remouj ilo iien m̦adm̦õd.” (Jon 4:35-38) Juon rũkallib eban etal jãn atake eo an ñe ejel̦ã bwe ekalo leen im eiien m̦adm̦õd. Ãindein kar bar Jijej. M̦okta wõt jãn an kar jepl̦aak ñan lañ, ear jiroñ rũkal̦oor ro an im ba: “Kom̦win ilo̦k, im kõm̦m̦an riaelõñ ko otemjej bwe ren rũkal̦oora.” (Matu 28:18-20) Ilo an kar Jijej lel̦o̦k naanin jiroñ in ñan er, ej ãinwõt ñe ear lel̦o̦k juon men eaorõk ñan er. Men in eaorõk ej jerbalin kwal̦o̦k naan.​—2 Korint 4:7.

⁷ Ãinwõt an kar em̦m̦aan eo lel̦o̦k tal̦õn ak jããn ñan rũkarejar ro an, Jijej ear lel̦o̦k ñan rũkal̦oor ro an jerbal eo ñan kõm̦m̦an rũkal̦oor. (Matu 25:14) Kõn men in, tal̦õn ko rej kõkkar kõn jerbal ak eddo eo ñan kwal̦o̦k naan im kõm̦m̦an rũkal̦oor.

8. Ta eo irooj eo ear kõtmãne bwe rũkarejar ro an ren kõm̦m̦ane meñe ear oktak joñan jããn ko ear lil̦o̦k ñan kajjojo iaaer?

 ⁸ Jijej ear ba bwe irooj eo ear lel̦o̦k 5 tal̦õn ñan rũkarejar eo kein kajuon, 2 tal̦õn ñan rũkarejar eo kein karuo, im 1 tal̦õn ñan rũkarejar eo kein kajilu. (Matu 25:15) Meñe eoktak joñan jããn ko irooj in ear lil̦o̦k ñan er, ak ear kõtmãne bwe aolepeer ren kate er joñan wõt aer maroñ ñan koorl̦o̦k jããn ko. Ilo ejja wãween in wõt, Jijej ej bar kõtmãne bwe rũkkapit ro ren kate er joñan wõt aer maroñ ilo jerbalin kwal̦o̦k naan. (Matu 22:37; Kolosse 3:23) Ilo kar Pentekost eo ilo iiõ eo 33, rũkal̦oor ro an Jijej rar jino kõm̦m̦an rũkal̦oor jãn aolep aelõñ ko. Im ñe jej riiti bokin Jerbal, jemaroñ lo joñan aer kar kate er ilo jerbal in. * (Lale kõmel̦el̦e eo itulal̦.)​—Jerbal 6:7, UBS; 12:24, UBS; 19:20, UBS.

9. (1) Ta eo rũkarejar ro ruo me retiljek rar kõm̦m̦ane kõn jããn ko irooj eo ear lil̦o̦k ñan erro, im ta eo jej katak jãn men in? (2) Ta eo ro me kõjatdikdik eo aer ej ñan mour ilo lal̦ in rej aikuj kõm̦m̦ane?

⁹ Rũkarejar eo kein kajuon im rũkarejar eo kein karuo ear jim̦we aer kõjerbal jããn ko  an irooj eo aer. Rũkarejar rein rej jitõñl̦o̦k ñan em̦m̦aan im kõrã ro me rej rũkkapit im rej tiljek ñan Anij ilo raan ko ãliktata. Jãn kar iiõ eo 1919, elukkuun l̦ap aer kate er ilo jerbalin kwal̦o̦k naan. Ilo bũrabõl̦ eo, ear oktak joñan jããn ko kar lil̦o̦k ñan rũkarejar ro ruo, bõtab ejjab mel̦el̦ein bwe ewõr ruo kumi in rũkkapit ro me reoktak jãn doon. Rũkarejar rein ruo rar jim̦or kate er jerbal im kar ruo alen an l̦apl̦o̦k joñan oran jããn ko kar lil̦o̦k ñan kajjojo iaaerro. Bõtab, rũkkapit ro rej ke ro wõt me rej aikuj in kate er ilo jerbalin kwal̦o̦k naan im katakin armej ro? Ejjab. Bũrabõl̦ eo an Jijej kõn jiip ko im koot ko ej katakin kõj bwe ro me kõjatdikdik eo aer ej ñan mour indeeo ilo lal̦ in, rej aikuj jipañ im rejetak rũkkapit ro jatin Jijej ilo jerbalin kwal̦o̦k naan im tiljek wõt ñan er. Rej kile bwe ej juon jeraam̦m̦an ñan jipañ im rejetak rũkkapit ro. Aolep armej ro an Jeova rej “juon wõt bwij,” im aolep rej kate er ilo jerbal eo ñan kwal̦o̦k naan im kõm̦m̦an rũkal̦oor.​—Jon 10:16.

10. Ta juon iaan kakõl̦l̦e ko me rej kam̦ool bwe jej mour ilo raan ko ãliktata?

¹⁰ Jijej ej kõtmãne bwe aolep ro rej l̦oore ren kate er ñan kõm̦m̦an rũkal̦oor. Eñin men eo rũkal̦oor ro ilo epepen eo kein kajuon rar kõm̦m̦ane. Ak ta kõn raan kein ãliktata me ejejjet kitien bũrabõl̦ in, ro rej l̦oore Jijej rej ke kõm̦m̦ane jerbal in? Aet. Elukkuun lõñl̦o̦k armej rej roñ kõn ennaan eo em̦m̦an im rej erom rũkal̦oor! Kõnke aolep ro rej l̦oore Jijej rej kate er ilo jerbal in, elõñ to̦ujin armej ro rej peptaij kajjojo iiõ. Rein rej bareinwõt kobatok im bõk kun̦aaer ilo jerbalin kwal̦o̦k naan. Kõn an aolep kate er ilo jerbal in im kõn an l̦ap tõprak ko rej wal̦o̦k, men in ej lukkuun kam̦ool bwe jerbalin kwal̦o̦k naan ej juon iaan m̦õttan kakõl̦l̦e ko raorõk me Jijej ear kwal̦o̦k kaki me rej kakõl̦l̦en raan ko ãliktata. Ejjel̦o̦k pere bwe el̦ap an Jijej m̦õn̦õn̦õ kõn rũkarejar ro an!

11. Ewi wãween ad jel̦ã bwe Jijej enaaj itok ak jepl̦aaktok ilo iien eñtaan eo el̦ap?

¹¹ Jijej ear ba: “Ãlikin juon iien eaetok irooj eo an rũkarejar ro ear jepl̦aaktok im etale l̦okwan jerbal ko aer.” (Matu 25:19, UBS) Irooj eo ej kõkkar kõn Jijej, im enaaj etale jerbal ko an rũkarejar ro ilo jem̦l̦o̦kinl̦o̦k iien eñtaan eo el̦ap. Ewi wãween ad jel̦ã men in? Ke Jijej ear kwal̦o̦k kanaan eo ilo Matu jebta 24 im 25, elõñ alen an kar kõnnaan  kõn an naaj itok. Ñan waanjoñak, ear ba bwe armej renaaj “lo Nejin Armej ej itok ilo kõdo̦ ko ilañ.” Men in ej jitõñl̦o̦k ñan iien eñtaan eo el̦ap ñe Jijej enaaj ekajete armej ro. Ear bareinwõt kakkõl ro rũkal̦ooran me renaaj mour ilo raan ko ãliktata bwe ren ekkõl wõt. Ear ba: “Kom̦ jaje ilo raan et Irooj enaaj itok.” Ear bar ba: “Ilo awa [eo] kom̦ij jab l̦õmn̦ak, Nejin Armej ej itok.” (Matu 24:30, 42, 44) Innem, ke Jijej ear kwal̦o̦k bũrabõl̦ eo kõn tal̦õn ko, ear bar jitõñl̦o̦k ñan iien eo me enaaj itok im ekajete armej ro im jol̦o̦k jukjukun pãd in an Setan. *​—Lale kõmel̦el̦e eo itulal̦.

12, 13. (1) Ta eo irooj eo ej ba ñan rũkarejar ro ruo, im etke? (2) Ñããt eo rũkkapit ro rej bõk sil eo aer ãliktata? (Bar lale bo̦o̦k eo etan “Rej Bõk Sil eo Aer ñe Rej Mej.”) (3) Ta jeraam̦m̦an eo ro rej jipañ im rejetake rũkkapit ro renaaj bõke?

¹² Ke irooj eo ear jepl̦aak jãn ijo ear etal ñane, ear lo bwe rũkarejar eo me ear lel̦o̦k 5 tal̦õn ñane ear jerbal im kõm̦m̦ane bar 5 tal̦õn, im rũkarejar eo me ear lel̦o̦k 2 tal̦õn ñane ear jerbal im kõm̦m̦ane bar 2 tal̦õn. Irooj eo ear ba ñan kajjojo iaaerro im ba: “Em̦m̦an am̦ kõm̦m̦an kwe karejera em̦m̦an im tiljek. Kwaar tiljek kõn men kã reiet, Inaaj kairooj eok ioon men ko rellõñ.” (Matu 25:21, 23) Ta eo Irooj eo ak Jijej enaaj kõm̦m̦ane ñe enaaj itok ak jepl̦aaktok ilo raan ko repãd im̦aan?

¹³ M̦okta wõt jãn iien eñtaan eo el̦ap, Anij enaaj sili rũkkapit ro ilo lal̦ in me renaaj mour wõt ilo tõre en̦. Eñin ej sil eo renaaj bõke ãliktata im ej kaalikkar an Anij buñbũruon kake er kõn aer kate er ilo jerbal ko aer. (Revelesõn 7:1-3) Innem, m̦okta jãn Armagedon, Jijej enaaj lel̦o̦k jinõkjeej eo aer bwe ren mour ilañ. Ak ta kõn ro me kõjatdikdik eo aer ej ñan mour ilo lal̦ in im rar rejetake rũkkapit ro ilo jerbalin kwal̦o̦k naan? Eokwe, naaj ekajete rein im kaalikkar bwe rej uwaan jiip ko. Rein renaaj bõk jeraam̦m̦an eo ñan mour ilo lal̦ in ñan indeeo ium̦win tõl eo an Aelõñ eo an Anij.​—Matu 25:34.

14, 15. Ke Jijej ear kwal̦o̦k kõn rũkarejar eo enana im jowan, mel̦el̦e eo an ej ke bwe elõñ iaan rũkkapit ro renaaj oktak im nana im jowan? Jouj im kõmel̦el̦e.

¹⁴ Bũrabõl̦ in ej bar kwal̦o̦k kõn rũkarejar eo me kar lel̦o̦k 1 tal̦õn ñane. Ear jab kõjerbal jããn eo ñan koorl̦o̦k oran ak likũti ilo pããñ bwe en wõr nejin. Bõtab, ear bõk jããn eo im kalibwini. Irooj eo ear ba bwe rũkarejar in ear nana im jowan. Kõn men in, ear bõk tal̦õn eo jãn rũkarejar in enana im lel̦o̦k ñan rũkarejar eo kein kajuon. Innem ear jol̦o̦k rũkarejar in enana ñan juon jikin ‘emarok,’ ijo ear jañ im bũrom̦õj ie.​—Matu 25:24-30; Luk 19:22, 23, UBS.

¹⁵ Ke Jijej ear ba bwe juon iaan rũkarejar ro jilu ear nana im jowan, ejjab mel̦el̦e eo an in bwe juon m̦õttan jilu in rũkkapit ro renaaj  ãinwõt rũkarejar in. Jejel̦ã men in ñe jej keidi bũrabõl̦ in ippãn bũrabõl̦ ko ruo m̦oktal̦o̦k. Ilo bũrabõl̦ eo an Jijej kõn rũkarejar eo etiljek im mãlõtlõt, ear bar kwal̦o̦k kõn juon rũkarejar enana, eo im ear kaeñtaan rũkarejar ro an. Ke Jijej ear kwal̦o̦k men in, ejjab mel̦el̦e eo an in bwe ro rej uwaan rũkarejar eo etiljek im mãlõtlõt renaaj oktak im nana. Ear kwal̦o̦k kõn rũkarejar eo enana kõnke en kakkõl rein bwe ren jab oktak im ãinwõt rũkarejar in enana. Innem, ilo bũrabõl̦ eo an kõn bõjin ro 10, Jijej ear kwal̦o̦k kõn bõjin ro 5 me rebwebwe. Ejjab mel̦el̦e eo an Jijej in bwe jimattanin rũkkapit ro renaaj jet ro im rebwebwe. Bõtab, ear kwal̦o̦k kõn men in ñan kakkõl rũkkapit ro kõn ta eo enaaj wal̦o̦k ñan er ñe rejjab pojak im ekkõl wõt. * (Lale kõmel̦el̦e eo itulal̦.) Ejjel̦o̦k oktak bũrabõl̦ kein jãn bũrabõl̦ eo kõn tal̦õn ko. Ejjab mel̦el̦e eo an Jijej in bwe elõñ iaan rũkkapit ro ilo raan ko ãliktata renaaj nana im jowan. Bõtab, Jijej ear kakkõl rũkkapit ro an bwe rej aikuj in ekkõl wõt bwe ren jab oktak im ãinwõt rũkarejar eo enana, ak ren wõnm̦aanl̦o̦k wõt im kate er ilo jerbalin kwal̦o̦k naan.​—Matu 25:16

16. (1) Ta men ko ruo jej katak jãn bũrabõl̦ eo kõn tal̦õn ko? (2) Ewi wãween an katak in jipañ kõj ñan mel̦el̦e kõn bũrabõl̦ eo kõn tal̦õn ko? (Lale bo̦o̦k eo etan “ Ta Mel̦el̦e ko Ad kõn Bũrabõl̦ eo kõn Tal̦õn Ko?”)

¹⁶ Ta men ko ruo jej katak jãn bũrabõl̦ eo kõn tal̦õn ko? Kein kajuon, jej katak bwe Jijej ear lel̦o̦k juon men eaorõk ñan rũkal̦oor ro an me rej rũkkapit. Ear lel̦o̦k jerbal eo eaorõk ñan kwal̦o̦k naan im kõm̦m̦an rũkal̦oor. Kein karuo, jej katak bwe Jijej ej kõtmãne bwe jen aolep kate kõj ilo jerbalin kwal̦o̦k naan. Ñe jej kijenmej wõt ilo ad kõm̦m̦ane jerbal in ñan jem̦l̦o̦kin im pokake im tiljek wõt ñan Jijej, jejel̦ã bwe enaaj kajeraam̦m̦an kõj.​—Matu 25:21, 23, 34.