Yam bʋg la d tõe n dɩk talã-rãmbã yel-bũndã pʋgẽ?
“Yẽ kõo ned a ye talã a nu, la a to talã a yiibu, la a tãab soabã talã a yembre.”—MAT. 25:15.
1, 2. Bõe yĩng t’a Zezi wẽ talã-rãmbã yel-bũndã?
A ZEZI wẽe talã-rãmbã yel-bũndã, n na n wilg a karen-biis nins sẽn paam vʋʋsem sõng zaeebã bũmb b sẽn segd n maane. La yel-bũndã tara yõod ne a karen-biisã fãa. Rẽnd d saagd n na n tɩ vɩɩmda saasẽ tɩ yaa tẽngã zug me, d segd n bao n wʋma a Zezi yel-bũndã võore.
2 Yɩ a sẽn wa n wilgd a karen-biisã ‘bãnd ning sẽn na n wilg a waoongo, la dũniyã sɛɛb wakatã’ la a wẽ talã-rãmbã yel-bũndã. (Mat. 24:3) Rẽnd yel-bũndã sẽn gomd bũmb nins yellã na n zĩnda tõnd wakatã, n wilg t’a Zezi sɩnga naam dɩɩbo.
3. Yel-bũn nins sẽn be Matɩe sak 24 n tãag 25 pʋgẽ wã sõngda tõnd tɩ d bãng bõe?
3 Matɩe 24:45 n tãag sak 25:46, a Zezi wẽe yel-bũn a naase. Talã-rãmbã yel-bũndã toor sẽn ka be, a wẽe tʋm-tʋmd sẽn tũud sɩd la sẽn tar yamã yel-bũndã, pʋg-sadb piigã yel-bũndã, la piis ne bʋʋsã yel-bũndã. Yɩ a sẽn wa n wilgd a karen-biisã bãnd ning sẽn na n wilg t’a sɩnga naam dɩɩbã la a wẽ yel-bũn-kãense. Yel-bũn a naasã fãa pʋgẽ, a Zezi wilga zʋg-sõma a karen-biisã sẽn segd n tall yaoolem wakatã. Pipi yel-bũndã goma tʋm-tʋmd sẽn tũud sɩd yelle. Tʋm-tʋmd-kãng yaa neb sẽn paam vʋʋsem sõng zaeebã sul-bil sẽn get Wẽnnaam nin-buiidã yelle. A wilgame tɩ nin-kãens segd n yɩ sɩd dãmb la neb sẽn tar yam. A wẽe pʋg-sadb piigã yel-bũndã me, n sagl sẽn paam-b vʋʋsem sõng zaeebã fãa tɩ b segd n segla b mens n gũ, b sẽn pa mi a sẽn na n wa daar ning la wakat ningã yĩnga. Rẽ poore, a Zezi wẽe talã-rãmbã yel-bũndã, n wilg tɩ sẽn paam-b vʋʋsem sõng zaeebã segd n tʋma tʋʋm nins a sẽn dat tɩ b tʋmã ne yẽesem. Sẽn na n baase, a wẽe piis la bʋʋs yel-bũndã, sẽn saagd-b n na n vɩɩmd tẽngã zugã yĩnga. A wilgame tɩ nin-kãens segd n yɩɩ wẽn-sakdba, la tɩ b segd n maana b sẽn tõe fãa n teel a ba-biis nins sẽn paam vʋʋsem sõng zaeeb n ket tẽngã zugã. * Sõs-kãngã na n wilga talã-rãmbã yel-bũndã võore.
ZU-SOABÃ RƖKA A PAOONGÃ N BOBL A TƲM-TƲMDBÃ
4, 5. Yel-bũndã pʋgẽ, raoã makda ãnda? Talã yõod taa zĩ-bʋgo?
4 Karm-y Matɩe 25:14-30. Talã-rãmbã yel-bũndã pʋgẽ, a Zezi goma rao sẽn dat n tog sor yelle. A ra wẽe yel-bũnd sẽn wõnd talã-rãmbã yel-bũndã, n gom rao sẽn “kẽng tẽng sẽn zãr n na n tɩ reeg naam” yelle. (Luk 19:12) Hal sẽn kaoose, tõnd yeta d sɛbã pʋsẽ tɩ yel-bũn a yiibã fãa pʋsẽ, raoã makda a Zezi, la tɩ so-toakã makda a sẽn leb saasẽ yʋʋmd 33 soabã. La a Zezi sẽn ta saasẽ wã, a pa lebg rĩm zĩig pʋgẽ ye. * A zĩnda Wẽnnaam rɩtgo, ‘n gũud a bɛɛbã sẽn na n lebg a naoã roagendga.’—Heb. 10:12, 13.
5 Yel-bũndã pʋgẽ, a Zezi wilgame tɩ raoã tara talã a nii, sẽn yaa ligd wʋsgã. * Nand t’a looge, a boola a tʋm-tʋmdbã, n kõ-b ligdã n yeel tɩ b yõdg n leeb n bao yõodo. Nand t’a Zezi me kẽng saasẽ, a ra tara bũmb sẽn tar yõod wʋsgo. Bõn-kãng yaa bõe? Yaa tʋʋmd ning a sẽn da tʋmd tẽngã zugã.
6, 7. Talã-rãmbã makda bõe?
6 Koɛɛgã mooneg la karen-biisã maaneg ra tara yõod wʋsg ne a Zezi. (Karm-y Luk 4:43.) A paka sor tɩ koɛɛgã na n moon tɩ neb wʋsg sake. Daar a ye, a yeela a karen-biisã woto: “Bɩ y zẽk y nens n ges pʋtã, tɩ bõe, bãmb pelgame n ta tigsg masã.” (Zã 4:35-38) Ka-koaad pʋʋg sã n ta kẽebgo, a pa na n maan yaal-yaal ye. Yɩɩ woto me ne a Zezi. Rẽ n so t’a vʋʋgrã poore, la nand t’a leb saasẽ, a yeel a karen-biisã yaa: “Bɩ y kẽng n maan nebã buud fãa tɩ b yɩ mam karen-biisi.” (Mat. 28:18-20) Woto, a Zezi kõ a karen-biisã tʋʋmd sẽn tar yõod wʋsgo: Yaa koɛɛgã mooneg b sẽn mak ne paoongã.—2 Kor. 4:7.
7 Rẽnd a Zezi sẽn wa n yeela a karen-biisã tɩ b moon koɛɛgã, yaa wa a sẽn bobl-b “a paoongo.” (Mat. 25:14) Talã-rãmbã makda koɛɛgã mooneg la karen-biisã maanego.
8. Baa raoã sẽn kõ tʋm-tʋmdbã ligd ningã sẽn pa ye wã, bõe la a ra rat tɩ b ned kam fãa maane?
8 A Zezi wilga yel-bũndã pʋgẽ tɩ raoã kõo tʋm-tʋmd a ye talã a nu, a to talã a yiibu, la tãab-n-soabã talã a yembre. (Mat. 25:15) Raoã sẽn kõ tʋm-tʋmdbã ligd ningã pa yembr ye. Baasgo, a ra ratame tɩ b ned kam fãa maan a sẽn tõe tɛk t’a ligd roge. Woto me, a Zezi ratame t’a karen-biis nins sẽn paam vʋʋsem sõng zaeebã moon koɛɛgã wa b sẽn tõe tɛka. (Mat. 22:37; Kol. 3:23) Yʋʋmd 33 Pãntekotã tɛka, a Zezi karen-biisã sɩnga koɛɛgã mooneg la karen-biisã maanego. D sã n karem Tʋʋm sebrã, d yãtame tɩ b sɩd moona ne yẽesem. *—Tʋʋ. 6:7; 12:24; 19:20.
TƲM-TƲMDBÃ TARA TALÃ-RÃMBÃ N LEEBD SƐƐBÃ WAKATE
9. a) Bõe la tʋm-tʋmdb a yiibã rɩk talã-rãmbã n maane, la rẽ wilgda bõe? b) Bõe la sẽn saagd-b n na n vɩɩmd tẽngã zugã segd n maane?
9 Dũniyã sɛɛb wakate, Kiristã karen-biis nins sẽn paam vʋʋsem sõng zaeeb n ket tẽngã zugã modgda wʋsg ne koɛɛgã moonego. Sẽn yɩɩd fãa, yaa yʋʋmd 1919 wã tɛk la b maand rẽ ne b sũur fãa. B maanda wa yel-bũndã pʋgẽ tʋm-tʋmdb a yiibã. La d pa baood n bãng ãnd dãmb n deeg talã a nu tɩ ãnd dãmb deeg talã a yiib ye. Yel-bũndã pʋgẽ, tʋm-tʋmdb a yiibã fãa modga wʋsg n paam yõod tɩ ta ligd-ma wã, rat n yeel tɩ b modgrã zema taaba. La yaa sẽn paam-b vʋʋsem sõng zaeebã bal n tʋmd wʋsg koɛɛgã mooneg yĩng bɩ? Ayo. Yel-bũnd ning a Zezi sẽn wẽ n gom piis la bʋʋs yellã sõnga tõndo, tɩ d bãng tɩ sẽn saagd-b n na n wa vɩɩmd wakat sẽn kõn sa tẽngã zugã segd n sõnga a Zezi ba-biisã, n moon koɛɛgã. B miime tɩ rẽ yaa zu-zẽkre. Rũndã-rũndã sẽn yaa yaoolem wakatã, sul a yiibã neb naaga taab n yaa “yãgr a yembre,” n moond koɛɛgã ne yẽesem n maand karen-biisi.—Zã 10:16.
10. Bõe n wilgd tɩ d bee dũniyã sɛɛb wakate?
10 A Zezi ratame tɩ kiris-nebã fãa modg wʋsg n maan karen-biisi. Pipi kiris-nebã maana woto. La a Zezi wilgame tɩ bũmb nins yell a sẽn gom yel-bũndã pʋgẽ wã na n zĩnda dũniyã sɛɛb wakate. Rẽ yĩnga a karen-biisã moonda koɛɛgã bɩ? Hal pĩnd wẽndẽ n tãag rũndã, b zɩ n moon koɛɛgã tɩ neb wʋsg wʋme, n lebg a Zezi karen-biis wa rũndã-rũndã ye. A Zezi karen-biisã fãa sẽn modgd wʋsgã kɩtame tɩ neb tus kobs reegd lisg yʋʋmd fãa. Bãmb me sõngd n moonda koɛɛgã. Koɛɛgã sẽn moond wʋsg woto tɩ neb wʋsg lebgd kiris-nebã wilgdame tɩ d bee dũniyã sɛɛb wakate. Yaa vẽeneg t’a Zezi sẽn yaa Zu-soabã sũur nooma ne koe-moondbã.
Kiristã bobla a karen-biisã koe-moonegã sẽn yaa tʋʋmd sẽn tar yõod wʋsgã (Ges-y sull 10)
WAKAT BƲG LA ZU-SOABÃ NA N WA?
11. Bõe n kɩt tɩ d miẽ t’a Zezi waoongã na n yɩɩ to-kãsengã sasa?
11 A Zezi yeela woto: “La sẽn kaoos wʋsgo, tʋm-tʋmd-kãens zu-soabã waame n yeel tɩ ned kam fãa tall a ligd n wa sõd t’a gese.” (Mat. 25:19) A Zezi sẽn yaa tʋm-tʋmdbã Zu-soabã na n maana rẽ to-kãsengã saab sẽnese. Bõe n kɩt tɩ d miẽ tɩ na n yɩɩ woto? Matɩe sak 24 la 25 bãngr-gomdã pʋgẽ, a Zezi goma a waoongã yell naoor wʋsgo. Wala makre, a yeelame tɩ nebã “na n yãa Ninsaal Biigã sẽn wat yĩngr sawatẽ.” Yaa a sẽn na n wa to-kãsengã sasa n kao nebã bʋʋdã yell la a sẽn gomã. A sagla a karen-biis nins sẽn na n vɩɩmd sɛɛbã sasa wã tɩ b gũ. A yeel-b-la woto: “Yãmb ka mi daar ning yãmb Zu-soabã sẽn na n wa ye.” A paasame: “Ninsaal Biigã wata wakat ning yãmb sẽn ka tẽeda.” (Mat. 24:30, 42, 44) Rẽnd a Zezi sẽn yeel tɩ tʋm-tʋmdbã ‘zu-soabã waame n yeel tɩ ned kam fãa tall a ligd n wa sõd t’a gesã,’ yaa wakat ning a sẽn na n wa kao ninsaalbã bʋʋdo, la a sãam a Sʋɩtãan dũniyã yell la a sẽn da gomdã. *
12, 13. a) Bõe la zu-soabã yeel tʋm-tʋmdb a yiibã? Bõe yĩng t’a yeel-b woto? b) Wakat bʋg la sẽn paam-b vʋʋsem sõng zaeebã paamd yaoolem bãndã? (Ges-y zĩ-gũbr ning gom-zug sẽn yaa: “B paamda yaoolem bãndã n yaool n ki” wã.) d) Bõe la a Zezi sẽn mak b rãmb ne piisã na n paame?
12 Zu-soabã sẽn yi a so-toakã n lebg n wa wã, a mikame tɩ tʋm-tʋmd ning sẽn deeg talã a nu wã leebame n paam talã a nu n paase, tɩ sẽn deeg-a talã a yi wã me paam talã a yi n paase. A yeela b ned kam fãa woto: “Yaa neere, tʋm-tʋmd-sõng sẽn maand sɩda. Fo maana sɩd ne bũmb bilfu, mam na n kõo foo tɩ f soog bũmb wʋsgo.” (Mat. 25:21, 23) A Zezi sẽn yaa Zu-soabã sã n wa, bõe la a na n maane?
13 Tʋm-tʋmdb a yiibã makda kiris-neb nins sẽn paam vʋʋsem sõng zaeeb n tʋmd wʋsgã. Nin-kãens na n paama yaoolem bãndã tɩ to-kãsengã yaool n sɩnge. (Wil. 7:1-3) Nand tɩ Armagedõ zabrã sɩnge, a Zezi na n tall-b lame n kẽng saasẽ tɩ b tɩ paam b keoorã. La neb nins sẽn saagd n na n vɩɩmd tẽngã zugã sẽn sõng n moon koɛɛgã yẽ na n paama bõe? Bãmb la a Zezi sẽn mak ne piisã. B na n paam n vɩɩmda wakat sẽn kõn sa tẽngã zugu, Wẽnnaam Rĩungã naam sasa.—Mat. 25:34.
TƲM-TƲMD-WẼNG SẼN YAA KƲƖƖMA
14, 15. A Zezi wilgame tɩ sẽn paam-b vʋʋsem sõng zaeebã wʋsg na n lebga wẽns la kʋɩɩmb bɩ? Wilg-y y leoorã võore.
14 Yel-bũndã pʋgẽ, yaoolem tʋm-tʋmdã pa rɩk a talã wã n leeb n bao yõodo, wall a tɩ bĩng bãnk pʋgẽ ye. A kẽng n tɩ tuu bok n busi. A sẽn maanã yaa wẽng wʋsgo. Bala, a yãka yam n maan bũmb sẽn pa nafd a zu-soabã ye. Rẽnd zu-soabã sẽn yeel t’a yaa ‘tʋm-tʋmd-wẽng sẽn yaa kʋɩɩmã’ zemsame. Zu-soabã reega a talã wã n kõ sẽn tar-a talã piigã, la a rig tʋm-tʋmd-wẽngã t’a “kẽ lik sẽn be kɛɛnga.” “Yãbr ne yẽn wãbr na n zĩnda be.”—Mat. 25:24-30; Luk 19:22, 23.
15 A Zezi wilgame tɩ tʋm-tʋmdb a tãabã sʋka, a ye n yɩ wẽng la kʋɩɩma. Woto rat n yeelame tɩ sẽn paam-b vʋʋsem sõng zaeebã neb a tãab sʋka, nin-yend n na n yɩ wa tʋm-tʋmd-wẽngã bɩ? Ayo. D sã n mak yel-bũndã ne yel-bũn a yiibu, d bãngdame tɩ sɩd pa woto ye. Tʋm-tʋmd sẽn tũud sɩd la sẽn tar yamã yel-bũndã pʋgẽ, a Zezi goma tʋm-tʋmd-wẽng sẽn pãbd a tʋmd-n-taas yelle. La woto pa rat n yeel tɩ tʋm-tʋmd-wẽng sull n na n zĩnd ye. A Zezi ra sagenda tʋm-tʋmd sẽn tũud sɩdã t’a gũus n da lebg tʋm-tʋmd-wẽng ye. Pʋg-sadb piigã yel-bũndã pʋgẽ me, a goma pʋg-sadb a nu sẽn pa tar yam yelle. La pa rat n yeel tɩ sẽn paam-b vʋʋsem sõng zaeebã pʋɩ-sʋk n pa na n tall yam ye. A Zezi yeela woto n na n wilg bũmb ning sẽn tõe n paam-ba, b sã n pa segl b mens n gũ. * Rẽnd d tõe n yeelame tɩ talã-rãmbã yel-bũndã pʋgẽ, a Zezi pa yeel tɩ yaoolem wakatã, sẽn paam-b vʋʋsem sõng zaeebã wʋsg na n lebga wẽns la kʋɩɩmb ye. A ra sagenda sẽn paam-b vʋʋsem sõng zaeebã tɩ b kell n moon koɛɛgã ne yẽesem, la tɩ b gũus n da wa lebg wa tʋm-tʋmd-wẽngã ye.—Mat. 25:16.
16. a) Bõe la talã-rãmbã yel-bũndã wilgd tõndo? b) Wãn to la sõs-kãngã sõng tõnd tɩ d wʋm talã-rãmbã yel-bũndã võor sõma? (Ges-y zĩ-gũbr ning gom-zug sẽn yaa: “Wãn to la d segd n wʋm talã-rãmbã yel-bũndã võore?”)
16 Bõe la talã-rãmbã yel-bũndã wilgd tõndo? Wilgda tõnd bũmb a yiibu. Pipi, a Zezi kõ a karen-biis nins sẽn paam vʋʋsem sõng zaeebã tʋʋmd sẽn tar yõod wʋsgo: Yaa koɛɛgã mooneg la karen-biisã maanego. Yiibu, a ratame tɩ tõnd fãa modg wʋsg n moon koɛɛgã. D sã n kell n maan dẽ, d tõe n kɩsa sɩd t’a Zezi sẽn yaa Zu-soabã na n keo-d-la d tẽebã yĩnga, d wẽn-sakrã, la d sẽn kell n gũ wã yĩnga.—Mat. 25:21, 23, 34.
^ sull 3 Yʋʋmd 2013 sẽoog kiuug pipi daar Gũusg Gasgã neng 27-28 sull a 8-10 wilgda tʋm-tʋmd sẽn tũud sɩd la sẽn tar yamã sẽn yaa a soaba. Sõsg ning sẽn loogã pʋgẽ, b wilga pʋg-sadbã sẽn makd b rãmbã. Yʋʋmd 1995 zĩ-likr kiuug rasem 15 Gũusg Gasgã neng 23-28, la sõsg ning sẽn pʋgdã wilgda piis la bʋʋs yel-bũndã võore.
^ sull 4 Ges-y zĩ-gũbr ning gom-zug sẽn yaa: “ Talã-rãmbã yel-bũndã wõnda min-dãmbã yel-bũndã.”
^ sull 5 A Zezi wakatẽ wã tɩ talã a ye yaa denie tus a yoobe. Denie ra yaa daar a ye tʋʋmd yaoodo. Rẽnd tʋm-tʋmd sã n da rat n paam talã a yembre, a segd n tʋma yʋʋm pisi.
^ sull 8 A Zezi tʋm-tʋmdbã kũum poore, a Sʋɩtãan maana sɩlem tɩ sɩdã kɩɩsdb paam pãng tigimsã pʋsẽ. Kell n yɩɩ woto n maan yʋʋm kobse. Koɛɛgã mooneg pa kell n kẽng taoor n sõng nebã tɩ b lebg kiris-neb hakɩk ye. La ‘tigsgã wakat’ sẽn yaa dũniyã sɛɛb wakatã, yɛlã ra na n toeemame. (Mat. 13:24-30, 36-43) Ges-y yʋʋmd 2013 sẽoog kiuug pipi daar Gũusg Gasgã neng 15-18.
^ sull 11 Ges-y yʋʋmd 2013 sẽoog kiuug pipi daar Gũusg Gasgã neng 13-14, sull 14-18.
^ sull 15 Ges-y sõsg ning sẽn loogã sull 13. Sõsgã gom-zug la woto: “Yãmb na n kell n gũume bɩ?”
