1, 2. Akin ya insalaysay nen Jesus so ilustrasyon nipaakar ed saray talento?

DIAD parabolo nen Jesus nipaakar ed saray talento, malinew ton indanet so obligasyon na saray alanaan ya patumbok to. Kaukolan tayon talosan so kabaliksan na sayan parabolo ta pakaaralan iya na amin ya tuan Kristiano, balanglan say ilalo tayo et diad tawen odino diad dalin.

² Say parabolo nipaakar ed saray talento et kabiangan na ebat nen Jesus nen nantepet iray disipulo to nipaakar ed ‘tanda na kiwawala to tan say kasampotan na sistema na mundo.’ (Mat. 24:3) Kanian, say kasumpalan na satan ya parabolo et nagawad panaon tayo tan kabiangan itan na tanda ya si Jesus et manuuley la bilang Ari.

3. Anto ray naaralan ed saray ilustrasyon ya nabasad Mateo kapitulo 24 tan 25?

³ Say parabolo nipaakar ed saray talento et sakey ed saray apatiran mankokonektaan ya ilustrasyon ya nabasad Mateo 24:45 anggad 25:46. Saramay talora—ya nipaakar ed matoor tan makabat ya aripen, samploran mamarikit, tan saray karnero tan kanding—et kabiangan met na ebat nen Jesus ed tepet nipaakar ed tanda na kiwawala to. Diad saratan ya apatiran ilustrasyon,  indanet to ray kualidad ya kaukolan a niwalad saray tuan patumbok to ed sarayan kaunoran ya agew. Say ilustrasyon nipaakar ed aripen, mamarikit, tan saray talento et parad saray alanaan ya patumbok to. Diad ilustrasyon nipaakar ed matoor ya aripen, indanet nen Jesus ya nepeg a matoor tan makabat so melag ya grupo na alanaan ya angimatalekan ed pamakan na saray lingkor na sankaabungan to legan na kaunoran iran agew. Diad parabolo nipaakar ed mamarikit, indanet nen Jesus ya amin ya alanaan a patumbok to et nepeg ya akaparaan tan alerto, ta amta ran onsabi si Jesus balet agda amta so eksakton agew tan oras. Diad parabolo nipaakar ed saray talento, indanet nen Jesus ya saray alanaan et nepeg ya makuli ed panggawa dad saray responsabilidad da. Say unor ya ilustrasyon nen Jesus nipaakar ed saray karnero tan kanding et parad saray say ilalo da et diad dalin. Indanet to ya kaukolan ya matoor ira tan sigpot dan suportaan iray alanaan ya agagi to diad dalin. * Diad sayan artikulo et aralen tayo so ilustrasyon nipaakar ed saray talento.

4, 5. Siopa so irerepresenta na katawan ed ilustrasyon, tan antoy kantidad na literal a talento?

⁴ Basaen so Mateo 25:14-30. Abayag lan impaliwawad saray publikasyon tayo ya samay katawan diad parabolo et ontutukoy ed si Jesus tan aliling to et sikatoy linmad arum a bansa nen pinmawil ed tawen nen 33 C.E. Diad mas akaunan parabolo nen Jesus, imbaga to no akin ya kaukolan to itan a gawaen—“pian awaten toy pakauley bilang ari.” (Luc. 19:12) Agtampol nagmaliw ya Ari si Jesus kapawil tod tawen. * Imbes, sikatoy “yinmurong ed nikawanan na Dios, a manlapu la ed saman et sikatoy manaalagar anggad saray kakabusol to et niiyan bilang toonan na saray sali to.”—Heb. 10:12, 13.

⁵ Say katawan ed ilustrasyon et walaan na waloran talento, baleg itan a kantidad nensaman. * Antis ya linmad arum a bansa, inter to iratan ya talento ed saray aripen to, tan iilaloan ton inegosyo da iratan pian manubo legan ya sikatoy walad arawi. Si Jesus et singa satan ya katawan ta sikatoy walaan na baleg a kayamanan antis ya pinmawil ed tawen. Anto itan? Satan et say kimey ya ginawa to diad dalin.

6, 7. Antoy isisimbolo na saray talento?

⁶ Importantin maong ed si Jesus so kimey ya panagpulong tan panagbangat. (Basaen so Lucas 4:43.) Panamegley na satan, aliling to et sikatoy nantanem ed uma ya amta ton manbunga na dakel. Diad tua, imbaga tod saray disipulo to: “Nengneng yo iray kaumaan, ya amputi la ra parad panag-ani.” (Juan 4:35-38) Sankanonot to so pantipon ed dakel ya matuan impanpuson totoo ya magmaliw a disipulo to. Singa sakey ya maong a dumaralos, agpaulyanan nen Jesus so uma legan na panag-ani. Kanian kayari inkioli to tan antis ya ompawil ed tawen, inikdan to ray disipulo to na seryoson asainmin: “Onla kayo sirin tan ibangat yo iray totoo ed amin a nasyones pian magmaliw iran disipulok.” (Mat. 28:18-20) Inmatalek nen Jesus ed sikara so mabmablin kayamanan, say Kristianon ministeryo.—2 Cor. 4:7.

⁷ Anto sirin so konklusyon tayo? Nen inter  nen Jesus ed saray patumbok to so kimey ya panaggaway babangatan, singa to inmatalek ed sikara iray “kaykayarian to”—saray talento o kayamanan to. (Mat. 25:14) Diad simplin panangibaga, saray talento et ontutukoy ed responsabilidad ya manpulong tan manggaway babangatan.

8. Antoy iilaloan na katawan ya gawaen na kada aripen anggano nanduruman kantidad so inawat da?

⁸ Nanengneng tayod parabolo ya inikdan na katawan so unonan aripen na limaran talento, amay komadua et duaran talento, tan amay komatlo et sakey a talento. (Mat. 25:15) Anggano nanduruman kantidad so inawat na kada aripen, iilaloan na katawan ya amin da et makulin mangusar ed satan. Mipadpara, iilaloan nen Jesus ya gawaen na saray alanaan ya patumbok to so anggaay nayarian da diad ministeryo. (Mat. 22:37; Col. 3:23) Nen inmunan siglo, manlapud Pentecostes 33 C.E., inggapo na saray patumbok nen Jesus ya usaren iray talento. Say inkakuli da ed panagpulong tan panaggaway babangatan et akarekord ed libro na Gawa. *—Gawa 6:7; 12:24; 19:20.

9. (a) Antoy ginawa na duaran matoor ya aripen ed saray talento, tan antoy naaralan tayod satan? (b) Antoy betang na ‘arum a karnero’?

⁹ Diad panaoy anggaan, lalo la manlapu nen 1919, inusar na matoor iran alanaan ya  aripen nen Kristo ya wadia nid dalin iray talento to. Singa samay unona tan komaduan aripen, ginawa na saray alanaan so anggaay nayarian dad panagpulong. Diad parabolo, nanduruman kantidad na talento so inawat na unona tan komaduan aripen, balet aglabay ya ibaga na satan ya walay duaran grupo na matoor ya alanaan. Parehon makulin nansagpot imay duaran aripen kanian anubo ira na doble. Balet kasin saray alanaan labat so nepeg ya mankuli ed kimey ya panagpulong tan panagbangat? Andi. Diad parabolo nipaakar ed saray karnero tan kanding, indanet nen Jesus ya pribilehyo na ‘arum a karnero’ ya suportaan iray matoor ya alanaan ya agagi to. Diad sayan mair-irap ya kaunoran iran agew, saray alanaan tan ‘arum a karnero’ et saniban mankikimey bilang “sakey a pulok” tan maseseg dan susumpalen so kimey ya panagpulong tan panaggaway babangatan.—Juan 10:16.

10. Antoy sakey ya makapadinayew ya paneknek ya manuuley lay Jesus ed Panarian?

¹⁰ Manepeg labat ya ilaloan na Katawan ya mankuli iray aripen to. Singa abitla nen niman, ginawa na saray matoor ya disipulo to nen inmunan siglo so anggaay nayarian da pian ondakel so kaykayarian to. Ontan met kasi ed sayan panaon na anggaan, ya nagagawa la so kasumpalan na parabolo nipaakar ed saray talento? On, nagagawa la natan so sankalaknaban ya panagpulong tan panaggaway babangatan! Lapud kuli na amin ya patumbok nen Jesus, nilibo iran balon disipulo so nababautismoan kada taon tan onaarum ed bilang na mangiyaabawag ed Panarian. Atan so rason no akin ya say kimey ya panagpulong tan panagbangat et sakey ya makapadinayew ya paneknek ya manuuley lay Jesus ed Panarian. Seguradon malikeliket so Katawan!

11. Panon tayon amta ya mikuentaan si Jesus legan na baleg a kairapan?

¹¹ Onsabi si Jesus pian mikuentaan ed saray aripen to diad bandad sampot na baleg a kairapan. Panon tayon amta? Diad propesiya nen Jesus ya nabasad Mateo kapitulo 24 tan 25, aminpigapiga ton binitla so nipaakar ed isabi to. Singa bilang, imbaga ton “nanengneng [na totoo] so Anak na too ya onsasabi a walad saray lurem na tawen,” ya say tutukoyen to et say panangukom ya nagawad  baleg a kairapan. Oniay bilin to met ed saray patumbok to legan na kaunoran iran agew: “Agyo amta no anton agew so isabi na Katawan yo” tan “diad oras ya agyo iisipen et onsabi so Anak na too.” (Mat. 24:30, 42, 44) Kanian nen imbaga nen Jesus ya “sinmabi so katawan na saraman ya ariripen tan akikuentaan ed sikara,” mapatnag ya say tutukoyen to et say panaon na isabi to pian mangukom tan deralen so mundo nen Satanas. *—Mat. 25:19.

12, 13. (a) Antoy imbaga na katawan ed unona tan komaduan aripen, tan akin? (b) Kapigan naawat na saray alanaan so permanentin tatak da? (Nengnengen so kahon ya “ Mikuentaan Ira Diad Ipatey Da.”) (c) Antoy premyo na saramay naukom bilang karnero?

¹² Unong ed parabolo, diad insabi na katawan, anengneng ton matoor iramay duaran aripen ya inikdan to na limara tan duaran talento, lapud nansagpot ira pian manubo na doble iray talento to. Parehoy imbaga na katawan ed sikaran dua: “Maabig so agawaan mo, maong tan matoor ya aripen! Matoor ka ed daiset a bengatla. Kanian turoen ta kan mangasikaso ed dakel a bengatla.” (Mat. 25:21, 23) Anto sirin so nailaloan tayo sano say Katawan, say niglorian Jesus, et onsabi pian mangukom diad arapen?

¹³ Antis na baleg a kairapan, saray makulin alanaan ya disipulo—ya irerepresenta na unona tan komaduan aripen—et naawat da lay permanentin tatak da. (Apo. 7:1-3) Antis na Armagedon, iter la nen Jesus so insipan ton premyo da diad tawen. Saramay walaan na ilalon manbilay diad dalin ya sinmuporta ed saray agagi nen Kristo diad panagpulong a kimey et naukom bilang karnero tan naawat day pribilehyon manbilay diad dalin ya uleyan na Panarian.—Mat. 25:34.

14, 15. Kasin labay ya ibaga nen Jesus ya dakel ya alanaan so magmaliw ya mauges tan mangiras? Ipaliwawa.

¹⁴ Diad parabolo, samay komatlon aripen et inkotkot to imay inawat ton talento imbes ya innegosyo odino imbangko to. Makapuy itan ya ginawa to, ta ginagala ton agtuloken so panlabayan na katawan to. Kanian duga labat ya sikatoy tinawag na katawan ya “mauges tan mangiras.” Binawi na katawan so talento ed sayan aripen tan inter tod samay walaan na samploran talento. Insan imbantak imay mauges ya aripen “diad paway ya ambilbilunget.” “Diman so pannangisan to tan panngalatengetan na saray ngipen to.”—Mat. 25:24-30; Luc. 19:22, 23.

¹⁵ Sanen imbaga nen Jesus ya sakey ed saray taloran aripen so nagmaliw ya mauges tan mangiras, agto labay ya ibagan kakatlo ed saray alanaan ya patumbok to so magmaliw ya singa ontan. Imanoen so konteksto. Diad samay ilustrasyon nipaakar ed  matoor tan makabat ya aripen, binitla nen Jesus so mauges ya aripen ya pinekpek to ray kapara ton aripen. Balet aglabay ya ibaga nen Jesus ya wala ray kabiangan na matoor tan makabat ya aripen ya magmaliw a mauges. Imbes, papasakbayan to so matoor ya aripen ya agda aaligen so ginawa na mauges ya aripen. Mipadpara, diad samay ilustrasyon nipaakar ed samploran mamarikit, aglabay ya ibaga nen Jesus ya kapalduad saray alanaan ya patumbok to et magmaliw ya makulangkulang. Imbes, papasakbayan to ray espiritual ya agagi to no antoy posiblin nagawa no ag-ira mansiansian akaparaan tan alerto. * No ontan sirin, nibaga tayo ya diad ilustrasyon nipaakar ed saray talento, aglabay ya ibaga nen Jesus ya dakel ya alanaan so magmaliw ya mauges tan mangiras legan na kaunoran iran agew. Imbes, papasakbayan nen Jesus iray alanaan ya patumbok to ya mansiansia ran makuli—ya ‘iyanap’ odino usaren da iray talento da—tan agda aaligen so ugali tan ginawa na mauges ya aripen.—Mat. 25:16.

16. (a) Anto ray naaralan tayo ed parabolo nipaakar ed saray talento? (b) Panon ya mas linminew so pakatalos tayod parabolo nipaakar ed saray talento? (Nengnengen so kahon ya “ Talosan so Ilustrasyon Nipaakar ed Saray Talento.”)

¹⁶ Antoy duaran naaralan tayo ed parabolo nipaakar ed saray talento? Unona, inmatalek na Katawan, say Kristo, ed saray alanaan ya aripen to so kayamanan ya mabmablid sikato—say panagpulong tan panaggaway babangatan. Komadua, iilaloan nen Kristo ya amin tayo et magmaliw ya makuli ed panagpulong a kimey. No mantultuloy tayod sayan kimey, tan mansiansia tayon matulok tan matoor ed si Jesus, seguradon iter to so premyo tayo.—Mat. 25:21, 23, 34.