1, 2. Dicon Hesus a conta e ilustracion di talento?

DEN e ilustracion di talento, Hesus a mustra bon cla kico ta e responsabilidad di su siguidornan ungi. Pero sea cu nos tin e speransa di biba den cielo of riba Tera, nos tin cu compronde e nificacion di e ilustracion pasobra e tin di haber cu tur cristian berdadero.

² Hesus a conta e ilustracion aki ora su apostelnan a puntr’e tocante “e señal di [su] presencia y di conclusion di e era aki.” (Mat. 24:3) Pues, e ilustracion ta papia di sucesonan cu ta tuma luga den nos tempo y cu ta parti di e señal cu ta indica cu Hesus ya ta goberna como Rey.

3. Kico nos ta siña for di e ilustracionnan di Mateo capitulo 24 y 25?

³ E ilustracion di talento ta un di e cuater ilustracionnan cu nos ta haya na Mateo 24:45 pa 25:46. E otro tresnan ta papia di e esclavo fiel y prudente, di e dies birgennan y di carne y cabrito. Nan tur ta forma parti di e contesta cu Hesus a duna riba e pregunta tocante kico ta e señal di su presencia. Y nan tur cuater ta describi cualidadnan cu lo a identifica e berdadero siguidornan di Hesus den e tempo di fin. E ilustracionnan di e  esclavo fiel, di e birgennan y di e talentonan ta dirigi na cristiannan ungi. Kico nos ta siña for di e ilustracionnan aki? Den esun di e esclavo fiel, Hesus a enfatisa cu e grupo chikito di cristian ungi cu tin e responsabilidad di duna cuminda na e sirbidornan di cas mester ta fiel y prudente. Den esun di e birgennan, Hesus a indica bon cla cu tur e unginan mester ta prepara y mester keda vigila, ya cu nan no sa ni e dia ni e ora cu Hesus lo bin. Den esun di e talentonan, Hesus a mustra cu e unginan mester ta diligente, es decir, nan mester traha duro pa cumpli cu nan responsabilidadnan cristian. E ultimo ilustracion, esun di carne y cabrito, Hesus a dirigi na hende cu tin e speransa di biba riba Tera. El a enfatisa cu nan mester ta leal y apoya e rumannan ungi di Hesus plenamente. * Laga nos analisa awor e ilustracion di talento.

4, 5. (a) Ken e homber, of doño, di e ilustracion ta representa? (b) Cuanto un talento tabata bal den tempo di Hesus?

⁴ Lesa Mateo 25:14 pa 30. Nos publicacionnan a yega di splica cu e homber, of doño, den e ilustracion ta representa Hesus y cu el a biaha pa exterior ora el a bay cielo na aña 33 di e prome siglo. Hesus a bisa den un ilustracion similar cu e proposito di su biahe tabata “pa keda corona como rey.” (Luc. 19:12) Pero ora Hesus a bay cielo, e no a bira Rey di biaha. * Mas bien, el “a sinta na man drechi di Dios, sperando djey padilanti te ora Dios pone su enemigonan como banki pa su pia.”—Heb. 10:12, 13.

⁵ Hesus a bisa cu e homber den e ilustracion tabatin ocho talento; esaki tabata hopi placa, un suma astronomico den e tempo ey. * Prome cu e homber a bay biaha, el a parti e talentonan entre su esclavonan pa nan haci negoshi cu nan durante su ausencia. Mescos cu e homber ey, Hesus tambe tabatin algo di gran balor prome cu el a bay cielo. Kico esey tabata? E obra cu el a dedica su bida na dje.

6, 7. Kico e talentonan ta representa?

⁶ E trabou di predica tabata hopi importante pa Hesus y, como resultado, hopi hende a bira su discipel. (Lesa Lucas 4:43.) Pero e tabata sa cu ainda tabatin hopi trabou di haci y cu mas hende lo a acepta e bon noticia. El a bisa su discipelnan: “Hisa boso cara wak e cunucunan; nan ta cla pa cosecha.” (Juan 4:35-38) Kico e tabata kiermen cu esey? Wel, e tabata pensa riba tur e hendenan di bon curason, kendenan cu tempo lo a bira su discipel. Mescos cu un bon cunukero lo no bay laga un cunucu cu ta cla pa cosecha, Hesus tampoco lo no a bay laga e hendenan ey pa nan cuenta. Pesey, un poco prome cu el a bay cielo, el a bisa su discipelnan: “Bay, y haci hende di tur nacion mi discipel.” (Mat. 28:18-20) Pues, Hesus a confia nan cu un trabou importante, un tesoro hopi valioso: e sirbishi cristian.—2 Cor. 4:7.

⁷ Kico nos por conclui for di esaki? Ora Hesus a duna su siguidornan e tarea pa bay haci discipel, el “a encarga nan cu su pertenencianan”, si, cu su talentonan.  (Mat. 25:14) Cu otro palabra, e talentonan ta representa e responsabilidad di predica y haci discipel.

8. Aunke e esclavonan no a haya e mesun cantidad di talento, kico e doño a spera di nan?

⁸ Hesus a conta cu e doño tabatin tres esclavo. El a duna e prome esclavo cinco talento, e otro dos talento y e ultimo un talento so. (Mat. 25:15) Aunke e esclavonan no a haya e mesun cantidad di talento, e doño a spera cu nan tur tres lo ta diligente y haci negoshi cu e talentonan. Kico esaki ta nifica? Hesus ta spera cu su siguidornan ta haci nan best den e trabou di predica. (Mat. 22:37; Col. 3:23) Na Pentecoste di aña 33, e discipelnan di Hesus a cuminsa haci negoshi cu e talentonan. Ora nos lesa e buki di Echonan, nos ta mira bon cla con duro nan a traha den e trabou di predica y di haci discipel. *—Echo. 6:7; 12:24; 19:20.

9. (a) Kico e dos esclavonan fiel a haci cu e talentonan, y kico esaki ta indica? (b) Kico ta e papel di e “otro carne[nan]”?

⁹ Den e tempo di fin, specialmente di 1919 en adelante, e fiel cristiannan ungi a haci bon negoshi cu e talentonan di e  Doño. Mescos cu e prome dos esclavonan di e ilustracion, e rumannan ungi a haci nan best den e trabou di predica. Den e ilustracion, un esclavo a haya cinco talento y e otro dos talento. Acaso esaki tin un nificacion special? No. E punto ta cu tur dos a traha duro y a gana dobel e cantidad cu nan a ricibi. Pero kico ta e papel di e “otro carne[nan]”, es decir, e cristiannan cu tin e speransa di biba riba Tera? Nan tin un papel sumamente importante. Den Hesus su ilustracion di carne y cabrito, nos ta mira cu nan tin e privilegio di apoya e rumannan ungi di Cristo. Durante e temponan critico di e ultimo dianan aki, e dos gruponan ta traha unidamente, como “un tou”, den e trabou di predica y haci discipel.—Juan 10:16.

10. Menciona un aspecto di e señal cu ta duna prueba cu nos ta den e tempo di fin.

¹⁰ E Doño naturalmente ta spera resultado. Manera nos a mira, e discipelnan fiel di e prome siglo a traha diligentemente den e trabou di predica y haci discipel y a aumenta e pertenencianan di e Doño. Pero ora Hesus a conta e ilustracion, e tabata papia di e tempo di fin. E siguidornan di Cristo ta cumpli cu e trabou aki awe? Si! Awe e campaña di mas grandi den historia ta tumando luga relaciona cu e trabou di predica y haci discipel. Debi na e trabou duro cu tur siguidor di Cristo ta haci, cientos di miles di persona ta batisa tur aña y ta join e grupo di predicadornan di Reino. Tur esaki ta mustra bon cla cu e trabou di predica ta un parti importante di e señal cu Hesus a duna tocante e tempo di fin. Esta contento e Doño mester ta cu su trahadornan!

11. Dicon nos ta bisa cu Hesus lo haci cuenta cu su esclavonan durante e tribulacion grandi?

¹¹ Hesus lo bin pa haci cuenta cu su esclavonan ora fin di e tribulacion grandi ta cerca. Dicon nos ta yega na e conclusion ey? Den e profecia di Mateo capitulo 24 y 25, Hesus a papia varios biaha di su binida. Por ehempel, el a bisa cu hende “lo mira e Yiu di hende bin riba e nubianan di cielo.” Esaki ta referi na e periodo durante e tribulacion grandi ora cu Hesus lo husga  hende. Tambe Hesus a urgi su siguidornan cu lo ta na bida durante e ultimo dianan pa nan keda alerta. El a bisa nan: “Boso no sa ki dia boso Señor ta bin” y “e Yiu di hende ta bin na un ora cu boso no ta pensa.” (Mat. 24:30, 42, 44) Pues, ora Hesus a bisa cu e “doño di e esclavonan ey a bolbe, y el a haci cuenta cu nan”, e tabata referi evidentemente na e momento cu e lo bin pa husga hende y destrui e mundo di Satanas. *—Mat. 25:19.

12, 13. (a) Kico e doño ta bisa e dos prome esclavonan, y dicon? (b) Ki ora e unginan ta haya nan seyo final? (Wak tambe e cuadro “ Nan Ta Duna Cuenta ora Nan Muri.”) (c) Ki recompensa hende cu ser husga como carne lo haya?

¹² Segun e ilustracion, ora e doño a bolbe, el a mira cu e dos prome esclavonan—esun cu a haya cinco talento y esun cu a haya dos talento—a haci nan trabou fielmente y a gana dobel e cantidad di talento. Anto e doño ta bisa tur dos esclavo mescos: “Hopi bon, mi bon y fiel esclavo! Bo tabata fiel riba poco cos. Lo mi encarga bo cu hopi cos.” (Mat. 25:21, 23) Pues, kico nos por spera ora cu e Doño, Hesucristo, bin pa ehecuta huicio den futuro?

¹³ Un poco prome cu e tribulacion grandi cuminsa, e unginan diligente—representa pa e dos esclavonan—lo haya e aprobacion final di Dios. Esey ta nan seyo final. (Rev. 7:1-3) Anto prome cu Armagedon, Hesus lo duna nan nan recompensa celestial, esta, bida den cielo. Kico lo pasa cu e cristiannan cu tin e speransa di biba riba Tera y cu a apoya e rumannan di Cristo den e trabou di predica? Nan lo ser husga como carne y lo haya e privilegio di biba pa semper riba Tera bou di e Reino di Dios.—Mat. 25:34.

14, 15. Acaso Hesus a indica cu un cantidad grandi di cristian ungi lo bira floho y malbado? Splica.

¹⁴ E ultimo esclavo di e ilustracion a dera su talento en bes di haci negoshi cu ne; e no a ni sikiera deposita e placa na banco p’e haya poco interes. E esclavo aki a demostra un mal actitud, ya cu el a traha deliberadamente contra e interesnan di e doño. Cu rason, e doño a yam’e “floho y malbado” y a kita su talento for di dje y a duna e prome esclavo esaki. Anto el a benta e esclavo malbado “den e scuridad cu tin pafo.” E relato ta conclui bisando: “Ey ta caminda lo e yora y morde riba djente.”—Mat. 25:24-30; Luc. 19:22, 23.

¹⁵ Tuma nota di e detaye aki: Hesus a bisa cu un di e tres esclavonan a sconde su talento. Acaso Hesus kier a indica cu un  tercera parti di e cristiannan ungi lo ta floho y malbado? No. Laga nos wak e contexto. Den e ilustracion di e esclavo fiel y prudente, Hesus a papia di un esclavo cu ta comete maldad y bati e otro esclavonan. Pero e no tabata profetisa eynan cu lo lanta un grupo di ungi cu lo haci malo. Mas bien, e tabata spierta e esclavo fiel pa nan no demostra e actitud di e mal esclavo ey. Asina tambe, den e ilustracion di e dies birgennan, Hesus no tabata kier mustra cu mitar di e unginan lo ta manera e cinco birgennan bobo. Simplemente el a spierta su rumannan spiritual tocante kico lo pasa si nan no ta prepara y alerta. * Pesey ta rasonabel pa nos conclui cu den e ilustracion di talento, Hesus no tabata kiermen cu den e tempo di fin un cantidad grandi di cristian ungi lo a bira floho y malbado. En realidad, Hesus tabata spierta su siguidornan ungi cu nan mester sigui traha duro—“haci[endo] negoshi” cu nan talento—y no bira manera e esclavo floho y malbado.—Mat. 25:16.

16. (a) Kico nos ta siña for di e ilustracion di talento? (b) Con e articulo aki a yuda nos compronde e ilustracion di talento? (Wak e cuadro “ Un Comprondemento Mas Cla di e Ilustracion di Talento.”)

¹⁶ Kico ta e dos lesnan cu nos ta siña for di e ilustracion di talento? E prome les ta cu Cristo, e Doño, a encarga su esclavonan ungi cu algo hopi valioso: e trabou di predica y haci discipel. E di dos les ta cu Cristo ta spera cu nos tur ta traha duro den e trabou di predica. Si nos persevera fielmente den e trabou aki y keda leal y obedecido na Hesus, nos por ta sigur cu lo e recompensa nos.—Mat. 25:21, 23, 34.