1, 2. Dahme kahrehda Sises ketin kasalehda duwen karasaras en papah silimeno?

 SISES ketin kasalehda duwen karasaras en papah silimeno pwe en kak ketin kasalehiong sapwellime me keidi kan ni sansal ia arail pwukoa. Ahpw karasaras wet kin dokedoke sapwellimen Sises tohnpadahk kan koaros. Eri mehnda ma kitail ahneki koapworopwor en mour nanleng de nin sampah, kitail anahne wehwehki wehwehn karasaras wet.

² Iahd me Sises ketin kasalehda karasaras wet? Ni ahnsou me e ketin kasalehiong sapwellime tohnpadahk ko kilel ehu me pahn kasalehda me e ketin wiahlahr Nanmwarki oh me imwin rahn akan tepidahr. (Mad. 24:3) Eri karasaras en papah silimeno kin wia kisehn kilelo oh me e pweidahr ni atail ahnsou.

3. Dahme kitail sukuhlkihsang karasaras kan nan Madiu irelaud 24 oh 25?

³ Ahnsou me Sises ketin kasalehda duwen karasaras en papah silimeno, e pil ketin kasalehda duwen karasaras siluh me pil wia kisehn kilelepen imwin rahn akan. Karasaras pwukat koaros kasalehda soangen irair kei me sapwellime tohnpadahk ko anahne ahneki. Kitail kak wadek karasaras pwukat nan Madiu 24:45 lel 25:46. Keieun karasaraso kin pidada duwen ladu lelepeko, pwihn tikitik en me keidi kan me ahneki pwukoa en padahki sapwellimen  Siohwa aramas akan. Irail anahne lelepek oh loalokong. * Keriaun karasaraso kin pid duwen serepein meipwon ehk ko. Nan karasaraso, Sises ketin kehkehlikihong me keidi kan koaros me re anahne onohnop oh mwasamwasahn pwehki re sohte pahn ese iahd rahno de awao me e pahn ketido. * Kesiluh, Sises ketin kasalehda duwen karasaras en papah silimeno pwehn padahkihong me keidi kan koaros me re anahne doadoahk laud en apwalih arail pwukoahn Kristian kan. Kapahieu, Sises ketin kasalehda duwen karasaras en sihpw oh kuht ko, me dokedoke irail ko me pahn ahneki koapworopwor en mour nin sampah. E ketin kasalehda kesempwalpen ar anahne loalopwoat oh wia uwen arail kak en sewese rie me keidi kan. * Iren onop wet pahn kawehwehda ia wehwehn karasaras en papah silimeno.

4, 5. Ihs me ohlo nan karasaraso rasehng? Dahieu talent?

⁴ Wadek Madiu 25:14-30. Nan karasaras en papah silimeno, Sises mahsanih duwen ohl emen me wia seiloak ehu. Nan ehu karasaras me duwehte met, Sises mahsanih duwen ohl emen me wia seiloak ehu pwehn wiahla nanmwarki. * (Luk 19:12) Erein sounpar tohto neitail sawaspen Paipel kan kin koasoia me nan karasaras riau ko koaros, ohlo kin karasaraskihong Sises, me ketidahla nanleng nan pahr 33. Ahpw Sises sohte ketin mwadangete wiahla Nanmwarki ni ahnsou me e ketidahla nanleng. E ketin awiawih lao pahr 1914, ni ahnsou me sapwellime imwintihti ko “wiahla utupen aluweluwe kan.”​—Ipru 10:12, 13.

⁵ Sises mahsanih me ohlo nan karasaraso naineki talent waluh. Mwohni laud ehu met. * Mwohn ohlo kohkohla, e kihong nah papah ko mwohni wet. E ndaiong irail ren doadoahngki mwohni wet pwehn kadoahkihada wihn en mwohni ong ih. Duwehte mwohni ko eh uhdahn kesempwal ong ohl menet, mie mehkot me pil uhdahn kesempwal ong Sises. Dahkot mwo? Met iei doadoahko me e ketin wia erein e ketiket nin sampah.

6, 7. Dahme talent ko kin karasaraskihong?

⁶ Doadoahk en kalohk uhdahn kesempwal ong Sises. Pwehki sapwellime doadoahk en kalohk, me tohto wiahla sapwellime tohnpadahk. (Wadek Luk 4:43.) Ahpw e ketin mwahngih me mie doadoahk me laudsang met me anahne wiawi oh me aramas tohto pahn alehdi rongamwahwo. Ni mehlel, e mahsanihong sapwellime tohnpadahk ko: “Kumwail sarada oh kilengwohng mwetuwel kan, wahrail kan mahier oh mwahuwongehr en dondol.” (Sohn 4:35-38) Soumwet mwahu men sohte pahn kesehla eh mwahto me mwahuwongehr en dondol. Sises sapwellimanki soangen madamadauohte. Eri mwohnte Sises eh ketidahla nanleng, e ketin kehkehlikihong sapwellime tohnpadahk ko: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk.” (Mad. 28:18-20) Ni ahl wet, Sises ketikihong irail pai kesempwal ehu, iei pwukoa kesempwal en kalohk.​—2 Kor. 4:7.

 ⁷ Duwehte ohlo me kihong nah mwohni ko ong nah ladu ko, Sises ketikihong sapwellime me keidi kan doadoahk en katohnpadahk. (Mad. 25:14) Eri talent ko kin karasaraskihong pwukoa en kalohk oh katohnpadahk.

8. Mendahki uwen mwohni me emenemen papah ko alehdi wekpeseng, dahme arail kauno kasik sang irail?

⁸ Sises mahsanih me ahn papah ko ar kauno kihong talent limau ong ladu keieuwo, talent riau ong ladu kariemeno, oh talent ehu ong ladu kasilimeno. (Mad. 25:15) Uwen mwohni me arail kauno kihong emenemen irail wekpeseng, ahpw e kasik me irail koaros en wia uwen arail kak en kadoahkihada wihn en mwohnio ong ih. Ni ahlohte, Sises ketin kasik sapwellime me keidi kan en wia uwen arail kak nan doadoahk en kalohk. (Mad. 22:37; Kol. 3:23) Ni Pendekos pahr 33, sapwellimen Sises tohnpadahk kan tepida wia doadoahk en katohnpadahk nan wehi koaros. Oh ahnsou me kitail wadek pwuhken Wiewia nan Paipel, kitail kilang ni sansal uwen laud en arail kin doadoahk. *​—Wiewia 6:7; 12:24; 19:20.

9. (a) Dahme papah lelepek riemeno wiahiong mwohni ko? Dahme kitail sukuhlkihsang met? (b) Dahme irail kan me ahneki koapworopwor nin sampah anahne wia?

⁹ Papah riemeno me doadoahngki mwahu  nein ara kauno mwohnio, kin karasaraskihong Kristian lelepek keidi kan ni imwin rahn akan. Ahpw keieu sang pahr 1919, irail kin wia uwen arail kak nan doadoahk en kalohk. Nan karasaraso, uwen mwohni me papah riemeno alehdi wekpeseng, ahpw met sohte wehwehki me me keidi lelepek kan wia pwihn riau me wekpeseng. Papah riemen ko koaros doadoahk laud oh kalaudehla mwohnio. Ahpw ia duwe, irail me keidi kante me anahne doadoahk laud nan kalohk oh padahk? Soh. Sapwellimen Sises karasaras en sihpw oh kuht ko padahkihong kitail me irail kan me ahneki koapworopwor en mour kohkohlahte nin sampah anahne sewese rien Krais me keidi kan nan doadoahk en kalohk oh re anahne loalopwoatohng irail. Irail pwukat pehm me e wia kapai ehu en sewese rien Krais kan. Ei, sapwellimen Siohwa aramas akan wia “pwihn sihpw teieu,” oh irail koaros kin doadoahk laud pwe ren kalohk oh katohnpadahk.​—Sohn 10:16.

10. Mehnia kisehn kilelo me kadehdehda me kitail mihmi ni imwin rahn akan?

¹⁰ Sises ketin kasik me sapwellime tohnpadahk kan koaros ren doadoahk laud pwehn katohtohla tohnpadahk kan. Ih met me sapwellime tohnpadahk ko wia ni mwehin wahnpoaron ko. Ahpw ia duwen ni imwin rahn pwukat ni sapwellimen Sises karasaras duwen papah silimeno eh wie pweidahr, sapwellime tohnpadahk kan kin wiewia doadoahk wet? Ei, aramas tohtohie karongehier rongamwahwo oh wiahla tohnpadahk kei laudsang mahso! Pwehki doadoahk laud me sapwellimen Sises tohnpadahk ko koaros wiadahr, aramas kid kid kei kin papidaisla sounpar koaros. Oh irail pil iangehr doadoahk en kalohk. Wiewia pwukat koaros oh ar kin imwila mwahu uhdahn kasalehda me doadoahk en kalohko wia kisehn soahng kan me kesempwal nan kilelo me Sises ketikihda duwen imwin rahn akan. Sises uhdahn kupwurperenkihda sapwellime tohndoadoahk kan!

11. Ia duwen atail ese me Sises pahn ketido erein kahn kamakam kowahlap?

¹¹ Sises mahsanih: “Kedekedeo, mwurin ahnsou reirei, en papah ko ar kaun ahpw pwurodo oh wia kainen en mwohni ko rehrail.” (Mad. 25:19) Kauno, me iei Sises, pahn ketin wia met ni kahn kamakam kowahlapo eh kereniong imwisekla. Ia duwen atail ese met? Nan sapwellime kokohp me kileldi nan  Madiu irelaud 24 oh 25, Sises mahsanih pak tohto me e pahn ketido. Karasepe, e mahsanih me aramas akan “pahn kilang duwen Nein-Aramas eh pahn ketiket kohdo pohn depwek en pahnlahng.” Met kin dokedoke erein kahn kamakam kowahlapo, ahnsou me Sises pahn ketin kadeikada aramas akan. E pil ketin katamankihong sapwellime tohnpadahk ko me mihmi ni imwin rahn akan ren mwasamwasahn. E mahsanih: “Kumwail sehse rahn me amwail Kaun-o pahn ketido” oh, “Nein-Aramas pahn ketido ni awa me kumwail pahn sasairki.” (Mad. 24:30, 42, 44) Eri nan karasaras en papah silimeno, Sises pil kin mahmahsanih duwen ahnsou me e pahn ketido pwehn ketin kadeikada aramas akan oh kasohrehla ahn Sehdan sampah. *

12, 13. (a) Dahme ahn papah riemeno ara kauno ndaiong ira, oh dahme kahrehda? (b) Iahd me kaimwiseklahn kileldi en irail me keidi kan pahn wiawi? (Menlau kilang koakon me oaralap “ Pakadeikda nin Duwen me Warohng kei ni Arail Mehla.”) (c) Soangen keting dahieu me irail me utung me keidi kan pahn alehdi?

¹² Ni ahnsou me kauno pwurodohsang eh seiloako, e kilang me papah me naineki talent limauo pil koadoahkihada talent limau, oh me naineki talent riauo pil koadoahkihada talent riau. Ara kauno ndaiong emenemen ira: “Keieu mwahu, papah lelepek oh mehlel men kowe! Pwehki omw loalopwoat ni koadoahkpen mehkot me tikitik, I pahn kihong uhk mehkot laud pwe ke en kin apwahpwalih.” (Mad. 25:21, 23) Dahme Kauno, Sises, pahn ketin wia ni eh pahn ketido ahnsou kohkohdo?

¹³ Kaimwiseklahn kileldi en irail me keidi kan me kin doadoahk laud, pahn wiawiher mwohnte kahn kamakam kowahlapo. (Kaud. 7:1-3) Eri, mwohn Armakedon, Sises pahn ketikihong ketingparail ni eh ketikihiraildahla nanleng. Ahpw ia duwen irail kan me ahneki koapworopwor en mour nin sampah me utung me keidi kan nan doadoahk en kalohk? Re pahn pakadeikda nin duwen sihpw kei. Oh re pahn ale keting en mour nin sampah pahn kaundahn Wehin Koht.​—Mad. 25:34.

14, 15. Ia duwe, Sises mahmahsanih me tohtohn me keidi kan pahn suwedla oh pohnkahkehla? Menlau kawehwehda.

¹⁴ Karasaraso pil kasalehda duwen papaho me alehdi talent ehu. E sohte kadoahkihada mwohnio pwehn laudla ong eh kauno de kihong nan pangk pwehn alehdi wihn en mwohnio. Ahpw, e sarepedi mwohnio. Kauno eri ndaiong ih me ih papah suwed oh pohnkahke men. E kihsang papah suwedo talento oh kihong papah keieuo. Ih eri kesepwekehla papah suwedo liki “nan rotorot mosul,” wasa me papaho sengiseng pwehki solahr eh koapworopwor.​—Mad. 25:24-30; Luk 19:22, 23.

¹⁵ Ni Sises eh mahsanih me emen rehn papah silimeno me suwed oh pohnkahke, e sohte mahmahsanih me silikis ehu en me  keidi kan pahn duwehte papah suwedo. Kitail ese met sang atail kapahrekihong karasaras wet ong pil karasaras riau. Nan karasaras en ladu lelepek oh loalokongo, Sises ketin kasalehda duwen papah suwed men me kin kaloke papah teikan. Sises sohte mahmahsanih me irail ko me wia kisehn ladu lelepek oh loalokongo pahn suwedla. Ahpw, e ketin katamankihong irail me keidi pwukat me ren dehr duwehla papah suwedo. Mwuhr, nan karasaras en serepein meipwon ehk ko, Sises ketin kasalehda duwen meipwon loalopwon limmen. E sohte ketin mahmahsanih me elep en me keidi kan pahn loalopwon. Ahpw, Sises ketikihda mehn kataman duwen dahme pahn wiawi ma re sohte kin onohnop oh mwasamwasahn. * Pil duwehte karasaras en papah silimeno, Sises sohte mahmahsanih me tohtohn irail me keidi kan erein imwin rahn akan pahn suwed oh pohnkahke. Ahpw, e ketin katamankihong me keidi kan ren dehr duwehla papah suwed men ahpw ren pousehlahte doadoahk laud nan kalohk, ren “koadoakihada” neirail talent ko.​—Mad. 25:16.

16. (a) Mehn kasukuhl riau dah me kitail sukuhlkihsang karasaras en papah silimeno? (b) Ia duwen iren onop wet eh sewese kitail en wehwehki karasaras en papah silimeno? (Menlau kilang koakon me oaralape “ Ia Duwen Atail en Wehwehki Karasaras en Papah Silimeno?”)

¹⁶ Mehn kasukuhl riau dah me kitail sukuhlkihsang karasaras en papah silimeno? Keieu, Sises ketikihong sapwellime me keidi kan pai kesempwal ehu, me iei pwukoa kesempwal en kalohk oh katohnpadahk. Keriau, Sises ketin kasik kitail koaros en doadoahk laud nan kalohk. Ma kitail dadaurete ni loalopwoat nan doadoahk wet oh kolokol atail kin peik oh loalopwoatohng Sises, kitail kak kamehlele me e pahn ketin katingih kitail.​—Mad. 25:21, 23, 34.