1, 2. ¿Imaraykutaj talentos rijchʼanachinamanta Jesús parlarqa?

JESUSQA talentosmanta rijchʼanachinanpi imatachus ajllasqa cristianosmanta suyasqanta rikucherqa. Ajllasqa cristianos kaspapis chayri manapis chay rijchʼanachina imatachus niyta munasqanta sumajta entiendenanchej tiyan, imaraykuchus chayqa kausayninchejpi yanapawasun.

² Jesús chay rijchʼanachinamanta parlarqa apostolesnin “ima señaltataj rikuchiwasqayku kutimunaykimanta, kay pachaj tukukuyninmantawan?”, nispa tapojtinku (Mat. 24:3). Chay rijchʼanachinaqa uj señal Jesús Rey jina kamachimushasqanmantaña, chaytaj kay pʼunchaykunapi juntʼakushan.

3. ¿Imastataj yachakusunman Mateo 24, 25 capitulospi rikhurej rijchʼanachinasmanta?

³ Jesusqa talentos rijchʼanachinamanta parlashaspa, waj kinsa rijchʼanachinasmantawan parlarqa, chaykunataj tukukuy pʼunchaykunamanta señales kanku. Chay rijchʼanachinasqa Jesuspa yachachisqasnin ima kʼacha kaykunasniyojchus kananku kasqanta sutʼinchashan. Chay rijchʼanachinastaj, Mateo 24:45–25:46 versiculospi kashan. Ñaupaj kajqa, allin kamachi yuyayniyojmanta rijchʼanachina, chay kamacheqa uj  juchʼuy qotu ajllasqa cristianosmanta kanku, Diospa llajtanta yachachinankupajtaj kamachisqas kanku. Paykunaqa atienekunapaj jina, yuyayniyojtaj kananku tiyan. Iskay kajtaj, chunka sipaskunamanta rijchʼanachina, chaywantaj Jesusqa ajllasqa cristianosman yuyaycharqa wakichisqas, rijchʼarisqastaj kanankuta, imaraykuchus mana yachankuchu ima pʼunchaychus, ima horachus Jesús jamunanta. Kinsa kajqa, talentosmanta rijchʼanachina, chaywantaj ajllasqa cristianosta yachachisharqa kamachisqanta juntʼanankupaj mayta kallpachakunanku kasqanta. Tawa kajtaj, ovejasmanta, cabrasmanta rijchʼanachina, chaywantaj kay Jallpʼapi wiñaypaj kausakuyta suyakojkuna cheqa sonqo kanankuta, ajllasqa cristianosta yanapanankupaj tukuy imata ruwanankuta ima nisharqa. * Kay yachaqanapitaj talentosmanta rijchʼanachina imatachus niyta munasqanta sutʼinchakonqa.

4, 5. 1) ¿Piwantaj ninakun rijchʼanachinamanta patrón? 2) ¿Mashkhataj uj talento valej Jesuspa tiemponpi?

⁴ (Mateo 25:14-30 leey.) Publicacionesninchejqa sutʼincharqa kay rijchʼanachinamanta patrón, Jesuswan ninakusqanta, pichus 33 watapi cieloman riporqa. Waj rijchʼanachinapitaj Jesusqa “karu llajtaman [...] reymanta churasqa kanampaj” rinanta nerqa (Luc. 19:12). * Chaywanpis Jesusqa mana cieloman ripuytawanchu rey jina churasqa karqa. Manaqa “Diospa pañanman tiyaykukorqa”, suyakorqataj 1914 watapi “enemigosnin chakisnin uraman churasqa” kanankukama (Heb. 10:12-14).

⁵ Jesusqa rijchʼanachinamanta patrón pusaj talentosniyoj kasqanta nerqa, chaytaj chay tiempopi may valorniyoj karqa. * Manaraj ripushaspataj chay patronqa, kamachisninman talentosninta mirachinankupaj qorqa. Chay patrón jinallataj Jesuspis niraj cieloman ripushaspa may jina kapuyniyoj karqa. ¿Imataj chay kapuynin karqa? Imatachus Jesús kay Jallpʼapi kashaspa ñaupajman churasqan karqa.

6, 7. ¿Imawantaj talentos ninakun?

⁶ Jesusqa runasman willamuyta may jatunpaj qhawarqa, chayraykutaj ashkha runas yachachisqasninman tukorqanku (Lucas 4:43 leey). Chaywanpis yacharqa mayraj llankʼana kasqanta. Chayrayku yachachisqasninman aswan ñaupajpiña kayta nerqa: “Qhawariychej chajrasta; cosechanapaj poqosqaña kashanku”, nispa (Juan 4:35-38). Uj chajra runaqa chajran cosechanapajña kashajtin mana saqerparinchu. Ajinallatataj Jesuspis cheqa kajmanta yachakuyta munaj llampʼu sonqo runasta mana jinallata saqerparinmanchu karqa. Chayrayku niraj cieloman ripushaspa yachachisqasninman runasman willamunankuta kamacherqa (2 Cor. 4:7). Pay nerqa: “Rispa, tukuy laya runasta yachachisqasniyman tukuchimuychej”, nispa (Mat. 28:18-20).

⁷ Imaynatachus rijchʼanachinamanta patrón kamachisninman qolqeta qorqa, ajinallatataj  Jesuspis ajllasqa cristianosman uj llankʼayta qorqa, chay llankʼaytaj karqa runasta yachachisqasninman tukuchimuy (Mat. 25:14). Waj parlaypi nisunman, runasman willamuy, Jesuspa yachachisqasninman tukuchimuy ima, talentoswan ninakusqanta.

8. ¿Imatataj patrón kamachisninmanta suyarqa?

⁸ Rijchʼanachinamanta patronqa kinsa kamachisniyoj karqa. Ujninman 5 talentosta qorqa, ujninman iskayta, ujninmantaj ujllata (Mat. 25:15). Patronqa mana kinsantin kamachisninmanchu phishqa talentosta qorqa, chaywanpis suyarqa sapa ujninku qosqan talentosta mirachinankuta. Chaytaj niyta munan Jesuspa yachachisqasnin tukuy atisqankuta runasman willamunanku kasqanta (Mat. 22:37; Col. 3:23). Paykunaqa Pentecostés 33 watapi runasman willayta qallarerqanku. Hechos librota leerishaspataj sutʼita rikunchej paykuna chay ruwayta juntʼanankupaj mayta llankʼasqankuta (Hech. 6:7; 12:24; 19:20). *

9. 1) Jesuspa rijchʼanachinamanta iskay kamachis, ¿imatataj ruwarqanku talentoswan, imatá chaymanta yachakunchej? 2) ¿Imatataj kay Jallpʼapi kausakuyta suyakojkuna ruwananku tiyan?

⁹ Kay qhepa pʼunchaykunapi, astawantaj  1919 watamantapacha, ajllasqa cristianosqa Jesuspa talentosninta mirachisharqanku. Jesuspa rijchʼanachinanmanta iskay kamachis jinallataj, ajllasqa cristianosqa tukuy atisqankuta ruwarqanku. Jesuspa rijchʼanachinanpeqa uj kamachi phishqa talentosta japʼerqa, ujtaj iskayta. Iskayninkutaj mayta kallpachakorqanku japʼisqanku talentosta mirachinankupaj. ¿Ajllasqa cristianosllachu runasman willamunankupaj, yachachimunankupaj ima mayta kallpachakunanku tiyan? Mana. Ovejasmanta, cabrasmanta rijchʼanachinaqa yachachiwanchej kay Jallpʼapi kausakuyta suyakojkunapis, ajllasqa cristianosta yanapananku kasqanta, paykunata kasukunanku kasqanta ima. Paykunaqa ajllasqa cristianosta yanapayta may jatunpaj qhawanku. Arí, Diospa llajtanmanta kajkunaqa “uj tropalla” kanku, paykunataj Reinomanta ujchasqa willamushanku, runastapis Jesuspa yachachisqasninman tukuchimushanku (Juan 10:16).

10. ¿Imataj rikuchin qhepa pʼunchaykunapi kausashasqanchejta?

¹⁰ Jesusqa kamachisnin ashkha runasta yachachisqasninman tukuchimunankuta suyan. Chaytataj ñaupa tiempomanta cristianos ruwarqanku. Kay tiempopitaj talentosmanta Jesuspa rijchʼanachinan juntʼakushan. ¿Jesuspa yachachisqasnin kamachisqanta juntʼashankuchu? Arí. Imaraykuchus ni jaykʼaj jina ashkha runas sumaj willaykunata uyarishanku, Jesuspa yachachisqasninmantaj tukushanku. Chay ruwayta juntʼanankupaj mayta kallpachakushasqankuraykutaj ashkha runas sapa wata bautizakunku, willaypipis yanapakushanku. Tukuy chaykunataj sutʼita rikuchin qhepa pʼunchaykunapi kausakushasqanchejta, Jesuspis kamachimushasqantaña. Tukuy chayta rikuspa Jesusqa sonqo juntʼasqachá kashan.

11. ¿Imaraykú ninchej manchay ñakʼariy tiempopi Jesús kamachisninmanta cuentata mañananta?

¹¹ Jesusqa kamachisninmanta cuentata mañaj jamonqa manchay ñakʼariy tiempo manaraj tukukushajtin. ¿Imaraykú chayta ninchej? Imaraykuchus Jesusqa Mateo 24, 25 capitulospi tarikoj profeciapi, ashkha kutispi jamuyninmanta parlarqa. Sutʼincharinapaj, manchay ñakʼariy tiempopi,  runas juchachasqa kashajtinku “Runaj Churinta cielo phuyus patapi jamushajta rikonqanku” nerqa. Tukuy cristianos kay tukukuy pʼunchaykunapi wakichisqas kanankupajtaj, nerqa: “Mana yachankichejchu ima pʼunchaychus Señorniykichej kutimunanta. [...] Mana yuyasqaykichej horapi Runaj Churenqa kutimonqa”, nispa (Mat. 24:30, 42, 44). Chantapis Jesusqa, “patronnink[u] unaymanta kutimuspa, paykunamanta cuentata mañasqa” nispataj, maykʼajchus kay pachaj tukukuyninpi runasta juzgananmanta, Satanaspa sajra pachanta chinkachinanmanta ima parlasharqa (Mat. 25:19). *

12, 13. 1) ¿Imatataj patrón iskay kamachisman nerqa, imaraykutaj? 2) ¿Maykʼajtaj ajllasqa cristianos wiñaypaj sellasqa kanqanku? ( Patapi kaj recuadrota leey.) 3) ¿Imatataj japʼenqanku Cristoj wauqesninta yanapajkuna?

¹² Jesuspa rijchʼanachinanpi patrón karu llajtamanta kutimuspa, rikorqa phishqa talentosta japʼej kamachi waj phishqa talentostawan ganasqanta, iskay talentosta japʼej kamachipis waj iskay talentostawan ganasqanta. Chayraykutaj patronqa sapa ujman nerqa: “Walejpacha, allinta ruwaj kamachi; pisi kajpi allinta ruwaspa juntʼasqaykirayku, kunanqa aswan ashkhata qosqayki”, nispa (Mat. 25:21, 23). ¿Imataj kanqa patronninchej Jesús runasta juzgananpaj kutimojtin?

 ¹³ Niraj manchay ñakʼariy tiempo qallarishajtin chay iskay kamachiswan ninakoj ajllasqa cristianosqa, wiñaypaj sellasqa kanqanku (Apo. 7:1-3). Niraj Armagedón maqanakuy qallarishajtintaj Jesús ajllasqa cristianosman janaj pachapi kausakuy tʼinkata qoponqa. Cristoj wauqesninta willaypi yanapajkunatajrí ovejaspaj qhawasqa kanqanku. Diospa Reinon kamachimushajtintaj, wiñaypaj kay Jallpʼapi kausakuyta atenqanku (Mat. 25:34).

14, 15. ¿Jesús nisharqachu ashkha ajllasqa cristianos sajrasman, qhellasman ima tukunankuta? Sutʼinchay.

¹⁴ Uj talentollata japʼej kamacheqa, chay talentota mirachinanmanta, bancoman churananmanta imaqa, jallpʼaman pʼampaykorqa. Patronnintaj chayta ruwasqanrayku nerqa: “Sajra, qhella kamachi”, nispa. Qosqan talentotapis qhechorqa, chunka talentosniyojmantaj qorqa. Chaymantataj patronqa chay qhella kamachita “jawa laqhaman wij[chʼorqa], maypichus waqay, kiru kʼarukuytaj kanqa, chayman” (Mat. 25:24-30; Luc. 19:22, 23).

¹⁵ Jesús uj talentollata japʼej kamachita “sajra, qhella” kasqanta nisqan, ¿ninayanchu sapa kinsa ajllasqa cristianosmanta, ujnin sajra, qhella kamachi kananta? Mana. Chayta yachanchej kay rijchʼanachinata waj iskay rijchʼanachinaswan kikinchaspa. Allin kamachi yuyayniyojmanta  rijchʼanachinapeqa, Jesús uj sajra kamachimanta parlarqa, pichus kamachi masisninta maqarqa. Chaywantaj mana nisharqachu allin kamachi yuyayniyoj kajkunamanta wakin sajras kanankuta. Astawanpis chayta nispaqa, ajllasqa cristianosman yuyaychasharqa mana chay sajra kamachi jinachu ruwanankuta. Chunka sipaskunamanta rijchʼanachinapitaj, phishqa mana yuyayniyoj sipaskunamanta parlarqa. Chaywantaj mana nisharqachu, ajllasqa cristianosmanta khuskan mana yuyayniyoj kanankuta. Astawanpis mana wakichisqa kaspa, nitaj rijchʼarisqa kaspa imapichus rikukunankuta nisharqa. * Ajinallatataj talentosmanta rijchʼanachinapipis, mana nisharqachu kay qhepa pʼunchaykunapi ashkha ajllasqa cristianos sajrasman, qhellasman ima tukunankuta. Astawanpis ajllasqa cristianosman wakichisqapuni kanankuta yuyaychasharqa, nisunman runasman willamunankuta, nitaj sajra, qhella kamachi jinachu ruwanankuta (Mat. 25:16).

16. 1) ¿Imastataj yachakunchej talentos rijchʼanachinamanta? 2) ¿Imaynatataj kay yachaqana yanapawanchej talentosmanta rijchʼanachinata astawan entiendenapaj? (“ Talentosmanta rijchʼanachina aswan sutʼi”, nisqa recuadrota leey.)

¹⁶ ¿Imastá yachakunchej talentos rijchʼanachinamanta? Ñaupaj kaj, Jesusqa ajllasqa kamachisninman uj sumaj ruwayta kamacherqa, chaytaj kashan runasman Reinomanta willay, yachachisqasninman tukuchiy ima. Iskay kaj, Jesusqa suyan tukuyninchej Reinomanta willaypi mayta kallpachakunanchejta. Reinomanta willamusunchej, Jesusta kasukusunchej, payman cheqa sonqo kasunchej ima chayqa, pay bendecinawanchejta suyakuyta atinchej (Mat. 25:21, 23, 34).