Аманат пул тымсалындан нәме өвренйәрис?
«Адам... бирине – бәш, бирине – ики, бирине – бир талант берди». МАТ. 25:15
1, 2. Иса аманат пул тымсалыны нәме үчин гүррүң берйәр?
ИСА аманат пул тымсалында месх эдилен месихчилериң җогапкәрчилиги барада айдяр. Эмма бу тымсал гөкде ве ерде яшамага умыт эдйән вепалы месихчилериң әхлисине дегишлидир. Шонуң үчин муңа хер биримиз дүшүнмәге җан этмели.
2 Иса аманат пул тымсалы аркалы шәгиртлериң: «Сениң гелмегиңиң ве ахырзаманың аламаты нәме болар?» диен сорагына җогап берйәр (Мат. 24:3). Ол бизиң гүнлеримизде ерине етип, Исаның барлыгының ве гөкде хөкүм сүрмегиниң аламатыны аян эдйәр.
3. Матта 24, 25-нҗи баплардакы тымсаллардан нәме өвренйәрис?
3 Матта 24:45—25:46-нҗы аятларында бири-бири билен багланышыклы дөрт саны тымсал язылан. Оларың бири: аманат пул тымсалы. Бейлеки үчүси: садык хем акыллы хызматкәр, он гыз, гоюнлар ве гечилер барадакы тымсаллар. Оларда Исаның барлыгының аламаты, соңкы гүнлерде вепалы гуллукчыларының нәхили хәсиетли болмалыдыгы барада агзаляр. Хызматкәрлер, гызлар ве аманат пул барадакы тымсаллар месх эдилен месихчилере дегишлидир. Садык хызматкәр барадакы тымсалда олар соңкы гүнлерде хызматкәрлере иймит пайлап, вепалы ве пайхаслыдыгыны гөркезйәрлер. Он гыз тымсалында Исаның гелҗек гүнүни ве сагадыны билмеселер-де, әхли месх эдиленлериң тайяр хем оя болмалыдыгы ныгталяр. Аманат пул барадакы тымсалда болса, олар борчларыны ыхласлы ерине етирмелидиги хакында айдыляр. Гоюнлар ве гечилер тымсалында ерде эбеди яшамага умыт эдйән месихчилериң вепалы галып, Исаның ердәки доганларыны йүрекден голдамалыдыгы барада гүррүң берилйәр *. Гелиң, аманат пул тымсалына гиңишлейин середелиң.
ХОҖАЙЫН ХЫЗМАТКӘРЛЕРИНЕ МАЛ-МҮЛКҮНИ ЫНАНЯР
4, 5. Тымсалдакы хоҗайын ким? Өңки дөвүрде талантың гымматлыгы нәхилиди?
4 Матта 25:14—30-нҗы аятлары окаң. Өң тымсалдакы хоҗайын Иса меңзедилйәрди. Онуң сыяхата гитмегини болса, б. э. 33-нҗи йылында Исаның гөге галмагы билен деңешдирилйәр. Иса башга бир тымсалында: «Бир асылзада өзүне патышалык алып гелҗек болуп, бир узак юрда ёла дүшйәр» дийип, өз сыяхатының максадыны аян эдйәр (Лука 19:12). Иса гөге галанда, оңа Патышалык ыгтыяры долы берилмеди *. Ол «Худайың сагында отуруп... душманларының өз аякларының астына басганчак эдилмегине гарашмалыды» (Евр. 10:12, 13).
5 Хоҗайының секиз таланты, ягны улы мүлки барды *. Ол сыяхата гитмәнкә хызматкәрлерине талантыны көпелтмеги табшыряр. Иса-да гөге гитмәнкә әгирт мүлк эдинди. Бу мүлке нәме дегишлиди? Муны билмек үчин, гелиң, онуң өзүни нәмә багыш эдендигине середелиң.
6, 7. Талант нәмәни аңладяр?
6 Иса вагыз этмек ве шәгирт тайярламак ишини өрән гыммат сайяр (Лука 4:43-и окаң). Ол бол хасыл алмак үчин көп зәхмет чекйәр. Бир гүн ол шәгиртлерине: «Гөзүңизи галдырың-да, экин мейданларына середиң, олар эййәм ормага етишипдир» диййәр (Яхя 4:35—38). Иса акйүрекли адамларың хакыкаты билмегини ислейәрди. Говы дайхан орак дөврүнде элини говшурып отурмаяр. Иса-да гөге галманка: «Гидиң-де, бүтин миллетлери шәгирт эдиң» дийип табшыряр (Матта 28:18—20). Хава, Иса шәгиртлерине гымматлы хазынаны, ягны вагыз ишини ынаняр (2 Кор. 4:7).
7 Муңа нәхили дүшүнсе болар? Исаның табшырыгы өз «мал-мүлкүни», ягны талантларыны пайландыгыны гөркезйәр (Мат. 25:14). Диймек, талантлар вагыз этмеги ве шәгирт тайярламагы аңладяр.
8. Хоҗайын таланты дең пайламаса-да нәмә гарашяр?
8 Хоҗайын бир хызматкәрине бәш, бейлекисине ики, ене бирине болса бир талант берйәр (Мат. 25:15). Хоҗайын таланты дең пайламаяр, йөне ол хызматкәрлериниң башарныклы ве ыхласлы болмагыны ислейәр (Мат. 22:37; Кол. 3:23). Б. э. 33-нҗи йылының Пентикост гүни Исаның шәгиртлери таланты көпелтмек үчин зәхмет чекип башладылар. Оларың вагыз этмек ве шәгирт тайярламак ишинде гөркезен ыхласы Ресулларың ишлери китабында беян эдилйәр * (Рес. иш. 6:7; 12:24; 19:20).
СОҢКЫ ГҮНЛЕРДЕ ХЫЗМАТКӘРЛЕРИҢ ЗӘХМЕТИ
9. a) Ики вепалы хызматкәр талантларыны нәме этдилер ве бу нәмәни аңладяр? б) «Башга гоюнлар» нәхили иши ерине етирйәрлер?
9 1919-нҗы йылдан бәри Месихиң месх эдилилен вепалы хызматкәрлери Хоҗайының талантыны хас-да көпелдйәрлер. Олар тымсалдакы ики хызматкәр ялы Хоҗайынының ынамыны өдемек үчин элинде барыны эдйәрлер. Бәш ве ики талант алан хызматкәриң кимдиги мәлим болмаса-да, оларың хоҗайынының талантыны көпелтмек үчин җан эдендигини билйәрис. Ерде эбеди яшамага умыт эдйән месихчилер нәхили иши ерине етирйәрлер? Гоюнлар ве гечилер тымсалында ерде яшаҗак месихчилериң Исаның доганларыны вагыз ишинде голдамалыдыгы айдыляр. Олар муны улы хормат сайярлар! Соңкы гүнлерде ики топар хем «бир сүри» хөкмүнде шәгирт тайярламак ишини ыхласлы ерине етирйәрлер (Яхя 10:16).
10. Исаның барлыгыны нәме субут эдйәр?
10 Хава, хоҗайының талап этмәге хакы бар. Ёкарда айдылышы ялы, I асырда яшан вепалы шәгиртлер Исаның мүлкүни говы доландырярлар. Аманат пул тымсалының соңкы гүнлерде долы ерине етйәндиги барада нәме дийсе болар? Исаның вепалы хем зәхметсөер гуллукчылары вагыз ишини тарыхда гөрлүп-эшидилмедик мөчберде алып барярлар. Оларың эдйән тагаллалары билен хер йыл 100 мүңлерче адамлар Патышалыгың вагызчылары болярлар. Вагыз ве шәгирт тайярламак ишиниң өсмеги Исаның Патыша хөкмүнде хөкүм сүрйәндигини месе-мәлим эдйәр. Хоҗайын муңа дийсең хошал!
Иса шәгиртлерине хорматлы вагыз ишини ынаняр (10-нҗы абзаца середиң)
ХОҖАЙЫН ХАСАБАТ СОРАМАГА ХАЧАН ГЕЛЕР?
11. Исаның агыр мушакгатда хасабат сораҗакдыгыны ниреден билйәрис?
11 Иса агыр мушакгатың соңунда хызматкәрлеринден хасабат сорамага гелер. Биз муны ниреден билйәрис? Маттаның 24 ве 25-нҗи бапларында Иса өзүниң гелҗекдигини ныгтап гечйәр. Агыр мушакгатда адамлар «Ынсан Оглуның гөкдәки булутларда... гелйәнини гөрер». Иса: «Сиз Реббиңизиң хайсы гүн гелҗегини билмейәрсиңиз... Чүнки Ынсан Оглы сизиң осламаян сагадыңызда гелер» дийип, шәгиртлерине оя болмагы дуйдурды (Мат. 24:30, 42, 44). Шейлеликде, «хызматкәрлериң агасы гелип, олардан хасабат сораяр» диен җүмле Исаның бу залым дүнйәниң үстүнден хөкүм этмәге гелҗек вагтыны тассыклаяр * (Мат. 25:19).
12, 13. a) Хоҗайын хызматкәрлерине нәме дийди ве нәме үчин? б) Месх эдилен месихчилере соңкы мөхүр хачан басылар? (« Иң соңкы хасабат» диен чарчува середиң). в) Башга гоюнлар нәхили сылага эе боларлар?
12 Тымсалда хоҗайын вепалы хызматкәрлериң талантыны көпелендигини гөрйәр. Шонда ол бәш ве ики талант берен хызматкәрине: «Берекелла, ягшы, садык хызматкәр! Сен аз затда садык болдуң, мен саңа көп затлары ынанарын» диййәр (Мат. 25:21, 23). Хоҗайын, ягны Иса шан-шөхрат билен хөкүм этмәге геленде нәме эдер?
13 Бу ики хызматкәр зәхметсөер месх эдилен месихчилери аңладяр. Олара агыр мушакгат башламанка соңкы мөхүр басылар (Ылх. 7:1—3). Армагеддоның өң янында болса, Иса олара вада эден гөкдәки сылагыны берер. Ерде яшамага умыт эдйән месихчилер хем Месихиң доганларыны голдап, гоюнлар хөкмүнде акланарлар ве Патышалыгың раятлары болмага мынасып гөрлер (Мат. 25:34).
ЭРБЕТ ВЕ ЯЛТА ХЫЗМАТКӘР
14, 15. Иса месх эдиленлериң көпүси эрбет ве ялта болар дийдими? Дүшүндириң.
14 Тымсалдакы үчүнҗи хәзматкәр хоҗайының пулуны көпелтмегиң ве гөтеримине бермегиң дерегине, оны ере гөмүп гойяр. Бу пәлияман хызматкәр агасының ислегине гаршы гидйәр. Шол себәпли хоҗайыны оңа «эрбет хем ялта» диййәр ве бир таланты алып, он талант газанана берйәр. Соңра пейдасыз хызматкәри «дашарык гараңкылыга ташлаяр; ол ерде агы ве диш гыҗама болар» (Мат. 25:24—30; Лука 19:22, 23).
15 Иса таланты гөмүп гоян хызматкәр барада гүррүң беренде, месх эдилен месихчилериң үчден бир бөлегиниң эрбет хем ялта болҗакыгыны гөз өңүне тутдумы? Ёк! Гелиң, тымсаллары ене бир сапар яда салалың. Иса садык хем акыллы хызматкәр тымсалында эрбет хызматкәриң башгалары урандыгыны белләп гечйәр. Эмма бу эрбет хызматкәрлериң болҗакдыгыны аңлатмаяр. Иса эрбет хәсиетлере гаршы гөрешмелидигини дуйдуряр. Шейле-де Иса оларың он гыз тымсалындакы бәш акылсыз гыза меңзеҗекдигини пыгамберлик этмеди. Гайтам, ол оя ве тайяр болмадык хызматкырлерине нәме болҗакдыгыны дуйдуряр *. Аманат пул тымсалында хем месх эдиленлериң эрбет ве ялта болҗакдыгы айдылмаяр. Иса оларың ыхлас билен көп талант газанмалыдыгыны ве эрбет гарайышдан хем ишлерден гача дурмалыдыгыны дуйдуряр (Мат. 25:16).
16. a) Аманат пул тымсалындан нәме өвренйәрис? б) Тымсал нәдип йөнекей ве айдың дүшүндирилйәр? (« Аманат пул тымсалының дүшүндирилиши» диен чарчува середиң).
16 Биз аманат пул барадакы тымсалдан ики ваҗып зады өвренйәрис. Биринҗиден, Хоҗайынымыз Иса хазынасыны — вагыз ве шәгирт тайярламак ишини месх эдилен месихчилере ынанды. Икинҗиден, Иса бизиң әхлимизиң ыхласлы вагыз этмегимизи ислейәр. Биз Хоҗайынымыза гулак асып, вепалы галсак, ол бизи сылаглар (Мат. 25:21, 23, 34).
^ абзац 3 «Гаравул диңи» журналының шу санының 2-нҗи өвренилйән макаласында он гыз тымсалы барада гүррүң эдилйәр. 4-нҗи өвренилйән макалада хем-де 1995-нҗи йылда чыкан «Гаравул диңинде» гоюнлар ве гечилер тымсалы дүшүндирилйәр (w95-U 15/10 сах. 23—28). Садык хем акыллы хызматкәр барадакы тымсал хем «Гаравул диңинде» дүшүндирилйәр (w13 15/7 сах. 21, 22, абз. 8—10).
^ абзац 4 « Аманат пул ве мина тымсалларының меңзешлиги» диен чарчува середиң.
^ абзац 5 Исаның гүнлеринде бир талант 6 мүң динара барабарды. Йөнекей ишчи гүнде бир динар газаняр. Ол бир таланты газанмак үчин 20 йыл зәхмет чекмели боляр.
^ абзац 8 Ресуллар арадан чыкансоң, имандан дәненлериң саны гүн-гүнден көпелйәрди. Шол дөвүрде Месихиң хакыкы шәгиртлерини тайярламак бабатда ызыгидерли тагалла эдилмейәрди. Эмма соңкы гүнлерде болҗак «орак вагты» әхли зат дүйбүнден өзгермелиди (Мат. 13:24—30, 36—43; (w13 15/7 сах. 9—12 середиң).
^ абзац 11 «Гаравул диңи» журналына середиң (w13 15/7 сах. 7, 8, абз. 14—18).
^ абзац 15 Шу журналдакы «Биз нәме үчин оя болмалы?» диен макаланың 13-нҗи абзацына середиң.
