1, 2. Bilong wanem Jisas i mekim tok piksa bilong mani talen?

LONG tok piksa bilong mani talen, Jisas i kamapim klia wok em i givim long ol disaipel em God i bin makim. Yumi mas kliagut long mining bilong dispela tok piksa, long wanem, dispela bai helpim olgeta Kristen, maski ol i bilip na wet long kisim laip long heven o long graun.

² Jisas i mekim tok piksa bilong mani talen taim em i bekim askim bilong ol disaipel long “wanem sain bai kamap bilong soim olsem [em i] kam i stap na pinis bilong dispela taim i kamap pinis?” (Mat. 24:3) Dispela tok piksa i kamap tru long taim bilong yumi, na em wanpela hap bilong ol sain i soim olsem Jisas i kam i stap na em i mekim wok King.

3. Yumi inap kisim wanem ol skul long ol tok piksa i stap long Matyu sapta 24 na sapta 25?

³ Tok piksa bilong mani talen em wanpela bilong 4-pela tok piksa i stap long Matyu 24:45 i go long sapta 25:46. Narapela 3-pela tok piksa, em tok piksa bilong gutpela wokboi i gat savetingting, 10-pela yangpela meri, na ol sipsip na ol meme—ol dispela tok piksa tu i olsem sain bilong soim olsem Jisas i kam i stap. Long 4-pela tok piksa  wantaim, Jisas i kamapim klia ol pasin em ol disaipel tru bilong em bai bihainim long dispela haptaim bilong las de. Tok piksa bilong wokboi, ol yangpela meri, na ol mani talen i stret long ol disaipel em God i bin makim. Namel long ol Kristen God i bin makim, i gat sampela man tasol i kisim wok bilong givim kaikai long ol arapela wokboi long dispela haptaim bilong las de. Olsem na long tok piksa bilong gutpela wokboi, Jisas i kamapim klia olsem dispela wokboi i mas mekim gut wok na bihainim savetingting. Long tok piksa bilong ol yangpela meri, Jisas i tok olsem olgeta disaipel em God i bin makim, ol i mas i stap redi na was i stap, long wanem, ol i save olsem Jisas bai i kam, tasol ol i no save long de na aua em bai i kam. Long tok piksa bilong mani talen, Jisas i soim klia olsem ol Kristen God i bin makim i mas wok strong long mekim gut wok God i givim ol. Taim Jisas i mekim laspela tok piksa long ol sipsip na ol meme, dispela tok piksa i stret long ol Kristen husat i bilip na wet long kisim laip long graun. Em i tok ol i mas i stap gut long God na wok gut wantaim ol brata bilong Jisas em God i bin makim na ol i stap yet long graun. * Orait nau yumi ken skelim tok piksa bilong mani talen.

4, 5. (a) Long tok piksa, man, o bosman, i makim husat? (b) Wanem strong bilong wanpela mani talen?

⁴ Ritim Matyu 25:14-30. Inap planti yia, ol buk na nius bilong yumi i stori olsem dispela man, o bosman, long tok piksa i makim Jisas, na taim Jisas i go antap long heven long 33 C.E., i olsem em i go long wanpela longwe ples. Long narapela tok piksa, Jisas i tokaut long risen bilong em long i go long wanpela longwe ples. Em bai “kisim namba olsem king.” (Luk 19:12) Taim Jisas i go bek long heven, em i no kisim kwik namba bilong mekim wok king insait long Kingdom, nogat. * “Em i sindaun long han sut bilong God. Na em i wetim God i putim ol birua bilong en aninit long lek bilong en.”—Hib. 10:12, 13.

⁵ Man long tok piksa i gat 8-pela talen. Long dispela taim bipo, maniman tasol i save holim kain mani olsem. * Paslain long em i raun i go long dispela longwe ples, em i skelim mani talen long ol wokboi bilong em, na em i laik bai ol i yusim dispela mani long mekim wok bisnis. Wankain olsem dispela man, Jisas tu i bin holim wanpela samting i dia tumas paslain long em i go antap long heven. Dispela samting i makim wok em i bin mekim taim em i stap long graun.

6, 7. Mani talen i makim wanem samting?

⁶ Jisas i tingim tru wok bilong em long autim tok na skulim ol man. (Ritim Luk 4:43.) Long rot bilong dispela wok, em i planim pinis sid bilong tok i tru long bel bilong ol manmeri. Em i tokim ol disaipel olsem: “Apim het na lukim ol gaden, kaikai i redi pinis.” (Jon 4:35-38) Em i laik helpim planti arapela manmeri i gat gutpela bel na bai ol inap kamap disaipel bilong em. Jisas i stap olsem gutpela fama, olsem na em i no inap larim kaikai i mau nating na i no gat man bilong bungim kaikai. Bihain liklik long em i kirap bek, na paslain long em i go bek long heven, em i givim bikpela wok long ol disaipel, na em i tok: “Yupela i mas i go na kamapim ol disaipel.” (Mat. 28:18-20) Jisas i putim gutpela wok tru long han bilong ol, em wok bilong autim tok.—2 Kor. 4:7.

⁷ Dispela inap givim wanem save long yumi? Taim Jisas i givim wok long ol disaipel, i olsem  em i putim “ol samting bilong en”—mani talen—long han bilong ol. (Mat. 25:14) Mani talen i makim wok bilong yumi long autim tok na kamapim ol disaipel.

8. Olgeta wan wan wokboi i kisim narapela narapela skel bilong mani talen, tasol bosman i laik bai ol i mekim wanem?

⁸ Long tok piksa bilong mani talen, bosman i givim 5-pela talen long wanpela wokboi, na 2-pela talen long narapela wokboi, na 1-pela talen long laspela wokboi. (Mat. 25:15) Olgeta wan wan wokboi i kisim narapela narapela skel bilong mani talen, tasol bosman i laik bai olgeta i yusim dispela mani long mekim gutpela wok. Dispela i makim olsem ol i mas givim bel tru long mekim wok autim tok. (Mat. 22:37; Kol. 3:23) Long taim bilong ol aposel, kirap long Pentikos 33 C.E., ol disaipel bilong Krais i kirap long mekim wok bisnis long ol dispela mani talen. Buk Aposel i stori gut long pasin bilong ol long givim bel tru long mekim wok autim tok na kamapim ol disaipel. *—Apo. 6:7; 12:24; 19:20.

9. (a) Tupela gutpela wokboi i yusim mani talen long mekim wanem wok? (b) Dispela i kamapim klia olsem 2-pela i bin bihainim wanem kain pasin long mekim wok? (c) “Ol arapela sipsip” i mekim wanem wok?

⁹ Long taim bilong pinis, kirap long 1919 na i kam, ol disaipel bilong Krais em God i bin makim  na ol i stap yet long graun, ol i yusim mani talen bilong Bosman long mekim wok bisnis. Ol bratasista em God i bin makim, ol i bihainim wankain pasin olsem namba 1 wokboi na namba 2 wokboi, ol i yusim olgeta samting ol i gat na ol i wok strong long mekim wok autim tok. Em i no bikpela samting long save husat i kisim 5-pela talen na husat i kisim 2-pela talen. Long tok piksa, 2-pela wokboi wantaim i yusim mani talen long mekim wok bisnis na tupela wantaim i kisim winmani inap long wankain skel olsem mani talen em bosman i bin givim long ol. Olsem na 2-pela wokboi wantaim i bin givim bel tru long mekim wok bilong ol. Ol Kristen husat i bilip na wet long kisim laip long graun, ol i kisim wanem wok? Ol i kisim bikpela wok! Tok piksa bilong Jisas long ol sipsip na ol meme i skulim yumi olsem, ol manmeri husat i bilip na wet long kisim laip long graun, ol i gat wok long helpim ol brata bilong Jisas long mekim wok autim tok na skulim ol man. Long dispela haptaim nogut bilong las de, dispela 2-pela lain i wok wantaim olsem “wanpela lain sipsip” na ol i givim bel tru long mekim wok bilong kamapim ol disaipel.—Jon 10:16.

10. Wanem bikpela wok i stap olsem sain bilong makim olsem Jisas i kam i stap?

¹⁰ Bosman i laik bai ol wokboi i mekim gutpela wok long mani ol i kisim. Olsem yumi stori pinis, ol disaipel long taim bilong ol aposel i bin mekim gut wok na ol i kisim winmani na mekim mani bilong Bosman i kamap planti. Olsem wanem long dispela taim bilong pinis, em taim we truim i kamap long tok piksa bilong mani talen? Ol wokman bilong Jisas i wok strong tru long mekim dispela bikpela wok bilong autim tok na kamapim ol disaipel. Wok bilong ol i opim rot na long olgeta yia planti handret tausen manmeri i kamap disaipel na ol tu inap autim tok bilong Kingdom. Wok bilong autim tok na skulim ol man em wanpela hap bilong sain i soim olsem Jisas i kam i stap olsem King long Kingdom. Yumi ken bilip olsem Bosman i amamas tru long wok bilong ol!

11. Bilong wanem yumi tok olsem Jisas bai skelim wok bilong ol wokman bilong em long taim bilong traipela hevi tru?

¹¹ Jisas bai kam skelim wok bilong ol wokman klostu long pinis bilong traipela hevi tru, em klostu nau bai kamap. Wanem samting i kirapim yumi long tok olsem? Long tok profet i stap long Matyu sapta 24 na sapta 25, planti  taim Jisas i kolim ol tok i makim olsem em bai kam. Taim Jisas i toktok long kot bai kamap long taim bilong traipela hevi tru, em i tok ol manmeri “bai lukim Pikinini bilong man i stap antap long ol klaut na kam.” Jisas i kirapim ol disaipel husat i stap long taim bilong las de long ol i mas was i stap. Em i tok: “Yupela i no save long wanem de Bikpela bilong yupela bai i kam” na “long taim yupela i no ting long en, Pikinini bilong man bai i kam.” (Mat. 24:30, 42, 44) Taim Jisas i tok “bosman bilong ol dispela wokboi i kam na skelim wok ol i bin mekim long mani bilong en,” tok bilong em i makim olsem em bai kam mekim kot long pinis bilong dispela haptaim. *—Mat. 25:19.

12, 13. (a) Bosman i givim wanem tok long namba 1 wokboi na namba 2 wokboi? Bilong wanem? (b) Wanem taim bai ol Kristen God i bin makim i kisim laspela mak bilong ol? (Lukim blok “ Bosman Bai Skelim Wok Bilong Ol Taim Ol i Dai.”) (c) Ol lain i stap olsem ol sipsip, ol bai kisim wanem blesing?

¹² Long tok piksa, taim bosman i kam kamap, em i lukim olsem namba 1 wokboi husat i kisim 5-pela talen na namba 2 wokboi husat i kisim 2-pela talen, ol i kisim winmani inap long wankain mak olsem mani ol i bin kisim. Bosman i givim wankain tok long 2-pela wokboi wantaim, em i tok: “Yu gutpela wokboi, yu mekim gutpela wok tru! Yu bin lukautim gut sampela samting bilong mi. Olsem na mi bai makim yu long lukautim planti samting moa.” (Mat. 25:21, 23) Taim Jisas, em Bosman, i kam wantaim glori long mekim kot, em bai mekim wanem?

¹³ Long dispela taim, ol manmeri husat i stap olsem namba 1 wokboi na namba 2 wokboi—em ol disaipel God i bin makim na ol i givim bel tru long mekim wok—ol bai kisim laspela mak paslain long traipela hevi tru i kamap. (Rev. 7:1-3) Paslain long Armagedon, Jisas bai givim prais long ol—ol bai kisim laip long heven. Ol manmeri husat i bilip na wet long kisim laip long graun na ol i bin helpim ol brata bilong Krais long autim tok, Jisas bai kolim ol olsem ol sipsip na ol bai kisim blesing bilong i stap long graun aninit long wok bos bilong Kingdom.—Mat. 25:34.

14, 15. Yu ting tok bilong Jisas i makim olsem bikpela namba bilong ol Kristen God i bin makim bai kamap wokboi nogut? Stori long dispela.

¹⁴ Long tok piksa, namba 3 wokboi i digim graun na haitim mani talen, na em i no mekim wok bisnis long en o putim mani long benk. Dispela wokboi i no mekim gut wok, long wanem, em i no bihainim laik bilong bosman. Olsem na i stret long bosman i kolim em olsem: “Yu wokboi nogut. Yu lesman.” Bosman i rausim mani talen long em na givim long wokboi i gat 10-pela talen. Ol i tromoi dispela wokboi nogut “i go ausait long ples tudak.” “Long dispela hap em bai krai na sikirapim tit bilong en.”—Mat. 25:24-30; Luk 19:22, 23.

 ¹⁵ Wanpela wokboi bilong bosman i haitim mani talen, olsem na yu ting dispela i makim olsem 30 pesen bilong ol Kristen God i bin makim bai kamap wokboi nogut? Nogat. Skelim ol narapela tok i stap klostu. Long tok piksa bilong gutpela wokboi i gat savetingting, Jisas i stori long wokboi nogut i paitim ol narapela wanwok bilong em. Tok bilong Jisas i no makim olsem sampela man bai i stap olsem wokboi nogut, nogat. Em i givim tok lukaut long gutpela wokboi long em i no ken kamap olsem wokboi nogut. Olsem tasol, long tok piksa bilong 10-pela yangpela meri, tok bilong Jisas i no makim olsem 50 pesen bilong ol Kristen God i bin makim bai kamap olsem 5-pela krankimeri, nogat. Em i tokim ol brata bilong em long hevi inap kamap sapos ol i no was i stap na i stap redi. * Na tu, long tok piksa bilong mani talen, tok bilong Jisas i no makim olsem bikpela namba bilong lain brata bilong em long haptaim bilong las de bai kamap wokboi nogut. Jisas i mekim tok lukaut long ol Kristen God i bin makim long ol i mas was i stap—yusim mani talen long “mekim wok bisnis”—na no ken kisim tingting na pasin we inap mekim ol i kamap olsem wokboi nogut.—Mat. 25:16.

16. (a) Yumi kisim wanem ol skul long tok piksa bilong mani talen? (b) Olsem wanem dispela stadi i helpim yumi long kisim stretpela save long tok piksa bilong mani talen? (Lukim blok “ Kliagut Long Tok Piksa Bilong Mani Talen.”)

¹⁶ Yumi kisim wanem 2-pela skul long tok piksa bilong mani talen? Namba 1: Bosman, em Krais, em i givim wanpela spesel wok long ol wokboi, em ol Kristen God i bin makim—em wok bilong autim tok na kamapim ol disaipel. Namba 2: Krais i laik bai yumi olgeta i givim bel tru long autim tok. Taim yumi mekim olsem, yumi ken save tru olsem Bosman bai blesim yumi long pasin bilong yumi long bilip, was i stap, na stap gut long em.—Mat. 25:21, 23, 34.