1, 2. Kaia ne tuku mai ei ne Iesu te tala fakatusa e uiga ki taleni?

I TE tala fakatusa e uiga ki taleni, ne fakaasi manino mai ei ne Iesu te tiute ke fai ne ana soko fakaekegina. E ‵tau o malama‵lama tatou i te uiga o te tala fakatusa tenei, me e aoga ki Kelisiano ‵tonu katoa, faitalia me e fakamoe‵moe latou ke maua te taui ke ola i te lagi io me i te lalolagi nei.

² Ne tuku mai ne Iesu te tala fakatusa e uiga ki taleni e pelā me se vaega o te tali ki te fesili a ana soko e uiga ki “te fakailoga o [tena] fakatasi mai mo te taimi o te gataga o te olaga tenei.” (Mata. 24:3) Tela la, a te tala fakatusa tenei e fakataunu i ‵tou aso nei kae se vaega o te fakailoga me i a Iesu ko fakatasi mai kae ko pule mai pelā me se Tupu.

3. Ne a akoakoga e maua mai i tala fakatusa kolā ne fakamau i te Mataio mataupu e 24 mote 25?

³ A te tala fakatusa e uiga ki taleni se tasi mai tala fakatusa e fa kolā ne fakamau i te Mataio 24:45 ki te 25:46. A ko nisi tala fakatusa e tolu e uiga ki te tavini fakamaoni kae poto, tamafine e tokosefulu, mo mamoe mo kouti, ne vaega foki o te tali a Iesu ki te fesili e uiga ki te fakailoga o tena fakatasi mai. I tala fakatusa katoa konei e fa, e faka‵mafa mai ei ne Iesu a uiga kolā ka fai ei ke tu ‵kese ana soko ‵tonu i aso fakaoti konei. A tala  fakatusa e uiga ki te tavini, tamafine, mo taleni ne fakasino atu katoa ki ana soko fakaekegina. I te tala fakatusa e uiga ki te tavini fakamaoni, e faka‵mafa mai ei ne Iesu te tāua mō te potukau foliki tenei o ana soko fakaekegina kolā e fagai ne latou ana nisi tavini i aso fakaoti konei ke fakamaoni kae ‵poto. I te tala fakatusa e uiga ki tamafine, ne fakailoa mai ne Iesu me e ‵tau mo ana soko fakaekegina katoa o toka kae matapula‵pula, me e se iloa ne latou te aso mo te itula e vau ei a Iesu. I te tala fakatusa e uiga ki taleni, e fakaasi mai ne Iesu me e ‵tau mo te kau fakaekegina o ga‵lue malosi i te faiga o olotou tiute faka-Kelisiano. Kae e fakasino atu a Iesu ki te tala fakatusa fakaoti e uiga ki mamoe mo kouti, ki a latou kolā e fakamoe‵moe ke ola i te lalolagi. E faka‵mafa mai ne ia me e ‵tau o fakamaoni latou kae ‵lago katoatoa atu ki taina fakaekegina o Iesu i te lalolagi nei. * Ke na ‵saga tonu atu tatou ki te tala fakatusa e uiga ki taleni.

4, 5. Ko oi e fakaata mai ne ia te tagata io me ko te matai, kae pefea te tāua o te taleni?

⁴ Faitau te Mataio 25:14-30. Ko leva ne fakamatala mai i ‵tou tusi me i te tagata tenā, io me ko te matai i te tala fakatusa ko Iesu, a ko tena fanatu ki te suā fenua e fakauiga loa ki te taimi ne fanaka ei a ia ki te lagi i te 33 T.A. I se tala fakatusa mai mua atu, ne fakaasi mai ne Iesu te pogai ne fano ei a ia ki se isi fenua, i se auala fakatusa, “ke fakamautinoa aka i ei tena pulega fakatupu.” (Luka 19:12) Ne seki fai fakavave a Iesu pelā me ko te Tupu i te taimi ne foki ei a ia ki te lagi. * Kae ne “sagasaga ifo ei i te feitu fakaatamai o te Atua, o fakatalitali i konā ke oko eiloa ki te taimi e tuku atu ei ana fili mo fai te mea e tuku ei ana vae.”—Epe. 10:12, 13.

⁵ Ne maua ne te tagata i te tala fakatusa a taleni e valu, se aofaki lasi i aso konā. * A koi tuai o fano a ia ki se isi fenua, ne tufatufa ne ia a taleni ki ana tavini, mo te fakamoemoega ke fakagalue ne latou i te taimi e galo ei a ia. E pelā mo te tagata tenā, ne tuku atu foki ne Iesu se mea e sili i te tāua a koi tuai o fanaka a ia ki te lagi. Se a te mea tenā? E faka‵na eiloa te tali ki te galuega telā ne fai ne ia i tena olaga kātoa.

6, 7. Se a te mea e fakauiga ki ei a taleni?

⁶ Ne fakatāua malosi ne Iesu a tena galuega talai mo te faiga o akoakoga. (Faitau te Luka 4:43.) E auala i te galuega talai, ne galue malosi a ia i te koga telā e tokouke a tino fia‵fia kolā ne fai mo fai ana soko. Mai mua malie, ne fai atu a ia ki ana soko: “‵Kilo aka ki luga kae onoono atu ki fatoaga, me ko ‵kena aka eiloa i fuataga e ‵tau o tau.” (Ioa. 4:35-38) Ne mafaufau a ia ki te fakamaopoopoga o nisi tino loto ‵lei e tokouke kolā ka fai mo fai ana soko. E pelā me se tino fai fatoaga ‵lei, ne seki manako a Iesu ke tiakina ne ia te fatoaga telā ko toka ke tau ana fuataga. Mai tua malie o tena toetuga kae mai mua o tena fanakaga ki te lagi, ne tuku atu ne ia ki ana soko se galuega tāua, kae fakatonu atu: “Tela la, olo atu koutou ki fenua katoa o fai a tino i ei mo fai a soko.” (Mata. 28:18-20) Ne tuku atu ne Iesu ki a latou se koloa tāua, ko te galuega talai faka-Kelisiano.—2 Koli. 4:7.

⁷ Tela la, se a te mea e mafai o fakaiku aka ne tatou? I te taimi ne tuku atu ne ia ki  ana soko te fakatonuga ke fai a soko, ne tuku atu eiloa ne Iesu ki a latou “ana mea”—ana taleni. (Mata. 25:14) I te auala tenei, e fakasino atu a taleni ki te tiute ke talai kae fai a soko.

8. E tiga eiloa e kese‵kese a te aofaki o taleni ne maua ne tavini taki tokotasi, se a te mea e fakamoemoe ki ei te matai?

⁸ E fakaasi mai i te tala fakatusa e uiga ki taleni me ne tuku atu ne te matai ki te tavini e tokotasi e lima taleni, ki te suā tino e lua, a ko te suā tino e tasi. (Mata. 25:15) E tiga eiloa e kese‵kese te aofaki ne maua ne tavini taki tokotasi, ne fakamoemoe te matai ke fakagalue faka‵lei ne latou a taleni konā, ko te faiga o te ‵toe mea e mafai o fai ne latou i te galuega talai. (Mata. 22:37; Ko. 3:23) I te senitenali muamua, kamata mai i te Penitekoso 33 T.A., ne kamata o fakagalue ne soko o Keliso a taleni konā. Ne fakamatala faka‵lei mai i te tusi o Galuega i te Tusi Tapu a te lotou ga‵lue malosi i te galuega talai mo te faiga o soko. *—Galu. 6:7; 12:24; 19:20.

9. (a) Ne a mea ne fai ne tavini fakamaoni e tokolua ki taleni, kae se a te mea e fakaasi mai i te mea tenā? (e) Se a te tusaga o “nisi mamoe”?

⁹ I te taimi o te gataga, maise loa talu mai te 1919 o vau, ne fakagalue eiloa ne tavini  fakaekegina fakamaoni o Keliso i te lalolagi nei a taleni a te Matai. E pelā mo tavini e tokolua kolā muamua, ne fai eiloa ne taina mo tuagane fakaekegina te ‵toe mea mafai ne latou o fai. Ne seki ‵tau o tuku taumate me ko oi ne maua ne ia a taleni e lima kae ko oi ne maua ne ia a taleni e lua. I te tala fakatusa, ne fakagalue katoa ne tavini e tokolua konei a mea kolā ne tuku atu ne te matai, tela la, e ‵pau eiloa lāua i te ga‵lue malosi. Se a te tusaga o tino kolā e fakamoe‵moe ke ola i te lalolagi nei? E tāua ‵ki eiloa! A te tala fakatusa a Iesu e uiga ki mamoe mo kouti e akoako mai ki a tatou me i a latou kolā e fakamoe‵moe ke ola i te lalolagi e maua ne latou te tulaga fakaaloalo ke ‵lago atu ki taina fakaekegina o Iesu mo te fakamaoni i te galuega talai mo te faiga o akoakoga. I te vaitaimi faigata o aso fakaoti konei, e ga‵lue fakatasi eiloa a potukau e lua konei pelā me se “lafu” e tasi mo te loto finafinau i te galuega ko te faiga o soko.—Ioa. 10:16.

10. Se a te ‵toe vaega tāua o te fakailoga e uiga ki te fakatasi mai o Iesu?

¹⁰ E fakamoemoe tonu eiloa te Matai ki ikuga. E pelā mo te mea ne taku muamua mai, ne mautinoa eiloa me ne fakatokouke ne ana soko fakamaoni i te senitenali muamua ana mea. Kae e a i te taimi o te gataga māfai ko fakataunu te tala fakatusa e uiga ki taleni? Ne fai ne tavini fakamaoni kae ga‵lue malosi a Iesu a te ‵toe galuega talai lasi ‵ki mo te faiga o soko i tala fakasolopito. Ne iku atu olotou taumafaiga ki te fakaopoopo mai te fia selau afe o soko ‵fou ke fai pelā me ne tino talai o te Malo i tausaga takitasi, mai te fai ne latou te galuega talai mo te faiga o akoakoga pelā me se vaega tu ‵kese o te fakailoga o te fakatasi mai o Iesu i tena Malo mo tena malosi. E mautinoa eiloa me ka fiafia te lotou Matai!

11. E iloa pefea ne tatou me i a Iesu ka vau ke maua ne ia se tala e uiga ki ana tavini i te taimi o te fakalavelave lasi?

¹¹ Ka vau eiloa a Iesu ke maua ne ia se tala e uiga ki ana tavini i se taimi mai mua malie o oti te fakalavelave lasi. Kae ne iloa pefea ne tatou a te mea tenei? I tena valoaga ne fakamau i te Mataio mataupu e 24 mo te 25, ne faipati faeloa a Iesu ki tena oko mai. E uiga ki te fakamasinoga i te fakalavelave lasi, ne fai mai a ia me i tino “ka lavea ne latou a te Tama a te tagata e vau i kaumana o te lagi mo tena ‵mana mo  tena ‵malu sili.” Ne fakamalosi atu a ia ki ana soko kolā ko ola i aso fakaoti ke matapula‵pula, i ana pati: “E se iloa ne koutou a te aso e vau ei te otou Aliki,” kae ko te “Tama a te tagata e vau i te itula telā e seki fakamoe‵moe koutou ki ei.” (Mata. 24:30, 42, 44) Tela la, i te taimi ne fai atu ei a Iesu me “ne toe foki atu ei te matai o pologa konā ke maua ne ia se tala e uiga ki ana tupe,” ne fakasino tonu atu a ia ki te taimi telā ka vau ei a ia o fakaoko mai te fakamasinoga i te gataga o te olaga masei tenei. *—Mata. 25:19.

12, 13. (a) E saga atu pefea te matai ki tavini tokolua muamua, kae kaia? (e) Ko te taimi fea ka maua ei ne te kau fakaekegina a te lotou fakamailogaga fakaoti? (Ke onoono ki te pokisi “ Se Fakamatalaga ‵Lei i te Taimi e ‵Mate i ei.”) (i) Se a te taui ka maua ne tino kolā e fai pelā me ne mamoe?

¹² E uiga ki te tala fakatusa, kafai ko oko mai te matai, ka maua ne ia me i tavini muamua e tokolua—kolā ne tuku ki a lāua a taleni e lima mo taleni e lua—ne fakamaoni mai te fakagalue ne lāua a taleni. Ne fai atu foki ne te matai a te mea tenā ki tavini e tokolua konā: “Mālō, a koe se pologa ‵lei kae fakamaoni! A koe ne fakamaoni i te faiga o nai mea. Ka ‵tofi ne au a koe ke pule i mea e uke.” (Matt. 25:21, 23) Se a te mea e mafai o fakamoe‵moe tatou ki ei māfai te Matai, ko Iesu telā ne faka‵malugina, e vau mō te fakamasinoga i aso mai mua?

¹³ A latou kolā e sui ne latou a tavini muamua e tokolua—ko ana soko fakaekegina kolā e ga‵lue malosi—kolā ka maua ne latou te lotou fakamailoga fakaoti mai mua malie loa o kamata te fakalavelave lasi. (Faka. 7:1-3) Mai mua o Amaketo, ka tuku atu ne Iesu ki a latou a te lotou taui faka-te-lagi. A latou kolā e fakamoe‵moe ke ola i te lalolagi kae ‵lago atu ki taina o Keliso i te galuega talai, ka fakamasino pelā me ne mamoe kae ka tuku ki a latou te tauliaga ke ola i te lalolagi mai lalo i te pulega a te Malo.—Mata. 25:34.

14, 15. E mata, ne fakaasi mai ne Iesu me ka tokouke ana taina fakaekegina ka matagā kae paie? Fakamatala mai.

¹⁴ I te tala fakatusa, ne tanu ne te tavini fakaoti ana taleni i lō te fakagalue ne ia io me faulu ki te pagike. Ne fakaasi mai ne te tavini tenei se uiga matagā, me ne seki fai ne ia te mea ne manako ki ei tena matai. Ne taku ne te matai a ia pelā me “matagā kae paie.” Ne puke kea‵tea ne te matai te taleni mai i a ia kae tuku atu ki te tino telā ko sefulu ana taleni. Kae ne ‵pei atu te pologa matagā tenei “ki te pouliga i tua. Tenā te koga ka tagi mautuutu kae fai ana lili i ei.”—Mata. 25:24-30; Luka 19:22, 23.

¹⁵ Se tokotasi mai tavini e tokotolu a te Matai ne ‵funa ne ia tena taleni, tela la, e mata, ne fakaasi mai ne Iesu me i te tasi  vae tolu o ana soko fakaekegina e fai pelā me matagā kae paie? Ikai. Mafaufau ki te fakamatalaga kātoa. I te tala fakatusa e uiga ki te tavini fakamaoni kae poto, ne faipati a Iesu ki se pologa masei telā ne tā ne ia ana tavini. Ne seki fai mai ne Iesu me ka isi se tavini matagā. Kae ne fakailoa atu ne ia ki te tavini fakamaoni ke sē fakaasi a uiga o se pologa matagā. I se auala tai ‵pau, i te tala fakatusa e uiga ki tamafine e tokosefulu, ne seki fakauiga a Iesu me i te āfa o ana soko fakaekegina e mafai o fai pelā mo tamafine va‵lea. I lō te fai penā, ne fakailoa atu ne ia ki ana taina faka-te-agaga e uiga ki mea ka ‵tupu māfai e se matapula‵pula kae se toka latou. * I te fakamatalaga tenei, se mea ‵lei ke fakaiku aka me i te tala fakatusa e uiga ki taleni, ne seki fai mai a Iesu me ka tokouke ana taina fakaekegina ka matagā kae paie i aso fakaoti konei. Kae ui ei, ne fakailoa atu ne Iesu ki ana soko fakaekegina me e ‵tau mo latou o tumau i te ga‵lue malosi—ke fakagalue olotou taleni kae ‵kalo keatea mai kilokiloga mo faifaiga a se pologa matagā.—Mata. 25:16.

16. (a) Ne a akoakoga e tauloto ne tatou mai te tala fakatusa e uiga ki taleni? (e) E mafai pefea o fesoasoani mai te mataupu tenei ke malamalama tatou i te tala fakatusa e uiga ki taleni? (Ke onoono ki te pokisi “ Ke Malamalama i te Tala Fakatusa e Uiga ki Taleni.”)

¹⁶ Ne a akoakoga e lua e tauloto ne tatou mai te tala fakatusa e uiga ki taleni? Muamua la, ne tuku atu ne te Matai, ko Keliso ki ana tavini fakaekegina se koloa tāua—ko te fakatonuga ke talai kae fai a soko. Te lua, e fakamoemoe eiloa a Keliso ko tatou ke ga‵lue malosi i te galuega talai. Kafai e fai tatou penā, ko mafai ei o mautinoa i a tatou me ka fakamanuia ne te Matai a tatou ona ko te ‵tou fakatuanaki, matapula‵pula, kae fakamaoni.—Mata. 25:21, 23, 34.