Li kʼusi chakʼ jchantik li lokʼolkʼop ta sventa talentoetike
«Li june laj yacʼbe comel voʼob talento, li yane laj yacʼbe comel chib, li yane laj yacʼbe comel jun.» (MATEO 25:15)
1, 2. ¿Kʼu yuʼun la xchap loʼil ta sventa talentoetik li Jesuse?
LI Jesuse laj yalbe sloʼilal talentoetik sventa snaʼik kʼusi skʼan spasik li yajtsʼaklomtak ti tʼujbil chbatik ta vinajele. Pe mi tʼujbil chijbat ta vinajel o mi muʼyuk, jkotoltik onoʼox oy kʼusi chakʼ jchantik li loʼil taje. Sventa xkaʼibetik smelolale skʼan jnaʼtik kʼusi skʼan xal li loʼile.
2 Li Jesuse, ¿bakʼin la xchapbe yajtsʼaklomtak li loʼil taje? Jaʼo kʼalal laj yal jun albil kʼop ti jaʼo chkʼot ta pasel mi ajvalil xaʼoxe xchiʼuk mi lik xaʼox li slajebal kʼakʼale (Mateo 24:3). Jaʼ yuʼun jnaʼojtik ti te stsakojbe sba skʼoplal li loʼil ta sventa talentoetik li vaʼ albil kʼop taje xchiʼuk jaʼo chkʼot ta pasel li ta slajebal kʼakʼale.
3. ¿Kʼusi chakʼ jchantik li loʼiletik chal ta Mateo 24 xchiʼuk 25?
3 Kʼalal laj yal Jesús li albil kʼop ta sventa slajebal kʼakʼale, laj yal xtok chanib loʼiletik sventa snaʼik kʼusi skʼan spasik li buchʼutik tʼujbil chbatik ta vinajel li vaʼ kʼakʼal taje. Li loʼiletik taje xuʼ te jkʼeltik li ta Mateo 24:45 kalal ta 25:46. Li baʼyel loʼile jaʼ ta sventa li j-abtel ti tukʼ yoʼontone, ti jaʼ li jtsop krixchanoetik ti tʼujbil chbatik ta vinajel ti oy ta sbaik xchanubtasel li yajtuneltak Diose. Ti kʼu yuʼun la xchap li Jesuse yuʼun tskʼan chakʼbe xchan ti skʼan tukʼ xakʼ sbaik xchiʼuk ti pʼijikuk li buchʼutik tʼujbil chbatik ta vinajele. * (Kʼelo li baʼyel tsʼib ta yok vune.) Li xchibal loʼile jaʼ ta sventa li lajuneb tojol tsebetike. Ti kʼu yuʼun la xchap taj xtoke jaʼ sventa lekuk chapalik xchiʼuk vikʼiluk satik yuʼun mu snaʼik kʼusi ora ti chtale. * (Kʼelo li xchibal tsʼib ta yok vune.) Li yoxibal loʼile jaʼ ta sventa li talentoetike. Ti kʼu yuʼun la xchap li Jesuse jaʼ sventa akʼo xakʼ yipik xchiʼuk tsotsuk x-abtejik li buchʼutik tʼujbil chbatik ta vinajel yoʼ spasik li kʼusi akʼbilik ta sba spasele. Li xchanibal loʼile jaʼ ta sventa li chijetike xchiʼuk li tentsunetike. Li loʼil taje jaʼ chakʼ ta chanel ti skʼan tukʼ xakʼ sbaik li buchʼutik oy spatobil yoʼonton chkuxiik ta Balumile xchiʼuk ti skoltaik li buchʼutik tʼujbil chbatik ta vinajele. * (Kʼelo li yoxibal tsʼib ta yok vune.) Li ta xchanobil liʼe ta jkʼeltik batel li sloʼilal talentoetike.
JUN VINIK TI CHAKʼBE EPAL TAKʼIN YAJ-ABTELTAKE
4, 5. 1) ¿Buchʼu skʼoplal li vinik chal ta loʼile? 2) ¿Kʼusi jaʼ li talentoe? (Kʼelo li tsʼib ta yok vune.)
4 (Kʼelo Mateo 25:14-30.) Li ta sloʼilal talentoetike, li Jesuse te laj yalbe skʼoplal jun vinik ti bat ta nome. Ta jun velta xtoke laj yal jun loʼil ti xkoʼolajtike, ti oy jun vinik ti bat ta yan balumil sventa la xbat yichʼ talel yabtel, yuʼun ta x-och ta ajvalilal (Lucas 19:12). * (Kʼelo li tsʼib ta yok vune.) Ta epal jabiletik xa li jvuntike chal ti vinik ti chichʼ albel skʼoplal ta xchibal li loʼiletike jaʼ la skʼoplal li Jesuse xchiʼuk ti bat la ta vinajel ta sjabilal 33. Pe muʼyuk x-och ta ajvalil ta anil noʼox kʼalal bat ta vinajel li Jesuse. Yuʼun jaʼ to och ta ajvalil ta 1914, te la smala kʼalal la sta «yorail ch-acʼbat stecʼubin scotol li yajcontrae» (Hebreos 10:12, 13).
5 Kʼalal skʼan toʼox xbate, li vinike la stak ta ikʼel yaj-abteltak sventa tspukbe komel vaxakib talentoetik. Taje epal takʼin. * (Kʼelo li tsʼib ta yok vune.) Laj yalanbe komel ti akʼo jolinuk yuʼunik li vaxakib talentoe, sventa x-akʼbat sutel ta tsʼakal. Yuʼun toj ep sbalil chil li vaxakib talentoetik li vinik taje. Li Jesuse oy kʼusi ti ep sbalil laj yil eke. ¿Kʼusi jaʼ taje? Jaʼ li abtelal la spas kʼalal ay ta Balumile.
6, 7. ¿Kʼusi jaʼ skʼoplal li talentoetike?
6 Li Jesuse oy sbalil laj yil li cholmantale. Koliyal li cholmantal la spase, epal krixchanoetik kʼotik ta yajtsʼaklomtak (kʼelo Lucas 4:43). Pe snaʼoj ti ep to skʼan xichʼ cholel li mantale. Jaʼ yuʼun xi laj yalbe li yajtsʼaklomtake: «Toyo avil asatic liʼ ta osilaltic xbate. Sacuben xa ta taquijel li trigoe; jaʼ xa yorail ta tuchʼel» (Juan 4:35-38). Li Jesuse la skoʼoltas ta stsobel trigo o kʼajoj li cholmantale. Li stuke jaʼ li lekil jtsʼunolajel ti tskʼel mi lek ta xichʼ tsobel o kʼajel li stsʼunobtake. Jaʼ yuʼun laj yakʼbe komel ta sba yajtsʼaklomtak ti akʼo spasik li abtelal ta cholmantal kʼalal skʼan toʼox xbat ta vinajele (2 Corintios 4:7). Xi laj yale: «Jaʼ yuʼun batanic me; bat pasic ta jchʼunolajel cuʼun li cristianoeti[ke]» (Mateo 28:18-20).
7 Jech kʼuchaʼal laj yakʼbe komel talentoetik yaj-abteltak li vinike, li Jesuse laj yakʼbe komel ta sba buchʼutik tʼujbil chbatik ta vinajel li abtelal ta cholmantale (Mateo 25:14). Jech oxal, li skʼoplal talentoetike jaʼ li abtelal ta cholmantal xchiʼuk li spasel ta yajtsʼaklomtak Jesús li krixchanoetike.
8. Akʼo mi jelajtik ti kʼu yepal laj yichʼik akʼbel talentoetik li j-abteletike, ¿kʼusi skʼan spasik?
8 Li vinik ta lokʼolkʼope, chal ti laj la yakʼbe voʼob talento li baʼyel yaj-abtele, li xchibale laj yakʼbe chib talento xchiʼuk li yoxibale laj yakʼbe jun talento (Mateo 25:15). Jech kʼuchaʼal chkiltike jelajtik ti kʼu yepal laj yichʼik akʼbel li talentoetike. Pe li vinik ti laj yakʼbe komel talentoetik li oxvoʼ yaj-abteltake oy ta yoʼonton ti xakʼik persa bu kʼalal xuʼ yuʼunik sventa xjolin yuʼunike. Li Jesús eke oy ta yoʼonton ti akʼo yakʼik persa bu kʼalal xuʼ yuʼunik ta xcholel mantal li buchʼutik tʼujbil chbatik ta vinajele (Mateo 22:37; Colosenses 3:23). Li ta kʼin yuʼun judioetik ta Pentecostés ta sjabilal 33, li yajtsʼaklomtake lik xcholbeik mantal krixchanoetik ti likemik talel ta epal lumetike. Li ta slivroal Hechose te chakʼ ta ilel ti tsots abtejike (Hechos 6:7; 12:24; 19:20). * (Kʼelo li tsʼib ta yok vune.)
JOLIN YUʼUNIK TALENTOETIK LI YAJ-ABTELTAKE
9. 1) ¿Kʼusi la spasik li chaʼvoʼ j-abteletik ti tukʼ laj yakʼ sbaike? 2) ¿Kʼusi chakʼ ta ilel taje? 3) ¿Kʼusi skʼan spasik li buchʼutik ta xkuxiik ta Paraisoe?
9 Li chaʼvoʼ j-abteletik ti jolin yuʼunik li talentoetike jaʼ skʼoplal li buchʼutik tʼujbil chbatik ta vinajel ti tukʼ yakʼoj sbaik li ta slajebal kʼakʼale. Tsots onoʼox abtejik ta xcholel mantal, mas to jech la spasik li ta sjabilal 1919. Li ta loʼil laj yal Jesuse, chal ti jelajtik ti kʼu yepal laj yichʼik akʼbel talentoetik li chaʼvoʼ j-abteletike. Pe taje maʼuk skʼan xal ti oy chaʼtsop buchʼutik chbatik ta vinajel ti tukʼ yakʼoj sbaike. Jvules ta joltik ti chaʼvoʼ tukʼil yaj-abteltak li vinike jech to yepal laj yakʼbeik sutel ti kʼu yepal akʼbatike. Taje chakʼ ta ilel ti tsots abtejike. Pe ¿mi jaʼ noʼox van skʼan xakʼbeik yipal cholmantal li buchʼutik tʼujbil chbatik ta vinajele? Maʼuk. Li sloʼilal chijetik xchiʼuk tentsunetike chakʼ ta chanel ti buchʼutik chkuxiik ta Paraisoe skʼan tukʼ xakʼ sbaik ta stojolal li buchʼutik tʼujbil chbatik ta vinajele xchiʼuk ti tskoltaik ta cholmantale. Ti jech tspasike jaʼ jun matanal chilik. Ta melel, ta skotolik taje «jun noʼox jchabivanej chcʼot yuʼunic» ti chakʼbeik yipal xcholel mantal xchiʼuk ti spasik ta yajtsʼaklomtak Cristo li krixchanoetike (Juan 10:16).
10. ¿Kʼusi sprevail ti oyutik xa ta slajebal kʼakʼale?
10 Li Jesuse oy ta yoʼonton ti tsotsuk x-abtejik ta cholmantal skotolik sventa spasik ta yajtsʼaklomtak Cristo li krixchanoetike. Taje jech la spasik li yajtsʼaklomtak ta baʼyel sigloe. ¿Mi tsots van ch-abtejik ek li yajtsʼaklomtak Cristo kʼalal jaʼo chkʼot ta pasel li sloʼilal talentoetik li ta slajebal kʼakʼale? Jech. Li avie muʼyuk bu jech ilbil-o ti butikuk xa noʼox tajek chcholik mantale. Koliyal ti tsots ta xcholik mantale ta sjaymilal xa noʼox krixchanoetik ta xichʼik voʼ jujun jabil xchiʼuk ta xkoltavanik ta xcholel mantal ek. ¡Taje jaʼ sprevail ti oyutik xa ta slajebal kʼakʼale xchiʼuk ti yakal xa ch-ajvalilaj li Jesuse! Melel onoʼox ti xmuyubaj tajek li Yajval abtele.
Li Jesuse oy kʼusi tsots skʼoplal laj yakʼbe komel ta sbaik spasel li yajtuneltake, taje jaʼ li xcholel mantale (Kʼelo parafo 10)
CHTAL LI VINIK TI BAT TA NOME
11. ¿Kʼuxi xuʼ jnaʼtik ti jaʼo chtal Jesús kʼalal yakal li mukʼta tsatsal vokolile?
11 Xi laj yal li Jesuse: «Cʼalal ep xaʼox cʼacʼal sbatel li yajvalique, isut tal. Laj yicʼan li jʼabteletic yuʼune; lic yichʼ ta venta cʼu yepal li staqʼuine» (Mateo 25:19). ¿Bakʼin chtal li vinik ti bat ta nome, jaʼ xkaltik, li Jesuse? Jaʼo kʼalal ta slajebal li mukʼta tsatsal vokolile. ¿Kʼuxi jnaʼojtik taje? Jkʼeltik batel. Li ta albil kʼop laj yal Jesús ta Mateo 24 xchiʼuk 25 ep ta velta chal ti bakʼin chtale. Jech kʼuchaʼal liʼe, laj yal ti krixchanoetike ‹ta xilik chyal tal ta tok ta vinajel›. Taje jaʼo chkʼot ta pasel kʼalal yakal li mukʼta tsatsal vokolile, kʼalal jaʼo chtal xchapan krixchanoetik li Jesuse. Jech xtok, la spʼijubtas li yajtsʼaklomtak ti chkuxiik ta slajebal kʼakʼal sventa vikʼiluk-o li satike. Xi laj yale: «Mu xanaʼic cʼusi ora chital, vuʼun li Avajvalicune». Xi to laj yal xtoke: «Yuʼun ti cʼalal muʼyuc anopoj chamalaicune, jaʼo chital, vuʼun ti Xnichʼon cristiano licʼote» (Mateo 24:30, 42, 44). Jech kʼuchaʼal chkiltike, li ta sloʼilal talentoetike, li Jesuse jaʼ laj yalbe skʼoplal xtok kʼalal mi tal xchapan li krixchanoetike xchiʼuk mi tal yakʼbe slajeb li slumal Satanase. * (Kʼelo li tsʼib ta yok vune.)
12, 13. 1) ¿Kʼusi laj yalbe ta jujuntal li baʼyel chaʼvoʼ yaj-abteltak li vinike? 2) ¿Kʼu yuʼun jech laj yalanbe taje? 3) ¿Bakʼin chichʼ seyoalik ti chakʼ ta naʼel ti ta melel chbatik ta vinajel li buchʼutik tʼujbilike? (Kʼelo li rekuadro ti bu chal: «Jaʼo ch-akʼbat seyoalik yuʼun Dios mi chamike».) 4) ¿Kʼusi matanal ch-akʼbatik yuʼun Jesús li buchʼutik tskoltaik ta cholmantal li buchʼutik tʼujbil chbatik ta vinajele?
12 Kʼalal sut talel ta nom li vinike, xi laj yalbe ta jujuntal li baʼyel chaʼvoʼ yaj-abteltake: «Lec oy, voʼot lequil jʼabtelot cuʼun; lec jun avoʼnton laʼabtej. Ta sventa ti lec jun avoʼnton laj aventain li cʼusi jutuc noʼox laj avichʼe, jaʼ yuʼun chacacʼbot aventain li yepale» (Mateo 25:21, 23). ¿Kʼu yuʼun jech laj yalanbe taje? Yuʼun laj yil ti jolin yuʼun yan voʼob talento li baʼyel yaj-abtele xchiʼuk ti chib to yan talento jolin yuʼun li xchibal yaj-abtele. ¿Kʼusi jaʼ skʼoplal taje? Jaʼ xkaltik, ¿kʼusi tspas Jesús kʼalal mi tale?
13 Kʼalal jutuk xaʼox skʼan xtal li mukʼta tsatsal vokolile, li Jeovae chakʼbe li seyoalik ti chakʼ ta naʼel ti ta melel chbatik ta vinajel li buchʼutik tʼujbilik ti tukʼ laj yakʼ sbaik ti liʼ to oyik ta Balumile (Apocalipsis 7:1-3). Vaʼun, kʼalal skʼan toʼox xlik li Armagedone, li Jesuse chakʼanbe smoton, jaʼ xkaltik, chikʼanan batel ta vinajel. Pe ¿kʼusi chkʼot ta pasel ta stojolalik li buchʼutik spatoj yoʼonton chkuxiik ta Paraisoe xchiʼuk ti tskoltaik ta xcholel mantal li buchʼutik tʼujbil chbatik ta vinajele? Li Jesuse chal buchʼutik jaʼ chijetik. Li smoton chichʼike jaʼ ti xuʼ chkuxiik ta Paraiso kʼalal mi ch-ajvalilaj xaʼox li Ajvalilal yuʼun Diose (Mateo 25:34).
‹LI CHOPOL XCHIʼUK CHʼAJIL J-ABTELE›
14, 15. ¿Mi jaʼ van la skʼan laj yal Jesús ti ep tspasik ta chopol xchiʼuk ta chʼaj li yajtsʼaklomtak ti tʼujbil chbatik ta vinajele?
14 Jech kʼuchaʼal laj kiltik li ta loʼile te chalbe skʼoplal xtok li yoxibal j-abtele. ¿Kʼusi la spas taje? Li Jesuse laj yal ti muʼyuk laj yabtelan li talento akʼbate. Muʼyuk laj yichʼ batel ta vanko xtok sventa xjolin li talentoe. Li kʼusi la spase jaʼ ti la smuk ta lume. Jaʼ yuʼun, xi albat yuʼun li yajval abtelale: «Toj chopolot, ven chʼajil jʼabtelot». Jech oxal la spojbe li jun talentoe, jaʼ laj yakʼbe li baʼyel yaj-abtele. Laje la sjip lokʼel li ta snae, la «[s]jipic loqʼuel ta icʼ osil». Te laj yokʼ ta sba (Mateo 25:24-30; Lucas 19:22, 23).
15 Kʼalal laj yal Jesús ti oy jun chopol li ta yoxvoʼal yaj-abtel li vinike, ¿mi jaʼ van skʼan xal ti ta oxvoʼ buchʼutik tʼujbil chbatik ta vinajel ti oy jun muʼyuk tukʼ chakʼ sbae? Moʼoj. ¿Kʼuxi ta jnaʼtik taje? Jaʼo kʼalal ta jkoʼoltastik xchiʼuk li sloʼilal j-abtel ti tukʼ yoʼontone xchiʼuk xtok li sloʼilal lajuneb tojol tsebetike. Li ta sloʼilal j-abtel ti tukʼ yoʼontone, li Jesuse te laj yalbe skʼoplal jun chopol j-abtel ti lik smaj li yan xchiʼiltak ta abtele. Taje maʼuk la skʼan laj yal Jesús ti tspasik ta chopol j-abteletik li buchʼutik tʼujbil chbatik ta vinajel ti jaʼik li j-abtel ti tukʼ yoʼontone. Jaʼ noʼox tskʼan tspʼijubtasan sventa mu spasik ta chopol j-abteletik. Koʼoltik jech laj yalbe smelolal Jesús li ta sloʼilal lajuneb tojol tsebetike. Laj yal ti muʼyuk pʼijik li voʼobe. Pe maʼuk la skʼan laj yal ti oʼlol muʼyuk pʼij chakʼ sbaik li buchʼutik tʼujbil chbatik ta vinajele. Li kʼusi tskʼan li Jesuse jaʼ ti spʼijubtas skotol li buchʼutik tʼujbil chbatik ta vinajel sventa lekuk chapalik xchiʼuk ti lekuk vikʼil li satike. * (Kʼelo li tsʼib ta yok vune.) Jaʼ jech chkʼot ta pasel li ta sloʼilal talentoetik eke. Li Jesuse maʼuk la skʼan laj yal ti tspasik ta chopol j-abteletik ta slajebal kʼakʼal li buchʼutik tʼujbil chbatik ta vinajele. Moʼoj, li kʼusi tskʼan Jesuse jaʼ ti spʼijubtas sventa tsotsuk x-abtejik xchiʼuk ti mu spasik kʼuchaʼal li chopol j-abtele (Mateo 25:16).
16. 1) ¿Kʼusi chakʼ jchantik li sloʼilal talentoetike? 2) ¿Kʼuxi xuʼ xachapbe skʼoplal li sloʼilal talentoetik ti laj xa jchantike? (Kʼelo li rekuadro ti bu chal: «¿Kʼusi skʼan xal li sloʼilal talentoetike?».)
16 ¿Kʼusi chakʼ jchantik li sloʼilal talentoetike? Oy chaʼtos. Baʼyel, li Jesuse oy kʼusi tsots skʼoplal laj yakʼbe komel ta sbaik spasel li buchʼutik tʼujbil chbatik ta vinajele. ¿Kʼusi taje? Jaʼ li xcholel mantale xchiʼuk li spasel ta yajtsʼaklomtak Cristo li krixchanoetike. Xchibal, li Jesuse tskʼan ti tsots xij-abtej jkotoltik li ta cholmantale. Mi ta jcholtik-o mantale xchiʼuk mi ta jpastik skotol li kʼusi chalbutik akʼo jpastik li Jesuse, ta xakʼ jmotontik (Mateo 25:21, 23, 34).
^ par. 3 Sventa jnaʼtik buchʼu jaʼ li j-abtel ti tukʼ yoʼontone kʼelo Li Jkʼel osil ta toyole 15 yuʼun julio ta 2013 ta pajina 21 xchiʼuk 22, parafo 8 kʼalal ta 10.
^ par. 3 Sventa jnaʼtik buchʼu jaʼ li tojol tsebetike kʼelo liʼ ta revista ti bu chal: «Skʼan ‹ti viqʼuiluc asatique›».
^ par. 3 Sventa xkaʼibetik smelolal li loʼil ta sventa chijetik xchiʼuk tentsunetike, kʼelo li yan xchanobil chtal ti xi sbie: «Jkoltatik li xchiʼiltak Cristoe» xchiʼuk La Atalaya 15 yuʼun oktuvre ta 1995, pajina 23 kʼalal ta 28.
^ par. 4 Kʼelo li rekuadro ti bu chal: «¿Kʼuxi xkoʼolaj li loʼil ta sventa talentoetik xchiʼuk li mina takʼine?».
^ par. 5 Li ta skʼakʼalil Jesuse, jtob jabil skʼan x-abtej sventa spas kanal jun talento li jun j-abtele.
^ par. 8 Kʼalal chamik xaʼox li jtakboletike, epal krixchanoetik lik stoy sbaik xchiʼuk lik chanubtasvanikuk ta sventa li kʼusitik mu meleluk li ta tsobobbailetike. Ta epal sigloetike jutebik li buchʼutik chcholik mantale. Pe li Jesuse laj xa onoʼox yal ti chlik xcholik mantal ta slajebaltik kʼakʼal li yajtsʼaklomtake (Mateo 13:24-30, 36-43). Taje te chalbe skʼoplal ta Li Jkʼel osil ta toyole 15 yuʼun julio ta 2013, pajina 9 kʼalal ta 12.
^ par. 11 Kʼelo Li Jkʼel osil ta toyole 15 yuʼun julio ta 2013, pajina 7 xchiʼuk 8, parafo 14 kʼalal ta 18.
^ par. 15 Kʼelo ta pajina 15 ta parafo 13 li ta xchanobil ti bu chal: «Skʼan ‹ti viqʼuiluc asatique›» li ta revista liʼe.
