Mahibaro Tikang ha Ilustrasyon Mahitungod han mga Talanton
“May gintagan hiya hin lima ka talanton, may gintagan hin duha, ngan may gintagan hin usa.”—MAT. 25:15.
1, 2. Kay ano nga iginsumat ni Jesus an parabola mahitungod han mga talanton?
HA PARABOLA mahitungod han mga talanton, iginpatin-aw ni Jesus an obligasyon han iya dinihogan nga mga sumurunod. Kinahanglan masabtan naton an kahulogan hini nga parabola tungod kay nakakaapekto ini ha ngatanan nga tinuod nga Kristiano, langitnon o tunan-on man an ira paglaom.
2 Iginsumat ni Jesus an parabola mahitungod han mga talanton sugad nga bahin han iya baton ha pakiana han mga disipulo may kalabotan han “tigaman han [iya] presensya ngan han ikatarapos hini nga sistema.” (Mat. 24:3) Salit ini nga parabola natutuman ha aton panahon ngan bahin han tigaman han presensya ni Jesus ngan han iya pagmando sugad nga Hadi.
3. Ano nga mga leksyon an igintututdo han mga ilustrasyon nga nakarekord ha Mateo kapitulo 24 ngan 25?
3 An parabola mahitungod han mga talanton usa han upat nga ilustrasyon nga nakarekord ha Mateo 24:45 tubtob ha 25:46. An tulo nga ilustrasyon—mahitungod han matinumanon ngan maaramon nga uripon, han napulo nga birhen, ngan han mga karnero ngan mga kanding—bahin liwat han baton ni Jesus ha pakiana mahitungod han tigaman han iya presensya. Hinin upat nga ilustrasyon, ginpapabug-atan ni Jesus an mga kalidad nga magpapakita han kaibahan han iya tinuod nga mga sumurunod durante hinin kataposan nga mga adlaw. An mga ilustrasyon mahitungod han uripon, han mga birhen, ngan han mga talanton naaplikar ha iya dinihogan nga mga sumurunod. Ha ilustrasyon mahitungod han matinumanon nga uripon, ginpapabug-atan ni Jesus nga kinahanglan magin matinumanon ngan maaramon an gutiay nga grupo han mga dinihogan nga iya gintaporan ha pagpakaon ha iya mga surugoon ha panimalay durante han kataposan nga mga adlaw. Ha parabola mahitungod han mga birhen, ginpapabug-atan ni Jesus nga an ngatanan niya nga dinihogan nga sumurunod kinahanglan magin andam ngan magin mabinantayon tungod kay diri hira maaram han adlaw o oras han iya pag-abot. Ha parabola mahitungod han mga talanton, iginpapakita ni Jesus nga kinahanglan magin maduruto an mga dinihogan ha pagtuman han ira Kristiano nga mga responsabilidad. Ngan ha parabola mahitungod han mga karnero ngan mga kanding, nagpokus hi Jesus hadton may tunan-on nga paglaom. Iya ginpapabug-atan nga kinahanglan hira magin maunungon ngan bug-os nga sumuporta ha iya dinihogan nga kabugtoan dinhi ha tuna. * Aton yana paghisgotan an ilustrasyon mahitungod han mga talanton.
GINTAGAN HAN AGARON AN IYA MGA URIPON HIN BAHANDI
4, 5. Hin-o an ginrirepresentaran han tawo, o han agaron, ngan mationan-o kadaku an kantidad han usa ka talanton?
4 Basaha an Mateo 25:14-30. Maiha na nga iginsaysay han aton mga publikasyon nga an tawo, o an agaron, ha ilustrasyon amo hi Jesus ngan nagbiyahe hiya ha iba nga nasud han sinaka hiya ha langit han 33 C.E. Ha puropariho nga parabola, iginsumat ni Jesus an katuyoan han iya pagbiyahe—basi “makarawat gud niya an pagkahadi.” (Luc. 19:12) Waray dayon magin Hadi hi Jesus pagbalik niya ha langit. * Lugod, hiya “liningkod ha too han Dios. Tikang hito nga panahon naghihinulat hiya tubtob nga an iya mga kaaway igbutang sugad nga tungtongan han iya mga tiil.”—Heb. 10:12, 13.
5 An tawo ha ilustrasyon may-ada walo ka talanton—daku hinduro nga kantidad hin kwarta hito nga panahon. * Antes magbiyahe, iya gintagan hin mga talanton an iya mga uripon. Naglalaom hiya nga igninegosyo nira ito samtang waray hiya. Pariho hito nga tawo, hi Jesus may-ada panag-iya nga daku hinduro an bili antes hiya sumaka ha langit. Ano ito? An iya buruhaton han nakanhi hiya ha tuna.
6, 7. Ano an ginsisimbolohan han mga talanton?
6 Importante gud kan Jesus an pagsangyaw nga buruhaton. Tungod han iya pagsangyaw, damu an iya nagin disipulo. (Basaha an Lucas 4:43.) Pero maaram hiya nga daku pa an buruhaton ngan damu pa an makarawat han maopay nga sumat. Ngani, ginsidngan niya an iya mga disipulo: “Kitaa niyo an kaumhan, hinog na an aranihon.” (Juan 4:35-38) Pariho hin maopay nga parauma, diri babayaan ni Jesus an usa nga uma nga hinog na an aranihon. Salit, han ginbanhaw hiya ngan antes hiya sumaka ha langit, iya gintagan an iya mga disipulo hin daku nga buruhaton: “Salit kadto kamo ha mga tawo . . . ngan tutdui hira basi magin akon mga disipulo.” (Mat. 28:18-20) Hito nga paagi, gintaporan niya hira hin presyoso nga bahandi—an Kristiano nga ministeryo.—2 Cor. 4:7.
7 Kon sugad, ano an mahimo naton magin konklusyon? Han ginsugo ni Jesus an iya mga sumurunod nga maghimo hin disipulo, sugad hin iginhatag niya ha ira an iya “mga panag-iya”—an iya mga talanton. (Mat. 25:14) Salit, an mga talanton nagsisimbolo ha responsabilidad nga magsangyaw ngan maghimo hin mga disipulo.
8. Bisan kon iba-iba an kadamu han talanton nga nakarawat han tagsa nga uripon, ano an ginlalaoman han agaron?
8 Ha parabola, gintagan han agaron an siyahan nga uripon hin lima ka talanton, an ikaduha nga uripon duha, ngan an ikatulo nga uripon usa. (Mat. 25:15) Bisan kon iba-iba an kadamu han talanton nga nakarawat han tagsa nga uripon, ginlalaoman han agaron nga hira ngatanan magigin maduruto ha paggamit hito. Ha pariho nga paagi, naglalaom hi Jesus nga bubuhaton han mga dinihogan an ira gimaopayi ha ministeryo. (Mat. 22:37; Col. 3:23) Tikang han Pentekostes 33 C.E., an mga sumurunod ni Jesus nagtikang paghimo hin mga disipulo ha ngatanan nga nasud. Ngan mababasa ha libro han Biblia nga Mga Buhat an ira maduruto nga mga pangalimbasog. *—Buh. 6:7; 12:24; 19:20.
GINAGAMIT HAN MGA URIPON AN MGA TALANTON HA PANAHON HAN KATAPOSAN
9. (a) Ano an ginbuhat han duha nga matinumanon nga uripon ha mga talanton, ngan ano an iginpapasabot hito? (b) Ano an kinahanglan buhaton hadton may tunan-on nga paglaom?
9 Ha panahon han kataposan, labi na tikang han 1919, maaramon nga ginagamit han magtinumanon nga dinihogan nga uripon han Kristo an mga talanton han Agaron. Pariho han duha nga uripon, ginbubuhat han mga dinihogan an ira gimaopayi ha pagsangyaw. Diri naton kinahanglan magbanabana kon hin-o an nakakarawat han lima nga talanton ngan kon hin-o an nakakarawat han duha nga talanton. Ha parabola, nadoble han duha nga uripon an kantidad nga iginhatag ha ira han agaron, salit pariho hira maduruto. Pero mga dinihogan la ba an sadang magin maduruto ha pagsangyaw ngan pagtutdo nga buruhaton? Diri. An ilustrasyon ni Jesus mahitungod han mga karnero ngan mga kanding nagtututdo ha aton nga adton may tunan-on nga paglaom may-ada pribilehiyo nga maunungon nga sumuporta ha buruhaton han dinihogan nga kabugtoan ni Jesus. Durante hinin kataposan nga mga adlaw, inin duha nga grupo urosa nga nagbubuhat sugad nga “usa nga panon.” Madasigon hira nga nagsasangyaw ngan naghihimo hin mga disipulo.—Juan 10:16.
10. Ano an usa nga importante nga bahin han tigaman han presensya ni Jesus?
10 Naglalaom hi Jesus nga mangangalimbasog gud an ngatanan niya nga sumurunod ha paghimo hin dugang nga mga disipulo. Ito an ginbuhat han iya mga disipulo ha siyahan nga siglo. Kumusta man hinin panahon han kataposan diin natutuman an parabola mahitungod han mga talanton? Nangangalimbasog gud an matinumanon ngan maduruto nga mga sumurunod ni Jesus ha pagsangyaw ha pinakadamu nga tawo ngan pagbulig ha ira nga magin disipulo. Tungod han ira urosa nga pagbuhat, ginatos ka yukot an nababawtismohan ngan nagigin magwarali kada tuig. Iginpapakita hini nga an pagsangyaw ngan pagtutdo nga buruhaton usa nga importante nga bahin han tigaman han presensya ni Jesus. Sigurado nga nalilipay gud hito hi Jesus!
Igintapod han Kristo ha iya mga sumurunod an presyoso nga responsabilidad ha pagsangyaw (Kitaa an parapo 10)
SAN-O MAABOT AN AGARON BASI MAKIGTUHAY?
11. Kay ano nga nakasiring kita nga makikigtuhay hi Jesus durante han daku nga kasakitan?
11 Maabot hi Jesus basi makigtuhay ha iya mga uripon ha ikatarapos han daku nga kasakitan nga hirani na gud umabot. Kay ano nga nakasiring kita hito? Ha tagna ni Jesus ha Mateo kapitulo 24 ngan 25, pauroutro nga gin-unabi niya an iya pag-abot. May kalabotan ha paghukom durante han daku nga kasakitan, hiya nagsiring nga “makikita an Anak han tawo nga nalusad [“maabot,” Maupay nga Sumat] upod han mga dampog ha langit.” Iya ginsagda an iya mga sumurunod ha kataposan nga mga adlaw nga magin mabinantayon, hiya nagsiring: “Diri kamo maaram kon ano nga adlaw maabot an iyo Ginoo” ngan “an Anak han tawo maabot ha oras nga diri niyo ginlalaoman.” (Mat. 24:30, 42, 44) Salit, han nagsiring hi Jesus nga “inabot an agaron hito nga mga uripon ngan nakigtuhay ha ira,” matin-aw nga gintutudlok niya an panahon diin maabot hiya basi hukman an mga tawo ngan bungkagon an kalibotan ni Satanas. *—Mat. 25:19.
12, 13. (a) Ano an ginsiring han agaron ha siyahan nga duha nga uripon, ngan kay ano? (b) San-o makakarawat han mga dinihogan an ultimo nga pagselyo? (Kitaa an kahon nga “Ginhukman nga Takos ha Ira Kamatay.”) (c) Ano nga balos an makakarawat han mga huhukman sugad nga karnero?
12 Uyon ha parabola, pag-abot han agaron, nakita niya nga an uripon nga gintagan hin lima nga talanton nakaganansya hin lima ngan an gintagan hin duha nakaganansya hin duha. Iya ginsidngan an tagsa ha ira: “Maopay an imo ginbuhat, matataporan ngan matinumanon nga uripon! Tungod kay matinumanon ka ha gutiay nga butang, tataporan ko ikaw hin damu nga butang.” (Mat. 25:21, 23) Kon sugad, ano an aton lalaoman kon an Agaron, an ginhimaya nga hi Jesus, umabot na basi maghukom?
13 An ginrirepresentaran han duha nga uripon—an magduruto nga dinihogan nga disipulo—nakakarawat na han ultimo nga pagselyo antes magtikang an daku nga kasakitan. (Pah. 7:1-3) Antes han Armagedon, ihahatag ni Jesus ha ira an ira balos nga kinabuhi ha langit. Hito nga panahon, adton may tunan-on nga paglaom nga sinuporta ha kabugtoan han Kristo ha pagsangyaw huhukman sugad nga mga karnero ngan tatagan hin pribilehiyo nga mabuhi ha tuna ilarom han pagmando han Ginhadian han Dios.—Mat. 25:34.
MARAOT NGAN HUBYA NGA URIPON
14, 15. Iginpapasabot ba ni Jesus nga damu han iya dinihogan nga kabugtoan an magigin maraot ngan hubya? Isaysay.
14 Ha parabola, iginlubong han ikatulo nga uripon an iya talanton imbes nga ignegosyo o igdeposito ha bangko. Ini nga uripon nagpakita hin maraot nga disposisyon tungod kay tinuyo nga ginbalewaray niya an sugo han agaron. Salit gintawag hiya han agaron nga “maraot ngan hubya nga uripon.” Ginkuha ha iya an talanton ngan iginhatag ito ha uripon nga may napulo nga talanton. Katapos, an maraot nga uripon iginlabog ngadto ha “kasisidman ha gawas.” “Didto hiya magtatangis ngan mangingigot an iya mga ngipon.”—Mat. 25:24-30; Luc. 19:22, 23.
15 Iginlubong han usa han tulo nga uripon an iya talanton, kon sugad, iginpapasabot ba ni Jesus nga an ikatulo ka bahin han iya dinihogan nga mga sumurunod magigin maraot ngan hubya? Diri. Tagda an konteksto. Ha ilustrasyon mahitungod han matinumanon ngan maaramon nga uripon, gin-unabi ni Jesus an usa nga maraot nga uripon nga nangastigo ha iya mga igkasi-uripon. Diri iginpapasabot ni Jesus nga magkakaada maraot nga uripon. Lugod, iya ginpapahamangnoan an matinumanon nga uripon nga diri magin pariho ha maraot nga uripon. Ha pariho nga paagi, ha ilustrasyon mahitungod han napulo nga birhen, diri iginpapasabot ni Jesus nga katunga han iya dinihogan nga mga sumurunod an magigin pariho han lima nga diri maaramon nga birhen. Lugod, iya ginpapahamangnoan an iya espirituwal nga kabugtoan han mahitatabo kon diri hira magin andam ngan diri magin mabinantayon. * Uyon hini nga konteksto, baga hin makatadunganon an pagsiring nga ha ilustrasyon mahitungod han mga talanton, diri iginpapasabot ni Jesus nga damu han iya dinihogan nga kabugtoan ha kataposan nga mga adlaw an magigin maraot ngan hubya. Lugod, iya ginpapahamangnoan an iya dinihogan nga mga sumurunod nga magpabilin nga maduruto—‘ignegosyo’ an ira mga talanton—ngan likyan an disposisyon ngan mga buhat han maraot nga uripon.—Mat. 25:16.
16. (a) Ano nga mga leksyon an aton hibabaroan ha parabola mahitungod han mga talanton? (b) Paonan-o nakabulig ha aton ini nga artikulo nga masabtan an kahulogan han parabola mahitungod han mga talanton? (Kitaa an kahon nga “ Pagsabot ha Ilustrasyon Mahitungod han mga Talanton.”)
16 Ano an duha nga leksyon nga aton hibabaroan ha parabola mahitungod han mga talanton? Siyahan, gintaporan han Agaron, an Kristo, an iya dinihogan nga mga surugoon hin presyoso nga bahandi—an sugo nga magsangyaw ngan maghimo hin mga disipulo. Ikaduha, ginlalaoman han Kristo nga magigin maduruto kita ngatanan ha pagsangyaw nga buruhaton. Kon bubuhaton naton ito, makakasiguro kita nga babalosan han Agaron an aton pagtoo, pagin mabinantayon, ngan pagin maunungon.—Mat. 25:21, 23, 34.
^ par. 3 Iginsasaysay han An Barantayan, Hulyo 15, 2013, pahina 21-22, parapo 8-10, kon hin-o an matinumanon ngan maaramon nga uripon. Ginhihisgotan han nauna nga artikulo kon hin-o an ginrirepresentaran han mga birhen. Iginsasaysay han An Barantayan, Oktubre 15, 1995, pahina 19-24, ngan han masunod nga artikulo, an ilustrasyon mahitungod han mga karnero ngan mga kanding.
^ par. 4 Kitaa an kahon nga “ Kaparihoan han mga Ilustrasyon Mahitungod han mga Talanton Ngan han mga Mina.”
^ par. 5 Ha panahon ni Jesus, an usa ka talanton katugbang hin mga 6,000 ka denaryo. An usa nga ordinaryo nga trabahador nga nakarawat hin usa ka denaryo kada adlaw kinahanglan magtrabaho hin mga 20 ka tuig basi makatirok hin usa ka talanton.
^ par. 8 Kamatay han mga apostol, nagsarang an apostasya ha ngatanan nga kongregasyon. Ha sulod hin damu ka siglo, haros naundang an pagsangyaw nga buruhaton. Pero mababag-o ito durante “ha pag-ani,” o ha panahon han kataposan. (Mat. 13:24-30, 36-43) Kitaa an Barantayan, Hulyo 15, 2013, pahina 9-12.
