1, 2. (1) ?Wanem ol parabol we Jisas i talem? (Yu luk pija long stat blong stadi.) (2) ?Wanem ol kwestin we yumi mas faenem ansa blong olgeta?

JISAS i stap storian wetem ol fren blong hem, hemia Pita, Andru, Jemes mo Jon. Oli stap tokbaot samting we i pulum tingting blong olgeta. Jisas i talem ol parabol blong slef we i stret mo waes, ten yang gel, mo talen mane. Afta, hem i tokbaot wan narafala parabol. Long parabol ya, hem i tokbaot taem ya we “Pikinini blong Man” bambae i jajem “olgeta man blong wol.” Hem i talem se “Pikinini blong Man” bambae i seraot ol man long tu grup. Wan hemia ol sipsip mo narawan hemia ol nani. Mo hem i tokbaot wan narafala grup bakegen, hemia ‘ol brata blong King.’—Ridim Matiu 25:31-46.

² Ol aposol oli lesin gud. Ol man blong Jehova long taem blong yumi olgeta tu oli intres long parabol ya, from we hem i tokbaot samting we i impoten long laef blong ol  man. Jisas i talem se sam man bambae oli kasem laef we i no save finis be ol narafala bambae oli lus. From samting ya nao, i impoten tumas blong save mining blong parabol ya, mo samting we yumi mas mekem blong kasem laef. Taswe, long stadi ya bambae yumi tokbaot ol kwestin ya: ?Olsem wanem Jehova i mekem mining blong parabol ya i kam klia? ?Olsem wanem parabol ya i soemaot se wok blong prij i impoten? ?Hu olgeta we oli mas prij? ?From wanem i impoten blong sapotem gud “King” mo ‘ol brata’ blong hem naoia?

3, 4. (1) Blong kasem save long parabol ya, ?yumi mas save wanem? (2) Long yia 1881, ?Wajtaoa i eksplenem parabol ya olsem wanem?

³ Blong kasem save long parabol blong sipsip mo nani, yumi mas save: (1) ?Hu ya “Pikinini blong Man” no “King”? ?Hu ya ol sipsip mo ol nani, mo hu ya ‘ol brata blong King’? (2) ?Wetaem “Pikinini blong Man” i seraotem ol sipsip long ol nani? (3) ?From wanem Jisas i singaot samfala se sipsip mo samfala se nani?

⁴ Long yia 1881, Wajtaoa i talem se “Pikinini blong Man” no “King” hemia Jisas. Hem i eksplenem se ‘ol brata blong King,’ hemia olgeta we bambae oli rul wetem hem long heven, mo olgeta we bambae oli laef long wol ya wetem bodi we i stret gud. Wajtaoa i gohed i se taem Jisas i rul blong Wan Taosen Yia, bambae hem i seraotem ol sipsip long ol nani. Olgeta we oltaem oli folem fasin blong God blong lavem ol man, oli sipsip.

5. Long yia 1923, ?olsem wanem ol man blong God oli kasem save klia moa long parabol ya?

⁵ Biaen, Jehova i givhan long ol man blong hem blong oli kasem save klia moa long parabol ya. Wajtaoa blong 15 Oktoba 1923 i talem se, “Pikinini blong Man” hemia Jisas. Afta, hem i yusum sam vas blong Baebol blong eksplenem se ‘ol brata blong King,’ hemia olgeta nomo we oli rul wetem Jisas. Wajtaoa i talem se ol sipsip, hemia olgeta we bambae oli laef long wol taem Jisas mo ol brata blong hem oli rul blong Wan Taosen Yia. Jisas i mas seraotem ol sipsip long ol nani bifo we rul ya i stat, from we oli no save givhan long ol brata blong Kraes taem ol brata ya oli stap rul finis long heven. Wajtaoa i talem tu se ol sipsip, hemia olgeta we oli bilif long Jisas mo oli bilif se Kingdom bambae i mekem laef blong ol man i gud moa.

6. Long yia 1995, ?olsem wanem save blong yumi i kam klia moa?

⁶ Blong plante yia, yumi bin ting se long ol las dei ya, Jisas i stap jajem ol man folem fasin we oli mekem taem yumi prij long olgeta. Sipos oli lesin, oli sipsip, be sipos oli no wantem lesin, oli nani. Be long yia 1995, Wajtaoa i mekem save ya i kam klia moa. Hem i skelem Matiu 24:29-31 (ridim) wetem Matiu 25:31, 32 (ridim), mo i eksplenem se Jisas, we i Pikinini blong Man, bambae i jajem ol man long taem blong bigfala trabol, taem hem i kam wetem bigfala paoa. *

7. ?Wanem mining blong parabol ya?

 ⁷ Tede, yumi kasem save klia moa long parabol blong sipsip mo nani. Yumi save se “Pikinini blong Man” no “King” hemia Jisas. ‘Ol brata blong King,’ hemia ol Kristin we tabu spirit i makemaot olgeta, we bambae oli rul wetem Jisas long heven. (Rom 8:16, 17) “Ol sipsip” mo “ol nani” hemia ol man blong olgeta kantri. Jisas bambae i jajem olgeta klosap long en blong bigfala trabol we bambae i stat i no longtaem. Mo Jisas bambae i jajem ol man folem fasin we oli mekem long ol tabu Kristin we oli stap yet long wol. !Yumi glad tumas se Jehova i givhan long yumi long ol yia we i pas, blong yumi kasem save long parabol ya mo ol narafala parabol long Matiu japta 24 mo 25!

8, 9. ?Jisas i talem se ol sipsip oli “stret man” from wanem?

⁸ Long parabol ya, Jisas i no yusum tok ya “prij” no “wok blong prij.” Taswe, ?from wanem yumi talem se parabol ya i soemaot se wok blong prij i impoten tumas?

⁹ Blong faenem ansa blong kwestin ya, fastaem yumi mas tingbaot se Jisas i talem parabol ya blong tijim ol man. Hem i no stap tokbaot ol prapa sipsip mo nani. Mo hem i no stap talem se olgeta man we oli olsem sipsip oli mas givim kakae mo klos long ol tabu Kristin, mo lukaot long olgeta taem oli sik, mo visitim olgeta long kalabus. Be Jisas i talem se ol sipsip oli “stret man” from we oli luksave se ol tabu Kristin oli ol brata blong Kraes, mo oli sapotem gud olgeta long ol las dei ya we laef i had.—Matiu 10:40-42; 25:40, 46; 2 Timoti 3:1-5.

10. ?Ol sipsip oli save mekem wanem blong givhan long ol brata blong Kraes?

¹⁰ Bifo we Jisas i talem parabol blong sipsip mo nani, hem i tokbaot ol samting we bambae oli hapen long taem blong en. (Matiu 24:3) Wan samting, hemia se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol.” (Matiu 24:14) Jes bifo we hem i tokbaot ol sipsip mo ol nani, hem i talem parabol blong talen mane. Parabol ya i blong tijim ol tabu Kristin se oli mas wok strong long wok blong prij. !I gat bigfala wok yet, be i no moa gat plante tabu Kristin long wol blong mekem wok ya! !Oli mas prij long ‘olgeta man long wol’ bifo we en i kam! Yumi lanem long parabol blong sipsip mo nani se “ol sipsip” oli givhan long ol brata blong Jisas. Taswe, nambawan samting we oli save mekem blong givhan, hemia wok blong prij. ?Be yu ting se i naf we oli givim mane nomo blong  sapotem wok ya? ?Sipos oli leftemap tingting blong ol brata blong Kraes blong oli gohed long wok ya, hemia i naf?

11. ?Maet yumi askem wanem kwestin? ?From wanem?

¹¹ Tede, i gat 8 milian disaepol blong Jisas long wol, mo bighaf blong olgeta oli no tabu Kristin. Be Jisas i no givim talen mane long olgeta ya. Hem i givim long ol tabu brata blong hem. (Matiu 25:14-18) Taswe, maet yumi askem se: ‘?Olgeta we oli no kasem talen mane oli mas prij?’ Yes. Bambae yumi luk from wanem.

12. ?Ol tok blong Jisas long Matiu 28:19, 20 i tijim yumi long wanem?

¹² Jisas i talem long olgeta disaepol blong hem se oli mas prij. Afta we Jisas i laef bakegen, hem i talem long olgeta disaepol se oli mas go long olgeta man blong ‘pulum olgeta oli kam man blong hem,’ mo oli mas tijim ol man ya long “olgeta tok” we hem i givim finis long olgeta. Wan long ol tok ya, hemia se oli mas prij. (Ridim Matiu 28:19, 20.) I klia se yumi evriwan i mas prij, nating se bambae yumi laef long heven no long wol.—Ol Wok 10:42.

13. ?Long vison blong Jon, yumi lanem wanem?

¹³ Buk blong Revelesen i soemaot se ol tabu Kristin mo ol narafala tu bambae oli prij. Long vison we aposol Jon i luk, i gat wan ‘woman’ we i stap singaot ol man blong oli kam dring wota blong laef. Woman ya i minim ol 144,000 tabu Kristin we bambae oli rul wetem Jisas long heven. (Revelesen 14:1, 3; 22:17) Wota i minim sakrefaes blong Jisas we bambae i givhan long ol man blong oli kam fri long sin mo ded. (Matiu 20:28; Jon 3:16; 1 Jon 4:9, 10) Ol tabu Kristin oli wok strong blong tijim ol man long sakrefaes blong Jisas, mo long samting we oli mas mekem blong kasem blesing from sakrefaes ya. (1 Korin 1:23) Be long vison ya, i gat wan narafala grup blong man we tabu spirit i no makemaot olgeta mo bambae oli laef long wol ya. Tok i go long olgeta tu, se oli mas talem long ol narafala man se: “Yu kam.” Oli obei long tok ya taem oli tijim ol narafala long gud nius. Yes, vison ya i soemaot se olgeta evriwan we oli bilif long gud nius oli mas prij long ol narafala.

14. ?Ol man we oli obei long “loa blong Kraes” oli mas mekem wanem?

¹⁴ Olgeta evriwan we oli obei long “loa blong Kraes” oli mas prij. (Galesia 6:2) Jehova i givim ol semfala loa long evriwan we oli wosipim hem. Long taem bifo, ol man Isrel mo ol strenja we oli stap wetem olgeta, olgeta evriwan oli mas obei long ol loa blong hem. (Eksodas 12:49; Levitikas 24:22) Tede  yumi no moa stap aninit long loa ya we God i givim long ol man Isrel. Be yumi mas obei long “loa blong Kraes,” nating se yumi tabu Kristin no nogat. Wan impoten samting long loa blong Kraes, hemia blong lavem narafala. (Jon 13:35; Jemes 2:8) Yumi mas lavem Jehova, mo Jisas, mo ol narafala man. Mo nambawan rod blong soemaot lav ya, hemia blong talemaot gud nius blong Kingdom long olgeta man.—Jon 15:10; Ol Wok 1:8.

15. ?Wanem i soemaot se tok blong Jisas i go long olgeta disaepol evriwan se oli mas prij?

¹⁵ Plante taem, tok we Jisas i talem long sam disaepol nomo i blong olgeta evriwan. Jisas i mekem promes long 11 disaepol blong hem nomo se bambae oli rul wetem hem long Kingdom. Be promes ya i go long olgeta 144,000 tabu Kristin evriwan. (Luk 22:29, 30; Revelesen 5:10; 7:4-8) Afta we Jisas i laef bakegen, hem i talem long sam disaepol nomo se oli mas prij. (Ol Wok 10:40-42; 1 Korin 15:6) Be olgeta disaepol blong Jisas evriwan long taem ya oli obei long tok ya. (Ol Wok 8:4; 1 Pita 1:8) Tede, yumi no harem voes blong Jisas we i talem se yumi mas prij. Be yumi save se yumi evriwan i mas prij. Naoia, klosap eit milian Witnes oli stap prij. Taem yumi prij, yumi stap soemaot se yumi gat bilif long Jisas.—Jemes 2:18.

16-18. ?Yumi mekem wanem blong sapotem gud ol brata blong Kraes? ?Mo from wanem naoia yumi mas mekem olsem?

¹⁶ Setan i save se “i gat smol taem nomo blong hem i stap.” Taswe hem i stap kam strong moa naoia, blong faet agensem ol tabu brata blong Kraes we oli stap yet long wol. (Revelesen 12:9, 12, 17) Be ol tabu Kristin oli gohed nomo blong lidim wok blong prij, nating se Setan i stap agensem olgeta. Plante man moa oli stap harem gud nius i bitim bifo. I klia se Jisas i stap wetem ol tabu Kristin mo hem i stap lidim olgeta.—Matiu 28:20.

¹⁷ Yumi luksave se i wan bigfala blesing blong givhan long ol brata blong Kraes long wok blong prij. Mo tu, yumi givhan taem yumi givim presen mane mo yumi wok had blong bildim ol Haos Kingdom, ol Haos Asembli, mo ol branj ofis. Yumi soemaot se yumi stap sapotem ol brata blong Kraes, taem yumi obei long ol elda mo long ol brata we ‘slef we i stret mo waes’ i putumap olgeta.—Matiu 24:45-47; Hibrus 13:17.

¹⁸ I no longtaem, bambae God i putum las mak long ol tabu Kristin we oli stap yet long wol. Afta, ol enjel bambae oli lego “ol fo win long wol,” nao bigfala trabol bambae i stat. (Revelesen 7:1-3) Bifo we Amagedon i faerap, Jisas bambae i tekem ol tabu Kristin oli go long heven. (Matiu 13:41-43) Taswe, sipos yumi wantem se Jisas i luk yumi olsem ol sipsip, naoia i taem blong yumi sapotem gud ol tabu brata blong Kraes.