1, 2. (a) Ki diferan parabol Zezi in koz lo la avek son bann zanmi pros? (Vwar portre anler.) (b) Ki nou bezwen konnen konsernan sa parabol mouton ek kabri?

ZEZI pe koz avek son bann bon zanmi, Pyer, Andre, Zak ek Zan. I fek rakont zot bann parabol konsernan lesklav fidel e pridan, dis zenn fiy e bann talan. Zezi i annan ankor en lot parabol pour rakont zot. I konsernan en letan “kan Fis-de-Lonm” pou ziz “tou nasyon.” Pa sa parabol ti’n bezwen enpresyonn son bann disip! Dan sa parabol, Zezi i konsantre lo de group, enn i ganny konsidere konman mouton e lot konman kabri. I osi dekrir en trwazyenm group enportan ki i refer avek konman “bann frer” “Lerwa.”—Lir Matye 25:31-46.

² Parey bann zapot, bann serviter Zeova dan nou letan in osi enterese avek sa parabol parski sa i enplik lavi bann dimoun. I eksplike akoz serten pou ganny lavi eternel tandis ki lezot pou ganny pinisyon eternel, andotmo zot mor pour touzour. Nou bezwen konpran e aplik sa bann laverite ki Zezi in ansennyen akoz nou lavi i depan lo la. Alor nou devret enterese pour konnen: Ki mannyer Zeova in ed nou  konpran sa parabol? Akoz nou kapab dir ki sa parabol i met lanfaz lo lenportans pour prese? Lekel ki ganny sa lord pour prese? E akoz i enportan pour fidel la konmela anver sa “lerwa” e bann ki i apel “mon bann frer”?

3, 4. (a) Ki sa trwa keksoz nou bezwen konnen pour kapab konpran sa parabol mouton ek kabri? (b) An 1881, ki mannyer Latour Veyer ti eksplik sa parabol?

³ Pour nou kapab byen konpran sa parabol mouton ek kabri, nou bezwen konn trwa keksoz dan sa resi: lidantite bann ki’n ganny mansyonnen, kan ki sa zizman i arive e rezon ki serten i ganny konsidere konman mouton tandis ki lezot kabri.

⁴ An 1881, Latour Veyer ti idantifye “Fis-de-Lonm,” ki osi ganny apele “lerwa,” konman Zezi. Bann Etidyan Labib ti dir ki sa lekspresyon “mon bann frer” pe refer avek bann ki ti pou renny avek Kris me osi tou dimoun ki pou viv lo later apre ki zot in vin parfe. Zot ti krwar ki sa separasyon mouton ek kabri ti pou arive pandan Renny Mil an Zezi Kris. Zot ti osi krwar ki dimoun ti pou ganny konsidere konman mouton akoz zot aplik lalwa Bondye konsernan lanmour.

5. An 1923, ki mannyer pep Bondye ti konpran sa parabol?

⁵ Pli tar, Zeova ti ed son pep pour pli byen konpran sa parabol. Latour Veyer le 15 Oktob 1923, ti konfirmen ki “Fis-de-Lonm” i Zezi. Me apre bann verse Labib ti ganny servi pour eksplike ki “bann frer” dan sa parabol pe refer zis avek bann ki pou renny avek Zezi. I ti osi dir ki bann mouton pe refer avek bann ki pou viv lo later anba renny Rwayonm Bondye kot Kris pou dirize. Me kan ki sa separasyon mouton ek kabri ti pou arive? Sa lartik ti dir ki bann frer Kris ti pou pe renny avek Zezi dan lesyel pandan Renny Mil an, alor, i pa kapab ki zot ganny ede oubyen neglize par bann ki lo later. I pour sa rezon ki separasyon bann mouton avek bann kabri ti pou bezwen arive avan sa Renny Mil an Zezi Kris i konmanse. Konsernan sa rezon akoz en dimoun i ganny idantifye konman en mouton, sa lartik ti dir ki dimoun ti pou ganny zize koumsa akoz zot rekonnet Zezi konman Senyer e krwar ki sa Rwayonm ki pou anmenn bann pli bon kondisyon.

6. An 1995, ki mannyer lafason ki nou ti konpran sa parabol ti sanze?

⁶ Anliny avek sa nouvo leksplikasyon, pep Zeova ti krwar ki sak dimoun i ganny zize konman mouton oubyen kabri tou dilon konklizyon sa move lemonn tou depan lo si zot aksepte oubyen rezet sa mesaz Rwayonm. Me pli tar lafason ki nou ti konpran sa parabol ti sanze. De lartik dan Latour Veyer le 15 Oktob 1995 ti fer resorti bann similarite ant parol Zezi dan Matye 24:29-31 (lir) e sa parol dan Matye 25:31, 32. (Lir.) * Alor ki konklizyon nou kapab tonm lo la? Sa premye lartik ti dir: “Bann mouton ek kabri pou ganny zize a lavenir.” Kan egzakteman? “Sa pou arive apre sa ‘ladetres’ ki ganny mansyonnen dan Matye 24:29, 30 i konmanse e Fis-de-Lonm i ‘vini dan son laglwar.’ . . . Apre ki sa move  lemonn in ganny detri, Zezi pou rann e egzekit zizman.”

7. Ki mannyer nou konpran parabol mouton ek kabri aprezan?

⁷ Ozordi nou konpran byen sa parabol konsernan mouton ek kabri. Konsernan lidantite bann ki’n ganny mansyonnen, Zezi i “Fis-de-Lonm,” sa Lerwa. “Bann frer” sa lerwa i bann msye ek madanm ki’n ganny swazir par lespri sen, ki pou renny avek Kris dan lesyel. (Rom. 8:16, 17) Bann “mouton” ek “kabri,” i reprezant dimoun dan tou nasyon ki pa’n ganny swazir par lespri sen. Me kan ki zot ganny zize? Sa pou ariv ver lafen sa gran ladetres ki pe vini. Me ki nou pou dir konsernan rezon akoz bann dimoun pou ganny zize konman mouton oubyen kabri? Zot pou ganny zize dapre lafason ki zot in tret larestan frer swazir Kris lo later. Vi ki lafen sa move lemonn i pros, pa nou rekonesan ki Zeova in ptitapti ed nou konpran sa parabol ek lezot parabol dan Matye sapit 24 ek 25!

8, 9. Akoz sa bann mouton i ganny dekrir konman “zis”?

⁸ Dan sa parabol mouton ek kabri, Zezi pa ti koz direkteman lo travay predikasyon. Alor, akoz nou kapab dir ki sa parabol i met lanfaz lo lenportans predikasyon?

⁹ Premyerman, remarke ki Zezi pe ansenny nou atraver en parabol. I kler alor ki i pa pe koz konsernan en separasyon ant bann vre mouton ek kabri. Pareyman, i pa pe dir ki sak dimoun ki ganny zize konman mouton i bezwen literalman donn son bann frer manze, lenz e pran swen avek zot ler zot malad oubyen vizit zot dan prizon. O kontrer, i pe montre latitid ki sa bann mouton senbolik i demontre anver son bann frer. I ti dekrir sa bann mouton konman “zis” akoz zot rekonnet ki bann Kretyen swazir i bann frer Kris e zot pe fidelman siport son bann frer swazir pandan sa bann dernyen zour difisil.—Mat. 10:40-42; 25:40, 46; 2 Tim. 3:1-5.

10. Ki mannyer bann mouton i kapab demontre labonte anver bann frer Kris?

¹⁰ Dezyenmman, annou egzamin konteks parol Zezi. I ti pe diskit lo siny son prezans ek konklizyon sa move lemonn. (Mat. 24:3, NW) Pli boner dan son diskour, Zezi ti endike ki sa siny ti pou annan en laspe remarkab, sa i ki sa bon nouvel lo Rwayonm ti pou “ganny anonse partou dan lemonn.” (Mat. 24:14) Me zis avan ki i ti koz konsernan bann mouton ek kabri, i ti rakont parabol konsernan bann talan. Parey nou’n diskit lo la dan sa lartik avan, Zezi ti donn sa parabol pour montre ki son bann disip swazir, setadir son “bann frer,” i bezwen fer sa travay predikasyon avek devouman. Me vi ki i annan zis en pti group Kretyen swazir ki reste lo later pandan prezans Zezi, i pa fasil pour zot pres avek “tou dimoun” avan ki lafen i arive. Sa parabol konsernan mouton ek kabri i montre ki bann Kretyen swazir ti pou ganny ede. Bann dimoun ki ganny konsidere konman mouton i demontre labonte anver bann frer Kris dan sa pli bon fason par siport zot dan sa travay predikasyon. Alor, ki mannyer sa sipor pou ganny donnen? Eski i sifi zis donn  larzan pour fer sa travay oubyen ankouraz zot pour pres sa mesaz?

11. Ki kestyon nou kapab demande e akoz?

¹¹ Ozordi lamazorite sa wit milyon disip Zezi pa bann Kretyen swazir. Zot pa’n ganny sa bann talan ki Zezi ti donn son bann serviter swazir. (Mat. 25:14-18) Sa i fer nou demann sa kestyon, ‘Eski sa responsabilite pour prese i vreman aplik pour bann ki pa’n ganny swazir par lespri sen?’ Larepons i wi. Me akoz nou tonm lo sa konklizyon.

12. Ki nou aprann avek parol Zezi dan Matye 28:19, 20?

¹² Zezi ti demann tou son bann disip pour al prese. Apre ki i ti’n resisite, Zezi ti dir son bann disip fer lezot disip e ansenny zot pour obzerv “tou” sa ki i’n konmande. Sa responsabilite pour prese ti parmi sa bann konmann. (Lir Matye 28:19, 20.) Alor, tou bann disip Kris i bezwen prese, ki swa zot annan sa lespwar pour al rennyen dan lesyel oubyen viv lo later.—Akt 10:42.

13. Ki sa vizyon ki Zan ti vwar i montre e akoz?

¹³ Liv Revelasyon i montre ki sa travay predikasyon ti pou ganny fer par bann Kretyen swazir ensi ki lezot. Zezi ti donn zapot Zan en vizyon kot i ti vwar “Nouvel-Marye,” sa 144,000 Kretyen swazir ki pou rennyen avek Kris dan lesyel pe envit dimoun pour vin “pran delo lavi gratwitman!” (Rev. 14:1, 3; 22:17) Sa delo senbolik i reprezant bann provizyon ki Zeova in fer pour ki bann imen i ganny libere avek pese ek lanmor lo baz sakrifis Zezi. (Mat. 20:28; Zan 3:16; 1 Zan 4:9, 10) Bann Kretyen swazir i ansenny dimoun lo sa ranson avek devouman e ki mannyer sa i kapab benefisye  zot. (1 Kor. 1:23) Me dan sa vizyon, Zan i osi vwar lezot ki pa bann Kretyen swazir. Zot osi zot ganny demande pour dir, “Vini!” Zot obei e envit lezot pour vin pran delo lavi. Sa dezyenm group i bann ki annan lespwar pour viv lo later. Alor, sa vizyon i klerman montre ki tou sa ki aksepte sa lenvitasyon pour “vini” i annan sa responsabilite pour prese.

14. Ki mannyer nou obei “lalwa Kris”?

¹⁴ Tou bann ki obei “lalwa Kris” i devret prese. (Gal. 6:2) Zeova i annan zis en sel standar. Par egzanp, i ti dir bann Izraelit: “I pou annan en sel lalwa ki pou aplik pour bann sitwayen e pour bann etranze ki pe reste parmi zot.” (Egz. 12:49; Lev. 24:22) Ozordi bann Kretyen pa anba Lalwa Moiz. Me nou tou, ki swa nou Kretyen swazir oubyen non, nou bezwen obei “lalwa Kris.” Sa lalwa i enplik tou sa ki Zezi ti ansennyen. En keksoz pli enportan ki Zezi ti ansenny son bann disip se pour demontre lanmour. (Zan 13:35; Zak 2:8) Enn parmi bann pli bon fason ki nou demontre lanmour pour Bondye, Kris ek nou prosen i par pres sa bon nouvel Rwayonm.—Zan 15:10; Akt 1:8.

15. Akoz nou kapab dir ki sa konmann ki Zezi ti donnen i aplik pour tou son bann disip?

¹⁵ Sa ki Zezi i dir avek en pti group i kapab aplik avek en pli gran group. Par egzanp, Zezi ti fer en lalyans pour en Rwayonm avek zis 11 disip, me sa lalyans i aplik pour 144,000 dimoun ki pou renny avek li dan lesyel. (Lik 22:29, 30; Rev. 5:10; 7:4-8) Pareyman, Zezi ti donn sa konmann pour prese avek zis en ptigin son bann disip apre son rezireksyon. (Akt 10:40-42; 1 Kor. 15:6) Me tou son bann disip fidel dan premye syek ti remarke ki sa konmann ti aplik pour zot, menm si zot pa ti’n ganny sa konmann avek Zezi personnelman. (Akt 8:4; 1 Pyer 1:8) Pareyman ozordi, Zezi pa’n personnelman koz avek okenn parmi sa wit milyon proklanmater ki pe prese. Me zot tou zot rekonnet ki zot annan sa lobligasyon pour met lafwa dan Kris e demontre sa par partisip dan predikasyon.—Zak 2:18.

16-18. Ki mannyer nou kapab fidelman siport bann frer Kris e akoz nou bezwen fer sa la konmela?

¹⁶ Satan pe lager avek larestan bann frer swazir Kris lo later e i pou entansifye son latak akoz i reste li “zis en pti pe letan.” (Rev. 12:9, 12, 17) Menm si zot bezwen andir bann tes, zot kontinyen gid sa pli gran travay predikasyon dan listwar. San dout, Zezi i avek zot e pe gid zot.—Mat. 28:20.

¹⁷ Nou vwar li en loner pour ed bann frer Kris prese e osi ed zot dan lezot fason pratik. Par egzanp, nou kontribye finansyerman, ede konstri bann Lasal Rwayonm, Lasal Lasanble ek bann biro brans e nou fidelman obei bann ki ganny apwente par “lesklav fidel e pridan” pour dirize.—Mat. 24:45-47 NW; Ebr. 13:17.

¹⁸ Byento bann lanz pou larg bann divan destriksyon ki pou konmans gran ladetres. Sa pou arive apre ki tou larestan frer Kris ki ankor lo later i ganny zot dernyen sele. (Rev. 7:1-3) Avan Amargedon i konmanse, bann Kretyen swazir pou al dan lesyel. (Mat. 13:41-43) Alor, la i lemoman pour bann ki anvi ganny zize konman mouton pour siport bann frer Kris fidelman.