1, 2. (a) Tera te kaikonaki are e maroroakinna Iesu ma raoraona ni kaan? (Nora te taamnei ni moan te kaongora aei.) (b) Tera ae ti riai n ataia n te kaikonaki ae taekaia tiibu ma kooti?

E A TIA n taetae Iesu nakoia raoraona ni kaan aika Betero, Anterea, Iakobo ao Ioane. I mwini maroroakinani kaikonaki aika taekan te toro ae kakaonimaki ma ni wanawana, ataeinnaine aika tengaun ao te tarena, e a motika ana maroro Iesu ma te kaikonaki teuana riki ae taekan “natin te aomata” are e nang motiki taekaia “botannaomata.” Ai kaungaakira nanoia taan rimwini Kristo n te kaikonaki aei! E a kaotaraea iai taekani kurubu aika uoua aika tiibu ma kooti. E katereterea naba kakawakin te katenua ni kurubu ae taekaia “tarin” nako “te Uea.”—Wareka Mataio 25:31-46.

² A kan ataa naba nanoni kaikonaki ana aomata Iehova ni boong aikai, ibukina bwa Iesu e kairekerekea iai maiuia aomata. E kaota raoi bukina bwa iai tabeman aika a na karekea te maiu are aki toki ao tabeman a na kamaunanakoaki. E boboto maiura i aon otara ma maiuakinan te koaua are taekinna Iesu. Ibukin anne, e kakawaki bwa ti na titiraki ni kangai: E kangaa Iehova ni karikirakea otara n te kaikonaki aei? Bukin tera ngkai ti kona n taekina te kaikonaki aei bwa e katuruturuaki  iai kakawakin te uarongorongo? Antai aika a mwiokoaki n te uarongorongo? Bukin tera ngkai e kakawaki bwa ti na kakaonimaki nakon “te Uea” ao naake e arania bwa ‘tarina’?

3, 4. (a) Baikara bwaai aika tenua aika ti riai n ataia ibukin te kaikonaki ae taekaia tiibu ma kooti? (b) E kangaa ni kabwarabwaraaki taekan te kaikonaki aei n te Zion’s Watch Tower ae bwain 1881?

³ Ngkana ti na ota raoi n te kaikonaki ae taekaia tiibu ma kooti, e kakawaki bwa ti na atai bwaai aika tenua aikai: kanikinaeaia te koraki ake a taekinaki taekaia, tain te motikitaeka ao bukini kaokoroaia bwa tao te tiibu ke te kooti.

⁴ E kamatataaki n te Zion’s Watch Tower ae bwain 1881 bwa “Natin te aomata,” e aranaki naba bwa “te Uea,” ae Iesu. A a ota Taan Reirei n te Baibara rimoa n te kabwarabwara are taekinaki n te King James Version ae “tariu” ake a tei ibukia te koraki ake a na tautaeka ma Kristo ao aomata ake a na karekea te maiu ae kororaoi i aon te aba. A iangoia bwa kamaenakoaia tiibu ma kooti e na karaoaki n ana tai Kristo n Tautaeka ae Manna Tenga te Ririki. Ao a kakoauaa naba bwa a kaokoroaki aomata aika tiibu ibukina bwa a maiuakina ana tua te Atua ae te tangira.

5. E kangaa ni manga kaboouaki otara n 1920 tabun?

⁵ Ni moan 1920 tabun, e buokiia ana aomata Iehova ni kabooua otaia n te kaikonaki aei. E kateretereaki raoi n The Watchtower ae bwain Okitobwa 15, 1923 bwa “natin te aomata” bon Iesu. Ma, a kaotaki iai kiibu ake a kabwarabwaraa kanikinaeaia tarini Kristo ae kaineti nakoia te koraki ake a na tautaeka mangaia i karawa, ao tiibu ake a na kantaningaa te maiu i aon te aba i aan ana Tautaeka n Uea Kristo. N ningai te tai are a na kamaenakoaki iai tiibu ma kooti? E taekinaki n te kaongora bwa a na tautaeka tarini Kristo ma ngaia i karawa i nanon Tenga n Ririki, are nanona bwa a na aki katukaki taekaia irouia te koraki ake a na maeka i aon te aba. Mangaia are, a na kaokoroaki tiibu ma kooti imwaini moanakin te Tautaeka ae Manna Tenga te Ririki. E taekinaki n te kaongora aei bukina ae a motikaki taekaia aomata tabeman bwa tiibu kioina ngkai a butimwaea Iesu bwa aia Uea ao n onimakina ana Tautaeka n Uea bwa e na kanakoraoi maiuia.

6. E kangaa ni kamatataaki riki otara n 1990 tabun?

⁶ Imwini bitakin te ota anne, a a iangoia ana aomata Iehova bwa a na motikaki taekaia aomata n tatabemania nako bwa tiibu ke kooti i nanoni kabaneani bongin te waaki ni kaineti ma aroia ni butimwaea rongorongon te Tautaeka n Uea. Ma, e a kamatataaki riki otara i aon anne n nukan 1990 tabun. Iai uoua kaongora n The Watchtower ae bwain Okitobwa 15, 1995, iteraniba 23-28 aika titeboo iai baika taekinaki n ana taeka Iesu aika koreaki ni Mataio 24:29-31 (warekia) ao ni Mataio 25:31, 32. (Warekia.) * Tera mwina? E taekinaki n te kaongora ni kangai: “E na motikaki taekaia tiibu ma kooti n te tai ae na roko.” N ningai te tai anne? “E na riki anne imwin ‘te rawawata’ ae taekinaki ni Mataio 24:29, 30 ike e na ‘roko ni mimitongina’ Natin te aomata . . . E nang roko n tokina te waaki ae buakaka ao e nang karaoa te motikitaeka Iesu.”

7. Tera ae ti a ota raoi iai ngkai?

⁷ Ni boong aikai, ti a ota raoi n te kaikonaki  ae taekaia tiibu ma kooti. Ni kaineti ma kanikinaeaia te koraki ake a taekinaki ao e oti bwa bon “Natin te aomata” Iesu ae te Uea. Te koraki ake a atongaki bwa ‘tarina’ bon taekaia aine ma mwane aika kabiraki ake a na tautaeka ma ngaia i karawa. (IRom 8:16, 17) A a tei “tiibu” ao “kooti” ibukia aomata man natannaomata nako ake te koraki aikai a aki kabiraki n te taamnei ae raoiroi. N ningai tain te motikitaeka? E na karaoaki te motikitaeka aei ni kaanin tokin te rawawata ae korakora ae imwaira. Bukin tera ngkai a na motikaki taekaia aomata nako bwa tao tiibu ke kooti? E na boto karaoan anne man aroia n akoiia tarini Kristo ake a maiu i aon te aba. Ai kukureira ngaira ngkai e a tia Iehova ni kaotaira n te kaikonaki aei ao aika taekinaki naba ni Mataio mwakorona 24 ao 25, e moamoa riki ngkai ti a uakaan ma tokin te waaki aei!

8, 9. Bukin tera ngkai a taekinaki tiibu bwa a “raoiroi”?

⁸ E aki taekina te uarongorongo Iesu n ana kaikonaki ae taekaia tiibu ma kooti. Ma bukin tera ngkai e kona n taekinaki bwa e katuruturuaki iai kakawakin te uarongorongo?

⁹ Te moan, ti riai n uringnga are e boto ana angareirei Iesu i aon te kaikonaki. E aki nanonna bwa a na kamaenakoaki tiibu ma kooti. N aron naba anne, e aki taekinna Iesu bwa e riai te aomata ae motikaki taekana bwa te tiibu ni karekea te amwarake, te kunnikai ke kawaran temanna mai buakoia tarina n te karabuuti. Ma e taekina aroaron te tiibu n te aro ni kaikonaki ae kaotiotaki nakoia tarina. E kabwarabwara ikai Iesu bwa a bon “raoiroi” tiibu ibukina bwa a kakaonimaki ni boutokaia tarini Kristo aika kabiraki ake a teimatoa ni maiu i aon te aba i nanoni kabaneani boong aika karuanikai.—Mat. 10:40-42; 25:40, 46; 2 Tim. 3:1-5.

10. A kangaa tiibu ni kaota te akoi nakoia tarini Kristo?

¹⁰ Te kauoua, iangoa raoi nanon ana taeka Iesu. E maroroakina kanikinaean okina ma tikuna ao tokin te waaki ae ngkai i aon te aba. (Mat. 24:3) E katerea Iesu ni moan ana kabwarabwara taekan te kanikina ae irekereke ma te bwai ae kakawaki, ae taekan te rongorongo ae raoiroi ibukin te Tautaeka n Uea are e na ‘tataekinaki n te aonnaba ni kabutaa.’ (Mat. 24:14) E kairekerekea taekan te kaikonaki ae te tarena imwaini maroroakinan taekaia tiibu ma kooti. N te kaongora are mai mwaina, e taekina te kaikonaki anne Iesu ni katuruturua iai taekaia taan rimwina aika kabiraki aika “tarina” ake a riai n ingainga n te mwakuri n uarongorongo. Mangaia are, a kaaitara ma te kataaki ae korakora nikiraia taani kabiraki aika i aon te aba ibukin tataekinan te rongorongo nakoia “botannaomata ni kabaneia” imwain rokon te toki, ae te tai are e a oki ma n tiku iai Iesu. E kaotaki n te kaikonaki ae taekaia tiibu ma kooti bwa a na buokaki taani kabiraki. Ngaia are te anga teuana ibukini kaotan te tangira nakoia tarini Kristo irouia te koraki ake a motikaki taekaia bwa tiibu, boni boutokaan te uarongorongo. Tera ngkanne ae irekereke ma karekean te boutoka anne? E irekereke iai tii katauraoani bwaai ao kabebetean te nano, ke e bati riki ae kainnanoaki?

11. Tera te titiraki ae kona n rio, ao bukin tera?

¹¹ Ni boong aikai, angiina mai i buakoia taan rimwini Kristo aika wanua te  mirion mwaitiia a bon aki kabiraki. E aki reke irouia te tarena are e anga Iesu nakoia ana toro aika kabiraki. (Mat. 25:14-18) E kona n rio te titiraki ae kangai: ‘A mwiokoaki naba n te uarongorongo te koraki ake a aki kabiraki?’ Rinanoi bukina tabeua ngkai ti kangai, eng.

12. Tera reireiara n ana taeka Iesu ni Mataio 28:19, 20?

¹² E mwiokoiia taan rimwina Iesu bwa a na uarongorongo. E tua Iesu nakoia taan rimwina imwini kautana bwa a na karekeia taan rimwina ao n reireinia “bwaai ni kabane” ake e tuangia. Teuana mai buakoni bwaai ake e tuangia, bon te mwioko ibukin te uarongorongo. (Wareka Mataio 28:19, 20.) Mangaia are, a riai taan rimwini Kristo ni kabane n uarongorongo n aki ongeia bwa tao a na tautaeka i karawa ke a na maiu i aon te aba.—Mwa. 10:42.

13. Tera te miitara are noria Ioane, ao bukin tera?

¹³ E kaotaki n te boki ae Te Kaotioti bwa e na karaoaki te uarongorongo irouia taani kabiraki ao tabemwaang. E anga te miitara Iesu nakon te abotoro Ioane ae taekan “te tia mare te aine,” are taekaia taani kabiraki aika 144,000 ake a na tautaeka ma Kristo i karawa, ao ni kaoia aomata nako bwa ane kan “anaa te ran ni kamaiu ao ke e anaia n akea boona.” (TeKao. 14:1, 3; 22:17) E tei te ran ibukin ana bwai n tituaraoi Iehova ae ana karea ni kaboomwi Kristo are e anga ibukini kamaiuaia aomata man te bure ao te mate. (Mat. 20:28; Ioa. 3:16; 1 Ioa. 4:9, 10) Te kaboomwi boni ngaia oin te rongorongo ae ti tataekinna, ao taani kabiraki bon taani kairiri aika buokiia aomata bwa a na karekei kakabwaiaaia mai iai. (1 Kor. 1:23) Ma n te miitara, ao Ioane e noriia te koraki ake tiaki buuni Kristo. A tuangaki naba bwa a na kangai, “Nakomai!” A teimatoa n ongeaba ao ni kaoia aomata bwa a na anaa te ran ni kamaiu. Te kauoua ni koraki aei a kantaningaa te maiu i aon te  aba. Mangaia are, e kaotaki n te miitara aei bwa te koraki ni kabane ake a butimwaea te kakao ae kangai, “nakomai” a mwiokoaki naba bwa a na uarongorongo nakoia tabemwaang.

14. Tera ae irekereke ma te ongeaba n “ana tua te Kristo”?

¹⁴ A riai ni bane n uarongorongo naake a kabaeaki i aan “ana tua te Kristo.” (IKar. 6:2) Titeboo ana kantaninga Iehova ibukia aomata aika taromauria bwa a na ongeaba n ana tua. Te katoto, e kangai nakoia tibun Iteraera: “Ti teuana te tua i bukin ane bungiaki i abami, ao i bukin naba te iruwa ae [e] maeka i buakomi.” (TeOti. 12:49, BG); NakIbo. 24:22) A a aki kabaeaki Kristian i aan ana tua Mote. Ma ti bane ni kabaeaki i aan “ana tua te Kristo” n aki ongeia bwa ti kabiraki ke ti aki. A boto ana reirei Iesu man te tua. Ana reirei Iesu ae rianako kakawakina are a riai ni kaotiotia taan rimwina bon te tangira. (Ioa. 13:35; Iak. 2:8) Te anga ae ti kona ni kaota iai tangiran te Atua, Iesu ao aomata nako, boni man tataekinan te rongorongo ae raoiroi ibukin te Tautaeka n Uea.—Ioa. 15:10; Mwa. 1:8.

15. Bukin tera ngkai e kona n taekinaki bwa e kaineti ana kaetieti Iesu nakoia taan rimwina ni kabane?

¹⁵ Ana taeka Iesu nakoia te koraki ae karako mwaitiia e kaineti naba nakoia aika mwaiti. Te katoto, e beritana te Tautaeka n Uea Iesu ma taan rimwina ake 11 mwaitiia, ma e boni kaineti raoi anne nakoia 144,000. (Ruka 22:29, 30; TeKao. 5:10; 7:4-8) N aron naba anne, e mwiokoia taan rimwina aika e karako mwaitiia ake e kaoti nakoia imwini kautakina bwa a riai n uarongorongo. (Mwa. 10:40-42; 1 Kor. 15:6) E ngae ngke e aki taetae Iesu nakoia taan rimwina ake n te moan tienture, ma a ataia bwa e kaineti naba te mwioko anne nakoia. (Mwa. 8:4; 1Bet. 1:8) Ni boong aikai, e aki taetae Iesu nakoia te koraki ae kaniia wanua te mirion mwaitiia ake a kakorakoraia n tataekina te Tautaeka n Uea. Ma a ataia bwa e kakawaki onimakinani Kristo n aroia ni kakaonimaki ni boutokaa te uarongorongo.—Iak. 2: 18.

16-18. A kangaa te koraki ake a na riki bwa tiibu ni boutokaiia tarini Kristo ao bukin tera bwa a riai ngkai ni karaoa aei?

¹⁶ E tabe Tatan ni buakania nikiraia tarini Kristo aika kabiraki i aon te aba, ao e na boni kakorakoraa riki buakanaia kioina ngkai e a “kimototo ana tai.” (TeKao. 12: 9, 12, 17) Ma a kakorakoraia taani kabiraki ni kaira te uarongorongo n aki ongea kaitaraaia iroun Tatan. Akea te nanououa bwa e boni memena Iesu ma ngaiia ao e teimatoa ni kaiririia.—Mat. 28:20.

¹⁷ A iangoia tiibu aika rikirake mwaitiia bwa bon te kakabwaia boutokaaia tarini Kristo tiaki tii n te uarongorongo ma n aanga n ibuobuoki riki tabeua. Te katoto, a anga aia mwane ibukini katean Taabo n Taromauri, ibukin te Runga, aobiti n tararua, ao aia kakaonimaki n ongeaba nakon aia kairiri taani kabiraki ae “te toro ae kakaonimaki ma ni wanawana”.—Mat. 24:45-47; Ebera 13:17.

¹⁸ E a kaan te tai are a nang kanakoaki iai aang aika urubwai irouia anera, are e nang moanaki iai te rawawata ae korakora. E na riki aio ngkana e a roko n tokina kanikinaeaia nikiraia tarini Kristo i aon te aba. (TeKao. 7:1-3) A na bane n nako karawa taani kabiraki imwain Aremaketon. (Mat. 13:41-43) Ngaia are, aei ngkai aia tai ni kakaonimaki ni boutokaiia tarini Kristo naake a kantaningaa motikan taekaia bwa tiibu.