1, 2. (a) Ano nga mga ilustrasyon ang ginsugid ni Jesus sa iya suod nga mga kaupdanan? (Tan-awa ang piktyur sa umpisa sini nga artikulo.) (b) Ano ang dapat naton mahibaluan sa ilustrasyon tuhoy sa mga karnero kag mga kanding?

SI Jesus nagapakig-istorya sa iya suod nga mga kaupdanan nga sanday Pedro, Andres, Santiago, kag Juan. Bag-o lang nila nabatian ang ilustrasyon tuhoy sa matutom kag mainandamon nga ulipon, sa napulo ka birhen, kag sa mga talanton. Gintapos ni Jesus ang ila pag-istoryahanay paagi sa isa pa ka parabola. Ginlaragway niya ang tion nga “ang Anak sang tawo” magahukom sa “tanan nga pungsod.” Nawili gid ang iya mga disipulo sa sini nga ilustrasyon! Ginpatuhuyan diri ni Jesus ang duha ka grupo, ang isa ka grupo subong mga karnero kag ang isa naman subong mga kanding. Kag ginpatalupangod niya ang ikatlo nga grupo nga ginpakilala niya subong “mga utod” sang “Hari.”—Basaha ang Mateo 25:31-46.

² Madugay na nga gusto mahibaluan sang katawhan ni Jehova ini nga ilustrasyon kag may rason gid sila, kay si Jesus nagahambal diri parte sa madangatan sang katawhan. Ginsugid niya kon ngaa ang pila makatigayon sang kabuhi nga wala sing katapusan samtang ang iban patyon sing dayon. Ang aton kabuhi nagadepende sa aton  paghangop kag pagpanghikot suno sa kamatuoran nga ginsugid ni Jesus. Bangod kabuhi naton ang nadalahig, dapat kita mamangkot: Paano amat-amat nga gin-athag ni Jehova ang aton paghangop sa sini nga ilustrasyon? Ngaa ginapadaku sang ilustrasyon ang importansia sang pagbantala? Sin-o ang ginsugo nga magbantala? Kag ngaa karon na ang tion nga mangin mainunungon kita sa “Hari” kag sa ginatawag niya nga ‘akon mga utod’?

3, 4. (a) Anong importante nga mga butang ang dapat naton mahibaluan agod mahangpan naton ang ilustrasyon tuhoy sa mga karnero kag mga kanding? (b) Sang 1881, paano ginpaathag sang Zion’s Watch Tower ini nga ilustrasyon?

³ Agod mahangpan sing husto ang ilustrasyon tuhoy sa mga karnero kag mga kanding, dapat naton hibaluon ang tatlo ka importante nga butang nga nadalahig sa parabola: kon sin-o gid ang mga karakter, kon san-o ang tion sang paghukom, kag ang rason kon ngaa gingrupo sila subong mga karnero ukon mga kanding.

⁴ Sang 1881, ginpaathag sang Zion’s Watch Tower nga si Jesus amo “ang Anak sang tawo,” nga gintawag man nga “Hari.” Nahangpan sang mga Estudyante sang Biblia sang una nga ang ekspresyon sa King James Version nga “akon mga utod” nagapatuhoy sa mga magagahom upod sa Cristo kag sa tanan nga katawhan sa duta nga napasag-uli na sa kahimpitan. Nagapati sila nga ang pagpain sa mga karnero gikan sa mga kanding mahanabo sa tion sang Isa ka Libo ka Tuig nga Paggahom sang Cristo. Kag nagapati sila nga ang tawo makabig subong mga karnero bangod ginsunod nila ang kasuguan sang Dios sa gugma.

5. Sang katuigan 1920, paano gin-athag ang aton paghangop?

⁵ Sang maaga nga bahin sang katuigan 1920, ginbuligan ni Jehova ang iya katawhan nga mahangpan sing maathag ini nga ilustrasyon. Ang The Watch Tower sang Oktubre 15, 1923, nagsiling nga si Jesus amo “ang Anak sang tawo.” Apang, ginpakita sini ang mabakod nga argumento sa Kasulatan nga ang mga utod sang Cristo nagapatuhoy lamang sa magagahom upod sa iya sa langit, kag ginlaragway sini nga ang mga karnero amo ang may paglaum nga magkabuhi sa duta sa idalom sang paggahom sang Ginharian sang Cristo. San-o naman ang tion nga painon ang mga karnero gikan sa mga kanding? Ang artikulo nagsiling nga ang mga utod sang Cristo magagahom upod sa iya sa langit sa Isa ka Libo ka Tuig nga Paggahom, gani indi sila mabuligan ukon mapabay-an sang dutan-on nga grupo. Gani ang pagpain sang mga karnero gikan sa mga kanding dapat mahanabo antes magsugod ang Isa ka Libo ka Tuig nga Paggahom. Tuhoy naman sa rason kon ngaa kabigon ang isa ka tawo subong karnero, nagsiling ang artikulo nga ang katawhan pagahukman sing subong sina bangod ginakilala nila si Jesus subong ila Ginuo kag nagalaum sila sa Ginharian nga amo ang makapaluntad sing mas maayo nga mga kahimtangan.

6. Sang 1995, paano gin-athag pa gid ang aton paghangop?

⁶ Bangod sina nga pag-athag, nagpati ang katawhan ni Jehova nga ang mga tawo ginhukman subong mga karnero ukon mga kanding sa pagsugod sang hingapusan sang sistema sang mga butang, depende sa ila reaksion sa mensahe sang Ginharian. Apang sang mga 1995, gin-athag pa gid ang aton pagtamod. Ang duha ka artikulo sa Oktubre 15, 1995, nga Ang Lalantawan nagpatalupangod sa pagkaanggid sa ginsiling ni Jesus sa Mateo 24:29-31 (basaha) kag sa Mateo 25:31, 32. (Basaha.) * Ano ang ginapakita sini? Ang artikulo nagsiling: “Ang paghukom sa mga karnero kag mga kanding mahanabo pa sa palaabuton.” San-o gid ini? “Mahanabo ini  pagkatapos magsugod ang ‘kapipit-an’ nga ginsambit sa Mateo 24:29, 30 kag ang Anak sang tawo ‘magakari sa iya himaya.’ . . . Nian, sa katapusan sang bug-os nga malauton nga sistema, si Jesus magadumala sang hukmanan kag magahatag sing paghukom.”

7. Ano ang maathag nga paghangop naton karon?

⁷ Sa karon, nahangpan naton sing maathag ang ilustrasyon tuhoy sa mga karnero kag mga kanding. Tuhoy sa ginsambit nga mga karakter, si Jesus amo “ang Anak sang tawo” kag ang Hari. Ang ginpatuhuyan nga ‘akon mga utod’ amo ang hinaplas sa espiritu nga mga lalaki kag mga babayi, nga magagahom sa langit upod sa Cristo. (Roma 8:16, 17) Ang “mga karnero” kag ang “mga kanding” nagarepresentar sa mga tawo halin sa tanan nga pungsod. Ini sila wala ginhaplasan sang balaan nga espiritu. San-o naman ang tion sang paghukom? Ini nga paghukom mahanabo sa katapusan nga bahin sang nagahilapit nga dakung kapipit-an. Kag ano naman ang rason kon ngaa hukman ang katawhan subong mga karnero ukon mga kanding? Nagadepende ini sa kon paano nila ginapakig-angutan ang nabilin sa duta nga hinaplas sang espiritu nga mga utod sang Cristo. Bangod malapit na gid kita sa katapusan sining sistema, nagapasalamat gid kita nga amat-amat nga gin-athag ni Jehova ini nga ilustrasyon kag ang mga ilustrasyon may kaangtanan sa sini nga narekord sa Mateo kapitulo 24 kag 25!

8, 9. Ngaa ginlaragway ang mga karnero subong “matarong”?

⁸ Sa ilustrasyon tuhoy sa mga karnero kag mga kanding, wala ginsambit sing direkta ni Jesus ang pagbantala. Kon amo, ngaa masiling nga ginapadaku sini ang importansia sang pagbantala?

⁹ Una, dumduma nga si Jesus nagatudlo paagi sa isa ka ilustrasyon. Maathag nga wala sia nagahambal parte sa pagpain sang literal nga mga karnero kag literal nga mga kanding. Subong man, wala sia nagasiling nga ang tagsa ka tawo nga ginhukman nga mga karnero dapat literal nga magpakaon, maghatag sing bayo, mag-atipan, ukon magbisita sa iya mga utod sa prisuhan. Sa baylo, ginailustrar niya ang panimuot sang malaragwayon nga mga karnero sa iya mga utod. Ginalaragway niya ang mga karnero subong “matarong” bangod ginakilala nila nga ang Cristo may grupo sang hinaplas nga mga utod nga yari pa sa duta, kag mainunungon nga ginasakdag nila ang mga hinaplas sa sining tion sang makahalanguyos nga katapusan nga mga adlaw.—Mat. 10:40-42; 25:40, 46; 2 Tim. 3:1-5.

10. Paano mapakita sang mga karnero ang kaayo sa mga utod sang Cristo?

¹⁰ Ikaduha, binagbinaga ang konteksto sa ginsiling ni Jesus. Ginabinagbinag niya ang tanda sang iya presensia kag ang hingapusan sang sistema sang mga butang. (Mat. 24:3) Sa iya ginhambal antes sini, ginpakita ni Jesus nga ang tanda magalakip sang talalupangdon nga bahin—ang maayong balita sang Ginharian “ibantala sa bug-os nga duta.” (Mat. 24:14) Kag antes niya ginsaysay ang tuhoy sa mga karnero kag mga kanding, ginsugid niya ang ilustrasyon tuhoy sa mga talanton. Subong sang ginbinagbinag sang nagligad nga artikulo, ginsugid ni Jesus ina nga ilustrasyon agod ipadaku sa iya hinaplas sang espiritu nga mga disipulo, nga amo ang iya “mga utod,” nga dapat sila mangin makugi sa pagbantala. Apang, ang gamay nga grupo sang mga hinaplas nga nabilin sa duta sa tion sang presensia ni Jesus may daku nga hilikuton—ang pagbantala “sa tanan nga pungsod” antes mag-abot ang katapusan. Ang ilustrasyon tuhoy sa mga karnero kag mga kanding nagapakita nga may magabulig sa mga hinaplas. Gani, ang isa sa panguna nga paagi nga ang ginhukman nga mga karnero makapakita sing kaayo sa mga utod sang Cristo amo ang pagsakdag sa ila sa pagbantala. Apang, ano ang nadalahig sa sina nga pagsakdag? Bastante na bala ang paghatag sa ila  sing materyal nga bulig kag lugpay, ukon may kapin pa sa sini?

11. Ano nga pamangkot ang mahimo mag-utwas, kag ngaa?

¹¹ Sa karon, ang kalabanan sa walo ka milyon ka disipulo ni Jesus indi hinaplas sang espiritu. Wala sila nakabaton sang mga talanton nga ginhatag ni Jesus sa iya hinaplas nga mga ulipon. (Mat. 25:14-18) Gani ang pamangkot amo, ‘Ang sugo bala nga magbantala maaplikar man sa mga wala ginhaplasan sang balaan nga espiritu?’ Binagbinaga ang pila ka rason kon ngaa huo ang sabat sa sini.

12. Ano ang aton matun-an sa ginsiling ni Jesus sa Mateo 28:19, 20?

¹² Ginsugo ni Jesus ang tanan niya nga disipulo sa pagbantala. Sang nabanhaw si Jesus, ginsilingan niya ang iya mga sumulunod nga maghimo sing mga disipulo, kag tudluan sila nga “tumanon ang tanan nga ginsugo” niya. Lakip sa sini nga sugo amo ang pagbantala. (Basaha ang Mateo 28:19, 20.) Gani, ang tanan nga disipulo sang Cristo dapat magbantala, may paglaum man sila nga maggahom sa langit ukon magkabuhi sa duta.—Binu. 10:42.

13. Ano ang ginapakita sang palanan-awon nga nakita ni Juan, kag ngaa?

¹³ Ang libro sang Bugna nagapakita nga ang pagbantala himuon sang mga hinaplas kag sang iban pa. Ginpakita ni Jesus kay apostol Juan ang isa ka palanan-awon tuhoy sa “nobya,” nga amo ang 144,000 ka hinaplas nga tawo nga magagahom upod sa Cristo sa langit, kag nagaagda sa mga tawo nga “magkuha sang tubig sang kabuhi nga wala sing bayad.” (Bug. 14:1, 3; 22:17) Ining simbuliko nga tubig nagarepresentar sa mga aman ni Jehova para mahilway ang katawhan gikan sa sala kag kamatayon pasad sa halad gawad sang Cristo. (Mat. 20:28; Juan 3:16; 1 Juan 4:9, 10) Ang gawad amo ang panguna nga mensahe nga aton ginabantala, kag ang mga hinaplas amo ang nagapanguna sa pagbulig sa mga tawo nga makatuon kag makabenepisyo sa sini. (1 Cor. 1:23) Pero sa  palanan-awon, nakita ni Juan ang iban nga indi bahin sang nobya. Ginsugo man sila nga magsiling, “Kari!” Gintuman nila ini kag nangagda sila sa iban nga magkuha sing tubig sang kabuhi. Ining ikaduha nga grupo amo ang may paglaum nga magkabuhi sa duta. Gani, ginapakita gid sa sini nga palanan-awon nga ang tanan nga nagbaton sang pangagda nga “kari” may responsibilidad nga magbantala sa iban.

14. Ano ang nalakip sa pagtuman sa “kasuguan sang Cristo”?

¹⁴ Ang tanan nga napaidalom sa “kasuguan sang Cristo” dapat magbantala. (Gal. 6:2) Isa lang ang talaksan ni Jehova. Halimbawa, ginsilingan niya ang mga Israelinhon: “Pareho lang ang kasuguan para sa tumandok kag sa dumuluong nga nagaistar sa tunga ninyo.” (Ex. 12:49; Lev. 24:22) Ang mga Cristiano wala napaidalom sa Mosaikong Kasuguan. Apang kita tanan, mga hinaplas man ukon indi, napaidalom sa “kasuguan sang Cristo.” Ina nga kasuguan nagalakip sang tanan nga gintudlo ni Jesus. Ang panguna sa mga panudlo ni Jesus amo nga ang iya mga sumulunod dapat magpakita sing gugma. (Juan 13:35; Sant. 2:8) Kag ang isa sa panguna nga mga paagi nga mapakita naton ang aton gugma sa Dios, sa Cristo, kag sa aton isigkatawo amo ang pagbantala sang maayong balita sang Ginharian.—Juan 15:10; Binu. 1:8.

15. Ngaa masiling nga ang sugo ni Jesus maaplikar sa tanan niya nga sumulunod?

¹⁵ Ang ginhambal ni Jesus sa gamay nga grupo maaplikar man sa daku nga grupo. Halimbawa, nakigkatipan si Jesus para sa Ginharian sa 11 lang ka disipulo, pero ina nga katipan maaplikar man sa tanan nga 144,000. (Luc. 22:29, 30; Bug. 5:10; 7:4-8) Sing kaanggid, nagpakita si Jesus sa gamay nga grupo sang iya mga sumulunod sa tapos sia mabanhaw kag sila lang ang ginsugo niya nga magbantala. (Binu. 10:40-42; 1 Cor. 15:6) Apang ang tanan niya nga matutom nga disipulo sang unang siglo nakahibalo nga dapat nila tumanon ina nga sugo, bisan wala nila nabatian sing personal ang ginsiling ni Jesus. (Binu. 8:4; 1 Ped. 1:8) Sa karon, wala man ginsilingan ni Jesus sing personal ang walo ka milyon nga aktibo nga manugbantala sang Ginharian. Pero nahibaluan sang tanan nga may obligasyon sila nga magtuo sa Cristo kag ipahayag ina nga pagtuo paagi sa pagpanaksi.—Sant. 2:18.

16-18. Paano masakdag sang potensial nga mga karnero ang mga utod sang Cristo, kag ngaa dapat nila ini himuon karon?

¹⁶ Nagapakig-away si Satanas sa hinaplas nga mga utod sang Cristo nga nabilin sa duta, kag ginapabaskog niya ang iya pagsalakay bangod “malip-ot na lamang ang iya tion.” (Bug. 12:9, 12, 17) Walay sapayan nga ang hinaplas nagabatas sang grabe nga pagtilaw, ginapangunahan nila ang pinakalapnag nga kampanya sa pagbantala. Pat-od gid nga kaupod nila si Jesus, nga nagatuytoy sa ila mga hilikuton.—Mat. 28:20.

¹⁷ Para sa nagadugang nga kadamuon sang potensial nga mga karnero, isa ka pribilehiyo nga sakdagon ang mga utod sang Cristo indi lang sa pagbantala kundi sa praktikal man nga mga paagi. Halimbawa, nagaamot sila sing kuarta kag nagabulig sa pagpatindog sing mga Kingdom Hall, Assembly Hall, kag pasilidad sang sanga, kag matutom nila nga ginatuman ang gintangdo sang “matutom kag mainandamon nga ulipon” nga manguna sa ila.—Mat. 24:45-47; Heb. 13:17.

¹⁸ Sa indi madugay buy-an na sang mga anghel ang hangin sang kalaglagan sa tion sang dakung kapipit-an. Matabo ini sa tapos nga ang tanan nga nabilin nga utod sang Cristo sa duta makabaton na sang katapusan nga pagmarka sa ila. (Bug. 7:1-3) Antes sang Armageddon, ang mga hinaplas dal-on sa langit. (Mat. 13:41-43) Gani, karon na ang tion nga sakdagon sing mainunungon sang mga nagalaum nga mahukman subong mga karnero ang mga utod sang Cristo.